Khotbah Mazmur 118: 22-29 Minggu Okuli, 24 Maret 2019

Mazmur 118 : 22 - 29 "Yesus Batu Penjuru"

Ganup do hita mangantusi hinaringkot ni batu di angka ulaon na pajongjonghon sada bangunan. Lumobi di angka bangunan na parjolo i, somal do taida batu dibahen hapeahan ni angka basiha jala nang nuaeng tongtong do sian batu na gab ojahan, parsuhi ni hajongjongan ni sada bagas. Tung diboto angka pande bagas i do dia ma rumang ni batu sipangkeonna. Ai atik pe rap margoar baru, ndang hea boi dos rumang ni sude batu. Adong ma i na marguna, adong na so marguna, luhutna i hombar tu ringkotna.

Jesus do Ojahan na Tutu Situtu. Deba sian batu i digoari di turpuk on batu na binalonghon (ay. 22). Batu na so marguna, na tinulak, na so niargahon ni pande bagas i, ima batu na binolongkon. Ndang apala tangkas dipaboa, dia Alana umbahen dibolongkon, alai na tangkas pande bagas i do na mambolonghon. Ringkot ingkon tangkasanta, ise do batu na binolongkon i. Maol do jumpang hita molo di turpuk on, ise do batu na tinulak i, na binolongkon ni pande bagas i. Adong dua panatapan taringot tu “Batu na binolonghon on”. Parjolo, molo tinatap turpuk on sian hatiha naung mulak bangso i sian habuangan, batu na binolongkon i ima bagas joro na parjolo pinajongjong ni si Salomo. Jala na umbolonghon batu i ima angka partogi ni bangso ni Debata, na mamboan bangso i manomba debata sileban, manundalhon lomo ni roha ni Debata, ro di na tartaban nasida tu habuangan, pola “marumpak” tutu bagas joro i. Alai laso sia batu na binolonghon i ma jongjong bagas joro ma paduahon. Paduahon, molo tinatap turpuk on sian ruhut ni Padan na Imbaru, songon judul na di ginjang i, Jesus do tinudu ni batu na binolonghon i na gabe patu parsuhi. Pande bagas i ima angka partogi ni bangso i, nasida ma na manulak dohot umbolonghon batu i (Mat. 21: 45), marhite na manulak haroro ni Jesus songon Mesias di tonga-tonga nasida. Ditulak bangso i do hadirion ni Jesus na sian Galilea, ai ndang adong ninna nasida panurirang na ro sian Galilea (Joh. 7: 52), ditulak nasida do hatauonna manang sian dia Ibana marguru (Joh. 7: 15), na niulaNa (Luk. 6: 2), parsaoranNa rap angka sijalo beo dohot angka pardosa (Mat. 9: 11), rodi angka panulahion na asing sahat tu pinarsilangkon nasida Tuhan Jesus dung jolo tumaon ragam ni haberniton. Batu naung binolonghon i do na gabe batu parsuhi. Kristus do na gabe batu parsuhi. Na ro ma Debata mambuat jala paulihon batu na binolonghon i, laos gabe batu parsuhi, batu utama molo dipandohan ni apostel Paulus di Efesus.

Dompak Ibana ma ende hamauliateonta. Ende hamauliateon do anggo sintuhu ni turpuk on. Tongon marpesta nasida di joro ni Debata. Alani dibuhai dohot ende mauliate do turpuk on sian ayat 1, jala dipaujung dohot ende mauliate di ayat 29. Digora Parpsalmen ma nasida asa ondop ro mamuji Debata (ay. 2-4), dipasupasu do ganup na ro mamongoti joro ni Debata (ay. 26), marnida dohot manghilala balga mi asi ni roha ni Debata na paluahon nasida sian godang ni hasusaan (ay. 5-18). Dung i mandok mauliate, mamelehon gok hamauliateonna tu langgatan ni Jahowa (ay. 27-28), disaluhut denggan basa ni Jahowa, dompak halongangan bolon binahenNa (ay. 23), dompak balga ni huaso ni Jahowa na paluahon nasida (ay. 19-28). Ende mauliate na mardongan pangidoan tu haluaon na sian Debata (ay. 25). Singkop situtu do antong asi ni roha ni Debata di bangsoNa. I do umbahen dipaujung turpuk on dohot pandohan “mandok mauliate ma hamu”, tung so habilangan jala hasuhatan do denggan basa ni Jahowa. Alani sada do unok ni hamauliateon nasida marhite turpuk on, ima ai rodi salelengna do asi ni rohaNa. Pola do lima hali dipatuduhon pandohan na jempek on di bindu 118 on, ima di ayat 1,2,3,4, dohot ayat 29 di turpuk on.

Debata do na jumadihon nasa ari (partingkian). Tung pe sai jotjot tabege spata dipatudos angka dongan hinaarga ni ari tu hepeng (time is money), sasintongna tung andul marasing situtu dope hepeng sian partingkian. Negara do sitompa hepeng alai Debata do sitompa ari, ndang adong gogo ni jolma nang negara manompa partingkian, alai sai na boi luluan dope ianggo hepeng, alai tung so haulahan do molo sanga mangguling angka partingkian. Songon i ma hapal ni Bibelta on jala tung hata hatorangan ni partingkian (kata keterangan waktu) do dipangke gabe hata parjolo na mamuhai, ima “dimula ni mulana”. Jala uju tajaha barita panompaon di 1 Musa 1, ganup panompaon i dipaumbuk Debata (dibingkai oleh Allah) tu bagasan partingkian. “Dung i mangkuling ma Debata jadi ma ho… ima ari parjolo (ay. 3), sahat tu ari na papituhon ari paradianan (1 Musa 2: 3). Sandok ganup do panompaon i dibingkai tubagasan partingkian jala saluhut na tinompa i dihandang dibagasan partingkian, songon nidok ni Parjamita 3: 1 “Martingki be do luhutna angka na tinompa”. Asa tutu ganup ari do ari ni Jahowa, ari na jinadihon ni Jahowa. Asa ingot do ganup hita mangolophon dohot manghalashon lumobi mangargahon nasa ariari ni ngolunta on. Asa sada rumang ni pangalaho na gumodang mambahen magopo angka ari-arinta, marisuang so marlapatan, dihata na asing didok menjenuhkan, menjemukan, membosankan, ala na hurang do hita mandok mauliate. Porlu siruru kecakapan menata hari dengan hati, ima marhite roha na marolopolop dohot na marlas ni roha. Jala dihirim Debata do hita tongtong marlas ni roha.

Ragam do rumang ni sihamauliatehononta, ima na taruli pasupasu do ganup na bongot tu Joro ni Jahowa. Jesus naung gabe batu parsuhi, na gabe ojahan ni sandok ngolunta. Ari hamonangan na pinatupa ni Tuhanta na ingkon janghononta mardongan olopolop dohot las ni roha. Gogo na sian Debata asa tongtong mian di hita. Alai laos dijou do hita mamelehon pelean hamauliateon ni rohanta tu langgatan ni Jahowa, marsitutu mamuji Debata, ai parasi roha si saleleng ni lelengna do Ibana.