Khotbah Keluaran 33: 1-6

Minggu 5 Set. Epiphanias; 10 Pebruari 2019

Evangelium: 2 Musa 33 : 1 – 6

(Oloi ma Tuhan i jala Pauba Roham)

Sada barita bolon do parmulak ni bangso Israel sian Misir di buku Padan na Robi. Ai dipabotohon disi, saluhut holan ala ni hagogoon ni Debata do na mamboan nasida ruar sian parhatobanan di Misir. Somal do dapot hita pandohan “dung i ro muse hata ni Jahowa” songon sada “formula utusan” na gabe sada legitimasi (pahothon) paboa tutu situtu do hata ni Debata, ndada hatahata ni jolma, isarana hata ni si Musa sambing. Didok tu nasida, laho ma ho, borhat sian on. Pandohan on martudutudu tu pangalaho di Masa, ima udut ni pardalanan ni bangso Israel sian Dolok Sinai manuju tano Kanaan. Ndang holan parenta ro sian Debata, ai didok Ibana: Husuru pe suruangKu manguluhon ho. Bagas do pangalapation dohot panginona ni pandohan on. Siala pardosaon ni bangso Israel, na dipangido bangso i tu si Aron, asa mambahen debata ganaganaan sian sere (anak lembu emas) na laho manguluhon nasida (2 Musa 32), alani pambahenan ni bangso i tu Debata ndang apala Debata be adop bohi manguluhon bangso i. Alai nang pe songon i, umbalga do asi ni roha ni Debata sian rimasNa. Alani i, tongtong do marpangulahi roha ni Debata marhite na tongtong rade manguluhon dohot mandongani nasida, nang pe marhite suruanNa.

Udut ni i didok, Ibana pe manogihon ham utu tano habaoran ni susu dohot situak ni loba. Pandohan on padamoshon sangkap pardalalan nasida. Tano Kanaan naung niuarihon Debata pasahatonNa tu nasida ima tano parmianan nasida, inganan nasida ditopa jala diparade. Hajongjongan ni tano on di ngolu ni bangso Israel ndang boi idaon jala peakhonon nasida songon sada ugasan sambing, alai marpardomuan do i tu hajongjongan nasida songon bangso ni Debata. Dohot pandohan na asing, si sada ihot do tano I dohot hadirion nasida songon bangso ni Debata. Boha do bangso i mangangkupi hata ni Debata? Di ayat 4 didok, Dung dibege bangso i hata na koras i gondok ma roha nasida. Boasa didok bangso Israel hata ni Debata gabe hata na koras? Ala sian panatapan ni bangso Israel, uhuman do nasida di naso adop bohi Debata dohot nasida. Alani i do “gondok roha nasida”. Sasintongna, roha na gondok on marpardomuan do tu ganggu dohot biar ni roha nasida manguduti pardalalan so dibagasan panguluhonon ni Debata na adop bohi nasida. Sian i boi idaonta, hagaleon ni haporseaon nasida do manginsonbut. Dipatuduhon nasida gondok ni roha i marhite na so adong nanggo sahalak na mamangke paheanna hian. Hasomalan do on di tongatonga ni bangso Israel laho patuduhon arsak dohot habot ni roha.

Alai, boha do Debata mangalusi parange ni bangso i? Didadap Debata do roha ni bangso i. Alani do didok: Bangso na tangkang marroha do hamu, nanggo satongkin Ahu nangkok di tongatongamuna, ingkon siaphononKu do hamu. Pandohan on manudu tu pangalaho dohot parulaon ni bangso Israel nasailaon. Debata do mamillit, paruarhon sian parhatobanan Misir, marmudumudu di parhorsihan, alai sai tong do tangkang roha nasida. Aha pola ringkotna on ditudu? Anggiat dapot di bangso i panandaon diri dohot pangokuon di angka dosa dohot pangalasion. Alani i do umbahen ditanggali halak Israel pahean nasida mandaodao sian Dolok Horeb. Diigil Debata sian nasida panandaon diri dohot pangongkuon di dosa pangalaosion. Borhat sian rumang ni ngolu si songon i, hirimon a dapot muse arsak na sintong na mamboan tu ngolu na sintong. Angkup ni hasomalan hatiha i na mananggali pahean patudu habot ni roha, diurupi pangalaho i do nasida ro marsomba tu adopan ni Debata. Boasa? Adong hasomalan hatiha i mamangke angka pahean laho marsomba tu angka debata sileban. Asa na ditanggali nasida paheanna, mangurupi nasida do i pahibulhon roha laho pajamothon hapolinon ni haporseaon dohot hapolinon ni parsombaon tu Debata.  

Minggu Ephipanias, lapatanna hapapatar. Sian pangalapation i boi ma taida na di paandar manang dipapatar Debata do diriNa di tongatonga ni ngolu saluhut jolma na tinompaNa na porsea di Ibana. borhat sian pangantusion i tangkas ma taida pambahenan ni Debata, na mangula di saluhut pardalanan ni ngolu ni bangsoNa naung patuduhon hapapatarNa di portibi on. Dohot pandohan na asing, ditanda Israek do Debata sian pambahenanNa. Ditanda bangso Israel do Debata na mangula mamboan nasida ruar sian Misir manuju Kanaan. Alani, tatanda ma Debata sian pambahenaNa di saluhut pardalanan ni ngolunta. Debata do na mamboan hita ruar sian gambo lisop ni dosa i jala bongot tu ngolu na imbaru, ngolu na badia, ngolu na hombar tu lomo ni roha ni Debata.

Paduhaon, parsiajaran na arga sian turpuk on ima las ma roha manjalo barita na uli di haradeon ni Debata na tongtong manguluhon hita di saluhut pardalanan ni ngolunta. Dipasunggulhon jamita on do hita, paboa tongtong rade Debata manjangkon haroronta. Umbalga do asi dohot denggan basaNa sian rimasNa. Antong, tung olo ma hita mananggali paheanta dalan patimbulhon roha laho pajamothon hapolinon ni haporseaon dohot hapolinon ni parsombaonta holan tu Debata, unang ma marlaok haporseaon dohot parsombaonta tu Debata. Jotjot suman tu Israel do pambahenanta maradophon Debata na giotan hita mambahen debata ganaganaan. Ndang hibul taoloi jala tahaporseai Debata. Alani marhite jamita on asa taoloi ma Tuhan i jala tapauba ma rohanta.