Khotbah 1 Korintus 1: 18-25

Minggu Septuagesima; 17 Pebruari 2019

1 Korint 1 : 18 – 25 (Debata do Haroroan ni nasa Habisuhon)

Jotjot do suhar di roha ni nadeba jolma pambahenan ni Debata. Maol tarjalo rohana angka na masa di parngoluanna. Maol diantusi rohana sangkap dohot holong ni Debata di ngoluna. Tarlumobi molo angka na masa i ndang hombar songon na di pingkiran nang di rohana. I do na masa tu torop halak Jahudi dohot halak Gorik di tingki panuratan ni surat 1 Korintus on. Maol tarjalo nasida barita taringot tu silang ni Jesus i. Maol siat tu roha nasida, na ingkon marhite silang i do dipillit Jesus dalan laho paluahon jolma manisia. Andul asing do hadirion ni Mesias na dihirim halak Jahudi marhite hadirion ni Jesus. Sian na robi nunga suan di tonga-tonga nasida sada panghirimon taringot tu haroro ni sahalak Mesias, sian pomparan ni si Daud, na gabe Sipalua nasida.

Jotjot do gabe partuktuhan angka ulaon ni Jesus di roha ni deba halak Jahudi. Tung mansai jotjot do maol tarjalo nasida angka pangajarion ni Jesus. Alani i piga-piga hali sai dilului nasida do dalan laho mangunjuni Jesus alai ndang jumpangsa. Alani i do dipangido nasida do asa dipatupa Jesus tanda halongangan laho papatarhon hamuliaon dohot huasoNa (Mat. 12: 38; 16: 1), paboa na sintong do angka hata nang pangajarionNa, paboa na tutu do Ibana Anak ni Debata, na tutu do Ibana Mesias na pinaimaima i. sasintongna pangidoan i ndang marharoroan sian roha na bulus laho manghaporseai Jesus, alai tung ala hinamaol ni roha dohot pingkiran nasida do laho mangjanghon Jesus. Asa gabe partuktuhan do barita taringot tu silang ni Jesus i di roha ni halak Jahudi. Ai sipalua do na hinirim nasida, ndada jolma na olo marsiak bagi jala na olo tarsilang manghophop jolma pardosa, ndada jolma na hona bura. Ai tangkas do tarsurat di Padan na Robi paboa sada uhum na borat situtu do silang i. Di 5 Musa 21: 22-23 tangkas didok: “Tung sura manang ise mambahen dosa, umbahen patut ibana marutang hosa, gabe saut ibana tarbunu, pola targantung ibana tu hau. Ndang jadi pola sanga marborngin bangkena i gantung dihau i….ai na hona bura n Debata do halak na targantung.” Pangantusion si songon on ma na diantusi halak Jahudi taringot tu hamatean di hau pinarsilang i. Jorbut situtu do i jala haleaon huhut bura do hamatean si songon i. Jala halak na mate di hau pinarsilang i ma halak na hona buran i Debata. I do diantusi nasida, jala ndada holan halak Jahudi na maol manjalo barita taringot tu silang i. Halak Gorik pe mansai maol do manjalosa, ai uhum na borat do i na pinamasa tu angka parjahat na sumalim.

Alani i maol situtu do halak Jahudi dohot halak Gorik laho manjalo sangkap ni Debata paluahon jolma marhite hau pinarsilang i. maol tarjalo nasida, silang i gabe dalan haluaon. Ai gari palua diriNa sian silang (sian sitaonon na borat i dohot sian hamatean) ndang talup Ibana, boha ma nasida boi manghirim asa Ibana paluahon nasida? Suhar do tutu silang i, jala haotoon do i di roha ni angka na so tumanda dalan dohot sangkap ni Debata. I do umbahen na didok di Jesaya 55: 8-9 “Ai ndada pingkiranku pingkiranmuna i, jala ndada dalanmuna angka dalanku, ninna Jahowa. Ai songon timbo ni angka langit sian tano on, songon i do tumimbo angka dalanku sian dalanmuna i, jala angka pingkiranku sian pingkiranmuna i.” Dao tumimbo pingkiran dohot dalan ni Tuhan i, andul sumurung sian pingkiran ni jolma. Alani i, ndang talup pingkiran ni jolma laho mangantusi dalan ni Tuhan i. Ndang talup bisuk ni jolma dohot bisuk ni portibi on gabe ojahan laho mangantusi dalan ni Tuhan i. Na pistar dohot na malo di portibi on ndang tuk laho manangkasi dalan dohot sangkap ni Tuhan i di ngoluna nang di potibi on, molo ndang adong haporseaon dohot roha na manghabiari Jahowa. Ai tangkas do didok di Poda 1: 7 “Biar mida Jahowa do parmulaan ni parbinotoan.” Asa haporseaon dohot roha na marhabiaran di adopan ni Debata do na mangungkap dalan laho mangantusi sangkap ni Debata di ngolu ni jolma. Jala haporseaon i do dalan mangantusi dohot manjalo haluaon marhite silang ni Jesus i.

Alani i, ditogihon jamita on do hita asa lam togu haporseaonta tu Tuhan Jesus i. Ai ndang tarjalo hita barita taringot tu silang ni Jesus i molo ndang porsea hita tu Ibana. Ai haotoon jala pargasipan do silang ni Jesus i di angka na so olo porsea. Marhite haporseaon i boi ma ditogutogu hita marnida jala mangantusi bisuk dohot hagogoon ni Debata, mangantusi sangkap ni Debata paluahon jolma marhite silang ni Jesus. Jala marhite silang i do dipatupa Jesus haluaon tu angka na porsea. Ai ndang tarsirang barita silang ni Jesus i sian barita haheheon ni Jesus. Ai ndada holan dibondut hamatean i, alai laos uduut muse disolukhon hamonangan i. Alani i, naeng ma tangkas taantusi, nang pe songon dalan haotoon di rohanta dalan ni Debata (suhar di roha nang pingkiranta), alai andul do sumurung bisuk ni Debata sian bisuk ni jolma jala sumurung sangkap, pingkiran dohot dalan ni Debata sian sangkap, pingkiran dohot dalan ni hita jolma. Alani i, molo suhar pe di rohanta angka na masa di ngolunta, naeng tongtong marsihohot hita manghaporseai Tuhan i, unang pintor mandele hita jala sumurut hita sian joloNa. Ai hasonangan do disangkapi Debata di ngolunta, ndada sangkap hamagoan (Jeremia 29: 11). Ra hita pe sipata suhar do di roha nang pingkiranta, molo taadopi angka hamaolon dohot parungkilon na borat hape denggan do parsaoranta dohot Debata. isarana, ringgas marminggu, ringgas hita martangiang. Alai taingot ma: Hanya pohon yang tinggi yang diterpa angina kencang dan hanya buah yang baik dan manis sering dilempari batu untuk mengambilnya. Alani i, manang aha pe na masa di ngolunta, sai tongtong ma tapasahat dirinta tu Ibana na tuk mangurupi jala mangaramoti hita marhite habisuhonNa na sumurung i.