Khotbah Markus 1: 21-28

Khotbah: Markus 1 : 21 – 28; Minggu 2 Set. Epiphanias; 20 Januari 2019

(Huaso ni Debata na Pangoluhon)

Tema jamita di minggu on “Huaso ni Debata na pangoluhon,” hape di ayat 24 di turpuk on tarsurat, “ Na ro do Jesus mangango nasida.” Hira na maralo do tema i tu ayat 24 on. Dia do na sintong, Debata na pangoluhon manang Debata na mangago? Ndang maralo na dua pandohan i, gariada masitomuan do duansa. Tutu, na ro do Jesus laho mangago, alai mangago ise? I do ringkotna manjaha turpuk hombar tu konteksna. Molo tajaha sude turpuk jamita minggu sadari on na manghatahon di ayat 24, “Na ro do Ho hape mangago hami,” ima sahalak artondi na hodar. Sintong do haroro ni Jesus laho mangago tondi na hodar. Dung lao tondi na hodar sian na sinonggopanna i, gabe mangolu (hipas) ma ibana. Jadi hamagoan ni tondi na hodar ima gabe hangoluan ni jolma. Alani do ndada na maralo tema dohot na tarsurat di ayat 24. Tuhan Jesus rot u portibi on ndada holan pangoluhon jolma na sinonggopan ni tondi na hodar na ditupuk on, alai laho pangoluhon sude jolma na porsea di Ibana.

1.      Ringgas ro tu parguruan

Tu dia do Tuhan Jesus laho di ari Sabat? Tangkas tarsurat di ayat 21, ima tu parguruan manang inganan ni halak Jahudi marpungu huhut manangkasi Hata ni Debata. Aha do na naeng dohonon ni jamita on tu hita? Naeng ma nian songon Tuhan Jesus i hita, ringgas ro tu parguruan ni hata ni Debata, isara ni parmingguon, partangiangan, punguan kategorial dohot lan na asing. Torop jolma manggoari dirina halak Kristen, alai losok rohana tu parguruan ni halak Kristen. Sian dia ma tandaon pambahenan ni Debata molo so marsaor dohot hata ni Debata? Tuhan Jesus sandiri ringgas tu parguruan lam hita ma nian? Laos di parguruan i do dipatupa Tuhan Jesus tanda halongangan na mangusir tondi na hodar. Tontu huaso ni Tuhan Jesus ndang holan di parguruan, di gereja, alai songon sada inganan naung pinajongjong jala dipaojak gabe inganan parjumpangan dohot Debata, mansai ringkot do halak na porsea ro tu gereja.

2.      Tuhan Jesus mangajari mardongan sahala

Dua hali didok di turpuk on na marsahala Tuhan Jesus, jala laos dua hali muse didok na longang siseanNa alani sahalaNa i. Aha ma lapatanna di hita na porsea nuaeng molo taboto na marsahala do Tuhan Jesus mangajari? Naeng dohononna tu hita, asa tapangido sahala sian Tuhan Jesus asa marsahala pangajarionta, asa marsahala podanta. Ringkot do natoras marsahala laho mamodai ianakhonna. Ringkot do angka na mardongan masiajaran jala masipodaan. Molo nunga marsahala pangajarion dohot angka poda, tontu diulahon na umbege ma i, molo tung so sude mangulahon, pinomat adong na mangulahon ala nunga marsahala poda i. Alai ndada holan laho mangajari dohot mamodai ringkot sahala. Di na mangula ulaonta siganup ari, tung mansai ringkot do sahala. Marsahala ma nian hita mangula ulaonta, mandok sidohononta. Sian ise ma tajalo i? Turpuk on mandok, sian Tuhan Jesus. Alani ro ma hita tu Tuhan Jesus mangido asa dilehon tu hita sahalaNa laho mangajari, mamodai nang mangula na siulonta.

3.      Jesus Palaohon tondi na hodar mardongan sahala

Ndada holan tingki mangajari Tuhan Jesus mardongan sahala alai dohot do tingki pasiphon dohot palaohon tondi na hodar. Uju bongot Tuhan Jesus tu parguruan i, nunga dini na sinonggopan ni tondi na hodar i. Didok ibana di ayat 24, “O Jesus, na sian Nasaret; marhua Ho tu hami! Na ro do Ho hape mangago hami! Hutanda do Ho; na badia ni Debata do Ho. Digoari partondi na hodar i do Tuhan Jesus “na badia ni Debata” jala diboto do na ingkon agohonon ni Tuhan Jesus ibana. Sian on boi taguruhon memang ndang adong pardomuan ni na tiur tu na holom. Ala na holom do partondi na hodar i, holan jumpang dohot Tuhan Jesus, i ma na tiur, pintor so marhasoan do Ibana, pintor maralo do haholoman tu hatiuron ni Tuhan Jesus. Umbege pandoha ni partondi na hodar i, disonggak Tuhan Jesus ma ibana dung i dipalao, jala saut do laho ibana. Respon nasida, ima longang. Udut tu halongangan nasida i, tubu ma panindangion paboa na mardongan sahala do Tuhan Jesus palaohon tondi na hodar, jala unduk do tondi na hodar i tu Tuhan Jesus. Huaso nang sahala ni Tuhan Jesus palaohon tondi na hodar di turpuk on, masa do sahat tu partingkianta saonari

            Angka dia ma tondi na hodar di partingkianta saonari? Boi do jolma na sinonggopan ni tondi na hodar songon na di turpuk on, alai laos boi do marhite bentuk-bentuk na asing, isarana nasa pangalaho na maralo tu lomo ni roha ni Debata, na patubuhon hagaoron, na manusai ngolu ni jolma tarlumobi manusai sihatoropan. Di minggu bongot ma hita tu Minggu paduahon dung Epiphanias manang hapapatar. Jamita minggu on papatarhon tu hita naung ro Tuhan Jesus dibagasan sahalaNa mangagohon tondi na hodar huhut pangoluhon hita. Sai olo ma hita dipangolu marhite na ringgas rot u parguruan ni halak Kristen jala marhite na paloas Tuhan Jesus palaohon angka bangko na maralo tu lomo ni roha ni Debata sian ngolunta. Tajalo ma sahala sian Tuhan Jesus asa marsahala hita di nasa ngolunta jala tajalo ma hangoluan na binasabasahon ni Tuhan Jesus i tu hita.