Khotbah Ezra 6: 13-18 "Beribadah Kepada Tuhan Dengan Setia"

Ezra 6 : 13  18  

Marsomba tu Debata Dibagasan Hasatiaon

Minggu Kantate, 19 Mei 2019

Dung mulak bangso Juda sian Babel hombar tu surat na pinaharuar ni si Koresh, raja Parsi taon 538 SM, ditahi bangso i do laho paulihon bagas joro naung sinegaan ni raja Nebukadnezar di taon 586 SM. Jala sada sintasinta naung leleng ditahi nasida ima laho pajongjonghon muse bagas joro ni Debata songon na pinauli ni raja Salomo di Jerusalem. Alai leleng do asa jongjong bagas joro i dung pe di taon 515 SM asa jongjong bagas joro i di tingki ni Raja Darius gabe raja Parsi. Tulus ma tutu bagas joro i ala parsitutuon nasida. Alai molo jongjong pe bagas joro i, ndada alani gogo nasida alai tung ala asi ni roha ni Debata.

Hombar tu hatorangan na disurathon di buku Ezra on dipatorang do taringt tu sangkap ni bangso Israel laho pajongjonghon sada langgatan pamelean tu Debata songon dalan nasida mandok mauliate huhut mamuji pasangaphon Jahowa (Ezra 3: 3). Dung i di tahi roha nasida do laho mambahen ojahan di bagas joro ni Jahowa na imbaru i marhite angka pande ojahan, diparade nasida do dirina laho martangiang, jala dipangiar nasida do soarana na gogo situtu laho mamujimuji goar ni Jahowa. I do tanda las ni roha ni bangso Israel tingki i. Taida do di turpuk on parsitutuon ni parhalado asa anggiat tulus jala hatop jongjong. Alai, ndang tiur pardalanan nasida laho pajongjonghon bagas joro i, sai adong do angka sipangambati ro manegai ulaon nasida godang do hamaolon na niadopan nasida laho paulihon bagas joro i. Di Ezra 4: 1-23 dipatorang do halak na marroha elat dohot late tu bangso Israel. Disangkapi nasida do laho manundati ulaon ni bangso Israel, ima si Bislam, si Mistredat dohot si Tabel dohot dongan nasida na satahi. Sanga do hurang lobi 15 taon lelengna (535-520 SM) mantak pembangunan ni bagas joro i. Ndang mura songon na mambalikkon tangan mura ni pajongjong bagas joro i. Ujungna mandele ma bangso i gabe dipasombu nasida ma paima adong hamubaon ni angka peraturan. Nang pe songon i hamaolon na niadopan ni bangso Israel, ditatap Jahowa do pardangolan nasida i. Marhite angka raja na asing, dipatulus do sangkapNa I asa saut hombar tu guru lomo ni rohaNa. Ala Debata do nampuna bagas joro i, ndang haambatan ni manang ise laho paulihonsa. Alani i disuru Debata ma angka panurirang, disungguli ma roha nasida laho pajongjonghon, gabe tubu ma roha nasida paulihon muse. Hinorhon ni hasabaron i dohot angka parsaoran na denggan maradophon na humaliang di Jerusalem jumpang do tingki laho manguduti paulihon bagas i muse. Hombar tu parsitutuon ni panurirang Haggai dohot Sakharia na sai tongtong manosohon nasida asa marsitutu paulihonsa. Diringkoti nasida ma tutu ulaon i jala dipasidung, hombar tu hata ni Debata ni Israel, hombar huhut parenta ni si Kores dohot si Darius dohot Artasta, raja sian Parsi (ay. 13).

Dung i saut ma jongjong bagas joro i jala neng pasahaton nasida ma tu Debata (ay. 16-18). Ima tingki na mansai uli situtu di nasida, jala marlas ni roha do nasida disi. Martahi do nasida laho mamestahon bagas joro naung sun dipauli i huhut mamuji dohot pasangaphon goar ni Jahowa. Disangkapi nasida do laho mangalehon pelean situtungon na hushus tu Jahowa hombar tu aturan na tarsurat di buku ni si Musa. Laos dipajongjong bangso i do angka malim sian halak Lepi di nasida bahen parjongjongan nasida di adopan ni Debata. Asa dung jongjong bagas joro i naeng pasahotan nasida ma tu Debata asa gabe bagas pamujion nasida i tu Debata. Nunga tangkas maralus pangidoan nasida tu Debata dihajongjongan ni bagas joro i. I do umbahen jumolo dipasahat tu Debata huhut mandok mauliate. Didok di turpuk on, “Dung i marari raya ma halak Israel, angka malim, dohot halak Lepi, ro di halak na asing angka na mulak sian habungan pasahathon joro i tu Debata marlas ni roha godang.

Molo jongjong bagas joro i patuduhon hasationta ma i tu Debata. Ala Debata sandiri pe nunga tangkas dipatuduhon Ibana hasatiaonNa tu hita. Dipillit do di tongatonga ni huria i na gabe Malim, parhalado na mangalehon dirina pauliulihon manang padimundimunhon bagas joro i. Alai na ummarga situtu, nunga dilehon Debata tu hita anakNa Jesus Kristus gabe ulu ni huria i. Ala Debata do nampuna huria i, ndang loasonNa sursaran ni manang ise pe. Nunga ro Ibana tu portibi on, ndang roha ni manang ise i. Jala hit ape nuaeng gabe bagas joro ni Debata. I do umbahn didok, “Ndang diboto hamu joro ni Debata hamu jala Tondi ni Debata maringan dibagasan hamu (1 Kor. 3: 16)”. Molo hita do joro ni Debata, naeng ma gabe bagas na hinalomohon ni Debata ngolunta. Asa manang tu di ape hita laho tongtong do patuduhon bagas joro ni Debata. I do na hinirim ni Debata sian bangso Israel nang sian hita. Nang pe tung leleng asa jongjong bagas joro i, alai anggo pangantusion na parjolo ingkon nasida do joro ni Debata. Asa gabe hasahatan ni ulaon angka na denggan.

Goar ni minggunta sadarion ima Kantate, lapatanna Endehon hamu ma di Jahowa ende na imbaru. Songon bangso Israel, dipalua Jahowa do nasida sian auga parhatobanon i, asa jumpang do di nasida las ni roha godang marhite basabasa dohot asi ni roha ni Jahowa di nasida. Antong, nang di hita pe angka na porsea, dia ma ojahanta laho mangendehon sada ende na imbaru di Jahowa? Nunga dilehon AnakNa na sasada i di hita angka jolma pardosa, asa teanonta ma hangoluan na salelenglelengna i. Tuhan Jesus Kristus do na gabe ojahan di ngolunta angka na porsea, marhite Ibana ma singkop las ni rohanta ala gabe panean hita di harajaonNa i. Antong aha ma ende na imbaru di Jahowa songon tanda pamujionta tu Jahowa? Ndada holan pelean hamauliateonta dohot silehonlehonta tu huria i songon bangso Israel na pasahathon angka pelean situtungon na hushus tu Debata. Alai na umbalga sian i, luhut ma gulmit ni ngolunta gabe pelean dohot ende pujipujian tu Ibana. Hasatiaonta marsomba tu Debata marhite na mangurupi angka na pogos, na dangol, dohot manarihon angka na anturaparon, na male intap ni na tarbahen hita.