Khotbah Mazmur 32: 1-11 "Kebahagiaan Orang yang Dibenarkan Tuhan"

Minggu 2 Set. Trinitatis; 30 Juni 2019

Psalmen 32: 1 - 11

32:1 Martua ma manang ise naung sinesaan pangalaosina, naung hinungkupan dosana.

32:2 Martua ma jolma, ia so * dijujur Jahowa tu ibana hajahaton, jala ndang * marpangalensem tondina di bagasan.

32:3 Ai saleleng huhasiphon dosangku reung do holiholingku, dibahen anggukku ganup ari.

32:4 Ai sai * didondoni tanganmu do ahu arian dohot borngin, jadi marsik do mudarhu songon di hamamasa ni logo ni ari. Sela.

32:5 Jadi hupabotohon ma tu Ho dosangku jala ndang huhungkupi salangku; ningku do: * Topotanku ma angka pangalaosingku tu Jahowa, jadi marpamuati do roham di utang ni dosangki.

32:6 Ala ni martangiang ma tu Ho sude na lidang marroha di * tingki parsaulian; tongon do, nang pe ro tahop angka aek magodang, * ndang tagamon sampe ianggo tu ibana.

32:7 Ho do pangondianku, sai jagaonmu do ahu sian parmaraon, sai * haliangkononmu do tu ahu olopolop ni haluaon. Sela.

32:8 Huparrohai jala hupodai pe ho taringot tu dalan sidalananmu, huiringiring pe ho dohot pamereng ni matangku.

32:9 Unang tung songon hoda hamu, manang songon halode na so marroha, ndang olo dumonok tu ho, nda pinatunduk ni kongkang.

32:10 Tung na lan do parniahapan ni parjahat, alai manang ise na marhaposan tu Jahowa, haliangkononna tusi asi ni roha.

32:11 Marlas ni roha ma hamu mida Jahowa, jala marolopolop ma hamu, ale angka partigor, jala marende ma sude hamu angka parsihohot marroha.

Jotjot do manang hea do ra tabege manang tadok pandohan on tu sasahalak: Martua ho amang/inang, hasea sude ianakhonmu, sarjana jala parkarejo sude. Manang tadok muse: Martua ompu si adui torop pinomparna. Molo tongon libur sikkola ro angka pahompuna mandulo ibana, ndang piga songon i. Ima taringot tu hatuaon ni jolma di ngolu si ganup ari. Lumobi di halak Batak hatuaon jotjot do disuhat sian hamoraon, hagabeon dohot hasangapon. Tingkos ma i, tarjalo roha do i ala sude do jolma, ndang holan halak Batak marsintasintahon songon i. Alai anggo halak Kristen adong dope na lobi ummarga sian i. Ndada holan hatuaon di pardagingon alai ummarga sian i adong hatuaon di partondion. Lapatanna lobi sian hasangapon, pangkat, sinadongan adong na ummarga. Nian tong do sian Debata angka na adong di hita i sude. Alai ndang sarupa arga ni hatuaon na tajalo di portibi on dohot hatuaon sian banua ginjang i. Hatuaon na sian Debata i ma sibasabasa jala na so tarlehon portibi on. Panindangion haporsaon manang poda si songon i do dipasahat Raja Daud tu angka na porsea tu Debata di turpuk jamita on. Hatuaon ni jolma alani hasesaan ni dosana. Pola dua hali pandohan martua ma di turpuk on.

Angka ise do na martua i nidok ni Parpsalmen i? Parjolo, manang ise naung sinesaan pangalaosionna naung hinuphupan dosana. Hata sosa marlapatan, ndang boi tarjaha, ndang haidaan be. Paduahon, martua ma jolma, ia so dijujur Jahowa tu ibana hajahaton, jala ndang marpanalessem tondina di bagasan. Ndang dijujur lapatanna ndang diingot, dietong, ndang ditimbang. Ndang didok Debata tu hita, nasa on ma dokdok ni dosamu, saleleng on, dung i pasahaton ma tu ho songon on. Ndang disuhati Debata sude dosanta dohot hasalaanta, dung i di sada tingki dipapatar ma tu hita. Alai tung disesa do sude dosanta i so pola dipaetongetong be. Disi ma tarida holong dohot hasatiaon ni Debata tu angka na porsea. Ndang tartuhor ni jolma hasesaan ni dosa. Ndang songon na masa di sada huria di tingki ni Martin Luther na adong poda manang pangantusion boi disesa uluan ni huria dosa marhite sinamot, godang ni hepeng. Gabe marlumba halak pasesahon dosana tu uluan ni huria i. Ndang songon i hita laho mangantusi hasesaan ni dosanta. Alai holan ala asi dohot holong ni Debata sambing do. Holan Debata do na tau manesa dosa ni jolma.

Songon dia ma hita patuduhon naung disea Debata dosanta dohot na so dijujur Jahowa be hajahatonta. Parjolo, olo ma hita paubahon roha (bertobat). Unang be taihuthon angka parjahat i. Di ayat 10 didok, tung lan do parniahapan ni parjahat, alai manang ise na marhaposan tu Jahowa, halianghononNa tusi asi ni roha. Molo tapaihutihut angka na masa di partingkian nuaeng on, lam mangimbukbuk do hajahaton ni jolma di portibi on, apalagi alani pangontak ni zaman na modern on. Marragam cara dibahen laho pasauthon na di rohana so mardia imbar sasaranna. Manangko, margabus dohot mamunu pe nunga diula jolma i, molo tapaihutihut angka na barita sian televisi nunga tiap ari adong angka kasus pembunuhan, sahira so mararga be hosa ni jolma i, jala sahira so adong be biar na. Paduahon, marhaposan tu Jahowa i do na ringkot di ngolunta on. Molo marhaposan tu Jahowa do hita jaloonta ma angka pasupasu i sian Ibana. Di poda ni raja Salomo i didok marhaposan tu Jahowa ma sian nasa roham, unang marpangunsandean ho tu pingkiranmu sandiri (Poda 3: 5-6). Marhite tangiang tapasahat sude panolsolion dohot panopotion ni dosanta. Tung mansai uli do molo tapamanat liturgi ni parmingguonta, marhite na parjolo dibaritahon hata ni Debata (Epistel), dung i diuduti muse tangiang panopotion dosa dohot bagabaga ni Debata taringot tu hasesaan ni dosa. Dung i dipabotohon muse patik manang ruhut di ngolu na imbaru. Lapatanna dipabotohon tu hita angka dia patik na maralo dohot patik siulahononta na hinalomohon ni Debata sian hita, asa unang be tadatdati mangulahon dosa ala nunga disesa Debata dosanta.

Mauliate ma tadok tu Debata naung ro tumopot hita tu portibi on asa dapot hita hasesaan ni dosa marhite Tuhan Jesus Kristus. Ro Ibana sian hasangaponNa i manopot hita na lea on. Holan marhite Kristus do tajalo hasesaan ni dosa. Martua ma hita tutu ala naung sesa dosanta dibahen Jesus. I do umbahen didok Tuhan Jesus sian hau na pinarsilang i, “nunga marujung”. Aha do tahe na marujung? I ma angka dosanta dohot sude pangalaosionta di adopanNa. Diboan Jesus tu hau na pinarsilang i. Alani i ro hita tu bagas joro ni Debata laho manghalshon dohot manghamauliatehon haroroNa tumopot hita. Hinorhon ni haporseaon tu Debata dohot ala asi ni roha ni Debata sambing do asa dapot hita haluaon dohot hatuaon i. I do didok si Martin Luther, sola fide (holan ala haporseaon); sola gratia (holan ala asi ni roha); sola scriptura (holan ala hata ni Debata). Martua ma manang ise na marhaposan tu Debata. Didok Tuhan Jesus: “Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon” (Mat. 11: 28-30). Sandok parasiroha jala pardenggan basa do Debata di ngolu ni angka na porsea dohot na marsihohot tu Ibana. Alani martua ma hita nampuna Tuhan Jesus ala tutu naung sesa dosanta.

Arga do hita di adopan ni Debata, hita ma ruas ni huria naung sinesaan angka dosanta. Alai asa jumpang hasesaan ni dosa i, ingkon rade hita manopoti. Didok Parpsalmen i, hupabotohon ma tu Ho dosangku, topotanhu ma angka pangalaosiongku. Hinorhon ni ingkon marlas ni roha hita mida Jahowa, i do nidok ni ayat 11 on, marlas ni roha ma hamu mida Jahowa, jala marolopolop ma hamu ale angka partigor, jala marende ma sude hamu angka parsihohot marroha. Asa tangkas do taboto, ia Debata parasi roha jala pardenggan basa do tu saluhut halak angka na olo manopoti dosana. Alai nang pe naung disesa Debata angka dosanta, ndada gabe sai tajugulhononta mardosa. Tanda naung sesa dosanta dohot mandok mauliate tu Debata, mian ma hita di bagasan hatiuron dohot hatigoran. I do dihalomohon Debata sian hita angka naung tinobusNa. Dipatuduhon Parpsalmen i do jonok ni parsaoranna tu Debata, mansai jonok ibana pola hira anak dohot amana. Ngolu sisongon i ma na naeng tiruonta, jonok tu Debata.