Khotbah Kolose 3: 12-14 "Kasih yang Mempersatukan"

Khotbah Minggu XI Set. Trinitatis 12 Agustus 2018

Kolosse 3 : 12 – 14 

(Haholongan na mangarahut hasadaon)
Patujolo
Gabe halak Kristen na marlapatan ma i gabe halak na marsaoar dohot Debata nang marsaor dohot dongan jolma. Ima na ginoran hubungan na bersifat vertical; hubungan dohot Debata nang hubungan na bersifat horizontal; hubungan dohot donganta jolma (Pat. 1 Kor. 12). Hakristenon mangajarhon hita asa tongtong marsaor dohot angka dongan manang didia pe maringanan, mangula nang marhuria. Diparsaoranta dohot angka dongan, sai tubu do angka persoalan manang masalah na taadopi, jala memang i dinamika ni parngoluanta di portibi on. Alani do dibagasan parsaoranta dohot angka dongan, naeng ma adong di hita holong ni Kristus na mangarahut parsaoranta i. Di tingki disurathon Apostel Paulus surat on tu huria Kolosse, tubu do disi angka parpoda haliluon na naeng manegai hasadaon ni huria i. Dibahen i do mansai ringkot Apostel Paulus mangalehon angka hata sipaingot nang pangajarion tu nasida, asa tongtong huria i mangaramothon hasadaon songon huria naung pinarbadiaan ni Debata. Jala sahat do tu hita nuaeng hata ni Debata sadarion asa hita pe huria na mangolu di partingkian nuaeng on, naeng tongtong mangaradoti hasadaon i.
Hatorangan ni Turpuk
Molo tasadari statusta manang hadirionta songon halak Kristen hita, ise do sasintongna hita? Didok Apostel Paulus Huria i, ima angka naung pinillit ni Debata, angka na badia jala hinaholongan jala dipasada Debata dibagasan holong ni Kristus. Pandohan i pataridahon hadirion ni huria i mansai timbo jala sangap. Hasadaron di hadirionta i, i do na ingkon mangonjar hita mangulahon holong ni Kristus i. Ndang mungkin boi tubu hasadaon di tongatonga ni parsaoranta molo ndang adong holong ni Kristus na mangula di bagasan dirinta. Hasadaon na nirahut ni holong ni Kristus i do hasadaon na tongtong mangharingkothon kebersamaan, nang pe adong angka perbedaan diangka pingkiran manang pandapot di tongatonga ni parsaoranta. Boi do adong angka perbedaan pandapot manang pingkiran di tongatonga ni parsaoranta, alai naeng ma angka perbedaan i unang gabe patubu parsalisian dohot parbadaan manang parbolatbolat on di tongatonganta. Songon naung pinillit jala diparbadiai Debata hita asa tasolukkon ma parasirohaon situtu, habasaon, haserepon, lambok dohot lambas ni roha. Hata solukkon marpardomuan tu na mamangke pahean. Molo pinangke pahean, uli ma tutu pamatangniba, alai molo ndang marpahean, roa ma tutu jala maila ala marsaemara. Alani do di ngolu partondion i mansai ringkot do manolukkon pahean angka nauli songon naung ginoaran nangkin. Jala tangkas do didok Jesus di Lukas 6 : 36 “Gabe parasiroha ma hamu, songon Amamuna parasiroha i!” Ala dipartingkianta nuaeng on di tongatonga ni parsaoranta godang angka dongan na susa, na pogos, na marsiak bagi dohot angka na asing muse. Jala diajari Jesus do hita asa gabe halak lambok marroha jala serep marroha songon na tarsurat di Mateus 11 : 29 “Jangkon hamu ma augangku, marguru ma ham utu Ahu, ai na lambok do Ahu jala na serep marroha, asa dapotan hamu hasonangan ni tondimuna”. Asa boi dapot hita hasadaon di tongatonga ni parsaoranta di huria nang di masyarakat, naeng ma tapaserep rohanta jala tapalambok rohanta tu angka halak na sai patubuhon muruk, manang rimas tu hita manang mambahen hansit rohanta. Asa unang gabe tarseret hita tu pangalaho na so pantas manang na so suman ala dileai hita. Alai naeng ma nian marbisuk hita mangorom murukta manang rimasta, jala marlambas ni roha hita manjalo hahurangan ni angka donganta. Halak na lambok jala na lambas marroha ima halak na olo marpangulahi manang marpanganju di angka hasalaan ni dongan. Saluhut angka sikap manang pangalaho na songon i, ima hataridaan ni hadirionta songon naung pinillit jala diparbadiai Debata.
Laho patoguhon jala pauliulihon parsaoran i dipaingot Apostel Paulus huria i, asa masipauneunean jala masiseaan dosa molo marpanghurangi angka donganta. Saleleng mangolu hita di portibi on, sai adong do kemungkinan angka perbedaan pandapot, pingkiran manang angka parsalisian dohot parbadaan, bahkan di angka halak naung pinillit jala diparbadiai Debata dohot na dihaholongi Debata. Molo holong ni Kristus do na manguluhon roha dohot pingkiranta tarbahen hita do mangaradoti hasadaon. Ala holong ni Kristus i ma hita olo masipauneunean dohot masisesaan dosa. Asa molo adong pe angka na hurang na binahen ni angka donganta di tongatonga ni parsaoranta, unang ma nian sai adong angka dendam kesumat manang adong niat naeng balas dendam alai boi do alani gabe patubuhon angka parsalisian manang parbadaan. Tapasomalsomal ma masisesaan dosa ni angka donganta, ala nunga parjolo tajalo hasesaan ni dosa sian Tuhanta. I do ojahanna, ala nunga disesa Kristus dosanta, hita pe ingkon boi manesa dosa ni donganta. Jala tangkas do muse didok Jesus di Mateus 6 : 14 – 15 “Ai ia disesa hamu sala ni halak na dompak hamu, season nni Amamuna na di banua ginjang i do dohot dosamuna. Alai anggo so disesa hamu sala ni halak dompak hamu, ndang tagamon season ni Amamuna nang dosamuna”. Jala taingot ma songon pandohan di tangiang hatopanta i, ima pandohan di tangian Ale Amanami “Sai sesa ma dosanami songon panesanami di dosa ni dongan na mardosa tu hami”. I do na niajarhon Tuhan Jesus tu sude angka siseanNa nang tu sude halak Kristen sahat tu tingki on. Manesa dosa ni dongan na mardosa tu hita, tarmasuk ma i syarat asa tubu hasadaon di tonga ni keluarga, huria, nang di tongatonga ni masyarakat.
Na parpudi, diayat 14 didok Apostel Paulus do, “Alai di ginjang ni saluhutna i; ima haholongan ni roha i; ai i do rahutrahut ni nasa harimpason”. Asa tasolukhon pahean holong i tu dirinta. Jala songon pandohan ni Apostel Paulus di 1 Korint 13: 13 “Asa tolu do na hot: I ma haporseaon, panghirimon dohot haholongan, alai haholongoan do na umbalga i”. Holong ni Kristus do na gabe paheanta, lambing ni habalgaon dohot tanda na mambedahon hita dohot halak na so mananda holong ni Debata. Holong ni Kristus do na mangarahut dohot pasingkophon hasadaon ni parsaoran ni halak Kristen.
Sipahusorhusoron
Tangkas do taboto marragam do latar belakang ni angka ruas ni huria i, marasingasing be do margana, houmna, hutana, pendidikanna dohot angka na asing muse. Na gabe sungkunsungkun di hita, beha do carana laho pauliulihon parsaoranta? Marhite turpuk on disosoi jala dipaingot hita asa manolukhon parasinirohaon, habasaoon, haserepon, lambok dohot lambas ni roha. Ihut tusi ingkon sai ungkap do rohanta masipauneunean dohot masiseaan dosa. Alai di ginjang ni i, ima haholongan ni roha i, ai I do rahutrahut ni nasa harimpason. Sude do hita adong hahuranganta be, jala ingkon berusaha do hita padengganhon dirinta be, asa boi dapot hita hasadaon. Molo dimaklumo angka dongan pe angka hahuranganta, gabe didok nasida “marboha bahenon ma hita, tajalo ma nga na hurang na binahen ni donganta i“, ndang na marlapatan na sintong hahuranganta i. Tongtong do ingkon olo hita padengganhon diri manguba pangalaho, asa tubu hasadaon di keluarganta, hurianta, punguanta, nang di tongatonga ni parsaoranta di masyarakat. Molo tapasombu do hahuranganta i tu joloan ni ari boi do gabe patubuhon sada masalah i, ingkon marsiajar do hita paubahon diri asa jumpang hita hasadaon i. Amen.