Khotbah Yeremia 33: 10-13 "Mensyukuri Kebaikan Tuhan"

Jeremia 33 : 10 - 13

Manghamauliatehon Dengganbasa ni Jahowa

Misercordias Domini, 05 Mei 2019

Pandohan na somal tabege manang tadok, menunggu waktu adalah suatu pekerjaan yang paling membosankan. Ndang sabar paimahon ujungna gabe sai bobonosan. Pangalaho sisongon i ma na jumpang di ngolu ni halak Israel songon bangso ni Debata dung tarbuang nasida tu Babel di taon 586 SM. Sai tarpaimaima nasida andigan mulak sian habuangan i. Ndang sabar manaon na porsuk binahen ni halak Babel tu nasida. Gabe sai tubu sungkun-sungkun di roha nasida, boasa dipasombu Debata hami songon on, na so holong be roha ni Debata tu hami? Gariada sai naeng tundalhonon naside Debata ala maol ni ngolu i. Alai nang pe tarbuang nasida satongkin do i di Debata, jala pangkeon nasida ma nian ilaho mangarataratai panjouon dohot pamiliton ni Debata tu nasida. I do umbahen didok di buku ni panurirang i, “Satangkirisap lelengna Hutadingkon ho alai papungupunguonku do ho muse marhitehite angka asi ni roha godang (Jes. 54:7). Umbalga sian i godang parsiajaran na arga na boi putihan nasida sian parsorion i. Ima taringot tu ngolu parbangsoon dohot parugamoon di luat sileban. Jala disi ma patuduhonon nasida hasatiaon tu Debata. Alai dipajogal jala dipatangkang rohana maradapohon Debata. Sai dipaingot angka panurirang do nian nasida asa unang mangulahon hatangkangon di adopan ni Debata, alai ndang marnamuba. Sai olo do nasida marsomba, mamele debata sileban (baal). Olo mambahen uhum na so denggan tu angka dongan, papeol uhu dohot angka rumang ni hajahaton na asing. Ima na mambahen rimas ni Debata tu nasida. Alai na ummarga sian i nang pe di habuangan nasida ingkon tongtong nasida marpanindangion paboa hot do holong dohot padan ni Debata tu nasida. Jala siala ni i ma nasida tongtong mandok mauliate nang pe mamolus ragam ni hamaolon.

Hasasaut ni bagabaga sisongon i do pinasahat ni panurirang Jeremia di turpuk jamita on. Nian anggo panjoun na sahat tu si Jeremia nunga mamungka sian taon 627 SM. Alai laos dohot ibana tu habuangan i jala dihurungkon (Jer. 33: 1). Laos sian hurungan i do ibana manurirangi bangso i. Na mandok ingkon mulak do nasida sian habuangan i. Dia ma panurirangon i? Parjolo, hot do bagabaga ni Debata. Ndang sadia lelengna i ingkon bungkas do nasida sian Babel tu Jerusalem. Alai ingkon hot ma nasida marpanindangion tu Debata songon nasailaon. Patubegehon pamujion dohot pamelean tu Debata. Didok di ayat 10, “Tarbege dope sogot disi soara olopolop dohot soara nil as ni roha, soara ni pangolin dohot soara ni oroan”. Nasida do nidokna pangolin dohot oroan ima bangso ni Debata. Paduahon, marpangkirimon dibagasan haporseaon. Sai disoarahon panurirang Jeremia i do asa muba nasida paima mulak tu Jesrusalem. Gariada tahe ingkon lam tamba ma pangkirimon nasida tu Debata. Ala Debata sandiri pe sai tong to dipatuduhon holongNa tu nasida. Patoluhon, naeng satia tongtong tu Debata. Ndang jadi marbalik bangso i sian Debata. Jala ingkon tongtong marsomba huhut mamuji Debata. Di ayat 11 didok, “Puji ma Jahowa Zebaoth, ai pardengganbasa do Jahowa ai ro di salelenglelengna do asi ni rohaNa”. Lapatanna, dibagasan habuangan ima sai ro joujou Debata tu bangso na tarbuang i, asa sai tongtong nasida marningot basabasa ni Debata. Paopathon, ndang jadi tarulang huta Jerusalem atik pe naung ditinggalhon nasida. Alai ingkon gok do suansuanan dohot pinahan marjampal muse disi. Alai i do tano naniuarihon ni Debata tu ompu nasida dohot tu pinomparna. Tole dibagasan huta angka na di dolok, tole dibagasan huta angka na di pea dohot dibagasan huta angka na tungkan dangsina dohot di tano Benyamin dohot dibagasan angka huta Juda (ay. 13).

Tudos tu ngolu ni halak Israel i do jotjot ngolunta. Busisaon, bobonosan huhut mabiar mangadopi ngolu on. Alai songon halak Kristen hita ingkon ngolu na marhasabaron ma niigil ni turpuk jamita on sian hita ruas ni huriaNa. Ala mamolus do ngolunta on di ragam ni angka na masa. Marganti soring angka parungkilon dohot hamaolon na taadopi. Alai di sudena i naeng do tongtong hita marpanindangion tu Debata. Jadi unang bobonosan hita di ngolu on, alai naeng tongtong sabar. “Orang sabar dikasihi Tuhan, semakin sabar semakin dikasihi Tuhan”. Prinsip i do naeng jumpang di ngolu ni halak Kristen. Sabar paimahon tingki, sabar paimahon haroroNa. Ndang saonari; marsogot, ndang marsogot; haduan, taon na naeng ro, dua taon na naeng ro. Sandok unang busisaon di ngolu on. Asa ndada ngolu na bosan hita, alai ngolu na sai tongtong manghirim jala porsea di panarihonon ni Debata. Jala panghirimon ni halak Kristen ima ingkon dumenggan do sadarion sian nantoari, dumenggan do marsogot sian sadarion, ima panghirimon na mangolu. Ala sudena i marharoroan sian Debata. Asal ma tapangido sian serep dohot unduk ni roha, sai na lehononNa do i. I do didok Tuhan Jesus di Mateus 7:7, “Pangido hamu ma sai lehononna do tu hamu, lului hamu ma sai jumpangan do hamu, tuktuhi hamu ma, sai na ungkaponna do di hamu”. Lapatanna unang marnaloja hita mangido tu Debata. Tinggil do sipareon ni Debata tu joujounta dohot angguk-anggukta. Nang apostel Paulus sandiri pe dipaingot do huria Rom asa mian dibagasan panghirimon na mangolu tu Debata. Marlas ni roha ma hamu manghirim, marbenget ni roha ma di haporsuhon. Jugulhon hamu ma tangiang (Rom 12:12). Partangiangan na marsitutu, i do dalanta mangido tu Debata. Unang mansadi hamu martangiang (1 Tes. 5:17), ninna di hata Epistelta i.

Minggu sadarion margoar Misekordias Domini, lapatanna gok asi ni roha ni Jahowa tano on (Psalm. 33:5b). I do tutu tung holan asi ni roha ni Debata sambing do na boi tapangasahon di ngolu on. Panindangion sisongon i ma tongtong mian di hita angka naung manjalo haluaon na binoan ni Jesus marhite hamamateNa dohot haheheonNa. Laos domu do i tu tema ni Minggunta sadari on, manghamauliatehon denggan basa ni Debata. Alai tong ma taingot denggan basa ni Jahowa na umbalga di hita ima Jesus Kristus. Marhite panghophopon ni Jesus Kristus dohot na mangalehon di hita hasesaan ni dosa. Siala ni i ingkon las ma rohanta jala ingkon pujionta ma goarna molo pe ingkon tabolus ragam ni angka hamaolon na masa di ngolunta ganup marsadasada.