Khotbah Yohanes 15: 1-8 "Tinggal dan Berbuah di dalam Yesus"

Johannes 15 : 1 - 8

Mian Dibagasan Jesus Kristus asa Marparbue

Minggu Jubilate, 12 Mei 2019

Di turpuk on digombarhon Jesus do hadirionNa songon hau anggur na tutu. Ala mayoritas do hita pangula dihutanta on, ra ummura do antusanta turpuk on, ala nunga taboto songon dia bahenonta asa denggan partumbur manang parbue ni suansuananta. Isarana molo hau anggur asa denggan partumbur ni hau anggur, ingkon ias do hauna I, ingkon dinapui do tano hatubuanna, jala ingkon bahenonta do panjangkitan ni andorna. Somalna lomak do partubu ni anggur, alai ndang sude na lomak i marparbue. Alani ingkon sai paiason do bona ni hau anggur i. Angka ranting na so ringkot, i ma ranting na so olo marparbue, somalna digotap i do i asa unang gabe manegai tu ranting na marparbue i. Asa tarida ma ndada halomakon manang haulion ni bulung dohot ranting ni anggur i na hinaringkothon, alai parbuena do. Jala i do sintuhu ni na manuan anggur tontu asa marparbue do, ndada gabe asa idaon jagar manang uli idaon sambing. Asa i do sasintongna gombaran ni halak na porsea, asa molo mangolu pe hita songon halak na porsea, na ingkon tarida do parbue ni haporseaonta i. Tontu asa boi marparbue angka ranting ni hau anggur manang molo dihutanta on ala godang kopi i na ingkon rap do ranting i tu hau ni kopi i, molo nunga gotap ranting i dohot hauna i, tontu ndang boi be i marpabue, alai danggurhonon nama i manang dibahen gabe soban molo di hutanta on.

Songon i do diida Jesus Kristus hinaringkot ni na mian hita angka siihuthon Ibana. Ndang tarbahen hita marparbue (Joh. 15: 4), lam ma marparbue na godang (Joh. 15: 5; 8), molo ndang taoloi pangidoanNa asa mian hita rap dohot Ibana. I do hataNa tu angka siseanNa na parjolo i. Laos i do hataNa nuaeng tu hita angka siihuthon Ibana di partingkian nuaeng on. Lao patangkashon hasisintong ni hinaringkot ni na mian i hita dohot Ibana, digombarhon Ibana ma marhite na mandok ia hita on ranting ni hau anggur do, Ibana hau anggur i jala Amai tukang porlak anggur i na manggotap ranting na so marparbue, jala paiashon ranting na marparbue asa lam ganda parbuena. Molo ndang mian hita rap dohot Ibana, ndang marparbue hita, songon ranting ni hau anggur i na so tuk marparbue ianggo sian dirina, ingkon sada do ranting i tu bona ni hau anggur i. Molo mian hita dohot Jesus Kristus marparbue na godang ma hita. Alai molo ndang mian hita rap dohot Jesus, so holan ndang marparbue hita, alai gabe digotap, jala dipalungguk dohot didanggurhon tu api laos gor ma. Asa boi hita marparbue, jala godang parbuena ingkon mian do hita raphon Ibana. Na ringkot dihita dalanta marparbue sai na lehononna do. Molo marparbue na denggan hau anggur i, tontu mampanghorhon do i tu nampunasa jala patubu las ni roha di nampuna porlak anggur i. Gabe marsangap ma Ama i nampuna porlak anggu i siala parbuenta i di joloni angka jolma di humaliangta. Alai molo ndang mian hita raphon Ibana, tung so tarbahen hita marparbue. Gariada uhumonNa ma hita marhite na manggotap hita sian Ibana. Siala ni i, dung songon i leleng hita gabe ruas ni pamatang ni Kristus manang gabe ranting ni Kristus Jesus hau anggur i, ringkot do tasulingkiti dirinta, nunga marparbue hasiseananta saleleng on, songon hataridaan ni naung dipatigor Debata hita di joloNa marhite mudar ni Jesus Kristus na durus di hau pinorsilang i?

Molo tapamanat tu pudi di pardalanan ni ngolunta gabe halak Kristen, nunga halak Kristen na marparbue hita manang ndang dope? Jala molo marparbue hita, parbue na songon dia ma, parbue na denggan dohot na tonggi do hita manang parbue na asom? Ala angka naung ditobus Jesus, i do angka ranting naung pinaiasNa, dihirim Debata do sian hita parbue na godang, jala dipatau do hita marparbuehon parbue na godang. Halak Kristen dipadiri Debata di portibi on asa marparbue do. Molo dijabu hita asa denggan holong ni rohanta tu donganta saripe, maradophon angka ianakhonta, maradophon angka pinompar ni natorasta. Di inganan ulaonta, asa denggan parsaoranta dohot dongan saparkarejoanta, unang be nian adong angka hosom dohot late molo tung pe marimba jabatanta dohot donganta. Songon i nang dohot donganta sahuta, hombar jabu, hombar balok di hauma manang dongan saparadatonta asa unang be nian marsihosoman manang masilatean angka na marhombar jabu manang marhombar balok nang pe marasing pasupasu na tadapot.

Molo nunga boi tangkas taida naung songon i denggan parbue ni ngoluna songon sisean ni Jesus Kristus hita, tapuji ma Tuhanta naung mangonjar rohanta marparbue, dohot patauhon hita marparbue, gabe marsangap Tuhanta i. Marjubilate ma hita sadari on, ala nunga songon i ngolunta saleleng on. Alai molo tahilala na so marparbue dope, otik pe ndang marparbue, mansai ringkot sungkononta, so tung do siala na so mian do hia rap dohot Jesus Kristus umbahen songon i ngolunta. Di partingkian nuaeng diharingkothon portibi on do angka parbue ni ngolu nang haporseaon ni angka siihuthon Jesus mangurupi hajolmaon managdopi parungkilon hajolmaon di portibi on. Halak Kristen dipadiri Debata asa gabe sisean na mambahen marsangap Debata. Molo so marsangap Debata ndang sisean na tutu dope hita. Dihirim Debata do sian hita angka parbue haporseaonta na ramos songon dalanNa patupahon angka na uli tu hajolmaon bahen sangap di goarNa. Asa sude ma nian hita marparbue. Jala ndang asal marparbue, alai marparbuehon na godang jala torus ganda. Margogo ma hita angka sisean ni Jesus Kristus di portibi on nuaeng. Marjubilate ma hita ala diparar Debata dope hita angka siihuthon Ibana patupahon i sude. Tapatupa ma angka ulaon na denggan songon parbue ni haporseaonta. Unang baliksa, tong ndang tapasolhot dirinta tu Ibana hape nunga taboto ia ujung ni angka na songon i, ima dibolongkon, dipalungguk jala didanggurhon tu api asa gor ma.