Khotbah Daniel 3: 21-29 Penyertaan Allah Bagi Orang Yang Setia

Daniel 3: 21 - 29

Pandonganion ni Debata di angka na Satia

Minggu Exaudi; 02 Juni 2019

Sian na hinan sai adong do hasusaan, hamaolon dohot parungkilon na diadopi torop siihuthon Jesus Kristus. Hira di sude inganan do boi pangarupaon, pangaleleion manang mangambati ngolu ni na porsea i sian angka na so manghalomohon siihuthon Kristus. Jotjot nasida mangasahon torop dohot mangasahon botohan. Nian adong do di negaranta on Undang-undang na mangatur hita mangihuthon Debata na tasomba. Alai, ala ndang uli dope mardalan uhum di negaranta on, ndang boi hita holan mangasahon i. Lapatanna ingkon tongtong do hita holan mangasahon huaso ni Debata. sahat tu naeng torus dope adong paraloan ni siihuthon Kristus tu na so marlomo ni roha tu halak Kristen. Sian turpuk jamita on, boi taparsiajari

1.      Pangunjunan ni angka na satia tu Jahowa

Dipatungkanghon raja Nebukadnesar sada ganaganaan sian sere asa sude jolma ginomgomanna marsinggang dohot manomba ganaganaan i. Alai adong ma tolu halak aleale ni si Daniel, i ma na margoar Mesak, Sadrakh dohot Abednego, na so mangoloi parenta ni raja i. Ndang olo nasida marsomba manang mamele di jolo ni ganaganaan i. Alani mansai muruk situtu do raja i, ala dialo nasida parenta ni raja Nebukadnesar, jala disangkapi naeng mamusa nasida na tolu. Ditali ma na tolu halak i laos dipatimpalhon tu bagasan liang pamurunan na marnalanala. Pangunjunan na mansai dokdok do binahen ni raja i. Alai, ala tangkas do dipatikhon Jahowa tu bangso Israel na so jadi oloan ganaganaan, alai holan Jahowa do na ingkon siloloan dohot sisombaon, dialo nasida do parenta ni raja Nebukadnesar i. Pangunjunan songon ni adopan ni na tolu halak i, boi do masa nang di partingkian nuaeng. Sai adong dope jolma di manang piga inganan di negaranta on na sai mangondam hosa ni halak Kristen molo so olo mangalaosi haporseaonna. Adong do na satia di haporseaonna, adong muse do na so satia. Rumang ni pangunjunan na asing boi ma arta, ulaon dohot sinamot. Adong do halak Kristen ala mangharingkothon hamoraon diparsoada haporseaonna jala laos ditadinghon Tuhanta i.

2.      Dipadao Jahowa parmaraan sian angka na satia

Dung dibege adong jolma na so unduk tu parentana disuru ma angka naposona na gumogo laho manimpalhon nasida tu api na pitu hali ummohop laho manurbu. Alani mohopna gabe na mangampehon na tolu halak i do disoksok api jala laos mate. Longang situtu raja i mamereng na masa i, alani dijou ma angka panuturina laos didok ma, nda tolu baoa na ditali i laho manimpalhon tu bagasan api? Sungkunsungkun do ibana ala ndang holan tolu halak diida di bagasan api i. Tangkas dibereng adong opat halak di api i jala alani ma dihatindanghon ibana, ida ma opat huida harhar talina mardalandalan di bagasan api, ndang mahua nasida. Sian na masa tu na tolu halak i, taida do songon dia Debata mangondihon angka na satia tu Ibana. Ndang dipasombu mago hosa ni angka na marhaporseaon tu jahowa. Tingki ro pangunjunan dohot parmaraan, disuru do suruanNa laho padaohon manang pasidinghon hamamago manang jean a diparade angka parjahat. Ndang marmara tondi dohot daging ni na marhaporseaon jala satia tu Debata. Ro do suruan ni Jahowa paluahon na satia i.

3.      Hamubaon ala pambahenan ni Jahowa

Mangihuthon mohop ni api di bagasan pamurunan na marnalanala i, na ingkon mate ma nian sitolu halak i di si, alai nanggo otik ndang agia mahua nasida. Sada halongangan bolon do i na binahen ni Debata tu angka na satia tu Ibana. Halongangan na ni ida ni raja Nebukadnesar i ndang holan paubahon pingkiranna gabe paluahon na tolu i sian bagasan api i, alai dohot do tu panindangion. Halongangan ni raja i marnida na so mahua na tolu halak i dipatorang marhite hata na mangondolhon pandonganion ni Debta, i ma halak na paopathon, na rupana tudos tu anak ni angka raja. Alani do muba raja i di na nidokna: Pinuji ma Debata ni si Sadrak, si Mesak dohot si Abedneg, naung marsuru suruanNa, asa dipalua naposoNa, angka na marhaposan tu Ibana, gabe ndang dioloi parenta sian harajaon, tung diseahon nasida do dagingna, asal unang mangoloi manang marsomba tu debata sileban, dungkon ni tu Debatana”. Pandohan ni raja i gabe jamita do tu luhut jolma na ginomgomanna. Hasatiaon ni na tolu i gabe tiruan tu angka na mura munggil haporseaonna.

4.      Marsangap Jahowa ala Hasatiaon ni na Porsea

Ayat parpudi ni turpuk on pabotohon tu hita parenta ni Nebukadnesar na manontuhon tu sude na nirajaanna: Manang ise sian angka bangso, houm dohot parpangkuling marragamragam mandok hata insahinsak dompak Debata ni si Sadrak, si Mesak dohot si Abednego. Ingkon tanggoan ibana, jala bagasna gabe partangkalan bahenon, ai ndang adong debata na asing na tuk paluahon, songon Ibana. Jaminan na mansai togu do parenta ni raja i jala mambahen Jahowa marsangap, ai ndang adong be na barani manginsahi goar ni Debata. diparhatutu raja Nebukadnesar do huaso ni Jahowa na so adong tudosanna. Ibana do Jahowa pargogo na so hatudosan songon naung tahatindanghon di hata haporseaonta. Hasatiaon na tolu halak i tu Debata manghorhon pamujion sian Raja Nebukadnesar.

Dung tabege barita na masa tu hasatiaon ni si Sadrak, si Mesak dohot s Abednego, nang panindangion ni pamujion ni Raja Nebukadnesar i, adong na porlu siulahononta di ngolunta songon angka na porsea. Asa tapasiding ma hinajorbut ni Sinkretisme ni haporseaon. Raja Nebukadnesar porsea do tu angka ganaganaan huhut porsea bahkan pasahaton peleanna do ibana muse tu Debata ni bangso Israel. Sapala naung porsea tu Tuhan i, ingkon Tuhan ma na tasomba di ngolunata unang be adong na asing. Ingkon hangoluhononta do pandonganion ni Debata di sude panggulmiton ni ngolunta, ndang hea dipasombu Debata jolma na satia tu Ibana. Alani unang mabiar, tahutan, humordit hita. Debata, pargogo na so hatudosan tongtong mangurupi dohot paluahon na satia i sian ragam ni hagogotan. Pos rohanta, malua do jolma sian hagogotan molo satia, hot dihaporseaonna di Tuhan i. Alai, unang lupa hita martangiang tu Debata laho mangido panuturionNa uju taadopi parmaraan ni tondi manang haporseaon. Tung margogo situtu jala mardongan “hahomion” do panghorhon ni hasatiaon ni angka sipangoloi Tuhan i. Ndang Manahan tahi ni parjahat pasidingkon nasida sian Tuhan i.