Khotbah Lukas 11: 1-13 "Tuhan, Dengarkanlah Doaku"

Lukas 11 : 1 – 13 

(Tuhan, Tangihon ma Tangiangku)

Minggu Rogate; 26 Mei 2019

Goar ni minggunta sadari on i ma minggu Rogate, na marlapatan martangiang. Diajari Tuhan Jesus do hita manjou Ama tu Debata asa taingot na solhot do hita tu Debata, asa tahangoluhon na anakhon ni Debata do hita. Molo taingot na anakhon ni Debata hita taingot ma na dihaholongi Debata do hita, ndang tagamon lehononNa na roa tu hita, alai angka na denggan do lehonon ni Debata tu hita. Alai memang molo tapamanat di partingkian nuaeng on, nunga lam godang halak Kristen na so mangharingkothon tangiang di bagasan ngoluna. Godang do halak na mansohot martangiang ala ndang pintor dialusi Debata na pinangidona di tangiangna i. Hape tangkas do taboto pandohan ni Marthin Luther na mandok Doa adalah nafas hidup orang percaya. Dipatudos ibana do tangiang i songon hosa, na marlapatan ma i sasintongna ndang boi hape hita mansohot martangiang. Jala i do na naeng idaonta marhite turpuk on.

1.      Debata gabe Ama di angka na porsea

Di tingki dipangido sisean ni Tuhan Jesus asa diajari nasida laho martangiang, diajarhon Tuhan Jesus ma tangiang Ale Amanami, ima tangiang na sai tadok di ganup parpunguan ni halak Kristen. Sada na mansai arga ima diajari Tuhan Jesus do hita manjou Ama tu Debata. Sada na imbaru do on tu angka siseanNa. Nang pe di Padan na Robi diajarhon do Debata songon Ama (isarana Psalmen 103: 13 “Songon asi ni ama-ama tu angka anakna asi ni roha ni Jahowa di angka na manghabiari Ibana), alai na manjou Debata gabe ama ndang adong jumpang i. Sada na mansai arga na hinamham ni panjouon Ama tu Debata, i ma patuduhon parsaoran tu Debata, hubungan ni ama tu ianakhonna do. Marhite pandohan “Ale Amanami” taongkuhon do, na Debata gabe Ama di hita jala hita gabe ianakhon ni Debata. Hubungan ni Debata tu angka na porsea ndada hubungan na dao, baliksa hubungan na mansai solhot, ndang adong na sumolhot sian hubungan ni Ama (Natoras) tu ianakhonna. Songon i ma nian hita, ganup tadok tangiang Ale Amanami, tubu panghilalaan na mansai solhot tu Debata. Ganup tajouhon “Ale Amanami” ingkon tasadari jala taauhon na Debata do Amanta jala anak ni Debata hita. Ndang mardia imbar statusna, pogos manang mora, marpangkat manang ndang, sude do hita anak ni Debata. Alani, tajouhon “Ale Amanami”.

2.      Jugul mangido manang martangiang

Somalna negatif do makna ni hata “jugul” alai ianggo di ayat 8 marlapatan na positif do. “Jugul mangido” lapatanna torus mangido, ndang mura mandele, mungkin ndang pintor dilehon tingki mangido na parjolo sahali, alai ingkon torus do pangido on. I do na niajarhon ni Tuhan Jesus tu siseanNa marhite tudosan aleale na mangido tu donganna di tonga borngin, dimulana i ndang olo aleale na i mangalehon alai ala dijugulhon ujungna dilehon do pangidoanna i. “Pangido hamu ma, sai na lehonon do tu hamu; Lului hamu ma, sai na jumpangan do hamu; Tuktuhi hamu ma, sai na ungkapon do di hamu!” Dos do lapatan ni pandohan na tolu i: Pangido, lului, tuktuhi, i ma asa diharinggashon, dijugulhon, na porsea mangido sipangidoanna tu Debata. Ndang sae holan sahali martangiang, jala ndang sae dua hali alai manongtong saleleng mangolu ndang jadi mansohot martangiang. Unang adong be nian sian hita na mansohot martangiang ala ndang pintor jumpang na dipangido. Ra dibagasan tangiangta sai tapangido hagabeon, ndang ra dapot dope, tapangido hahipason, ndang ra jumpang dohot lan angka na asing muse. Marhite turpuk on dipaingot hita, asa unang mandele. Ra nunga marbulan manang martaon hita mangido alai tongtong ma tajugulhon mangido tu Ama i, ai anakhonNa do hita, sai na lehononNa do i hombar tu tingki halehetanna mangihuthon Debata.

3.      Debata mangalehon na denggan tu angka na porsea

Molo taondolhon hubungan ama (natoras) tu ianakhon marhite pandohan “Ale Amanami” tu Debata, dihamham ima muse pos ni roha di pananrihonon ni Debata tu hita. Songon natoras di portibi on mansai holong rohana tu ianakhonna, disarihon ianakhonna, jala dilehon na pinangido ni ianakhonna, lobi sian i ma Debata. Asa molo tajouhon “Ale Amanami” marlapatan, na pos rohanta dipanarihonon ni Debata. Ndang hea ganggu roha ni ianakhon molo rap dohot natorasna. Songon di ape biar ni sahalak dakdanak, molo nunga rap dohot natorasna, sai tubu do di ibana pos ni roha. Songon i ma nian tubu di roha ni angka na porsea. Molo adong na mambahen hita mabiar manang mambahen bobonosan, unang muramura ganggu rohanta. Sotung adong na sahat tu pandelean. Alai, taingot ma na adong Debata, gabe Ama di hita. Alani dongananNa, ramotanNa jala urupanNa hita. Ndang adong natoras na olo pasombu ianakhonna marmara, alani ndang pasombuon ni Debata hita di ngolunta on. Sipata ndang diantusi dakdanak pambahenan ni natorasna gabe didok na kejam natorasna. Molo so dilehon na pinagidona, dianggap na so holong roha ni natoras na tu ibana. Alai dung magodang dakdanaki gabe diantusi ma muse paboa sude na binahen ni natorasna uju i, tu angka na denggan do hape. I do naeng ondolhonon ni turpuk on tu hita, paboa na denggan do lehonon ni Debata tu hita angka na porsea ala ianakhonNa do hita, ala holong roha ni Debata tu hita. Memang ndang apala pintor mura taantusi alai unang pola ganggu rohanta, songon hata ni Buku Ende nomor 187: 1 “Denggan do panogum ale Jahowa, di angka na pinarmahananMi, tagamon bahenonMu ma na roa so tarbunihon Ho do burjuMi? Jotjot suhar do pambahenanMi di roha ni na so tumanda Ho, alai marhite sian i do rot u hatiuron na tinoguMi. Suhar manang so suhar tu pingkiranta, sada na hot sitioponta ima angka na denggan do dilehon Debata tu angka na porsea.

Marhite turpuk on disosoi do hita asa lam tu burjuna martangiang jala lam tu jugulna mangido tu Tuhanta i. Laos i do songon sunggul-sunggul di hita di Minggu Rogate on. Ihut tusi diajari Tuhan Jesus do hita asa diangka tangiangta, sai jumolo ma hita mamparbadiai goar ni Tuhan i, jala sai tapatujolo asa saut ni lomo ni roha ni Debata, dung i mampanghorhon ma i tu angka pasupasu marhite hangoluan siganup ari, hasesaon ni dosa dohot haluaon sian pangago. Laos songon i ma nang sikapta laho mangido tu Debata, ingkon jugul do hita jala marserep ni roha mangido angka sipangidoanta, tu Amanta pardenggan basa i. Songon pandohan ni si Marthin Luther “Di tingki mangido hita tu Debata, ingkon pogos do hita”. Lapatan na ingkon tarajumi do dirinta na gale (tidak ada apa-apanya) di adopan ni Debata, jala holan mangasahon pangurupionNa do hita margogo.