Khotbah Kejadian 22: 1-12 "Iman yang Menyelamatkan"

Minggu Trinitatis

16 Juni 2019

1 Musa 22: 1 - 12 

22:1 Jadi dung salpu angka jamita ondeng, diunjuni Debata ma si Abraham, ninna ma mandok ibana: Jo Abraham! Dison do ahu, ninna.

22:2 Dung i ninna ma: Buat ma anakmu na sasada i, haholongan ni roham, si Isak i, jala togihon ibana tu tano Moria, jala pelehon ibana disi bahen pelean situtungon tu sada dolok, sipaboaonku tu ho.

22:3 Jadi dipasogot si Abraham ma hehe manogotna i, dipalanoi halodena, jala diarahon dua halak naposona rap dohot si Isak, anakna i, jala ditahai soban manutungi pelean i, dung i borhat ma ibana laho tu dolok, na nidok ni Debata tu ibana.

22:4 Patoluarihon manaili ma si Abraham, jadi ditatap ma dolok i.

22:5 Dung i ninna si Abraham ma tu angka naposona i: Dison ma hamu mangulon rap dohot halode i, alai anggo ahu dohot dakdanak i, laho ma hami tu sadu i, jala ia dung martangiang hami, mulak hami tu hamu on.

22:6 Jadi dibuat si Abraham ma soban tu pelean situtungon i diampehon ma tu si Isak, anakna i. Alai ibana do maniop api dohot raut sada, jadi rap mardalan ma nasida na dua i.

22:7 Dung i ninna si Isak ma tu si Abraham amana i: Atehe, ale amang, ninna! Dison do ahu ale anaha, ninna. Dung i ninna si Isak ma: Nunga dison api dohot soban, alai didia do birubiru bahen pelean situtungon i?

22:8 Jadi ninna si Abraham ma: Sai pilliton ni Debata di Ibana sada birubiru bahen pelean situtungon, ale anaha. Jadi rap mardalan ma nasida na dua i.

22:9 Jadi dung sahat nasida tu dolok, na nidok ni Debata tu ibana, dipauli si Abraham ma disi sada langgatan, jala disusun soban i, ditali dohot si Isak anakna i, jala diampehon ibana tu ginjang ni langgatan i, tu atas soban i.

22:10 Dung i dipatoltol si Abraham ma tanganna mambuat raut i laho maneat anakna i.

22:11 Dung i dijou suruan ni Jahowa ma ibana sian banua ginjang, ninna ma: Jo Abraham, Abraham! Dison do ahu, ninna.

22:12 Jadi ninna suruan i ma: Unang laho tanganmu tu dakdanak i, jala unang bahen manang aha tu ibana, ai nunga huboto dihabiari ho do Debata, jala ndang diolani ho anakmu na sasada i maradophon Ahu.

Dihalomohon Debata do sada hubungan (relasi) na satia sian saluhut jolma maradophon Debata. Alai memang, molo tapamanat di partingkian nuaeng on, sipata lam maol do mangalului halak na satia maradophon Debata. alani do ringkot hita marsiajar sian turpuk on taringot tu hasatiaon ni haporseaon maradophon Debata marhite na masa di ngolu ni si Abraham. Abraham ima sada tokoh na mansai ringkot (sentral) di Bibel nang di halak Jahudi manang di Hakristenon pe. Dipatuduhon ibana do sada tiruan na mansai denggan taringot tu haporseaon tu Debata. Diadopi ibana do sada ujian manang hamaolon, alai dipaduhon ibana do hasatiaonna maradophon Debata. Hira ganup do hita umboto taringot barita ujian na niadopan ni si Abraham on. Disuru Debata ibana mamelehon si Isak tu sada dolok. Ndang mura mangadopi rumang ni ujian na songon on. Boi dohonon rumang ni ujian na songon on ma na umborat laho adopan. Siala sopot mangonai tu diri ni si Abraham, ianakhonna dohot keluargana. Ingkon tuk ibana laho mamillit si Isak do manang Tuhan i. Ndang tarjua molo dung sapala ro ujian i. Pandohan on ma na tuk mewakili panghilalaan ni torop halak molo songgop ujian. Sangombas idaon, sai hira dipasombu Debata sasada hita mangadopi na dokdok i. Hape tangkas do di tangantangan Debata ganup hita, asa unang sala jala lilu langkanta. Songon na boi taida di turpuk on, lumobi ma dungkon sahat si Abaraham dohot si Isak di dolok i, ndang dipaombu Debata pola lalu tanganna tu ianakhonna i.

Diparade Tuhanta do birubiru tunggal sada bahen peleanna tu Debata. Ndang matibuhu dipatuduhon Debata birubiru i (asa unang ganggu roha ni si Abraham), jala ndang tarlambat (asa unang sanga lalu tangan ni si Abraham dompak si Isak). Alai diparade Debata do hombar tu tingki na binuhulNa. Ndang tarlambat pangurupion ni Debata. Ndada holan birubiru tunggal i na diparade Debata, jala ndada holan haporseaon sambing diparade Debata bohal ni si Abraham laho tumangkohi dolok i, alai dohot do nang gogo suang songon i nang roha na sonang pangkeon ni si Abraham dohot si Isak manghamonanghon ujian na rot u nasida. Tuhanta paradehon, ndada holan dompak si Abraham alai dohot do ganup halak na porsea di Debata na mangolu di partingkian nuaeng sahat ro di ari marsundutsundut. Diparade Debata do Jesus AnakNa na sasadai, haholongan ni rohaNa i gabe pelean laho manobus luhutna hita sian hadosaonta, asa taruli hita dihaluaon sisaleleng ni lelengna na pinarade ni Debata di hita. Holan on tutu, jotjot do masa tu hita songon pengalaman ni si Abraham na di ayat 13 di turpuk on, dung pe jolo binolus dalan na tolping jala na rahis i, i pe asa taboto dia do na sinangkapan ni Tuhanta. Ndang sude na pinarade ni Tuhanta i jumpang jita di bona ni sada pardalanan i, sipata do i dungkon taripar hita tu tongatonga manang na jumotjot ima dungkon taripar hita tu bariba jala olo do pe jolo dungkon leleng hita di ujung ni pardalanan i, disi pe baru asa singkop boi haidaan na sinangkapan ni Debata dibagasan parungkilon na tabolus. Na ringkot tapeop ima, diparade jala pasahaton ni Debata do i angka na ringkot i di hita hombar tu tingki na binuhulNa, songon na pinamasa ni Debata tu si Abraham. Ala naung diparade Debata di si Abraham, dipajongjon ibana ma sada langgatan pamelean di Jahowa, digoari ma i Jahowa Jireh manang Jahowa manatap, na marlapatan ditata Debata do na masa di si Abraham dung i Debata ma na paradehon angka na ringkot di ibana. Ndang digoari si Abraham pamelean i dolok pangunjunan manang partinaonon manang dolok haunduhon, alai dolok pangaradeon. Didoari ibana songon i goar ni dolok i, ala tangkas diida ibana diparade Debata haluaon sian ari na ujui dohot tu ari sogot.

Dungkon dipatuduhon si Abraham haunduhon manang pangoloionna hombar tu parsuruon ni Debata, dilehon suruan ni Debata ma sadala alasan na tontu, boasa diloas Debata si Isak mangolu ndang jadi pelehonon ni si Abraham, ala mangolu dibagasan biar mida Jahowa do si Abraham. Biar mida Jahowa na tumubuhon roha na unduk, sipangoloi di Debata na marharoroan sian haporseaon. I do Alana umbahen na didok haporseaon i do paluahon. Songon na tarsurat di Jakobus 2: 22; manumpak do haporseaon tu angka uloanna, jala sian angka ulaon i gabe rimpas (sempurna) haporseaon i. Dipatudu si Abraham do dia ma angka na ringkot siparadeonta uju masa angka hamaolon i. Ingkon hot hita, unang mubauba, ingkon jongjong jala mangalangka mangasahon hata ni Debata. Ibana ma na boi gabe sada tiruan di hita mangaradoti haporseaon nang pe dibagasan pangunjunan. Ramot ibana dihaporseaonna i, ndang gabe manjua ibana di parsuruon ni Debata alai bulus diulahon ibana. Toho do sipata sahira na hurang adil do tahilala molo diloas Tuhanta hita mangadopi ujian songon na niadopan ni si Abraham on. Alai molo rade hita marguru sian haporseaon ni si Abraham songon na pinaandar ni turpuk on, jumpang hita do pangantusion na dipangke Debata do pangunjunan i laho manoma hita tu na dumenggan. Ndang pasombuon ni Tuhan i hita punjung sasada hita mangadopi pangunjunan i (Tuhan tidak sedang mempersulit kehidupan kita). Alan a diboto Ibana do holan marhite dalan na songon i do lam tudos hita tu rupa dohot pangalahoNa, lam tang jala matoras haporseaon dohot panghirimonta di Debata.

Isarana molo dipatudos haluaon songon na manangkohi sada dolok, nangkohanta ma dolok na timbo i mardongan haporseaon. Disi ma hita mamungka rap mardalan dohot Kristus i, naung mamolus hamatean jala paujunghon saluhutna dibagasan haluaon. Alani tudos ni pardalanan na tumangkohi dolok ma hita nuaeng, na ingkon mamolus ragam ni dalan na rahis, sipata tompu adong perubahan suhu dohot perubahan cuaca, gok batu dalan i, sahat ro di na boi tinipa ni sahit. Hasalaan na tapatupa uju mangalangkahon langkanta manangkohi dolok i, boi pataru hita hita tu hamagoan. Alai haunduhon, roha biar mida Jahowa parbue ni haporseaon na mangolu dibagasan Jesus Kristus, tuk do pataru hita tu hangoluan saleleng ni lelengna. Diparade Tuhan i do saluhut angka na ringkot di halak na manghaposi Ibana mansai gomos na so ganggu rohana maradophon Debata. Alani dihirim Debata sian hita asa bagas tatanda holong ni rohaNa, jala tahaporseai Ibana, ala haporseaon i do na paluahon si Abraham songon i nang hita.