Khotbah Wahyu 22: 1-12 "Hidup Kudus di Hadapan Allah"

Pangungkapon 22: 12-17

22:1 Dung i dipatuduhon ma tu ahu batang aek hangoluan na tio songon sorminan, na ruar sian habangsa ni Debata dohot Birubiru i.

22:2 Di tongatonga ni alamanna dohot di batang aek i angkupangkup adong hau hangoluan, na marparbue sampuludua hali, na mangalehon parbuena ganup bulan; ia bulung ni hau i gabe hahisaron ni angka bangso.

22:3 Ndang adong be na hona bura. Disi do habangsa ni Debata dohot Birubiru i; angka naposona i ma marhalado di Jolona.

22:4 Idaonnasida do Bohina; di pardompahannasida do Goarna.

22:5 Ndang masa be disi borngin, ndang ringkot be di nasida palito manang sondang ni mata ni ari, ai sondangan ni Tuhan Debata do nasida, jala na mangarajai do nasida salelenglelengna.

22:6 Dung i didok ma mandok ahu: Haposan do angka hata on jala na sintong; disuru Tuhan Debata, nampuna tondi ni angka panurirang, do surusuruanna, patuduhon tu angka naposona angka na naeng masa tibu.

22:7 Ida ma, gira do Ahu ro! Martua ma na mangaradoti angka hata panurirangon na di bagasan buku on!

22:8 Ahu, Johannes, do marnida jala umbege angka on. Jadi dung hubege jala huida, manungkap ma ahu marsomba tujolo ni pat ni surusuruan, na patuduhon angka i tu ahu.

22:9 Jadi didok ma mandok ahu: Unang ma songon i! Donganmu naposo do ahu jala dongan ni angka hahaanggim, dongan ni angka panurirang dohot angka na mangaradoti hata ni buku on. Debata ma somba!

22:10 Dung i didok ma mandok ahu: Unang sahapi angka hata panurirangon ni buku on, ai jonok ma tingkina!

22:11 Tong ma didatdati siula hajahaton mangulahon hajahaton; tong ma diramuni na ramun i dirina; tong ma diulahon na tigor i hatigoran; tong ma diparbadiai na badia i dirina!

22:12 Ida ma, gira ma Ahu ro! Boanonku ma upa silehonon tu ganup, hombar tu na niulana!

Ninna angka na pistar, lumeleng do jolma mangolu molo so mangan sian molo so minum. Boi mangolu jolma nang pe so mangan 30 sahat tu 40 ari, alai molo so minum olat ni 3 sahat tu 4 ari do (hurang lobi 100 jam). Alani, humanist do hurangan aek sian hurangan mangan. Ndang na mandok tabo do molo hurang mangan. Sian i taantusi ma ia aek, i ma kebutuhan na mansai ringkot di ngolu nji jolma. Alani somal do aek dipangke gabe simbol ni hangoluan. Laos i do na pinataridahon ni turpuk on tu hita, marhite gombaran batang aek hangoluan na ruar sian habangsa ni Debata. Sada sian ragam ni teologi na padomuhon Padan na Robi tu Padan na Imbaru i ma teologi aek (sunge). Di bona ni Padan na Robi jala di ujung ni Padan na Imbaru digombarhon do na adong batang aek. Di 1 Musa 2: 10 – 14, disurathon adong batang aek di porlak Edeba ba manirpang gabe opat batang aek bolon, i ma Pison, Gihon, Tigris, Euprat. Songon i di ujung ni Padan na Imbaru, i ma di turpuk on di Pangungkapon 22: 1 “Dung i dipatuduhon ma tu ahu batang aek hangoluan na tio songon sorminan, na ruar sian habangsa ni Debata dohot Birubiru i”.

Dia do lapatan ni gombaran na di buku Pangungkapon on tu hita di partingkianta saonari? Songon naung tadok nangkin, ia batang aek i ma simbol hangoluan ni jolma. Jadi batang aek na di porlak Eden nang na di habangsa ni Debata martudutudu paboa na tongtong diparade Debata nasa na ringkot di ngolu ni jolma. Manang aha pe na taharingkothon asa mangolu di ngolu saonari nang sogot, saluhutna i diparade Debata. Batang aek hangoluan na di turpuk on mangihuthon bindu 21 jumpang di ari parpudi do i, i ma tingki ro langit dohot tano na imbaru. Tutu sijaloonta di ari parpudi do i, alai tong do ingkon ingotonta paboa nunga tadai jala tajalo i marhite haroro ni Tuhan Jesus tu portibi on. Secara teologis i ma na nidokna, nunga jala ndang dope (sudah dan belum). Di bagasan Tuhan Jesus Kristus sijaloonta di ari parpudi i nunga sahat di portibi on, i do umbahen didok Tuhan Jesus di Lukas 17: 20-21 “Alai disungkun angka Parise do Ibana: Andigan ma songgop harajaon ni Debata? Gabe dialusi ma nasida, ninna ma: Apala gumortap idan harajaon ni Debata di harorona i. Jala ndang tardok: Ndi on do! Manang: Ndi an! Ai tung di tongatongamuna do harajaon ni Debata” (Pat. Mat. 12: 20). Lapatanna, nunga di tongatonganta, nunga di portibi on harajaon ni Debata. Tutu sipaimaonta dope batang aek hangoluan i di ari parpudi alai sasintongna ianggo patujolona nunga tadai jala tajalo di partingkianta sisaonari. Molo tung jaloonta pe muse di ari parpudi holan hasisingkopna nama i. Lapatanna, nasa na di bagasan Tuhan Jesus Kristus nunga manjalo jala mandai batang aek hangoluan na tio na asongon sorminan i di ngolu saonari. Batang aek hangoluan na sian habangsa ni Debata i do na pangoluhon nang margogoihon hita sahat tu saonari. Ndang adong be sian hita na hona bura songon na nidok ni ayat 3. Ndang adong be angka na porsea na di toru ni bura tarlumobi buran i dosa.

Batang aek do na patubuhon angka hau nang suansuanan, suang songon i nang di habangsa ni Debata. Ala nunga haruar batang aek hangoluan sian habangsa ni Debata, tontu tubu ma angka suansuanan, jala di turpuk on didok tubu ma hau hangoluan (pat. 1 Musa3: 22). Na menarik sian gombaran ni hau hangoluan on i ma marparbue 12 hali manang marparbue ganup bulan. Somalna ndada ganup bulan marparbue hau manang suansuanan, marmusim do, adong do bulan-bulan tertentu suansuanan asa marparbue, jala pigapiga bulan nari ndang marparbue. Balik sian i do ianggo hau hangoluan na di habangsa ni Debata. Manontong do i marparbue, ndang hea mansohot. Suansuanan na so hea mansohot marparbue di habangsa ni Debata, songon i ma ndang hea mansohot panarihonon ni Debata di ngolu ni na porsea. Gombaran on pahothon roha ni halak Kristen di huria na parjolo i na digosagosa pola torop dibunu uju di panggomgomion ni Kaisar Romawi, Dominitianus. Dipapos Debata rohanasida marhite na mangalehon parnidaan tu si Johannes paboa na so dipasombu Debata nasida, baliks dilehon do panghirimon na mangolu tu nasida. Ingkon jaloon nasida langit dohot tano na imbaru na so adong be iluilu disi (Pang. 21: 4). Disi ma panganon nasida parbue ni hau hangoluan na ruar sian batang aek hangoluan. Jala di partingkian nasida i pe, didongani jala dipargogoi Debata do nasida. Laos songon i ma nang tu hita saonari. Dipahot jala dipapos turpuk on ma haporseaonta paboa na so hea mansohot pangaramotion ni Debata di hita nang pe tabolus ragam ni hamaolon. Tongtong do Debata manarihon ngolunta ala tongtong do hau hangoluan i “marparbue 12 hali”. Dijamin Debata do pandonganionNa, pangaramotionNa marhite gombaran ni hau hangoluan na marparbue ganup tingki. Lobi sian dope dipabotohon tu hita paboa diparade Debata do hamamalum tu angka a marsahit marhite pandohan “bulung ni hau hangoluan gabe hahisaron”, pabothon na dipamalum Debata do saluhutna i.

Molo nunga dipasunggulhon tu hita asa pos rohanta di hangoluan nang hahisaron na pinarade ni Debata di hita di ngolu saonari nang ari sogot, nuaeng ditogihon hita marhite ayat 11 on, asa taparbadiai dirinta. Sungkunsungkunna, boi do jolma mamparbadiai dirina? Alusna adong dua, boi jala ndang boi. Ndang boi molo mangasahon dirina, alai boi do molo di bagasan Tuhan Jesus. Dirupi, dipargogoi, dipatau Debata ma angka na porsea mangolu dibagasan habadiaon ni Debata. I do umbahn didok di ayat 11, “Tong ma didatdati siula hajahaton mangulahon hajahaton, tong ma diramuni na ramun dirina; tong ma diualhon na tigor i hatigoran, tong ma diparbadiai na badia i dirina!” Ndang na mandok lomo roha ni Debata mangolu jolma i di bagasan hajahaton. Ayat 11 on gabe sipaingot tu angka na porsea asa mangolu di bagasan Tuhan Jesus Kristus asa diparbadia i Ibana hita sian hadosaonta, jala dipargogoi hita mangolu hombar tu lomo ni rohaNa. Habadiaon ni Tuhan Jesus do na boi mamparbadiai hita, dung i dipatau ma hita mangula lomo ni rohaNa. Tasungkun ma dirinta nuaeng, mangolu di bagasan hajahaton dope hita manang habadiaon? Molo dibagasan hajahaton dope, turpuk on ma gabe joujou tu hita asa tatadinghon i. Tadapothon ma habangsa ni Debata naung ro tu portibi on dibagasan Tuhan Jesus Kristus. Di bagasan habangsa ni Debata i ma nuaeng nang di ari sogot mandai batang aek hangoluan, parbue ni hau hangoluan, dohot hahisaron. Aek songon simbol ni hangoluan nunga diparade Debata di hita nuaeng nang sogot. Alani, tapataridahon ma naung mangolu hita dibagasan habangsa ni Debata marhite ngolu na marhabadiaon.