Khotbah 1 Yohanes 4: 1-6 "Mengenal Roh yang Berasal dari Allah"

Senin (Pentakosta II); 10 Juni 2019

Digoari do surat on surat am (umum) ala hasahatan ni surat i ndada tu sasahalak manang tu sada huria, alai tu halak Kristen na marserak di hatiha i. Sibonsiri ni surat on ima laho mangalusi ragam ni angka parpoda haliluon na masa di ujui na manggugai haporseaon ni huria na parjolo i. Ummotikna adong tolu ajaran ni parpoda haliluon na mangajarhon poda na maralo situtu sian hata ni Debata. Parjolo, i ma Gnostisisme (na mandok Debata dohot Tuhan Jesus Kristus i holan berupa zat sambing), jala haluaon dirajumi nasida do i boi jumpang ala ni parbinotoan (gnosis). Na paduahon i ma, Cerinthus (na mandok jolma biasa do Jesus i, na tinadingkon ni Amai i dungkon gantung Ibana di hau pinarsilang). Na patoluhon i ma, Doketisme (holan haidaan sambing do Jesus i manisia, alai sasintong na ndang manisia, halinu ni tondi do i na tarida songon jolma). Dihorhon angka parpoda haliluon i, lam neang roha ni halak Kristen na parjolo i tu holong ni roha ni Debata dohot panaonon ni Kristus Jesus na patupahon ulao panobusion ni jolma sian dosa dohot sorop ni hamatean. Jala digoari ma angka na mangoloi dohot mangihuthon parpoda haliluon i antikristus. Ala manegai do panghorhon ni parpoda haliluon i ditongos si Johannes do surat on laho pahantushon na tutu do jolma situtu Jesus, jala ganup tondi na marhatopothon Jesus Kristus, naung ro dibagasan daging, i ma sian Debata (ay. 2). Marhite surat on podia jala ditogutogu do angka na porsea i asa tongtong satia mangihuthon Jesus nang pe godang marroan angka parpoda haliluon.

Jala andorang rap dope Jesus dohot angka siseanNa nunga dipodahon hian na ro ma angka parpoda haliluon na manggugai dohot manegai haporseaon nasida, didok Jesus do; “jaga hamu ma angka panurirang pargapgap, ai na ro do nasida mandapothon hamu marrupahon birubiru, alai anggo rohana dibagasan, tung babiat pandoro do (Mat. 7: 15-23). Ai nunga borhat torop panurirang pargapgap tu portibi on (ay. 1), jala ndada holan sada inganan na nitujuna, mangihuthon ayat 1, tu sandok portibi on do nasida borhat. Alani unang ganup tondi tahaporseai, alai jumolo ma tauji marhite hata ni Debata laho manimbangi pangajarion nasida i. Di hata Gorik, tondi dison dipatudos ma i tu “pangajari”, tu nasa halak na manghilala dirina gabe pangajari di bagasan panogunoguon ni Tondi ni Debata. Asa ndang sala molo gabe di pentakosta na paduahon on didok; “uji hamu ganup pangajaran”. Disosohon si Johannes do asa manat angka na porsea i manjagahon dirina sian angka pangajari siboan haliluon. Unang gait manang neang roha nasida di angka na masa i ala nunga tung mansai torop bilangan ni angka panurirang pargapgap i. Alani do dipatolhas si Johannes di turpuk on dalan laho manguji i ma marhite jala marojahan sian hata ni Debata jala manangkasi dompak ise pangokuon nasida (ay. 2-3). Tanda ni angka guru na marharoroan sian Debata i ma na marhatopothon Jesus Kristus naung ro dibagasan daging, paboa na tutu do Ibana Debata naung gabe jolma, na ro tu portibi on, mate jala mulak mangolu Ibana sian hamatean asa boi dapotan hangoluan saluhut jolma. Alai ganup angka pangajari na marhatopothon Jesus i, i ma na  so sian Debata. I ma pangalaho ni antikristus.

Ndang boi talu hita bahenon ni poda haliluon i, baliksa hita do manaluhon poda haliluon i. Sian Debata do anggo hamu, angka anaha; jala nunga ditaluhon hamu nasida, ai umbalga do Ibana na dibagasan hamu, asa na dibagasan portibi on (ay. 4). Pandohan manaluhon di son ndang boi antusanta holan manaluhon di pardagingon (fisik), alai na lobi tumangkas i ma manaluhon di roha dohot manaluhon di pingkiran. Didok andul do umbalga i sian tondi na mian di portibi on. Lapatanna, balga do tondi ni portibi on, alai umbalga sian i do hagogoon ni Tondia na sian Debata. Ala sian portibi on do nasida, na pinodahon nasida pe taringot tu portibi on do, sian portibi on do hata nasida, jala ditangihon portibi on do nasida (ay. 5). Roha holong tu portibi on do na manggohi jala mangonjar roha nasida, rodi nasa panghirimon ni portibi on do na dihaporseai nasida. Ingkon adong imbar ni halak na porsea sian angka parpoda haliluon i, di ayat 6 didok; “sian Debata do ia hita. Halak na tumanda Debata, i ma na tumangihon hita, halak na so sian Debata, i ma na so tumangihon hita. Sian i do tatanda Tondi hasintongan dohot tondi sipaotooto”. Ndang tarbahen portibi on marsipaulaula (berpurapura) gabe sai hira sipangoloi di Debata. Ai lam kecanduan (marroha portibi) jolma i, lam holing do ibana sian Kristus i. Baliksa, lam solhot hita tu Debata lam tuk ma hita manirang lomo ni roha ni Debata sian lomo ni roha ni portibi on.  

Lam lumeleng lam ragat do jumpang hita na asli dohot na palsu rap haidaan di tongatonga ni ngolunta si ganup ari. Sai hira sude nama nuaeng adong rumang palsuna. Jala sipata ndang dao be imbar ni na palsu sian na asli, baliksa boi do sai hira na ummuli idaon na palsu i sian na asli. Songon i do nang di ngolu partondion, adong do parpoda haliluon. Hehe do nasida mamodahon angka na marasing ro di na maralo sian hata ni Debata. Jala nunga bangkona huroha, sai gumodang do halak targoda tu poda na lilu, sian poda na asli, i ma hasintongan na sian Debata. Alani mansai ringkot do alat uji dalan laho manangkasi, manirang na asli sian na palsu. Asa unang lilu hita angka na umbegesa. Alani unang lemba pangantusionta tu nasa poda na sian Debata. Denggan do molo tong jamot hita sian dia do haroroni pangajarion i tu hita, sian hatigoran i do manang sian duru ni hatigoran, asa unang tarjollung hita tu ajaran na so padohot lomo ni roha ni Debata. Sian Debata do hita angka na porsea di Tuhanta Jesus, i ma hita angka na olo manangihon dohot mangulahon hataNa. Songon pandohan ni Tuhan Jesus di Johannes 8: 47a; “Ganup na sian Debata, tangihononon i do hata ni Debata”. Debata mangusehon TondiNa i tu hita, asa Ibana mian dibagasan hita jala hita dibagasan Ibana. Rajumanta ma parningotan di ari hasasaor ni Tondi Parbadia na paduahon on, i ma dalan ni Debata laho manubuhon hita jolma tu bagasan haporseaon dohot pamotoan na tontu naung gabe parmianan ni Tondi ni Debata hita saluhutna. Nang pe di portibi on do pe hita maringanan alai anggo parangenta na ingkon songon parange ni anak hatituron ma. Nang pe ragam hamaolon taadopi uju marparange hita songon parange ni anak hatiuron, taingot ma umbalga do huaso ni Tondi ni Debata naung maringanan di ngolunta sian tondi na adong di portibi on.