Khotbah 2 Timotius 1: 6-12

2 Timoteus 1: 6-12; Minggu XIX Set. Trinitatis 04 November 2018

(Paratarata ma Silehonlehon ni Debata na Sahat tu Ho)

Di partingkian si nuaeng on, lam torop do jolma na giot rohana patuduhon kemampuan dohot bakat na adong di ibana. marhapataran do i marhite na lam martamba angka kegiatan mencari bakat, isarana program Indonesian Idol, American Got’s Talent, Idola Cilik, dohot lan angka na asing. Torop do jolma na mandohotisa. Torop do nang hita marnidasa di televise jala dohot do hita mendukung nasida marhite na mambahen manang mangkirim sms tu nasida. Marhite i boi ma idaonta ragam ni angka talenta/bakat na adong di jolma. Adong do na malo marende, melukis, marmusik, marlawak, dohot lan angka na asing. Molo pinaihutihut angka na masa i dapot do antusan, berproses do ngolu on. Talup do nasida patuduhon bakat dohot kemampuanna na boi mambahen hita longang jala tarhatotong, ala di dalani nasida sada proses laho pahembanghon dohot manghangoluhon talenta na adong di nasida be. Jadi silehonlehon ni Tuhan na dipasahat tu hita patut do tahembanghon i.

Saluhut silehonlehon ni Debata patut do taulahon asa marparbue, mangomo jala lam mangerbang. Molo ndang diulahon, ingkon unsaton do i sian hita jala luangan ma hita. Alani do umbahen na gomos dipaingot si Timoteus asa diparatarata silehonlehon ni Debata naung dipasahat tu ibana, asa unang diunsat, asa unang luangan ibana, jala tarlumobi asa lam hembang, lam marlapatan, jala lam marguna silehonlehon i gabe pangomoan, na paro silas ni roha dohot pasupasu di ngolu ni huria, gabe dalan pasangap Debata, gabe dalan marbarita nauli. Ringkot situtu do sipaingot on dipasahat tu si Timoteus, ala tongon tingki i tung godang do hamaolon na diadopi halak Kristen, termasuk na niadopan ni si Timoteus dohot apostel Paulus. Ro do angka parpoda haliluon tu huria i na mangelaela dohot mangharhari haporseaon ni ruas ni huria i. Ro muse do angka panggosagosa dohot angka na mangalelei halak Kristen, gariada tahe naeng do buaton nasida hosa ni halak Kristen asa mate ma nang hakristenon i, i do ditahi rohanasida. Lam manggogo do portibi on manggosagosa huria i. Alani i ringkot situtu si Timoteus laho paratarata silehonlehon ni Debata na tu ibana, asa unang mabiar, unang gale jala unang mandele si Timoteus nang ruas ni huria mangadopi hamaolon bolon i. Asa unang sumurut sian haporseaon tu Tuhan Jesus i. Asa adong habaranion dohot gogo laho mangadopisa. Asa hot haporseaon nasida tu Tuhan i jala hot nasida laho marbarita nauli. Ai tangkas do dipatorang di turpuk on: “Ai dilehon Debata do tondi hagogoon, tondi haholongon dohot tondi pangarajaion diri”. Ndada holan tu si Timoteus dohot ruas ni huria na parjolo dipasahat silehonlehon i. Nang tu hita pe angka na porsea tu Tuhan Jesus di partingkian nuaeng on, parjambar do nang hita di silehonlehon i jala nang tu hita pe sahat do hata sipaingot on, asa taparatarata silehonlehon na sahat tu hita.

Marhite hagogoon na sian Tuhan i tarpatupa hita do panghobasion di jolo ni Tuhan i, ima laho manghatindanghon Tuhan i jala manghophop barita nauli. Songon halak Kristen dohot do nang hita tarjou pararathon barita nauli di ngolunta marhite ulaonta na marragam i. dipillit jala ditongos do nang hita gabe sitindangi ni Kristus tu portibi on. Ai surat ni Kristus do hita na boi jahaon ni saluhut halak asa gabe ditanda torop halak Kristus i marhite ngolunta. Ndang na mura mangulahon i. Godang do tantangan. Ndang mura manghatahon hasintongan, ai jotjot do gabe sisogo angka parhata na sintong. Godang nari tantangan na boi taadopi uju naeng jongjong hita gabe sitindangi Kristus. Molo mangasahon diri dohot gogonta sambaing, ndang tarpatupasa panghobasion i. Terbatas jala gale do ianggo pamatang on, alai girgir do anggo tondi, ima tondi na ginohan ni Tondi Parbadia. Marhite gogo na sian Tuhan i talup do hita mangulahon i. Marhite gogo na sian Kristus ndang ringkot hita maila manang tahuton manghatindanghon barita na uli i. Saluhut panandaionta taringot tu Jesus i nang saluhut pasupasuNa naung taida jala naung tadai, ringkot tapatolhas. Asa nang nasida boi taruli marhite i.

Laos holong tu Tuhan i nang holong ni roha tu huria i, i do gabe motivasi bertahan di saluhut hamaolon na masa. Bagas do panghorhon ni holong ni roha di na laho patulushon sada ulaon. Nionjar ni holong godang do na talup patupaonna. Nionjar ni holong ni roha do si doli nangkok tu dolok jala tuat tu rura holan laho pajumpang dohot si boru. Hinorhon holong ni roha digogo natoras do mansari arian nang botari jala marsiak bagi holan laho mangalului pandaraman ni ngolu jala mangalului sinamot laho pasingkolahon gelleng na. Holong ni roha boi gabe motivasi na denggan laho berjuang jala bertahan, nang pe maol pardalalanan ni ngolu na taadopi. Holong ni roha i do ojahan di torop halak asa unang mandele patupahon na denggan di ngoluna. Molo songon so maralus, marparbue manang so mararga angka na taula angka poda na tapasahat manang angka pangurupion na tabahen i unang pintor hansit roha jala mandele. Holong ni roha i do na patubu roha pangantusion di dirinta maradophon hahurangan dohot hagaleon ni dongan jolma. Ai dihuphupi holong ni roha i do godang hahurangan. Alani i marhite na taparatarata holong ni roha i naeng lam ditanda torop halak Debata Siparholong na tasomba i. Antong godang nari angka silehonlehon na dipasahat Tuhan i tu hita, silehonlehon pardagingon nang silehonlehon partondion. Naeng taparatarata saluhutna i, taulahon asa marhapataran jala marparbue di ngolunta. Asa unang diunsat angka silehonlehon i sian hita, alai asa lam mangerbang. Jala asa saluhut silehonlehon i boi pangkeonta gabe dalan pasangap goar ni Tuhan i.