Khotbah Mateus 25: 1-13 "Berjaga-jaga dan Setia Menyongsong Kedatangan Tuhan

Khotbah Mateus 25 : 1 – 13     

(Dungo jala Marsihohot Managam Haroro ni Tuhan i)

Minggu Palmarum, 14 April 2019

Ra hira sude do hita hea manonton film Titanic. Ima film na paandarhon barita taringot tu parlonong ni sada kapal di Samudera Atlantik Utara di tanggal 15 April 1912. Torop do halak mamboto barita i laos torop do naung marnida film i. Sian barita na hea tarbege, hatihai di ruang kendali ni kapal i tongon do mangula angka parkarejo hombar tu ulaonna be, laos manghuling ma telepon. Alai ndang apala adong na sigop manjalo telepon i ala tung mansai repot nasida hatiha i. Dung pe salpu piga-piga menit sai manghuling dope telepon i, adong ma sahalak na mangalusi telepon i. Hape sian petugas pengintai di haluan kapal do haroro ni telepon i. Nasida naeng paboahon na adong gunung es dijolo nasida. Telepon i laho mandok asa dipahusor nasida kapal i asa unang hona tu gunung es i. Pintor hobas do nasida saluhutna, asa boi nian tarpasiding nasida gunung es i. Alai nunga tarlambat. Aut sugari ma pintor hatop petugas i mangalusi telepon i, ra ndang masa i. Dipasombu angka petugas i do piga-piga hali partingkian na une laho palua nasida sian parmaraan bolon i. Ai piga-piga hali nunga manghuling telepon i, alai ndang ra roha nasida mangalusi. Hit ape jotjot do songon i. Talos do marsalpuan angka partingkian na une. Jotjot do ndang taparhaseang denggan angka partingkian na adong. Ujungna ro ma panolsolion tu dirinta. I ma na masa tu jolma na so mamangke partingkian (kesempatan) na adong. Gabe luangan ma, gabe susa ma ngoluna dohot ngolu ni keluargana, gariada tahe adong do na lonong jala sahat tu ngolu na paet manang parir, ala so marbisuk mamangke partingkian na adong. Laos i do na pinaandar/pinaingot ni turpuk on tu hita, asa boi hita marsiajar sian 5 anak boru na pantas marroha i, unang ma songon 5 nari anak boru na oto i.

Di hatiha i tongon do Jesus pasahat pangajarion taringot tu haroro ni harajaon banua ginjang. Pangajarion on marbingkas sian sungkun-sungkun nasida (Mat. 24: 3), andigan masa i jala dia ma tanda ni haroro ni Anak ni Debata dohot ajal ni hasiangan on. Tutu adong do tanda i. Di Mateus 24: 3 – 35 dipatotang do, masa ma hapariron, hausaan bolon dohot haholomon. Tarumobi di ay. 29 didok, alai dung salpu haporsuhon ondeng, pintor mangholom ma mata ni ari i, ndang marsinondangbe bulan i, mardabuan ma angka bintang. Dipatorang Jeus do angka tanda i, alai laos tangkas do piga-piga hali diondolhon Jesus paboa ndang adong na umboto sadihari harorona. Jala di turpuk on pe di ayat 13 dipatorang do, ai ndang diboto hamu arina manang sadiharina. Pasti do ro ajal ni hasingan on, pasti ingkon ro do Ibana. Jala di buku Mateus on piga-piga hali dipabotohon Jesus taringot tu ari paruhuman sogot (Mat. 10:15; 11: 22-24; 12: 36), nang taringot tu haroro ni Anak ni Jolma i na paduahalihon (Mat. 10: 23; 16: 28; 25: 31). Diajari Jesus do natorop i paimahon haroro ni Anak ni Jolma manang ajal di portibi on marhite sada umpana taringot tu anak boru na sampulu na paimahon haroro ni pangolin na naeng mangalap oroanna.

Di tradisi ni halak Jahudi somal do dipatupa acara panomunomuon tu pangoli. Jala somalna dipillit do 10 anak boru, paimahon di harbangan ni huta. Jala ingkon disi do nasida paimahon manang sadihari haroro ni pangoli i. Molo dung ro pangoli i, manortori ma angka anak boru huhut manomunomu pangoli i sahat tu bagas ni oroan laho mangalap oroan i. Alani ringkot situtu do anak boru i mamboan palitona be, atik tung borngin parsahat ni pangoli i, asa adong palito na manondangi dala nasida sahat tu jabu ni oroan. Molo tapamanat turpuk on, rap parade diri do 10 anak boru i. Rap diboan do palitona, jala rap laho paimahon di harbangan. Rap loja do nasida, rap mondohondok jala rap tarpodom, rap hehe do mus nasida dung ro pangoli i jala rap pature palitona be. Na mambahen nasida marasing ima kualitas ni pangaradeon i. Sian hibul ni roha do nasida mangarade. Ndada holan palito diboan nasida, alai huhut diboan nasida miak di ingananna. Denggan do diparhaseang nasida tingki. Sabalikna do na masa tu lima anak boru na oto i. Ndang dipangke nasida tingkina laho patupa pangaradeon di angka na ringkot. Sasintongna adong partingkian di nasida, andorang so ro pangoli i, alai ndang diulahon. Hape dung ro pangoli i, nunga tarlambat, ndang adong be tingki laho mangarade. Dung mulak nasida mangalap miak tu palito nasida, hape nunga disordak pintu i jala ndang boi nasida parsidohot di pesta i.

Boha do hita? Nunga boha pangaradeonta manomunomu haroro ni Tuhan i? Nunga taboan palitonta? Nunga galak palitonta? Nunga rade miak tu palitonta i? Manang na mintop do manang matemate ne palitonta? Mangolu do haporsaonta manang na minto do? Pasti do ro Tuhan i paduahalihon. Songon na dihatindangkon si Sepanya 1: 7 “Hohom ma hamu maradophon Tuhan Jahowa. Ai jonok nama ari ni Jahowa” Tarlumobi diondolhon di ayat 14, “Jonok nama ari ni Jahowa na bolon i”. Alani i, taparhaseang tingki. Binsan sadihari. Marbisuk ma hita mamangke tingki parasian on, asa malua hita jala unang sahat hita tu parmaraan na jorbut i. . Pasti do ro Tuhan i paduhalihon, alai ndang adong na umboto andigan masa i. Alani jaga jala dungo ma hita, asa unang luangan, unang mago/tartading jala asa unang hona uhum hita, asa unang ditulak hita songon anak boru na oto i, alai asa dijangkon hita jala parsidohot di hasampuran rea i (ima surgo hasonangan). Antong dungo jala marsihohot ma hita di haporseaonta laho managam haroro ni Tuhan i.