Khotbah Markus 15: 22-32 "Yesus Terkutuk Karena Dosa Kita"

Markus 15: 22 – 32

(Hona Bura Jesus Alani Dosanta)

Jumat Agung, 19 April 2019

Bully (Bullying), on ma sada istilah baru na jotjot tabege di tingka na parpudi on. Bully lapatanna hata nang pambahenan na manginsahi, manusai, paoruhon sangap sahat tu na mangagohon rasa percaya dohot arga diri ni na hona bully. Mansai jorbut do panghorhonna, adong na gabe stress, jala na umposa pola gabe bunu diri. Nang pe ndang adong hata “bully” di turpuk on, alai marhite hata manginsahi di ayat 29,31,32; boi dohohon na dibully do Tuhan Jesus. Angka ise ma na mambully Ibana, ima sisulingkitonta asa lam tubu roha mauliate di hita di panghohopon ni Tuhan Jesus. Adong lima na memainkan peran di turpuk on, ima soldadu, pamolus, sintua ni malim rap dohot siboto surat, dua panamun na tarsilang dohot Tuhan Jesus. Alai, nang pe Tuhan Jesus pemeran utama ni turpuk on, ndang adong nanggo sanghababa didok Ibana; holan na opat peran na asing i do na manghatai. Dos do peran nasida ima manginsahi Tuhan Jesus. Nian ndang dipangke hata manginsahi tu angka soldadu di turpuk on, alai pambahenan nasida tangkas do manginsahi.

Adong tolu pambahenan ni soldadu na boi goaron na manginsadi (bully) Tuhan Jesus. Parjolo, ima na mambagi abit ni Jesus angka soldadu marhite tondung topet di toru ni silang. Paduahon, manurathon “Jesus raja ni Jahudi” di silangNa (ay. 26) hape ndang diongkui nasida na sinuratna i. Dalan nasida do i holan naeng pailahon Jesus. Patoluhon, mamparsilngkon panamun rap dohot Tuhan Jesus (ay. 27), na marlapatan dipatudos nasida Tuhan Jesus tu panamun. Angka na mamolus, didok angka na mamolus i do, “Ho pe, na mangalohai bagas joro i jala na pajongjonghonsa dibagasan tolu ari! Palua diriM jala mijur ma Hoa sian hau na pinarsilang i! Ndang apala tangkas taboto angka ise na mamomus on, alai boi do dohonon nunga hea nasida pajumpang manang pinomat umbege taringot tu Tuhan Jesus ala diboto nasida pandohan ni Jesus on. Tutu hea do didok Tuhan Jesus songon i (Joh. 2: 19), alai ndada Bagas Joro secara isik na nidok-Na taringot tu diri-Na sandiri do, ima na hehe Ibana sian hamatean di ari patoluhon. “Na leban dipalua, ia diri-Na so tarpaluasa. Ho, Kristus, Raja ni Israel! Mijur ma Ho antong sian hau pinarsilang i, asa huida hami i jala porsea!” Ima insak-insak ni angka sintua ni malim dohot siboto surat tu Tuhan Jesus. Dirajumi nasida na so tuk huaso ni Tuhan Jesus paluahon diri-Na sian hau silang i. Ndang porsea nasida na tutu Jesus i Krsitus, raja Isarel nang pe nunga diida nasida torop jolma dipalua Jesus sian parsahiton nang sibolis. Songon sintua ni malim dohot siboto surat, sasintongna nasida ma nian na parjolo porsea di Jesus ala umbotoan nasida di na tarsurat, alai dipatangkang nasida do rohana. Di buku ni si Markus on ndang disurathon hata bully ni panamun na rap tarsilang i, alai di Lukas 23: 39 didok, “Alai na sada sian angka parjahat, na targantung i, mangaleai Ibana: Ai ndada Kristus I Ho? Palua ma diriM, nang hami antong”. Dos do songon na manginsahi i. Dilesengi do Jesus marhite na manggoari “Kristus”alai ndang diokuhon nasida na tutu Kristus do Jesus na tarsilang i. Tung jorbut do pangalaho ni na masa i. Sude manginsahi Jesus: ndang adong na so manginsahi (membully) Tuhanta i.

Di Padan na Robi dibagabagahon do haroro ni Mesias na ro, laho paluahon bangso Israel. Sai dipaima halak Jahudi do haroro ni Mesias, na ro songon raja na marhuaso, na sangap laho paluahon nasida sian pangomgomion ni bangso Rom na tongon menjajah nasida. Mesias (hata Heber), na di hata Gorik Kristus, marlapatan na miniahan. Sahalak na miniahan, pasti na sangap jala marhuaso, i do umbahen maol halak Jahudi manjalo Jesus songon Mesias (Kristus) ala tubu sian keluarga na pogos do Ibana jala diparsilangkon. Na so tutu do Jesus i Kristus? Na maralo do peristiwa silang on tu na tarsurat d Padan na Robi? Ayat 28 mandok, “Gabe jumpang ma na nidok ni Surat i: Tarrajum do Ibana tu halak parjahat”. Na nidok surat nadia? Ima Jesaya 53: 12. Marhite Jesaya 53 on tangkas taantusi na hombar do hape hamamate ni Jesus tu na tarsurat di Padan na Robi. Jesaya 53 na digoari “Nyanyian Hamba (Mesias) yang menderita” manurirangkon ingkon marsitaonon Mesias. Jadi, molo tung pe marsitaonon Jesus, tarsilang ibana, ndang ala na so boi dipalua Ibana diriNa songon insak-insak na pinasahat tu Ibana, alai asa jumpang do na tarsurat i. Jadi molo tarsilang Tuhan Jesus, dibully Ibana, justru i do na membuktikan na tutu Ibana Mesias, raja na pinaimaima i. Alai boasa ndang olo porsea halak Jahudi, Sintua ni Malim dohot Siboto surat? Aut sura diingot jala dihaporseai nasida na tarsurat lumobi Jesaya 53, tontu tarjalo nasida ma Jesus do Mesias (Kristus) raja Israel na pinaimaima ni nasida i.

Humopkop hita do dibully Tuhan Jesus, alani taauhon ma panghophoponNa i. Ndang so boi Ibana paluahon diriNa sian hau pinarsilang i, alai ingkon taononNa, ingkon aeonNa do i asa malua hita. Humopkop hita do dibully Tuhan Jesus, alani unang dohot hita mambully Ibana. Nda hansit do rohanta angka na porsea di Tuhan Jesus, molo taida angka na membully Tuhan Jesus di hatiha i? Ndang dia imbarta sian angka na mamolus, sintua ni malim, siboto surat, nang panamun na manginsahi molo sai tadatdati mangulahon dosa. Molo unduk dope hita tu sibolis, molo diparhatoban dosa i dope hita, dos do i na manginsahi (membully) Tuhan Jesus. Humpokop hita do dibully Tuhan Jesus, alani unang olo hita manginsahi (membully) dongan jolma. Insak-insak (bully) do dibahen natorop tu Tuhanta i. Lungun do rohanta manjaha jala mambegei, alani so tung olo hita manginsahi (membully) donganta. Alai nang pe dinsahi (dibully) Tuhanta i, alai ndang dibalos Ibana. Ndang adong haruar hata panginsahion manang hata bully sian Tuhanta i. Alani, ndang siulahonon ni angka na porsea manginsahi manang membully. Ingkon roha pangoluhon do hita ala nunga dipangolu Debata hita di bagasan Tuhan Jesus Kristus.