Khotbah Ibrani 4: 14-16, Minggu Reminiscere 17 Maret 2019

Ibrani 4 : 14 - 16 "Yesus Imam Besar Agung"

Manang ise dongan na so manadinghon hita di tingki hasusaan, i do dongan na sintong. Boasa tubu pandohan si songon i? Godang do dongan di portibi on, alai molo ro hasusaan, ndang piga sian dongan i na rade mangurupi. Dohot pandohan na asing, godang dongan rap mengkel, alai ndang piga dongan rap tangis. On do na naeng sunggulhonon ni jamita on, Tuhan Jesus, Sintua ni Malim manghilala hagaleon ni angka jolma. Di Padan na Robi malim i ma jabatan na pinabangkit ni Debata na gabe parhitean ni Debata manghatai tu bangso Israel jala parhitean ni bangso Israel manghatai dohot Debata. Sian tonga-tonga ni angka malim dipabangkit ma sahalak Sintua ni Malim na manguluhon Ari Raya Pardengganan sisahali sataon laho pasahathon pelean pardosaan tu Debata. Hatiha i bongot ma Sintua ni Malim tu inganan na badia mamistikhon mudar pardengganan tu ibana, tu isi ni jabuna, nang sandok Israel (3 Musa 16: 1-25). Di buku Heber on dipatohon tu hita na tumimbo do hamalimon ni Tuhan Jesus sian angka Sintua ni Malim na di Padan na Robi. Boasa? Ala pelean pardamean na pinasahat ni Sintua ni Malim di Padan na Robi dohot do i tu dirina sandiri, alai na pinasahat ni Tuhan ndang marulakulak Tuhan Jesus pasahat pelean pardamean songon Sintua ni Malim di Padan na Robi ai diriNa do dipasahat gabe pelean sahali rodi saleleng ni lelengna (Heber 5: 7).

Tuhan Jesus mangkilala di angka hagaleonta (ay. 15). Tuhan Jesus do “Sintu ni Malim na gabe dongan manghilala angka hagaleonta.” Molo tahilala gale hita, pardosa hita, ndang tuk gogonta mangulahon parsuruon ni Debata, taingot ma dihilala jala diboto Tuhan Jesus do i ala nunga dialami Ibana i uju di portibi on. Digombarhon do songon dia Tuhan Jesus marhagaleon andorang so tarsilang, pola songon mudar na himpal hodokna mardekdehan di Getsemane (Luk. 24: 41-44). Lapatanna, diantusi Tuhan Jesus do hagaleonta ala hea do Ibana manghilalahon dojdok ni sitaonon pola mardongan mudar. Ummalo do jolma mangurupi dongan na marsitaonon molo hea ibana manaon si songon i. Ummalo do na tilahaon mangapuli na tilahaon, na mabalu mangapuli na mabalu. Nian ndang las roha molo ditaon dongan songon na tinaon, alai kenyataanna hira na lumumbang do panghilalaan molo binoto adong dongan na songon iba sitaononna. Molo binoto adong na marsitaonon songon iba, gabe tubu ma panghilalaan na so punjung hape holan iba, gabe tamba ma gogo mangadopi sitaonon i.  Nuaeng dipabotohon turpuk on tu hita, ndang holan dongan jolma hape na hea manghilalahon songon na tataon i alai dohot do Tuhan Jesus, Sintua ni Malim i. Diboto, diantusi Ibana do hagaleonta i ala nunga hea Ibana manghilalahonsa. Molo taboto, taingot, jala tahaporseai do on, nda tamba ma gogonta laho mangadopi nasa hamaolonta i?

Marlas ni roha mandapothon Tuhan Jesus (ay. 16a). Ndang tarbahen jolma di portibi on so marsitaonon, ndang tarsirang sipingkiran sian portibi on alai sada na pasti ala nunga he Tuhan Jesus mangadopisa, diboto Ibana do songon dia mangurupi jala margogoihon hita. Diparungkilonna i ndang mardosa Ibana (ay. 15); alani hit ape boi do ndang mardosa di parungkilontai molo tu Tuhan Jesus Sintua ni Malim i hita ro. I do umbahen didok di ayat 16a: Antong, marhiras ni roha ma hita mandapothon habangsa parasiasian. Habangsa parasiasian na nidokna i ma Tuhan Jesus Kristus. Marlas ni roha mandapothon Tuhan Jesus ndang na marlapatan mandapothon Tuhan Jesus holan di tingki las ni roha, alai mandapothon Tuhan Jesus di tingki arsak nang las ni roha, tingki margogo nang gale. Molo dibagasan las ni roha, tontu mura do ro mandapothon Tuhan Jesus, alai boha molo diagasan hagaleon dohot parungkilon? Marlas ni roha mandapothon Tuhan Jesus dos do i mandapothon Tuhan Jesus dibagasan haporseaon. Dihamham i do las ni roha manghirim di Sintua ni Malim na manghilala nasa hagaleon ni jolma. Molo tadapothon Ibana, ndang songon jolma di portibi on Ibana, na lari manang martabuni. Baliksa, tarpaima do Ibana di haroronta, jala jumolo do Ibana manjou hita asa ro mandapothon Ibana songon na tarsurat di Mateus 11: 28: “Ro ma ham utu Ahu, hamu angka na loja jala na sorat, asa hupasonang hamu”.

Mandapothon Tuhan Jesus asa diurupi (ay. 16b). Mandapothon Tuhan Jesus Sintua ni malim i ndada holan laho curhat (pabotohon isi ni roha) jala ndada holan asa adong dongan na umbege holso, alai lobi sian i tahe asa diurupi hita. Ummura do Tuhan Jesus mangurupi hita ala nunga jumolo dihilala Ibana nasa hagaleon ni jolma. Jala, nang pe marhagaleon Ibana hatiha di portibi on, ndada ala ni dosaNa, baliksa alani dosanta do. Tuk do huasoNa mangurupi hita ala Debatanta i do Pargogo na so hatudosan. I do umbahen dipamuhai ni jamita on, dongan disitaonon i do dongan na sasintongna. Ise ma i? Mangihuthon tupuk jamita on, ima Tuhan Jesus Kristus. Didongani Ibana do hita di tingki las ni roha nang di tingki arsak arsak pe. Ndang hea ditadinghon Tuhan Jesus hita, ai diriNa pe nunga dipelehon di hau pinarsilang holan laho humongkop hita. Ibana do dongan na sasintongna i songon hata ni endenta di Buku Ende no. 219: 1. Marhite ayat 16 on ditogihon do hita manghaporseai holan Tuhan Jesus do dongan na tongtong mandongani jala mangurupi hita.

Turpuk on manjou hita asa unang ganggu rohanta molo ro sipingkiran ala adong do Tuhan Jesus Sintua ni Malim na rade mangurupi hita. Diboto Ibana do mangurupi hita ala nunga jumolo Ibana manghilalahon dokdok ni sitaonon di portibi on. Alani, hita angka na pinalua ni Debata, tadapothon ma Tuhan Jesus Sintua ni Malim i dibagasan las ni roha asa diurupi jala dipamonang hita di ragam ni pardalanan ni ngolunta ai saguru di Debata do saluhut na masa.