Khotbah Wahyu 22: 12-17 "Hidup Kudus dihadapan Allah"

Minggu 1 Set. Trinitatis; 23 Juni 2019

Pangungkapon 22 : 12 - 17

22:12 Ida ma, gira ma Ahu ro! Boanonku ma upa silehonon tu ganup, hombar tu na niulana!

22:13 Ahu do Mulana jala Punsuna, Parjolo jala Parpudi, Bonana jala Ujungna!

22:14 Martua ma angka na mamburi abitnasida, asa marhuaso nasida marjambar di hau hangoluan i jala masuk sian angka harbangan tubagasan huta i.

22:15 Dibalian ma angka biang dohot angka siulahon rasun dohot angka parmainan dohot pamunu dohot sioloi na so Debata, ro di nasa na mangkaholongi jala na mangulahon gabus.

22:16 Ahu, Jesus, marsuru surusuruanku, mangkatindangkon tu hamu angka on, mandapothon angka huria i. Ahu do urat dohot marga ni Daud, bintang sipaias na marsinondang i!

22:17 Jadi didok Tondi dohot oroan i: Ro ma Ho! Laos dohonon ni na umbegesa: Ro ma Ho! Sai ro ma na mauas; dijalo na giot roha i ma aek hangoluan i, dalan basabasa!

Adong sada sungkunsungkun songon on, boi do jolma mamparbadiai dirina sandiri? Adong dua alus na boi dohonon tu sungkunsungkun sisongon i. Boi jala ndang boi. Ndang boi molo mangasahon dirina sadiri, alai boi do molo dibagasan Tuhan Jesus Kristus. Diurupi, dipargogoi, dipatau Debata ma angka na porsea mangolu di bagasan habadiaon ni Debata. Jala i do na naeng sunggulhonon ni turpuk jamita on tu huria na parjolo i. Na tongon mangadopi ragam ni hasusaan dohot parmaraan di tingki panggomgomion ni harajaon Roma uju mamarenta Kaisar Domitianus. Adong parenta sian Kaisar dihatiha i, asa sude halak na ginomgoman ni harajaon Roma ingkon manomba Kaisar na gabe debata (dewa). Torop halak Kristen dihatiha i na ginosagosa pola torop na dibunu ala ndang olo marsomba tu Kaisar. Patoguhon haporseaon nasida umbahen disurathon buku Pangungkapon on. Dipapos Debata rohanasida marhite na mangalehon parnidaan tu si Johannes di Pulo Patmos paboa na so dipasombu Debata nasida, baliksa dilehon do panghirimon na mangolu tu nasida. Ingkon jaloon nasida langit dohot tano na imbaru na so adong be iluilu disi. Alani ingkon boi tongtong nasida manjaga habadiaon nasida ala nunga diparbadiai Debata nasida marhite hamamate ni Tuhan Jesus di hau na pinarsilang.

Disituasi ni halak Kristen na mangadopi hamaolon dohot sitaonon alani haporseaon nasida tu Tuhan Jesus, dihirim nasida do asa gira ro Debata laho mangurupi dohot paluahon nasida sian angka hamaolon dohot sitaonon i. Alani do marhite parnidaan ni si Johannes di pulo Patmos dipatuduhon ibana na so dipasombu Debata nasida mangadopi angka hamaolon dohot sitaonon i. Di ayat 12-13 didok: “Ida ma, gira ma Ahu ro! Boanonku ma upa silehonon tu ganup, hombar tu na niulana! Ahu do Mulana jala Punsuna, Parjolo jala Parpudi, Bonana jala Ujungna!” Pandohan ida ma, gira ma Ahu ro; didok dua hali di bindu 22 on na naeng patuduhon mansai ringkot do nasida manjaga habadiaon ni ngolu, ala molo nunga ro tingkina ndang boi be dohonon paima jolo, satongkin nari ma ro asa jolo pinadenggan angka pangalaho dohot pambahenan, ndang boi dohononta songon i. Ala Ibana do Mulana dohot Punsuna manang parjolo jala parpudi patuduhon na Ibana do Debata na hot ro di saleleng ni lelengna na ingkon sombaon ni halak na porsea. Haroro ni Debata laho mamboan upa silehonon tu ganup halak hombar tu parniulaan na be. Ndang adong na boi martabuni manang marsidalian molo nunga jumpang tingki haroroNa i. Upa na laho lehonon ni Debata tu ganup halak hombar do tu parangena manang pambahenan ni jolma i siganup ari. Hangoluan na saleleng ni lelengna manang uhum do na dapot ni sasahalak tergantung tu angka na niulana be ma. Marhite ayat 12-13 on, naeng pahothon haporseaonta tu Ibana, atik pe di portibi on godang haporsuhon, hajahaton, alai ingkon boi hita marsihohot manang lam gomos manjaga haporseaonta dohot habadiaonta di jolo ni Debata ala Ibana do silehon pasupasu hot ro di salelengleleng na. Unang gabe dohot hita mangulahon angka dosa dohot hajahaton.

Dilehon Debata do panghirimon na mangolu tu huria na parjolo i na tongon mangadopi angka hamaolon dohot sitaonon, tangkas didok di ayat 14, martua ma angka na mamburi abitna. Molo didok martua boi dohonon ingkon sonang ma jolma na martua. Alai andorang so sahat hita tu hatuaon na pinarade ni Debata ingkon adong do siulahonon ni jolma i, molo diturpuk on didok angka na mamburi abitna. Na marlapatan ma i angka na tongtong marsihohot mangulahon parenta ni Debata laho manjaga habadiaon ni ngoluna nang pe mangadopi ragam ni angka hamaolon alani haporseaon tu Debata. Nunga diparade jambar di hau hangoluan marhite hamamate ni Tuhan Jesus di hau na pinarsilang dohot haheheonNa sian na mate laho manaluhon huaso ni hamatean dohot sorop ni dosa. Ingkon tajangkon do basabasa na naeng pasahaton ni Debata tu saluhut halak na porsea marhite na mamburi abit manang manjaga haiason dohot habadiaon ni ngolunta asa masukanta harbangan ni huta i, i ma inganan hasonangan naung pinarade ni Tuhan Jesus Kristus na hot ro di salelenglelengna. Alai di halak na so mangoloi Debata ndang gabe parsidohot nasida di inganan hasonangan i. Tangkas didok di ayat 15, di balian do inganan nasida. I ma upa ni halak na mangulahon ragam ni hajahaton, angka halak na dao sian lomo ni roha ni Debata. Uhum nama pamasaon ni Debata tu halak na songon i.

Dijou Debata do huria manang halak (oroan) na manjaga habadiaonna mandai aek hangoluan na gabe dalan basabasa. Ninna angka na pistar, lumeleng do jolma mangolu molo so mangan sian molo so minum. Boi mangolu jolma nang pe so mangan 30 sahat tu 40 ari, alai molo so minum olat ni 3 sahat tu 4 ari do (hurang lobi 100 jam). Alani, humanist do hurangan aek sian hurangan mangan. Ndang na mandok tabo do molo hurang mangan. Sian i taantusi ma ia aek, i ma kebutuhan na mansai ringkot di ngolu nji jolma. Alani somal do aek dipangke gabe simbol ni hangoluan. Laos i do na pinataridahon ni turpuk on tu hita, marhite gombaran batang aek hangoluan na ruar sian habangsa ni Debata. Sada sian ragam ni teologi na padomuhon Padan na Robi tu Padan na Imbaru i ma teologi aek (sunge). Di bona ni Padan na Robi jala di ujung ni Padan na Imbaru digombarhon do na adong batang aek. Di 1 Musa 2: 10 – 14, disurathon adong batang aek di porlak Edeba ba manirpang gabe opat batang aek bolon, i ma Pison, Gihon, Tigris, Euprat. Songon i di ujung ni Padan na Imbaru, i ma di turpuk on di Pangungkapon 22: 1; 17. Dia do lapatan ni gombaran na di buku Pangungkapon on tu hita di partingkianta saonari? Songon naung tadok nangkin, ia batang aek i ma simbol hangoluan ni jolma. Jadi batang aek na di porlak Eden nang na di habangsa ni Debata martudutudu paboa na tongtong diparade Debata nasa na ringkot di ngolu ni jolma. Manang aha pe na taharingkothon asa mangolu di ngolu saonari nang sogot, saluhutna i diparade Debata.

Tasungkun ma dirinta nuaeng, mangolu di bagasan hajahaton dope hita manang habadiaon? Molo dibagasan hajahaton dope, turpuk on ma gabe joujou tu hita asa tatadinghon i. Tadapothon ma habangsa ni Debata naung ro tu portibi on dibagasan Tuhan Jesus Kristus. Di bagasan habangsa ni Debata i ma nuaeng nang di ari sogot mandai batang aek hangoluan, parbue ni hau hangoluan, dohot hahisaron. Aek songon simbol ni hangoluan nunga diparade Debata di hita nuaeng nang sogot. Alani, tapataridahon ma naung mangolu hita dibagasan habangsa ni Debata marhite ngolu na marhabadiaon.