Khotbah Roma 8: 9-11 "Roh Kudus yang Menghidupkan"

Minggu Pentakosta; 09 Juni 2019

Di sada buku adong dipatorang taringot sahalak tokoh sian India na margoar si Mahatma Gandi, ima taringot tu panandaion ni si Mahatma Gandi tu hakristenon. Didok ibana do, ianggo Jesus i sada pribadi na luar biasa. Longang do ibana manjaha saluhut uloanNa. Jala sumurung do dirohana Jesus i. Alani do di na memperjuanghon haluaon (kemerdekaan) ni India, jotjot do marsiajar ibana sian Mateus 5 – 7 (Khotbah di Bukit). Alani do asa gabe disungkun si Stanley Jones sahalak Missionaris tu si Gandi, jotjot do hata ni Tuhan Jesus dibahen ibana laho mamparjuanghon India alai boasa ndang olo gabe Kristen? Didok ibana mangalusi Missionaris i, lomo do rohana di pangajarion ni Tuhan Jesus, alai ndang lomo rohana marnida parange ni halak Kristen. Ai ndang tarida gombaran ni Jesus i di torop halak Kristen. Na marbonsir ma i tingki di Afrika ibana karejo sebagai pengacara topet di ari Minggu, ro ibana naeng tu gereja, alai ndang diloas ibana bongot tu bagas joro i ala sian “Kulit Hitam” ibana. Alani ma didok ibana, godang do halak Kristen na andul parangena sian na niajarhon ni Jesus i. Molo tapamanat godang dope halak Kristen na so saurdot ngoluna tu pangajarion ni Jesus i. Ringgas do deba halak Kristen tu gereja, alai ndang bagas dilapati harorona tu gareja i. Molo ni sukkun aha do tujuan na ro tu gereja, pintor dialusi do, “naeng marminggu”. Jempek do alus i, alai jotjot do hurang diantusi hinabagas ni pangantusion di alus na jempek i. Alani tung somal do tabege hata na mandok, “ai so huboto lapatan ni na marminggu on, jamita pe so tabo, hira so adong do dapotniba manang aha, gabe marisuang nihilala. Marhite hata i boi antusanta, sai adong dope halak Kristen ro tu gereja holan na marminggu sambing. Ai molo disungkun dongan hita, “Laho tudia hamu lae manang eda?” Lao marminggu, ninna hita do mangalusi. Manang tadok tu donganta, “beta na marminggu on lae”. Somal do tabege manang tahatahon pandohan “laho marminggu” laos deba sian hita tahangoluhon do hata on, holan na marari minggu sambing do hita tu gereja. Ndang sala molo taulahon hasomalan i, alai na dipangido sian hita lobi sian hasomalan molo borhat hita tu gereja. Na dipangido tu halak Kristen ndang holan targoar Kristen, ndang holan mangulahon ritus-ritus parugamoon manang hakristenon. Alai lobi sian i, i ma asa mangolu dibagasan Tondi ni Tuhan i. Jala i do na naeng ondolhonon ni turpuk jamita on.

Andorang so sahat di ayat 9 di turpuk on, di ayat 8 tangkas didok, “Alai ndang tarhalomohon Debata angka parroha daging”. Ondolan on ringkot dipasahat apostel Paulus ala diida tung bahat dope halak Kristen na mangolu diulaon pardagingon. Tutu do nunga tardidi nasida jala diantusi paboa dapotan haluaon angka na porsea tu Jesus. Ndang diparsoada apostel Paulus pangajarion i jala huhut do diondolhon, paboa ndang na mangonai be uhum tu angka na dibagasan Kristus (ay. 1a), alai laos diuduti ibana do hatorangan, “I ma angka na so marpangalaho marguru tu daging alai marguru ma tu Tondi (ay. 1b). Alani i naeng dipatota tu nasida, ndada holan mangolu dibagasan Kristus, alai huhut do ringkot diantusi nasida lapatan ni na mangolu dibagasan Kristus i ma angka na so marpangalaho marguru tu daging alai na marguru tu Tondi. Laos didok muse “Alai ndang tarhalomohon Debata angka parroha daging”. Alani i ringkot situtu do hantus di roha ni halak Kristen lapatan dohot parasingan ni ngolu dibagasan tondi dohot dibagasan daging. Alani i tangkas do diondolhon apostel Paulus, “alai anggo hamu, ndang be dibagasan daging i, dibagasan tondi do, molo na tutu Tondi ni Debata maringanan dibagasan hamu (ay.9)”.

Laos joujou do on tu saluhut halak Kristen asa mangolu dibagasan tondi, i ma marhite na niinganan ni Tondi ni Debata ngolu nasida. Molo taloas Tondi ni Debata maringanan dibagasan ngolunta, manguluhon hita, mangajari hita, manogunogu huhut maniroi hita, talup do hita mangulahon angka parbue ni tondi (Gal. 5: 22). Ai molo sian dirinta sambing, ndang tarula hita agia aha na hombar tu lomo ni roha ni Tuhan i. Ai tangkas didok, “ai girgir do nian tondi i alai gale do ia daging i (Mat. 26: 41). Huhut muse taingot hata ni Jesus di Joh. 15: 5; “ai ndang tarula hamu agia aha, anggo so mardongan Ahu”. Alani ndang talup hita mangulahon i molo holan sian dirinta. Holan hagogoon na sian Tuhan i do na boi tapangasahon asa talup hita patupahonsa. Ai tangkas do dihatindanghon apostel Paulus di Pilippi 4: 13; “Ai saluhut do tarpatupa ahu marhite Ibana na margogoihon ahu”. Alani, taloas ma ma mangula Tondi ni Debata di ngolunta, asa ditogotogu jala dipargogoi, dipatau hita mamparbuehon parbue ni tondi.

Molo mian jala mangula do tond ni Tuhan i dibagasan ngolunta, ditogutogu do hita mangantusi angka na hinalomohon ni Debata dohot na hinalomohonNa. Ditogutogu hita manirang angka na roa huhut mamillit dalan na denggan i di ngolunta. Dipargogoi do hita maralohon angka na jat na naeng mangelaela hita mandao sian dalan ni Tuhan i. Dipargogoi do hita mardame jala patupahon dame di tongatonga ni angka konflik na boi masa di tongatonga ni parsaoranta dohot dongan jolma. Haroronta gabe siboan dame, ndang gabe lam mambahen rundut angka konflik manang persoalan na masa. Lan doe angka parange partondion na patut jala talup taulahon molo mian do Tondi ni Tuhan i di ngolunta.

Tutu ndang mura mangolu dibagasan Tondi ni Tuhan i. Ai dihosomi ortibi on do Jesus, suang songon i nang hita songon sisean ni Jesus. Tontu godang do tantangan na patut adopanta uju naeng mangulahon ulaon na denggan. Jotjot do ra tabege hata na mandok, “sisogo do sidok na sintong, manang ndang marlapatan hape haburjuon i”. Jotjot do sisurang hita uju tapasahat hasintongan manang sahira so dianggap dongan angka pambahenanta na denggan (haburjuonta i) tu nasida. Alai ingkon porsea hita, “Molo Kristus dibagasan hamu, mangolu do tondi alani hatigoran (ay. 10)”. Unang ganggu rohanta, ai nungga disunggul i Tondi i Jesus sian na mate, nunga mangolu jala monang Jesus i, nunga ditaluhon hamatean dohot sumbia ni sibolis. Tontu ingkon monang jala mangolu hita rap dohot Jesus naung monang i. Ndang pasombuonNa hita mangadopi hamaolon punjung sasada hita. Ai tangkas do bagabagaNa di Mateus 28: 20; “sai na dongananHu do hamu ganup ari, rasi rasa ro ajal ni hasiangan on. Alani unang ganggu rohanta. Tongtong ma tapangasahon Tuhan i. Naeng ma hita boi jongjong gabe halak Kristen na tutu. Taungkap ma rohanta dohot ngolunta manjangkon Tondi ni Tuhan i. Asa Ibana na mangula dibagasan ngolunta. Asa manang aha pen a taula naeng hombar tu lomo ni rohaNa, mambahen sangap di goarNa.