Khotbah Maleakhi 3: 13-18

Khotbah Minggu Sexagesima; 24 Pebruari 2019

Evangelium: Maleakhi 3 : 13 – 18 

(Patuduhon Hasintongan Mananda Debata)

Panurirang Maleakhi dijou Debata mamaritahon hataNa di tonga-tonga ni bangso Israel dung habuangan sian Babel, laos ibana ma na gabe panurirang parpudi mangulahon parsuruon ni Debata. Tingki mangula panurirang Maleakhi on godang do pangalaho na so denggan diulahon bangso Israel, dohot ragam ni angka na so dihalomohon Debata, jala sian ragam ni angka pangalaho na niulahon ni bangso Israel tarida do na so adong biar ni roha nasida maradophon Debata, hape diboto jala diida Debata do sude angka pangalaho na niulahonna i. Di pardalanan ni parngoluan ni bangso Israel tarlumobi dung mulak sian habuangan tardok nunga mansai denggan ngolu nasida mian di tano na pinarbaga ni Debata, sahat tu na boi nasida dibagasan las ni roha dohot hasonangan laho paulihon Bagas Joro ni Debata i ma uju di tingki pangulaon ni si Nehemia, tarida do hasadaon di tonga-tonga nasida lumobi ma i diparsaoran nasida dohot Debata na patuduhon na mansai unduk mangoloi dohot mangulahon hata ni Debata. Alai di partingkian na mangihut ima uju mangula si Ezra sumurut do panandaon dohot haporseaon ni bangso Israel ala tubu muse pangalaho na so denggan, marhite angka ulaon hajahaton na lam mangrbang diulahon nasida sahat tu pangoloionna tu debata sileban.

Taida do i sian tupuk on tutu na sai dipatuduhon bangso i hatangkangon ni rohana di adopan ni Debata, ala disoadahon do sude na hea dibahen Debata tu ngolu nasida, jala ndang adong be dapot hasintongan ni pangoloion dohot haporseaonna tu Debata, ai barani do nasida mandok, “Ndang adong labana Debata, tung aha ma parlabaan nami ala huradoti hami hataNa.” Ise ma na tuk mansoarahon sisongon i di partingkian sinuaeng on, molo adong tubu pandohan na songon i, sian ngolu ni angka na porsea tu Debata, tontu na mangaleai Debata nama i, mansoadahon huaso dohot gogo ni Debata. Mago pangantusion nasida laho mananda Debata, ala nunga gumodang diihuthon angka poda dohot pangajarion na so sintong, songon i ma na tubu di ngoluna alani pangoloionna tu angka gana-ganaan dohot debata sileban. Sandok nunga be mago hasintongan ni panandaonna dohot holong ni rohana tu Debata. Alai molo pe songon i pangalaho ni bangso Israel, anggo panurirang Maleakhi sai tongtong do dihirim asa marhamubaon ni roha nasida, na ingkon boi tutu tadinghononna pangalaho na so dihalomohon Debata, tung sadihari pea dong hamubaon ni angka pangalaho na i, tongtong do rade Debata paimahon hamubaon nasida. Alani i do, sai tongtong dipaingot panurirang Maleakhi on nasida.

Dipartingkian dohot situasi na masa di tonga-tonga ni bangso Israel i ma ro panurirang Maleakhi laho manungguli nasida asa boi mulak panandaon nasida tu Debata marhite na olo porsea dohot mangulahon lomo ni roha ni Debata. Asa marpangalaho na sintong nasida di adopan ni Debata. Tangkas do taida di pandohan ni panurirang Maleakhi (Mal. 1: 1), “Nunga huhaholongi hamu ninna Jahowa, alai diparsoada bangso Israel do i marhite na didok nasida muse tu Debata, marhite aha hami dihaholongi ho?” Marlapatan ma i tutu paboa sude na binahen ni Debata mamungka dung harurar nasida sian habuangan ndang diingot nasida be angka naung pinatupa ni Debata, jala nunga tung mansai godang tutu na binahen ni Debata tu bangsona i laho patuduhon holong ni rohaNa, nata pen dang sintong nasida mangoloi Debata, hape anggo sangkap ni Debata tu ngolu ni bangsoNa naeng do asa malua nasida sian haporsuhon dohot parungkilon na niadopanna lumobi ma paluahon nasida sian hamatean, ala sangkap na denggan do sinangkapan ni Debata tu ngolu ni angka na olo porsea tu Ibana.

Asa naeng ma tutu sihabiari Debata nasida marhite na sai tongtong unduk mangulahon lomo ni roha ni Debata. Jala songon i do na patutu ulahonon ni sude na mandok porsea jala mananda Debata, ingkon tangkas dipatuduhon i di ngolu siganup ari, lumobi di partingkian nuaeng on na mansai godang tubu ragam ni angka na boi mangelaela haporseaonta tu Debata. I do na sinoarahon ni turpuk on tu hita ruas ni huria naung targoar porsea di Debata asa tongtong marningot holong ni roha ni Debata naung patupahon angka na denggan marhite na olo Ibana mangalehon ragam ni pasu-pasu sahat tu na mangaramoti ngolunta, ala tahilala do ingkon hatindanghononta na pinatupa ni Debata saluhutna. Alani i tahaburjuhon ma tongtong patuduhon hasintongan paboa naung tatanda jala tahaporseai Debata.

Hombar tu goar ni minggunta sadari on disungguli do hita tutu angka na porsea asa unang mangalupahon parsaoranta dohot Debata. Alani asa tongtong hita manghaburjuhon laho marsaor dohot Debata. Nunga dilehon Debata tu hita partingkian laho mula ulaon dibagasan onom ari, jala di ari papituhon i ingkon pangkeonta do tingkinta laho marsaor dohot Debata rot u adopanNa marsomba dohot mamuji goarNa na badia i. Asa ingkon tarida ma di ngolu siganup ari hasintongan ni ngolu ni na porsea i na tongtong unduk mangulahon lomo ni roha ni Debata. Mangoloi Debata dibagasan hasintongan, i do sada tanggungjawab di ngolu ni angka naung targoar porsea di Debata, molo tung manimbil sian adopan ni Debata manang ndang mangharingkothon parsaoranna dohot Debata, ndada gabe halobian ni hita jolma manang gabe sada kebanggaan i, gariada na naeng parohon uhuman do i tu angka na so olo be mangoloi Ibana, songon na pinatuduhon ni bangso Israel, alai ala olo nasida marhamubaon gabe sumurut ma rimas ni Debata. Ai dihasogohon Debata do tutu molo adong na so mangoloi Ibana. Alani i, nasa naung targoar napinillit jala jinou ni Debata gabe siihuthon Ibana, naeng patuduhononna tutu marhite panghatindanghononna dohot pamabahenanna paboahon godang ni pambahenan ni Debata, na sai tongtong rade patupahon angka na denggan jala na sai tongtong marpanatap, marnida hita angka na tinompaNa i. Taoloi ma Debata marhite haradeon ni rohanta di angka ulaon siganup ari, paboa saluhutna taulahon i boi gabe halomoan ni roha ni Debata.