Yesaya 45: 18-25 Tunduklah Kepada Allah Pencipta

Minggu 3 Set. Epiphanias 27 Januari 2019

Evangelium: Jesaya 45 : 18 – 25

(Paunduk Dirim tu Debata Sitompa Saluhut)

Uju tarbuang Juda tu Babel, mansai hansit do dihilala nasida na masa i: lengse bagas joro, dao sian bona pasogit jala tarulang tano golat nasida. Alai laos di partingkian i do ro si Jesaya mangapuli dohot ahot haporseaon nasida. Di Babel pe nasida ndada naeng mago alai asa marsiajar unang be mangalaosi padanna tu Debata.mulak do nasida sian Babel tu Jerusalem mangingani tano bagabaga i. Ndada holan tu bangso Juda barita i dipasahat dohot do tu angka bangso na leban asa tangkas mananda Jahowa Debata. Nang hita nuaeng dijou marparhatutuhon Jahowa, sasadasa Debata di tano on, na bonar jala silehon tua dohot haluaon.

1.      Jahowa Sipalua Saluhut Bangso

Marjamita do si Jesaya tu angka bangso naung pinapatu ni Babel asa mananda Jahowa Debata. Dijou nasida asa rap ro marluhut tu lambungna, angka naung malua sian bangso parbegu jala laos dipabotohon, na so malua angka na manomba ganaganaan. Lapatanna ndang adong agia ise na tuk palua nasida, ia so Jahowa, Debata ni Israel. Disuru Debata do Sirus laho patupahon haluaon nasida. Alani didok, “dompakhon hamu ma Ahu, asa martua hamu nasa ujung nu tano on!” Angka debata sileban, ganaganaan na disomba nasida nasailaon i ndang tuk patupahon haluaon. Ndang marguna manomba debata na pinature ni tangan.

2.      Jahowa Pargogo na so Hatudosan

Jahowa sitompa saluhut portibi on, langit dohot tano, nang manisia laho mangingani tano na tinompa i. Didok panurirang i, “ Ibana do paojakhonsa, ndada laos rumar umbahen ditompa, bahen inganan ni jolma i do umbahen dijadihon. Dipatandahon si Jesaya, ia Jahowa ndada holan Debata ni Israel alai Debata ni saluhut ni bangso. Alani do dipaboa di pamuhai ni bindu 45, ia pinatupa ni raja Sirus aa ditanda saluhut bangso Ibana. molo didok, “Ahu do Jahowa jala dungkon ni Ahu ndang adong be” ima na patuduhon hadirion ni Debata na tuk mangatasi saluhut debata ni tano on. I do umbahen tolu hali didok di ayat 19, Jahowa manghatai ndang di sihabunian manang inganan na holom di tano i. Ibana do Jahowa na mandok hatigoran jala mamaritahon hasintongan. Jala tu angka na tarbuang i, tarida ma bagabaga panurirangon ni Jesaya (Jes. 9:1; 60: 1-3) na mandok, “bangso na mardalani dibagasan haholomon marnida sada panondang na bolon, nunga gabe hapataran. Haluaon sian Babel ndang holan nipi (Psalmen 126: 1). Dipasahat do tu nasida pos ni roha asa unang mandele manang ganggu rohana, joujou tu Jahowa mangido haluaon ni bangso i. Hot do hadirion ni Jahowa, Ibana do Debata na sintong jala na tigor.

3.      Jahowa do Pangurupi

Ndang dipasombu Jahowa jolma manaon na hansit songon binahen ni angka debata sileban. Haluaon pinatupa ni Debata marhite tangan ni raja Sirus ndada holan tu bangso Juda alai dohot do angka bangso na asing. Dipalua angka bangso sian sian habuangan jala diloas mulak tu ingananna be songon Juda na mulak tu Jerusalem. Laos mardomu tu hadirionNa i do panindagion ni si Jesaya na mandok, “Ahu do Jahowa jala dungkon ni Ahu ndang adong be.” Alai aha ma na boi idaon ni bangso i sian Jahowa na Sasada i? Didok di ayat 25, dibagasan Jahowa dapotan hapintoran jala marolopolop sandok pinompar ni Israel. Pangurupion dohot haluaon pinatupa ni Jahowa tu bangso Juda, songon i mang nang pangurupion dohot haluaon na tajalo nuaeng marhite AnakNa Tuhan Jesus Kristus. Nasa na porsea di haluaon ni Kristus dapotan hapintoran dohot olopolop di ngoluna.

4.      Jahowa Hot ro di Salelengna

Ndang adong debata di tano on na mamaritahon haluaon ia so holan Jahowa (ay. 21). Salpu pe langit dohot tano alai Jahowa hot do manang manongtong. Uli do pandohan ni panurirang Jesaya, “ingkon lompit sogot nasa ulu ni tot marsomba tu Ahu jala marmangmang tu Ahu dila” na pola dua hali disurat di padan na imbaru. Pandohan i marpardomuan tu paruhuman ni Debata songon na tarida di ayat 24, “maila sude angka na hehe mangalo Ibana.” Panindangion di hadirion ni Jahowa na manongtong i, ndang holan sian pamangan ni Juda alai saluhut bangso marparhatutuhon Ibana do Debata. nang di panindangion haporseaon ni halak Kristen, ganup tingki do tadok i. di tingki hehe sogot angka na mate sian tanoman, di si ma paruhuman ni Debata masa tu tano on. I do hata na tahatindanghon, “Mulak mangolu sogot daging ni halak naung mate dohot di hangoluan na ro suda.” Angka na taruli haluaon sian asi ni roha ni Kristus, dapotan hangoluan saleleng ni lelengna songon Jahowa na mangolu salelengna.

Antong dia ma na ringkot hangoluhononta sian jamita on? Jahowa, Sasadasa do Debata di atas tano on. Ala sasada Ibana Debata, nang tapatuduhon di ngolunta “parange na pasangaphon angka dongan” na marasing haporseaonna. Ai bangso na leban pe dapotan haluaon do sian Jahowa. Alai ndang holan haluaon naung pinarade ni Debata marhite Kristus sitagamonta, dohot do tahe ari paruhuman sogot. Angka na so olo manjangkon joujou ni Debata hona uhum ngoluna. Unang adong na mardebata sileban. Jotjot do tarunjun torop jolma taringo tu son. Holip do sian pamerengang angka pambahenan ni na deba, marhaporseaon na marlaok, ndang polin holan tu Jahowa na Sasadasa i, marhite Jesus Kristus marhaposan. Manat ma hita, ai angka jolma na mandao sian Jahowa boi do lam martamba manang lam godang debatana.