Lukas 4: 16-21

Minggu 4 Set. Epiphanias; 03 Pebruari 2019

Evangelium: Lukas 4 : 16 – 21

(Barita Nauli na Paluahon)

Haroro ni Jesus tu bagas joro ni Debata hatiha i ndang holan ala na mangulahon tradisi hajahudion, alai ala panogunoguon ni Tondi Parbadia hombar tu ulaonNa songon Anak ni Debata. haroroNa tu bagas joro ndang ala panjouon ni angka malim ni Jahudi manang Sibotosurat alai ala panjouon ni Tondi Parbadia laho mamboan hatiuron tu angka humaliangNa, termasuk mangajari hata ni Debata. Ai di bagas joro ni Debata do inganan ni angka halak Jahudi laho marsiajar, manaringoti Hata ni Debata, mambege hatorangan tu ngolu nasida asa hombar tu Hata ni Debata, huhut pasahathon ende pujipujian nang angka tangiang. Dipangido angka malim do Jesus asa manjaha Hata ni Debata. Dung i dijaha Jesus ma sada turpuk sian buku ni panurirang Jesaya 61: 1-2. Marhite i dipatuduhon Jesus do, ia haroroNa mamboan Hata ni Debata tu na umbegesa, asa taruli sude jolma dihaluaon na binoanNa tu portibi on. Godang halak na kagum jala tertarik di pangajarion na pinasahat ni Jesus. Pangajarion binoan ni Jesus taringot taringot tu haluaon, ima pangajarion na so hea dibege saleleng mangolu nasida.

Tangkas didok Jesus, haroroNa dohot ulaonNa,  ima “maningtinghon taon parasinirohaon sian Jahowa, dohot ari partubolan ni Debata jala mangapuli saluhut halak na marsak roha”. Turpuk na tarsurat di buku ni si Jesaya, na jinaha ni Jesus sasintongna manggombarhon hadirionNa songon Mesias. Ndang holan ritus-ritus sambing diulahon Jesus di bagas joro ni Debata hatiha i, alai laho do Ibana tu angka na pogos, mangurupi angka na dangol, mangalehon gogo nang panghirimon asa unang mandele alani hapogosonna. Laho do Ibana pamalumhon angka na marsahit, asa malum jala neang dihilala nasida. Diulahon Jesus do mangurupi angka na ginosagosa ni dosa, asa olo paubahon roha jala manjangkon haluaon. Di tingki on, godang do halak na ringgas mangulahon angka ritus-ritus parugamoon di bagas joro ni Debata, alai ndang adong pangulaonna manang aha pe hombar tu angka ritus na niulana di bagas joro. Isarana, ringgas marjamita, ringgas marminggu, ringgas tu partangiangan, alai ndang adong na niulana marhahonaan tu parngoluan siganup ari uju marsaor dohot angka dongan na di humaliangna.

Molo diula Jesus saluhut ulaon parasinirohaon laho paluahon angka na dangol, tontu tiruan do na pinatuduhon ni Jesus tu hita. Asa hit ape naeng taulahon songon naung diulahon Jesus di turpuk on. Ra, tubu do sungkun-sungkun di bagasan rohanta: Aha do gogonta mangulahon na nidok ni Jesus di turpuk on? Ndang halak na mamora hita, ndang adong jabatanta, jala ndang adong huasonta, tarulahon hita do na nidok ni Jesus i? Tarulahon hita do i, ala Tondi Parbadia margogoihon hita, songon Tuhan Jesus na dipargogoi Tondi Parbadia mangulahon saluhutna ulaon parasinirohaon i (ay. 18). Molo ndang tondi Parbadia na patauhon hita laho mangulahon i, tontu ndang tarulahon hita ulaon i. Molo huaso pardagingon do tapangasahon laho mangulahon i, tontu gagal do hita mangulahon i. Nang pe so adong hamoraonta, jabatanta, huasonta, alai molo talehon rohanta disungguli jala dipargogoi Tondi Parbadia mangula angka ulaon parasinirohaon, tontu tarulahon hita do i. Sai dipatudu Debata do dalan tu hita asa boi hita mangurupi angka na dangol nang na pogos. Godang do jolmana mamora, godang jolma parjabatan jala parhuaso alai ndang hea dilehon rohana mangulahon ulaon parasinirohaon. Molo holan mangalului popularitas dohot pencitraan do motivasinta mangula angka ulaon parasinirohaon, tontu gagal do hita mangulahon ulaoniI, jala ndang dihalomohon Debata ulaonta i.

Haluaon na binoan ni Jesus ndang holan haluaon secara fisik manang bersiat materi sambing. Haluaon na binoan ni Jesus ima haluaon na sempurna, haluaon di pardagingon nang partondion ni jolma. Sude do halak boi tarhurung, digosagosa jala mapitung (ay. 18-19). Ndang holan na mapitung secara fisik na ginoaran “angka na mapitung”. Ndang holan halak na tarhurung secara fisik na ginoaran “halak na tarhurung”. Jala ndang holan halak na ginosagosa secara fisik na ginoaran “halak na ginosagosa”. Boi do halak mapitung parrohaonna nang pe marnida simalolongna. Halak na mapitung parrohaonna nang haporseaonna ima halak na so boi marnida hasintongan, na so boi membedakan dia ulaon na sintong jala dia ulaon na jat. Angka halak na ginosagosa ndang holan halak na tertindas secara fisik, alai dohot do na tertindas di partondion, tertindas secara sosial, secara structural di parkarejoan, na berpihak tu angka na gogo (na marhuaso). Angka halak na tarhurung, ndang holan na tarhurung secara fisik di lembaga pemasyarakatan (penjara), alai dohot do nang na tarhurung pingkiranna di angka ulaon hajahaton, na tarhurung ala tongtong mangulahon dosa (tarhurung alani dosana, di angka hasomalan na so denggan), tarhurung di angka dendam, hansit ni roha, hosom, teal, elat dohot late ni roha. Angka ima na pinalua ni Jesus asa malua sian angka na mambobani ngolu ni jolma i, na mambahen jolma i menderita secara fisik dohot psikis. Haluaon na binoan ni Jesus ima haluaon na paluahon (membebaskan) jolma sian dosa nang hamatean, asa dapot hangoluan na salelenglelengna. Paluahon angka na mapitung di partondion marhite na manogunogu partondian nasida asa diulahon nasida hasintongan nang hatigoran. Paluahon na ginosagosa ni portibi on, ima marhite na mangurupi nasida pasauthon keadilan, mangalehon hak-hak ni na tertindas. Paluahon angka na tarhurung, ima marhite na mangalehon bimbingan, nasihat, huhut mangurupi nasida asa margogo maninggalhon hisaphisap ni daging na mamboan tu hamagoan.