TATA IBADAH PASKAH 2019

tata ibadah paskah I gereja kristen protestan indonesia (gkpi) resort sagala

TEMA :

YESUS BANGKIT, PERCAYALAH

(JOHANNES 20 : 24 – 31)

mINGGU, 21 APRIL 2019

1.  Hata Patujolo

  P  : Selamat Paskah ma di hita sude! Molo so hehe Kristus i, silang na di Golgota i holan barita parungkilon sambing do i di sejarah ni Timur Tengah. Jala molo so hehe Kristus sian na mate, rumar ma haporseaonta jala tong dope hita mian di bagasan dosa. Dibahen i, tapestahon ma hamonangan ni Kristus i na patundukhon dosa dohot hamatean. Nunga hehe Ibana, alani i tahaporseai ma, paheheon-Na do sogot sude na tardidi di bagasan goar-Na jala mangolu saleleng-lelengna rap dohot Ibana. Antong rap ma hita mamestahon dohot mangolophon hamomonang ni Kristus i di bagasan las ni roha. Haleluya! Nunga hehe Kristus i.

  H : Nunga hehe Kristus i! Haleluya.

  P  : Nunga hehe Kristus i! Nunga monang Ibana maralohon hamatean

  H : Nunga hehe Kristus i! Pinuji ma Ibana.

  P  : Nunga hehe Kristus i! Haleluya 

  H : Haleluya. Pinuji ma Ibana

2.  Marende B.E. No. 95  : 1 – 3   “Ngot ma ho dijou soara”

Haleluya! Taendehon Nuaeng di ari haheheon Tuhanta Siparmonang i.

Ai malua do Ibana, Haruar sian tanomanNa; Na talu hamatean i.

Sun ulaonNa i dibaen Tuhanta i. Haleluya!

Naung sahat di Tuhanta i. UpaNa na sumurung i.

Tongam di parungkilonNa dipangke Jesus i gogoNa. Mangalo sipangago i.

Hita Naung pinarhatoban ni setan dapot haluaon. Dibaen hamonanganNa i,

Naung sae utangta i digarar Jesus i, Haleluya

Di Tuhan i rohanta i saleleng ni lelengna i.

Na so pola habiaran ni hita on be hamatean, ai hita pe sai hehe do.

    Molo burju taihuthon Tuhanta i di parungkilon sai ingkon tu lambungNa ro

Diboan Jesus i do hita on muse tu lambungNa. Parmonang i!

Sai saut ma i binaen ni hagogoonMi!

3.  Votum    :                                                                               (Huria Jongjong)

  P  : Dibagasan goar ni Debata Ama, dohot goar ni Anak-Na Tuhan Jesus Kristus dohot goar ni Tondi Parbadia, na manompa langit dohot tano on.

H : Amen.

4.  Panopotion ni Dosa

 P  : Hamu angka dongan na hinaholongan di bagasan goar ni Tuhanta, tadapothon ma Debata dibagasan serep ni roha. Tatopoti ma sude dosanta huhut mangido hasesaan ni dosanta tu Ibana di bagasan goar ni Tuhanta Jesus Kristus silehon haluaon i. Ianggo pangurupion di hita i ma dibagasan goar ni Jahowa

 H : Sitompa langit dohot tano on.

 P  : Ale Debata Ama Pargogo na so hatudosan, Sitompa jala Sitobus hami, pardosa godang do hami jala tung so tama d hami jongjong di adopan-Mu. Nunga mardosa hami maradophon Ho marhite pingkiran, panghataion nang pambahenan nami pe. Dibahen i do umbahen na ro hami tu Ho mangido hasesaan ni dosa nami ala ni Anak-Mu Tuhan Jesus Kristus Tuhan nami. 

 H : Mangendehon B.E No. 171 : 1 – 2             “Tandai ma au”

Tandai ma au! Sungkapi ma dohot rohangku.

Uji ma au. Pamanat huhut ma dalanku.

Olo ditanda Ho au Debata!

Asi ma rohaM taringot tu pangalahongku.

Olo, tutu, jotjot do na lilu dalanku

Sesa dosangku sude Debata!

P  : Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. Hasangapon ma di Debata na di ginjang.

H : Amen.                                                                                  (Huria Hundul)

5.  Marende B.E. No. 90 : 2 + 5    “Sai marlas ni roha hita”

Anggo utang ni dosangku digarari Jesus i;

I do haporseaonku di na tinaonNa i.

Nunga tulus patik i, nunga mintop rimas i;

Di na hehe i Ibana, diarahon hangoluanna.

On tongtong do huhalashon; Nunga hehe Jesuski.

Dohot ma hamu donganku angka na tinobus i,

Sai tapuji Debata, sai tadok: Haleluya!

Na mangolu do Tuhanta ala ni sai las rohanta.

6.  Introitus :                                                                              (Huria Jongjong)

P  : Unang ho mabiar, ai Ahu do Parjolo jala Parpudi! Ahu do Siparngolu; naung mate do Ahu najolo, gabe mangolu antong ro di salelenglelengna; di Ahu do anak hinsu ni hamatean dohot banua toru! Haleluya!

H : Hasangapon ma di Debata Ama, Anak, dohot Tondi Parbadia, sian mulana, saonari, ro di saleleng-lelengna. Amen,

7.  Kirye Eleison (Tuhan, asi ma rohaM di hami)

P  : Tuhan, asi ma roham di hami.

H : Tuhan, asi ma roham di hami.

P  : Kristus, asi ma roham di hami.

H : Kristus, asi ma roham di hami.

P  : Tuhan, asi ma roham di hami.

H : Tuhan, asi ma roham di hami.

8.  Hasangapon ma di ginjang   :

P  : Hasangapon ma di Debata di ginjang.

H : Dame ma di tano on, di angka jolma halomoan i.

9.  Tabe & Tangiang Kolekta     :

P  : Tuhan mandongani hi!

H : Dohot mandongani ho!

P  : Martangiang ma hita :

Ale Kristus naung hehe jala na pataridahon diri tu si Maria Magdalena di manogot i di ari hamonangan-Mi.

H : Ungkap ma mata ni haporseaon nami asa boi huida hami haroroM di ngolu nami na manorusi sude angka ganggu ni roha nami.

P  : Ale Kristus naung hehe jala pataridahon diri tu dua halak sisean di dalan na tu huta Emmaus.

H : Ungkap ma mata ni haporseaon nami asa boi huida hami haroroM di pardalanan ni ngolu nami asa marsigorgor roha nami di bagasan holong tu Ho nang tu dongan nami jolma.

P  : Ale Kristus naung hehe jala pataridahon diri tu angka sisean di topi ni Tao Galilea jala na manganhon samponggol dengke na tinutung.

H : Ungkap ma mata ni haporseaon nami asa boi huida hami haroroM di panggulmiton ni ngolu nami siganup ari, asa huboto hami mandok mauliate di sude angka pasupasuM huhut huingot hami sude halak na marungkil dope di parngoluan siganup ari.

P  : Ale Kristus naung hehe jala pataridahon diri di dolok, jala mangalehon tona tu anka sisean-Na asa borhat laho marbarita nauli tu sude bangso.

H : Ungkap ma mata ni haporseaon nami laho marnida haroroM di panindangion dohot panghobasion nami, asa pos roha nami di pandonganion-Mu di hami sahat tu ari parpudi jala manggogoihon hami manghatindangkon holong dohot parpamuation ni rohaM di tonga-tonga ni portibi on na jotjot marlaok hosom, pangarupaon nang angka haholiton pe.

P  + H : Hupuji hami ma ho ale Tuhan, ai Ho do panggomgomi rap dohot Ama na songkal i dohot Tondi Parbadia, di tingki on sahat ro di saleleng-lelengna. Amen.                                                      (Huria Hundul)

10.      Marende B.E. No. 93 : 1 – 2            “Pesta Paska, hatuaon!”

Pesta Paska, hatuaon! Pesta Paska, Haluaon

Sian hamatean i! Sian hamatean i!

Tuhan Jesus do pasuang, hangoluan, hasonangan tu saluhut jolma i.

Talu ho banuatoru, ndang tarbahen tiopanmu

Raja Siparngolu i, Raja Siparngolu i,

Hamatean, hamagoan, Na so pola habiaran; Nunga talu i sude.

11.      Epistel            : Mazmur 21 : 1 – 7  

P  : Hata ni Debata patujolo ni Jamita di Pesta Ari Haheheon sadari on, i ma na tarsurat di Mazmur 21 : 1 – 7

Ende sian si Daud. Ale Jahowa, marlas ni roha do rajai mida gogom, jala marolopolop situtu do ibana mida panumpahim.

H : Dilehon Ho do tu ibana pinangido ni rohana, jala ndang dijua Ho pinangido ni hatana.

P  : Ai ditomutomuhon Ho do tu ibana angka pasupasu ni hadoharon, ditalitalihon Ho do tu uluna tumpal sere palangki.

H : Hangoluan do dipangido sian Ho, dilehon Ho do tu ibana, diudut Ho do ariarina ro di salelenglelengna.

P  : Timbul do hamuliaonna dibahen panumpahim; hatongamon dohot hatimbulon diampehon Ho tu ibana.

P+H : Ai parhitean ni angka pasupasu do ibana dibahen Ho salelenglelengna, dipasabam Ho do rohana marhitehite las ni roha mida bohim.

P  : Martua ma angka na umbege hata ni Debata naumpeopsa jala na mangulahonsa.

H : Mangendehon         : Haleluya, Haleluya, Haleluya.

12.      Marende B.E. No. 91 : 1 + 5           “Hatuaon do”

Hatua on do las ni roha do Hangongot ni Tuhanta i.

Mago do hita, ngot ma Tuhanta, Las be las be ma rohanta i!

Mago do hita, ngot ma Tuhanta, Las be las be ma rohanta i!

Hatua on do las ni roha do Hangongot ni Tuhanta i.

Monang ma hita jumpa ajalta, Las be, las be ma rohanta i!

Monang ma hita jumpa ajalta, Las be, las be ma rohanta i!

13.      Manghatindanghon Haporseaon            :                                  

(Huria Jongjong)

P  : Tahatindanghon ma haporseaonta i, songon na hinatindanghon ni donganta sahaporseaon di portibi on, sian mula ni Huria I sahat tu sadari on. Rap mandok ma hita :

14.      Marende B.E. 96 : 1 + 3       “Nunga talu hamatean”

Nunga talu hamatean dibaen Tuhan Jesus i,

Ai na hehe do Ibana songon na nidokna i.

Haleluya, Haleluya! Nunga hehe Jesus i,

Haleluya, Haleluya! Nunga hehe Jesus i,

Marlasroha be ma hita ala hehe Jesus i

Ai malua sude hita sian hamagoan i.

Haleluya, Haleluya…..

15.      Tingting/Berita Gereja       :

16.      Tangiang Pangondianon   :

17.      Marende B.E. No. 89 : 1 + 3 – 4     “Ate di dia soropmi”

Ate di dia soropmi nuaeng, o hamatean?

Di dia hamonanganmi nuaeng, banua toru?

Na talu do hamu sude, na talu do sibolis pe, ai ditaluhon Jesus.

Mangolu do naung mate i, hurungan dilohahon;

Dirante do musunai tabanna diarahon.

Tung ise na mangate be mangalo ulubalang i,

Na so tarbaen so monang?

Mangolu do Tuhanta i na hehe do Ibana;

Ditaiti do ruasna i mangihut tu Ibana,

Ndang tinggal di tanoman i saluhut na porsea i, di hata ni Tuhanta.

18.      Jamita : Johannes 20 : 24 – 31   

19.      Marende B.E. No. 457 : 1 – 2          “Bagas ni haholongan”

Bagas ni haholongan naung sun hinaholongkon

Ni Debatanta i tu hita jolma i.

Na tuat do AnakNa tumopot hita jolma.

Hupuji holongMi, na so mansohot i,

Hupuji holongMi, na so mansohot i.

Diporsan do dosanta, targantung do singkatta

Di hau parsilang i, songon parjahat i.

Na mate do Ibana, hita pinaluana

Hupuji holongMi………

20.      Ayat Pelean  : 1 Musa 4 : 4

P  : Andorang so tapasahat do pe peleanta, tabege ma Hata ni Debata ojahan ni haporseaonta laho pasahathon pelean i, i ma na tarsurat di 1 Musa 4 : 4

“Jadi dohot ma si Abel mamboan sian buhabaju ni birubiruna dohot sian tabotabona. Jadi lomo ma roha ni Jahowa mamereng si Abel dohot na pinelehonna i.” Amen.

21.      Tangiang Pelean     :                                                         (Huria Jongjong)

22.      Ende Pelean B.E. No. 472 : 2 – 3                “Sai malungun do”

Sagusagu hangoluan dipangido rohangki,

Ai na pogos au, o Tuhan, loja au di dalanki.

Ndang adong siboanonku, ndang marisi tanganki,

Lehon ngolu sian ginjang lao pasabam tondingki.

23.      Tangiang Panutup  : Ale Amanami

24.      Pasupasu       :

25.      Amen, Amen, Amen.

PENDETA DAN PENGURUS HARIAN RESORT

MENGUCAPKAN :

“SELAMAT HARI PASKAH”