Khotbah Filipi 2: 5-11 Yesus Ditinggikan

Pilippi 2 : 5 – 11  

(Jesus Dipatimbo Debata)

Ari Hananaek ni Tuhan Jesus, 30 Mei 2019

Di tongos Apostel Paulus do surat on tu huria Pilippi di taon 63 M, di tingki di bagasan hurungan ibana (Pil. 1: 12-26; 2: 17). Jala tangkas do taboto tarhurung pe ibana ndang alani hasalaan manang hajahatonna alai alani manghophop Barita Nauli i do. Mansai ringkot rimang-rimanganta di Ari Hananaek ni Tuhan Jesus apala di tingki on. Di turpuk on diarahon apostel Paulus do huria Pilippi asa paserephon dirina songon parrohaon ni Kristus Jesus. Dipatorang apostel Paulus hadirion ni Jesus Kristus na manadinghon hamuliaonNa, patutoru diriNa gabe suman tu jolma manolukhon rupa ni hatoban, gabe pangoloi di Debata pola mate tarsilang (ay. 5-8). Jesus Kristus na gabe tiruan di hita, manolukhon rupa ni hatoban (ay. 7). Aha do tiruan na boi taida sian Tuhan Jesus, na ingkon sitiruon ni angka na porsea? Haserepon ni roha dohot pingkiran ni Kristus. Ngolu na rela berkorban, na so mementingkan diri sendiri, parduli tu angka dongan jala mangulahon na denggan tu sude halak. Na naeng dohonon ni turpuk on, i ma keteladanan na pinasahat ni Jesus, naeng adong di angka na porsea, karakter na olo mansoadahon diri. Dipataridahon Jesus do sude ngoluNa manghaholongi angka jolma pardosa, paluahon nasida sian dosa, pamalum na marsahit, mangapuli na marsak, mangurupi na pogos di partondion nang pardagingon. Di dongani Jesus do sude jolma na pogos nang na mora, sude bangso (ndang holan Jahudi), sude na tinihaan ni portibi on, sude na mauas male, martihas nang so mardihadiha. Debata do Tuhan Jesus, alai ingkon dirumari diriNa jala disolukhon rupa hatoban (hamba) na manggombarhon haserepon ni rohaNa na mansai serep situtu. Debata do ibana alai ingkon solukhononNa rupa hatoban. I ma na manggombarhon haunduhon ni Tuhan Jesus tu AmaNa dibagasan serep ni roha diulahon Ibana sude na pinasahat ni AmaNa tu Ibana. Debata na so terbatas alai ingkon tubu Ibana gabe jolma na sangat terbatas, tubu songon posoposo di inganan na lea diida portibi on. Aha lapatan ni “dirumari do diriNa (mengosongka diri)”? Isarana, molo manghatai hita (halak na magodang) tu dakdanak na metmet marumur tolu taon, ingkon songon dakdanak hita manghatai jala tabahen dirinta songon dakdanak na metmet marumur tolu taon. Ingkon tatanggali do sifat ni halak na magodang na adong dibagasan dirinta (termasuk hajagoonta manghatai). Manghatai tu dakdanak songon dakdanak na metmet asa diantusi aha na tadok. Lobi sian i na binahen ni Jesus, ndang holan dirumari diriNa, alai gabe hatoban, pola tung mate di hau pinarsilang. Ditaon do haporsuhon (ditijuri, dilingsingi, dileai). Ima dalan ni Debata mamboan jolma masuk tu bagasan hasisingkop ni harajaonNa, marhite na masoadahon diriNa.

Dibolus Jesus do pardalanan na paet di ngoluNa, maninggalhon hamuliaonNa dohot huasoNa sian habangsaNa gabe dirumari dirNa, ala holong ni rohaNa tu hita jolma. I ma naung pinatuduhon ni Jesus tu hita, holong ni roha na membutuhkan pengorbanan, haserepon nang haunduhon tu Debata. Asa malua jolma sian dosa nang hamatean, ingkon manaon do Jesus. Naeng songon i ma nang hita olo berkorban maniru Tuhan Jesus. Na so mementingkan dirinta sandiri, alai boi jala perduli di kebutuhan ni angka dongan na asing. Dirumari Jesus diriNa ala haunduhonNa tu Debata. Ndang holan haserepon ni roha be na pinatuduhon ni Jesus, alai haunduhonNa (ketaatan) tu Debata. Di zaman nuaeng on mansai porlu do haunduhonta tu Debata. Godang jolma gagal di ulaonna nang ngoluna, ala ndang adong haunduhon tu Debata. Sada syarat asa berhasil hita di ngolunta i ma unduk tu Debata. Dipatuduhon Jesus haunduhonNa mulai sian tubu sahat tu na mate, sahat tu na hehe sian na mate jala manaek tu banua ginjang. Haunduhon ni Jesus tu Amana marhite proses perjuangan na borat, alani do tingki martangiang Ibana di Getsemane, marungkil do Jesus manjalo silang na ingkon ampe tu Ibana. Gabe songon mudar do hodok ni Jesus di tingki martangiang di porlak Getsemane. Lapatanna, songon jolma bergumul do Jesus mangadopi hamatean i nang cara ni parmatena (i ma marhite silang). Diporsan Jesus silang i dibagasan haunduhon tu Amana. Alani do silang gabe simbol ni Hakristenon. Alai boasa gabe silang simbol ni Hakristenon? Boasa ndang panggatan hapeakan ni Tuhan Jesus tingki sorang tu portibi on, sungsang duri na binahen ni angka soldadu tu simajujung ni Jesus, manang darapati? Ala silang do inti ngolu ni Tuhan Jesus, marhite silang i dipatuduhon Ibana haunduhonNa tu Debata.

Marhite jamita on taingot ma, adong do proses na ingkon tadalani dibagasan haunduhonta tu Debata. Borat do proses mandalani haunduhonta tu Debata. Ra ingkon marungkil jala tumatangis hita alani boratna, alai ingkon tadalani do dibagasan habengeton jala marpos ni roha tu Debata. Pasahathon dirinta tu Debata dibagasan haunduhon songon na niulahon ni Jesus. Luar biasa na pinatuduhon ni Debata tu Jesus, di ayat 9 – 11 didok, “Alani i do dipatimbo Debata Ibana jala dibasabasahon tu Ibana goar na sumurung asa nasa goar, asa somba tu goar ni Jesus nasa ulu ni tot, na di banua ginjang i dohot na di tano, nang di toru ni tano, jala asa nasa na marsoara marhatopoton Jesus Kristus do Tuhan, bahen hasangapon ni Debata Ama”. Di ari parningotan hananaek ni Tuhan Jesus dipaingot hata ni Debata hita, ia hananaek ni Jesus tu banua ginjang i ma patuduhon naung dipatimbo Debata Tuhan Jesus sian nasa na adong. I do las ni rohanta songon halak Kristen mamestahon ari hananaek ni Tuhan Jesus. Marsangap Tuhan Jesus di habangsaNa di banua ginjang jala marsangap Debata Ama. 

Marhite turpuk jamita on dijouhon do hita halak Kristen asa olo martoruk ni roha manang marserep ni roha (humble) songon Kristus. Sada dalan na mansai ringkot di huria i, i ma maniru harohaon ni Tuhan Jesus. Didok Apostel Paulus: “Songon parrohaon ni Kristus Jesus ma parrohaonmuna”. Rupa ni Debata di Ibana, alai dirumari do diriNa jala disolukhon rupa hatoban, gabe rumang jolma dapot di Ibana, gabe sipangoloi Ibana paima mate, pola tung mate tarsilang. Di son taida paneahonon diri ni Jesus holan humongkpo hajolmaon. Dibahen i do Ibana gabe dipatimbo Debata. Sada tiruan na boi taihuthon cara panghobasion ni Presiden Jokowi na jotjot didok “blusukan” huhut mamangke baju na sederhana, tujuanna asa cocok tu roha ni masyarakat i. Ndang dipangke ibana baju hapresidenonna, ditanggalhon do i asa solhot ibana tu rakyat na ginomgomanna. Molo taulahon do haserepon sisongon i, arga ma hita di adopan ni Debata jala patimboonNa ma hita. Taingot ma hata ni Tuhan Jesus: “Ai nasa na patimbo dirina, sipaoruon do; jala nasa na paoru dirina, i do sipatimboon (Luk. 14:11; Mat. 23:12)”.