Khotbah Yohanes 20: 24-31 "Yesus Bangkit, Percayalah"

JOHANNES 20 : 24 - 31

PORSEA MA HO, NAUNG HEHE JESUS

MINGGU, PASKAH 1, 21 APRIL 2019

Andorang so dipataridahon Jesus diri-Na tu angka sisean i, gok biar do luhut sisean i. Giragira nasida manutup pintu bagas inganan nasida. Hira na martabuni do sisean i di jabu, ndang barani marsaor dohot natorop; ai didok rohanasida sogor roha ni natorop i di nasida ala siihuthon Tuhan Jesus saleleng on. Atik pe naung dibaritahon si Maria Magdalena naung hehe Jesus sian na mate, alai ndang apala bulus dope rohanasida manghaporseai barita i; ai didok rohanasida nang pe so ditanoman i be Tuhan Jesus, atik boha didok, nasida do manangko bangke ni Jesus i. Alani ndang hinata, molo mabiar situtu nasida mida halak Jahudi; gabe sai holan na di jabu, ndang barani manghatindangkon naung hehe Jesus sian na mate. Lapatanna, angkup ni na hurang porsea sisean i di haheheon ni Jesus, sian dirina sandiri pe nunga adong surasura ni roha (asumsi/pikiran) negatif, ima na mambahen nasida dibagasan biar. Ra hit ape jotjot do songon angka sisean i, mabiar manghatindangkon hasintongan ni Debata ala godang asumsi negatif dibagasan rohanta, lumobi ma ala ndang boi tapatorang angka na di bagasan rohanta.

Haheheon ni Jesus mamboan dame dohot las ni roha. Na paling menarik di turpuk on didok Tuhan Jesus tu angka sisean i, “dame ma di hamu!” Hit ape saonari tong dohonon ni Tuhan Jesus ganup tu huriaNa, “dame ma dihamu”. Mansai bidang do lapatan ni hata “dame” na nidok ni Jesus di turpuk on. Dame ro sian hata “Syalom” (Heber), manang “Eirene” (Gorik). Lapatanna pos ma rohanta, Tuhanta i naung monang maralohon dosa, i do manalpuhon sude dosanta na godang i, alani unang lomos rohanta molo tarajumi pardosa godang hita, ai nunga durus mudar ni Jesus di dolok Golgata manggarar utang ni dosanta. Molo dosanta na godang i digarar Jesus, tontu ndang ganggu be rohanta di sipanganon dohot siinumon ro di ari sogot ni keluarganta; pos rohanta adong do Debata pargogo na so hatudosan, naung monang manaluhon hamatean. Ibana do tumangkas manarihon nasa na hasea di ngolunta be, di keluarganta, nang di hurianta pe. Jadi molo tutu porsea hita naung hehe Jesus pasti ingkon adong pos ni roha di pangurupion ni Tuhanta, dao hansit ni roha, dao rasa kuatir, jala pos roha na tongtong do diparrohahon Jesus ulaonta, karier, jabatan, dipadaon angka jolma na naeng manegai ulaonta jala ditopot hita di angka ulaonta siganup ari. Atik pe nuaeng mansai godang hajahaton, sahit dohot ragam ni hasusaan, alai gabe pos rohanta, umbalga do holong ni Debata sian saluhut holsonta. Marnangkok tuat pe tadalani di ngolu on, taboto ma na mangolu do Tuhanta jala tanganNa na badia i manangan-nangan hita di dalan na gogot i.

Haheheon ni Kristus mangajari hita patedekhon rohanta. Atik pe jotjot dipangke karakter ni si Tomas gabe gombaran ni sada halak na maol manghaporseai donganna, alai adong do na patut sitiruon jala sipujion di pangalahona. Ima ungkap ni rohana laho patuduhon na di bagasan rohana, ndang adong na buni di rohana, ndang adong kepalsuan manang kepurapuraan. Sandok na dibagasan rohana i do dihatahon, molo so tarjalosa pingkiran ni donganna sisean ndang dipahohom ibana, alai didok do pingkiranna na manghirim do di pengalaman na mambahen sombu panghilalaanna. Pangalaho na songon i, atik pe agak mengecewakan nang di Tuhan Jesus, alai andul dumenggan do i, jala dianju Tuhan Jesus bangko na songon i. I do umbahen ro Tuhan Jesus sahali nari tu tongatonga ni angka sisean i, uju marpungu nasida rap dohot si Tomas. Gabe dipataridahon Tuhan Jesus diriNa dohot sude tanda haheheonNa tu si Tomas. Didok si Tomas, “Tuhan jala Debatangku”. Jadi didok Tuhan Jesus ma tu ibana, “Ala dung diida ho Ahu umbahen na gabe porsea ho, martua ma angka na porsea, atik pe so diida”. Na boi taida jala taguruhon sian i, ima mansai ringkot do halak Kristen mangolu dibagasan roha na tedek, na terus terang, na jelas patubegehon soarana, unang holan manghohom hira na so adong persoalan alai manihai dibagasan rohana. Mansai godang haulion, pertumbuhan jala gabe uli manang sehat parsaoran molo niloas dongan mananda bangkoniba manang karakterniba.

Haheheon ni Kristus patandahon dalan tu hangoluan. Sasintongna ndang sae holan angka na di Bibel i patoranghon saluhut na binahen ni Tuhan Jesus paluahon jolma sian dosa dohot hamatean. Mansai godang dope na so tarsurat di Bibel i jala ndang tarjamitahon angka parjamita sude na binahen ni Debata manghaholongi portibi on. Alani, unang lupa hita, ndada holan marhite jamita manang marhite na manopot halak tu jabunasida huhut mamboan Bibel hita manogu dongan mandapothon Kristus. Ai songon na pinaingot ni si Johannes di ayat 30-31, mansai godang dope na so disurathon di Bibel i. Asa ndang sae holan na tarsurat i dalanta mamboan dongan asa ditanda Kristus. Ngolunta sandiri dohot keluarganta pe dipangido Jesus do asa gabe tiruan di dalan na sintong na hombar tu lomo ni roha ni Debata, songon na nidok ni apostel Paulus di 2 Korint 3: 3, hita do surat ni Kristus i na tinanda jala jinaha saluhut jolma. Alani, ngolunta siganup ari, panghataionta, pangalahonta di parkarejoan dohot di angka ulaon adat, disi do hita marbarita naul patandahon Kritus tu angka dongan asa dohot nasida mananda haluoan, marhite angka pambahenan nang panghataion na denggan. Haheheon ni Kristus i do patubuhon semangat, mangalehon panghirimon, kepastian dohot las ni roha tu hita. Haheheon i do patauhon hita asa lam hinsa jala hiras rohanta mamboan pangurupion, keadilan nang hasintongan tu angka dongan na gale, na susa, na membutuhkan panguruion. Antong hot ma hita porsea naung hehe Jesus sian na mate, asa di hita tondi haheheon ni Kristus i, na patauhon hita manjalo hangoluan na salelenglelengna.