Keluaran 32: 7-14 Khotbah Minggu 6 Mei 2018 (Rogate)

Evangelium : Keluaran 32:7-14
“Marsihohot dibagasan tangiang”
I. Patujolo
Gok asi ni roha jala parholong roha do ianggo Jahowa Debatata i. Dipatuduhon Ibana do asi ni rohaNa tu Bangso Israel naung tartaban nasida 400 taon lelengna di Misir. Pola do bernit, paet, jala porsuk do parniahapan ni bangso i dibahen raja ni halak Misir i. Joujou do bangso Israel huhut marhuraja do nasida dompak Tuhan i, maimaima do nasida nang dipanogunoguon ni Ibana asa haru malua nasida nian sian dokdokni sitaonon nasida. Dibagasan bukku 2 Musa 3:7-10 dibaritahon do songon dia sangkap ni Tuhan i laho paluahon bangsoNa i sian auga parhatobanon di Misir. Dipillit Debata do ianggo si Musa laho manguluhon bangso Israel haruar sian Misir. Pola do dipapatar Debata hagogoonNa i laho marmahani bangso Israel, huhut dipatuduhon Debata do holong ni rohaNa laho paradehon angka na porlu jala na ringkot diangka haporluon nasida dipardalanan nasida sahat tu huta Kanaan. 40 taon lelengna bangso Israel diparmudumudu Tuhanta diparhorsihani. Ditogihon Ibana do bangsoNa i marhite si Musa bongot tu dolok Sinai, ima dinalaho manjalo patik na sampulu i na gabe tanda hot ni padan na pinatupa ni Debata maradophon bangso Israel, jala ianggo patik na sampulu i na gabe sulusulu na sian Debata do tu bangso Israel asa marparangehon na hombar nasida tu guru lomo ni roha ni Debata. Alai, ditingki nangkok si Musa tu Dolok Sinai, ndang boi dirajai bangso Israel diri nasida, pola do gabe disangkapi roha nasida laho patupahon Debata sisombaon nasida sian angka sere, perak na adong dinasida gabe sada ganaganaan marrupahon sada patung lombu. On ma tutu na gabe sada na so hinalomohon ni roha ni Debata, gabe mambahen tarrimas Debata tu bangsoNa i.
II. Isina
Dibagasan bukku 2 Musa bindu 32 on dibaritahon do songon dia parange ni bangso Israel na sai olo marungutungut tu adopan ni Debata. Alani ungutungut nasida gabe ndang harajaan nasida be dirina gabe dipatupa ma sisombaon na gabe tujuan ni pamelean nasida. Diparsoada nasida do ditingki i hadirion ni Debata, pola do dang dipaima nasida si Musa tuat sian dolok Sinai. Tarrimas ma Tuhanta umboto pangalaosion ni bangsoNa i. Dibagasan bukku 2 Musa 32:7-14 on dibaritahon do songon dia rimasni Debata jala dipabotohon do tu si Musa sangkap hamagoan na naeng pamasaonna tu bangsoNa i. Alai, didodo si Musa do ianggo asi ni roha ni Jahowa Debatata i, martangiang do si Musa tu adopan ni Debata jala marpangidoan do ibana asa marningot Tuhan Debatata i dipadan naung niuarihonNa tu angka ompu ni bangso Israel, ima si Abraham dohot si Ishak. Dibagasan ayat 7-10 dipataridahon Tuhanta do songon dia bangko ni bangso Israel na tagonan manomba debata ganaganaan na binahen nasida, marhite sangkap hamagoan nasida i gabe diparsoada nasida Tuhan Debata pargogo naso hatudosani. Dipelehon nasida do angka pelean situtungon tu debata ganaganaani. Satongkin do ditadingkon di Musa luhutan bangso na bolon i, hape nunga gok haurahon pangalaho nasida. Alai, dibagasan ayat 11-13 dipatorang do songon dia si Musa mangelekelek jala mandodo rohani Jahowa Debatata i, ima asi ni rohaNa dohot hasatiaonNa di padanNa binahenNa i tu bangsoNa. Nda tung dohonon ni halak Misir ma songon on, “nunga dipalua Jahowa Debata bangsoNa i, hape na laho bunuon jala ripashononna nasida”. Dibaheni, didok si Musa ma asa marpangulahi roha ni Jahowa Debatata i, asa marpamuati ma Debata taringot tu jea na naeng pasonggoponNa tu bangsoNa i. Jadi, marpamuati ma tutu roha ni Jahowa Debatata i tu bangso Israel alani holong ni rohaNa dohot asi ni rohaNa na balga i. Alani ima, adong do impola ni jamita on dibagasan parngoluonta di tingki on, ima:
Ndang jadi marungutungut parngoluonta dompak Tuhan Debata ia molo tung pe dang na sai ingkon saut saluhutna na tapareahi dibagasan ngolunta siganup ari. Alai, ingkon rade do hita dibagasan hasatiaon managam asiasi ni Debata, huhut marpanghirimon na mangolu tu Ibana.
Unang ma tapangasahon gogo dohot pingkiranta mangadopi angka hisaphisap ni pardagingonta, alai ingkon haporseaonta tu Debata do na tapangasahon asa unang tarsulandit hita dipardalan ni ngoluntaon.
Tajugulhon ma martangiang jala tagogohon mangido tu Tuhanta diangka asi ni rohaNa i, asa marpangulahi Tuhan Debata diangka pangalaosionta naung taulahon dibagasan ngoluntaon.
Parasiroha jala pardengganbasa do ianggo Jahowa Debatata i, satia jala hot do Ibana dipadanNa i. Alani ima, dijou Tuhanta i do hita saluhutna asa marhamubaon ni roha hita huhut mangolu dibagasan parange na imbaru na marguru tu lomo ni roha ni Debata.
III. Panutup
Songon tema ni jamita di Minggu Rogate on, didok do asa “Marsihohot dibagasan tangiang”. Antong, tarjou do hita saluhutna angka na porsea laho pahothon haporseaonta tu Tuhan Debata, asa tongtong hita marsitutu manghaporseai Ibana, benget mandalani ngolunta siapari dibagasan las ni roha, huhut tapajonok jala tapasolhot ngolunta on tu Tuhani dibagasan tangiangta. Dibagasan bukku Jakobus 5:16b didok do, “Na margogo situtu do tangiang ni partigor, molo dihaburjuhon”. Antong, tahaburjuhon ma martangiang dibagasan haporseaon na mangolu diadopan ni Jahowa Debatata i