TATA IBADAH PASKAH SUBUH

partording ni acara   parningotan ARI HAHEHEON NI TUHAN JESUS BUHA-BUHA IJUK gereja kristen protestan indonesia (gkpi) resort sagala

TEMA :

KEBANGKITAN DAN HIDUP

(JOHANNES 11 : 17 – 27 )

MINGGU, 21 APRIL 2019

1.   Marende B.E. No. 96 : 1 – 3     “Nunga talu hamatean”

Nunga talu hamatean dibaen Tuhan Jesus i,

Ai na hehe do Ibana songon na nidokna i.

Haleluya, Haleluya! Nunga hehe Jesus i,

Haleluya, Haleluya! Nunga hehe Jesus i,

Ia angka boruboru lao do tu tanoman i;

Ndang disi be Tuhan Jesus nunga hehe sian i.

Haleluya, Haleluya………..

Marlasroha be ma hita ala hehe Jesus i

Ai malua sude hita sian hamagoan i.

Haleluya, Haleluya………………..

2.   Votum – Introitus – Tangiang  :

P  : Pesta haheheon di Buhabuha Ijuk, parningotan di haheheon ni Tuhanta Jesus Kristus na tapatupa sogot manogot on, dipungka jala mardalan di bagasan goar ni Debata Ama, Anak, dohot Tondi Parbadia.

H  : Amen.

P  : Ari on do na jinadihon ni Jahowa, marolopolop jala marlas ni roha ma hita disi.

H  : Batu naung binolongkon ni angka pande bagas i, ima gabe batu parsuhi. Sian Jahowa do i masa, halongangan do i anggo di matanta.

P  : Iale Jahowa, sai manumpak ma Ho.

H  : Iale Jahowa, sai Ho ma mambahen manjadi. Haleluya!

P  : Martangiang ma hita

      Ale Tuhan Jesus Kristus Tuhan nami, naung hehe sian na mate. Sogot manogot di buhabuha ijuk on, ro do hami di bagasan las ni roha laho mandok mauliate, mamuji jala pasangaphon goar-Mu, naung manaluhon huaso ni sibolis dohot hamatean ala ni haheheon-Mi. Nunga disondangi Ho roha nami, asa gabe marpangkirimon na mangolu hami. Ndang huhabiari hami be hamatean, ala Ho do Tuhan jala sipangolu hami. Nunga dipaunsat Ho hami sian haholomon tu hatiuron, sian hamatean tu hangoluan na salelenglelengna. Ale Tuhan sai pargogoi ma hami mangulahon lomo ni rohaM, marhite hata, parange dohot pangulaon nami. Pinuji ma goar-Mu, sadarion ro di salelenglelengna.

P+H         : Amen

3.   Marende B.E. No. 91 : 1 – 2     “Hatuaon do”

Hatua on do las ni roha do Hangongot ni Tuhanta i.

Mago do hita, ngot ma Tuhanta, Las be las be ma rohanta i!

Mago do hita, ngot ma Tuhanta, Las be las be ma rohanta i!

Hatua on do las ni roha do Hangongot ni Tuhanta i.

Monang do Jesus, talu sibolis, Las be, las be ma rohanta i!

Monang do Jesus, talu sibolis, Las be, las be ma rohanta i!

4.   Epistel     : Jona 2 : 1 – 10

P  : Dung i diparo Jahowa ma sada ihan raja, asa di bondut si Jona. Jadi * di bagasan butuha ni ihan i ma si Jona tolu ari tolu borngin.

H  : Dung i martangiang ma si Jona tu Jahowa Debatana, sian butuha ni ihan i.

P  : Jala didok ma: Joujou do ahu sian hagogotanki tu Jahowa gabe dialusi ibana ahu. Sian butuha ni parbeguan ahu mangangguhi: Ditangihon ho do soarangki!

H  : Nunga direongkon ho ahu tu bagasan lung tu bagasan pusupusu ni laut, gabe pusat mangkaliangi ahu, sude angka ombakmi dohot galumbangmi mangalungkupi.

P  : Ianggo ahu, nunga hudok: Nunga bali ahu sian jolo ni matam; alai tahe ulahanku dope mamereng dompak joro habadiaonmi.

H  : Nunga nian dihaliangi angka aek i ahu, pola tos hosangku, lung i pasampaksampak ahu sirambon do alit tu ulungku.

P  : Nunga mangungkor ahu sahat tu bona ni angka dolok, ransangransang ni tano on pe nunga tarsordak humaliang ahu ro di salelenglelengna. Alai dipanangkok ho ngolungku sian godung ale Jahowa Debatangku.

H  : Uju mandate hosangku di bagasan, Jahowa ma huingot, jadi sahat ma tangiangku tu ho, tu joro ni habadiaonmi.

P  : Alai halak na * marsomba tu ganaganaan sipaotooto, i ma na manadingkon hasonangannasida i.

P+H         : Alai anggo ahu mardongan soara pujipujian ahu mamele tu ho, gararonku do na huparbagabaga, Jahowa do nampuna hatuaon.

P  : Martua ma angka na umbege hata ni Debata naumpeopsa jala na mangulahonsa.

H  : Amen.

5.   Marende B.E. No. 94 : 1 + 3     “Ale tondingku, naung hehe”

Ale tondingku, naung hehe Tuhanmu, Nunga ditaban do banuatoru;

Las ma roham, ai martua ma ho;

Rap dohot Jesus mangolu ma ho; Rap dohot Jesus mangolu ma ho;

Tahaburjuhon mangalo dosanta, jala tabaen Tuhan Jesus donganta.

Posma rohanta di Tuhanta i;

PamonangonNa do hita sude; PamonangonNa do hita sude.

6.   Panjahaon I        : Agenda nomor 1 – 13

Paragenda      : Alai torang ni arina i, na mangihut tu ari parhobasan i, marluhut ma angka sintua ni malim ro di Parise tu jolo ni si Latus, angka ninna ma:

Sude Pangula : Huingot hami, Tuannami, naung didok Pangansi i, di na mangolu dope Ibana: "Na hehe ma Ahu di ari patoluhon!"

Paragenda      : Antong, dokkon ma na manjaga tanoman i sahat ro di ari patoluhon, asa unang ro angka siseanna manangko Ibana, jadi dohononnasida ma tu natorop: Naung hehe Ibana sian na mate; gabe rumoa maon sipaotooto parpudi sian na parjolo i.

Sude Ama      : Jadi didok si Latus ma tu nasida: Togihon hamu ma parjaga i! Laho ma hamu mangaramotisa sian nasa rohamuna!

Sude Ina         : Dung i laho ma nasida mangaramoti tanoman i, dipajagahon, huhut ma disahapi batu i.

Paragenda      : Asa dung salpu ari Sabbat i, dituhor si Maria Magdalena dohot si Maria ni si Jakobus rap dohot si Salome ma ragamragam ni na hushus, laho mamiahi bangkena. Jadi mansai sogot di ari parjolo dung Sabbat i, laho ma nasida tu tanoman i, di na binsar mata ni ari.

Sude Ina         : Masipandohan do nasida: Ise ma manggulang batu i di hita sian baba pintu ni tanoman i?

Paragenda      : Alai nunga masa lalo na gogo. Ai tuat do surusuruan ni Tuhan sian banua ginjang; jala dung sahat, digulang ma batu i, laos hundul diatasna.

SudeHuria      : Mamereng dompak i nasida, diida ma naung digulang batu i, ai na balga situtu do i. Dibongoti nasida ma tanoman i, gabe diida ma dolidoli sahalak, parulos na marlinanglinang, hundul tungkan siamun, jadi mabiar situtu ma nasida.

Paragenda      : Alai ninna surusuruan i ma mandok parompuan i: Unang hamu mabiar, ai huboto, dilului hamu do Jesus, naung diparsilangkon. Ndang dison Ibana. Ai nunga hehe Ibana, songon na nidokna hian. Pajonok hamu ma; ida hamu ma inganan hapeahanna i!

Sude Huria     : Mangendehon Reff. BE. No. 96: 1

                         Haleluya, haleluya, nunga hehe Jesus i,

Haleluya, haleluya, nunga hehe Jesus i.

Paragenda      : Hatop ma hamu laho tu angka siseanna i paboahon, naung hehe Ibana sian na mate, jadi joloananna do hamu tu Galilea, disi ma idaonmuna Ibana; nunga hupaboa i tu hamu.

Sude Ina         : Dung i ruar ma nasida maporus sian tanoman i, laos angka dotdot do nasida jala tarmali. Jadi ndang adong dipaboaboa nasida agia tu ise, ai na tahuton do rohanasida.

7.   Marende B.E. No. 89 : 4           “Ate didia soropmi”

Mangolu do Tuhanta i na hehe do Ibana;

Ditaiti do ruasna i mangihut tu Ibana,

Ndang tinggal di tanoman i saluhut na porsea i, di hata ni Tuhanta.

8.   Panjahaon II : Agenda nomor 14 – 26

Sude Naposo : Laos jongjong do si Maria dibalian ni tanoman i tumatangis, jadi di partangisna i dipaunduk ma ibana dompak tanoman i.

Paragenda      : Gabe diida ma hundul disi surusuruan dua, parabit na marlinanglinang; na sada tartungkan julu on, na sada nari tartungkan inganan ni pat ni hapeahan ni bangke ni Jesus.

Sude S.M        : Didok nasida ma tu ibana: Boasa tangis ho, inang?

Sude Naposo : Dibuat na mambuat do Tuhanki; ndang huboto, manang na tudia ditaruhon.

Paragenda      : Mandok songon i, humusor ma ibana dompak pudi, gabe diida ma Jesus jongjong disi; alai ndang ditanda.

Sude S.M        : Dung i didok Jesus ma tu ibana: Boasa tangis ho, inang? Ise dilului ho?

Sude Ina         : Jadi dirimpu rohana ma, tukang porlak i Ibana, gabe didok ma tu Ibana: Anggo hamu do mambuat Ibana, paboa hamu ma tu ahu, manang na tudia ditaruhon hamu asa hualap Ibana!

Paragenda      : Dung i didok Jesus ma tu ibana: Maria! Jadi didompakkon si Maria ma Ibana huhut mandok: Ale Guru!

Sude Pangula : Jala didok Jesus ma tu ibana: Unang Ahu jama; ai ndang dope nangkok Ahu tu Ama i. Alai laho ma ho tu angka anggingki, dok ma tu nasida: Na laho nangkok ma Ahu tu Damang jala Amamuna, tu Debatangku jala Debatamuna.

Sude Ina         : Dung i laho ma si Maria Magdalena, dibaritahon ma tu angka sisean i: Nunga huida Tuhan i,

Sude Huria     : Mangendehon Reff. BE. No. 96: 1

                         Haleluya, haleluya, nunga hehe Jesus i,

Haleluya, haleluya, nunga hehe Jesus i.

Paragenda      : Nunga tarbondut hamatean; nunga soluk hamonangan! Jo hamatean, didia hamonanganmi?

Sude Huria     : Jo hamatean, didia soropmi?

9.   Marende B.E. No. 92 : 1                       “Puji ma na manaluhon”

Puji ma na manaluhon dosa hamatean i;

Puji ma na pangoluhon saluhut pardosa i,

Jesus na dung mate i, las roham, o huriaNa,

Ala na mamillit ho, Jesus i, mangolu do.

10.        Panjahaon III : Agenda nomor 27 – 39

Paragenda      : Naung tutu do dipahehe Tuhan i

Sude Huria     : Ari on do na jinadihon ni Jahowa, marolopolop jala marlas ni roha ma hita disi.

Paragenda      : Naung tutu do dipahehe Tuhan i

Sude Huria     : Mangendehon Reff. BE. No. 96: 1

                         Haleluya, haleluya, nunga hehe Jesus i,

Haleluya, haleluya, nunga hehe Jesus i.

Paragenda      : Marhua ma dohonon ni na deba sian tongatongamuna, na so adong haheheon ni angka naung mate, dung sanga binaritahon taringot tu Kristus, paboa naung dipahehe Ibana sian na mate!

Sude Naposo : Alai anggo so adong haheheon ni angka na mate, ndang na hehe nang Kristus.

Sude Pangula : Ai anggo so hehe Kristus sian angka na mate, rumar ma jamitanami, laos rumar ma nang haporseaonmuna.

Sude Huria     : Mangendehon Reff. BE. No. 96: 1

                         Haleluya, haleluya, nunga hehe Jesus i,

Haleluya, haleluya, nunga hehe Jesus i.

Paragenda      : Ai songon marhite sian sada jolma songgop hamatean, songon i do marhite sian sada Jolma haheheon ni angka naung mate.

Sude Ama      : Ai tangkas do huboto mangolu do Sipangolu ahu, jala Ibana parpudi jongjong di atas orbuk. Jala ia dung malangke hulingkulingkon, jala malua ahu sian sibukkon, idaonku ma Debata.

Sude Huria     : Ai on do huboto hami: Di na tanggal bagas parlapelapeannami na sian tano on, adong ma di hami inganan na sian Debata, bagas na so pinauli ni tangan, na mian salelenglelengna di banua ginjang i.

Paragenda      : Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on.

Sude Huria     : Hami do panindangi di hata on dohot Tondi Parbadia, na nilehon ni Debata tu angka na mangoloi Ibana. Amen.

11.        Tangiang Pangondianon      :

12.        Marende B.E. No. 95 : 1 + 3             “Ngot ma ho dijou soara”

Haleluya! Taendehon Nuaeng di ari haheheon Tuhanta Siparmonang i.

Ai malua do Ibana, Haruar sian tanomanNa; Na talu hamatean i.

Sun ulaonNa i dibaen Tuhanta i. Haleluya!

Naung sahat di Tuhanta i. UpaNa na sumurung i.’

  Na so pola habiaran ni hita on be hamatean, ai hita pe sai hehe do.

  Molo burju taihuthon Tuhanta i di parungkilon sai ingkon tu lambungNa ro.

  Diboan Jesus i do hita on muse tu lambungNa.

  Parmonang i! Sai saut ma i binaen ni hagogoonMi!

13.        Jamita : Johannes 11: 17 – 27

14.        Marende B.E. No. 99 : 1       “O Tondi Parbadia i, bongoti”

O ulubalang na gogo, songon sadarion do Ho manaek tu hasangapon!

Naung sidung do ulaonMi; na ringkot patupaonMi,

humophop hajolmaon. Sabam, tongam do Ho muli

Tu na uli marhabangsa di siamun ni Jahowa.

15.        Ayat Pelean    : 1 Musa 4 : 4

16.        Tangiang Pelean        :

17.        Ende Pelean B.E. No. 9 : 4   “Hupuji holong ni roha-Mu”

Di Ho saleleng ni lelengna, au on o Jesus, Tuhanki!

Ho ma nampuna sasudena gogongku rodi artangki!

Ai naung dilehon Ho mudarMu manggarar utang ni dosangku.

18.        Tangiang Panutup    :

P  : Ale Tuhan Debata Amanami, mauliate ma hupasahat hami tu Ho, ala ni haluaon dohot hatuaon na pinatupa-Mi di hami saluhutna, marhite haheheon ni Anak-Mu Jesus Kristus, naung monang manaluhon sibolis dohot sorop ni hamatean. Antong jalo ma tangiang nami on, ditangiang na pinodahon ni Anak-Mu Jesus Kristus Tuhan nami, di na rap hami mandok :

19.        Paborhathon – Pasupasu     :

Mulak ma hamu (hita) di bagasan dame, baritahon hamu (tabaritahon) ma Barita haluaon i, tu nasa na tinompa, marhite gulmit ni ngolumuna (ngolunta) siapari, jala jalo hamu (tajalo) ma pasu-pasu sian Tuhanta :

Asi ni roha ni Tuhanta Jesus Kristus, dohot holong ni roha ni Debata Ama, dohot parsaoran ni Tondi Parbadia, i ma na mandongani dohot mamasumasu hamu (hita) saluhutna. Amen.

20.        Marende B.E. No. 96 : 4 (Singkat ni Amen,amen,amen)

Sai tapuji ma Tuhanta na marholong roha i

Tapasangap ma Ibana na marasiroha i

Haleluya, haleluya, nunga hehe Jesus i,

Haleluya, haleluya, nunga hehe Jesus i.