Khotbah Yohanes 21: 1-14 "Yesus adalah Tuhan"

Johannes 21 : 1 - 14

Jesus do Tuhan i

Minggu Quasimodogeniti, 28 April 2019

Turpuk jamita sadari on ima sada sian barita na dipataridahon Jesus diriNa tu angka jolma dung haheheonNa i. Dibagasan 40 ari dung haheheonNa marulak-ulak do dipatuduhon Jesus diriNa. Pigapiga hali dipataridahon Jesus do diriNa, asa porsea angka sisean dohot angka natorop i (nang hita pe) paboa situtu do naung hehe Ibana. Ala molo so hehe Jesus i, jala molo so porsea nasida nang hita dibarita haheheon ni Jesus i magopo ma barita taringot tu Jesus i jala magopo ma haporseaonta (1 Kor. 15: 14; “Ai anggo so hehe Kristus sian na mate, rumar ma jamitanami, laos rumar ma nang haporseaonmuna”). Rumar jala magopo do saluhutna ala ndang adong haluaon molo so hehe Jesus i. Molo silang i do ujung ni ulaon ni Jesus, Tuhan na talu do Jesus i. Alani i do impola ni haporseaonta dihaheheon dohot dihamonangan ni Jesus i do ala naung hehe Jesus, hita pe hehe ma. Ala naung monang Jesus, hita pe monang ma. Alai naung mulak mangolu Jesus, hita pe mangolu ma. Diturpuk on dipatorang do proses panogunoguon na dipatupa Jesus asa diboto jala asa porsea angka sisean i naung hehe do Jesus i. Tongon ditingki i marpungu angka sisean i, laos didok si Simon Petrus ma, “Laho ma ahu mardengke” (ay. 3). Umbege i gabe diihuthon angka sisean i ma si Petrus laho mardengke. Ndang apala dipatorang alasan nasida mangulahon i.

Atik laho mangalului ulaon sambing do, ala hatihai ndang adong ulaon na hantus siulahon nasida. Molo na sailaon rap marbarita nauli do nasida dohot Jesus, alai nuaeng ndang diula nasida be i. Jadi ala so adong ulaon nasida, gabe laho ma nasida mardengke jala holan sangombas do i paima diuduti nasida muse ulaon marbarita nauli. Manang ala naeng mulak do nasida tu ulaonna na parjolo i. Ai panjala dengke hian do nasida uju so dijou Jesus gabe siseanNa. Jadi ndang holan laho mangalului ulaon sambing alai tutu do naeng mulak tu ulaonna hian. Tutu ndanga apala dipatorang alasan nasida na mardengke i. Alai molo pinaihutihut tu ayat 15-19, alasa na paduahon ummura do jaloon. Na marsangkap do si Simon Petrus dohot sisean na asing laho mulak tu ulaon nasida na parjolo i. Alani i do ringkot di roha ni Jesus manungguli/paingothon panjounNa na parjolo tu si Simon Petrus (Luk. 5: 1-11). Hira dos do na masa uju i (panjoun na parjolo) dohot na masa di turpuk on. Pola saborngin nasida marparau mangalului dengke, alai ndang dapot nasida agia aha. Dung i disuru Jesus ma nasida sumampakkon jalanasida laos dapot nasida ma dengke tung mansai bahat bilanganna. Marhite na masa i tontu ndang maol di roha ni si Simon Petrus laho marningot panjouon ni Jesus na parjolo i. Tarlumobi dung didok si Johannes paboa Jesus do i, gabe lam tarsunggul ma rohana. Dipature ma parabitonna laos ditimbung ma tu tao i jala didapothon ma Jesus tu topi ni tao i. Pajumpang ma nasida dohot Jesus, rap marsaor, rap marsipanganon songon na uju i. Ai nunga diparade Jesus sipanganon (dengke dohot roti) di darat i. Huhut ma muse ditambai dope sipanganon i marhite angka dengke na ditangkup nasida sian tao i. Rap mangan ma tutu nasida jala Jesus do manghobasi di nasida. Diparade Jesus do saluhutna. Dibuat ma roti dohot dengke i jala diparlehon tu angka siseanNa.

Parjumpangan i dipangke Jesus do dalan manogunogu siseanNa asa porsea naung hehe Ibana, huhut pahothon rohanasida dipanjouon naung dipasahat Jesus tu nasida. Marhite na masa i dipaimbaru Jesus ma muse panjounNa tu si Simon Petrus, ima marhite tolu sungkun-sungkun di ayat 15-19. Tutu do nunga diparsoada si Simon Petrus Jesus i jala tutu nunga ditadingkon ibana Jesus i. Alai ndang dipaloas Jesus ibana lam dao manadingkon Jesus i. Alani holangNa disungguli Jesus do muse si Simon Petrus rap dohot angka sisean na asing taringot tu panjounna tu nasida. Ndada be sijala dengke be nasida, alai sijala jolma nama, ima marmahani birubiru ni Tuhan i.

Nuaeng pe marhite jamita sadari on disungguhon Jesus do nang tu hita paboa nunga hehe Ibana. Nunga hehe Jesus i jala nunga monang Ibana maralohon sibolis, dosa dohot hamatean. Asa naeng porsea hita disi. Ai ringkot situtu do asa porsea hita di Jesus naung hehe i. Ai molo so porsea hita, magopo ma saluhutna. Magopo ma angka na taula. Magopo ma nang ngolu dohot haporseaonta. Harhar saluhutna. Udut tusi laos marhite haporseaon tu Jesus i do talup hita manguduti ngolunta nang ulaonta di portibi on. Ai tangkas do didok, “Ai ndang tarula hamu agia aha, anggo so mardongan Ahu” (Joh. 15: 5). Patar do i marhite na masa tu si Simon Petrus rap dohot sisean na asing, ndang dapot nasida agia aha nang pe naung saborngin nasida mangalului dengke. Dung pe ro Jesus jala dung pe dipasahat Jesus parenta tu nasida jala olo nasida pasauthon hata ni Jesus, manjadi ma na niula nasida. Ndang marisuang be gogo dohot halojon nasida. Dapotan pasupasu ma nasida. Suang songon i ma nang hita, tongtong ma tatambor-tambori haporseaonta tu Jesus i. Tapareahi ma parsaoran na denggan raphon Ibana huhut tatangihon jala taoloi hata dohot parentaNa. Taloas ma Ibana mangula dohot manghobasi angka na ringkot di ngolunta. Alai ndang na marlapatan gabe berpangku tangan hita, ingkon taulahon do na boi taulahon (songon sisean na manampakkon jalana), dung i Tuhan Jesus ma na pasauthon ulaon i asa denggan parbuena. Asa manang aha pe na masa, las ni roha nang arsak ni roha, unang ma sumurut hita sian dalan hasintonganNa (songon BE. No. 149:3). Alai tongtong ma hita mangulahon lomo ni rohaNa. Tongtong ma taida Ibana naung hehe jala naung monang i, asa tubu panghirimon na mangolu dihita. PamonangonNa do nang hita mangadopi angka hamaolan na masa di ngolunta. Ai ramotanNa do hita rasi rasa ajal ni hasiangan on.