Khotbah Ester 5: 1-8 "Hidup dalam Ketaatan"

Minggu 4 Set. Trinitatis; 14 Juli 2019

Ester 5: 1 - 8

5:1 Tole patoluarihon marpangkean harajaon ma si Ester jala jongjong di alaman parbagasan mardonokkon jabu ni rajai, tondong ni jabu ni rajai tahe, alai hundul di habangsa harajaonna i anggo rajai di bagasan jabu ni rajai, tondong ni pintu ni jabu i.

5:2 Jadi dung diida rajai si Ester, jolma ni rajai, jongjong di alaman, lomo ma roha ni rajai marnida si Ester, laos disurdukkon rajai ma tu si Ester tungkot harajaon sere na di bagasan tanganna. Dung i dipajonok si Ester ma, laos dijama ma ujung ni tungkot harajaon i.

5:3 Dung i ninna rajai ma tu nasida: Aha do na hurang di ho, ale Ester, jolma ni raja, jala aha do na pinangido ni roham? Sahat ro di satonga ni harajaon i ingkon lehonon do i tu ho.

5:4 Alai ninna si Ester ma: Molo tung denggan di roha ni rajai, sai ro ma rajai rap dohot si Haman sadarion tu panggalangon na hupauli di ibana.

5:5 Dung i ninna rajai ma: Haru silu ma dokkon hamu si Haman pasauthon hata ni si Ester! Jadi dung ro rajai dohot si Haman tu panggalangon, na pinadiri ni si Ester.

5:6 Mangkuling ma rajai mandok tu si Ester, dung sombu rohana minum anggur: Aha do na pinangido ni roham, ingkon lehonon do i tu ho, jala aha do sihol ni roham ro di satonga ni harajaon i, ingkon pasauton do.

5:7 Jadi ninna si Ester ma mangalusi: Pangidoanku dohot sihol ni rohangku on do:

5:8 Molo asi roha ni rajai marnida ahu, jala molo denggan di roha ni rajai mangalehon pangidoanku dohot pasombu sihol ni rohangku, sai ro ma rajai rap dohot si Haman tu panggalangon na hupauli di nasida, jadi marsogot ma bahenonku hombar tu hata ni rajai.

Ndang mansohot pangunjunan dohot parungkilon sian parngoluon ni hita jolma. Sadia godang pe arta hamoraon, ndang tuk laho manundati hamaolon lias sian ngolunta. Ndada ala hasalaan manang hahurangan umbahen ro angka siarsakhonon i. Hajahaton ni jolma do na jumotjot mambahen tubu hasusaan, ai sai adong do na so marlomo ni roha mida hatuaon ni ngolunta. Ndang holan di tingki na jolo songon i, alai nuaeng pe masa do tu angka siihuthon Tuhan i. Tabege do barita hasusaan na niadopan ni torop halak Kristen di pigapiga luat. Nunga diparade sude na ringkot laho manjalo panolopion sian pamarenta. Hape dung jongjong bagas i, ndang sadia leleng, ro ma na mangasahon gogo mambahen hagaoran huhut manutup inganan i. Hansit do ditaon torop ruas ala parsitutuon nasida mangihuthon Tuhanta i. Hasatiaon tu Debata, ndang holan managam haulion alai dohot nang hangaluton, parmaraan sahat na agoan hosa. Songon dia do tama hita halak Kristen mangadopi angka parsorion na hansit dohot parir na songon i?

Barita na mambahen tarhalomong roha dohot pingkiran sian turpuk jamita on ima taringot tu sada parompuan Israel na margoar Hadasa (Ester è manuman goar ni debata parompuan Persia è Istar, lapatanna buni do ahu). Gabe jolma ni raja Serses do ibana, na manggomgomi 127 luat (provinsi) sian India sahat tu Kus (Sungai Nil Misir), hatiha i nunga targoar liat portibi on. Harajaonna ma na umbalga, jala maringanan di Susan do ibana. Tongon marpesta do raja i, dijou do sude pangituai na, alai tunggane boru na margoar Wasti ndang ro tu pesta i. Mamungka sian i do ndang diloas be si Wasti manopot raja Serses ala pangalahona na mambahen pis mata ni halak tu raja i. Dung i dipapungu raja i ma sude parompuan di luat na ginomgomanna, laho mamillit singkat ni si Wasti. Ro ma dohot si Ester mandapothon raja i jala jumpangan asi ni roha ma ibana (Ester 2: 16). Saut ma si Ester gabe jolma ni raja Serses. Na diain si Mordahai do si Ester gabe boruna, dipagodang huhut dipodai asa sai marsihohot tu asi ni roha ni Debata dung marujung ngolu natorasna, ima na margoar Abigael. Dung salpu barita i, dipabangkit raja Serses nang si Haman gabe induk ni saluhut induk di bagas na. Dibahen do patik na hot asa ingkon marsomba saluhut jolma tu ibana angka na naeng bongot tu bagasan. Alai, ai si Mordahai ndang olo marsinggang manang marsomba tu si Haman, ala diboto ibana holan Debata Jahowa sambing do sisombaon. Marnida parange ni si Mordahai, tarrimas situtu ma si Haman jala ditahi naeng mangarendephon sude halak Jahudi di luat na ginomgoman ni raja Serses. Dipabotohon ma isi ni rohana na roa i tu raja Serses. Didok, na so olo unduk halak Jahudi tu patik tinontuhonna. Dioloi do pangidoanna i jala dilehon huaso laho patulushonsa. Halak Amalek do si Haman. Sian na hinan nunga sai sogo roha ni halak Amalek tu bangso Israel. Bangso Amalek do na hea mangambati si Musa jala marporang mangalo raja Saul. Alo ni halak Israel do halak Amalek. Asa nunga tung leleng sai naeng rendephonon ni halak Amalek bangso ni Debata.

Ndang adong manang ise na boi mangalo huaso ni raja. Halak Jahudi marserak do di pigapiga luat jala ndang margogo mangalo ala bangso na tartaban do nasida. Dung sahat barita i tu si Mordahai, gabe marsak situtu ma ibana. Disansani ma angka ulosna, jala marulos tangki dohot sirabun ma ibana ruar tu tongatonga ni huta i huhut mangangguk badar dohot mangandungi. Sahat ma barita i tu si Ester sian angka naposona. Gabe dipabotohon ma tu si Ester hinajorbut ni tahi ni si Haman na naeng mangarendephon saluhut halak Jahudi jala pola do diparade perak na mansai godang tu raja i molo dung sidung agohononna bangso ni Debata. Ndang holan si Mordahai, si Ester pe marsak situtu do mangadopi tahi na jahat i. Mangadopi na masai dipasahat si Mordahai ma poda tu si Ester, ai sasada ibana nama na tau pangunsandean ni sude halak Jahudi. Sasada ibana do na boi mangadop raja Serses laho manundati tahi na jahat i. Andorang so borhat si Ester mangadop raja Serses dipangido do tu saluhut halak Jahudi na mian di Susan asa marpuasa tolu ari tolu borngin lelengna. Puasa, sada dalan na marsitutu mangido panuturion sian Jahowa. Marpuasa halak Jahudi mangalualu tu Debata asa dipalua Ibana bangsoNa sian parmaraan bolon i. Di ari patoluhon i, borhat ma si Ester mandapothon raja Serses. Marpahaean harajaon ibana ro. Somalna, jolma na so dijou ro mangadop raja ndang tagamon dijangkon jala boi laos agoan hosa. Hira manopot liang ni babiat panoro do harorona tu bagas ni raja i. Mangolu manang mate ndang mambahen humordit dirina ala posea Debata do manontuhon parngoluan ni angka na porsea. Ala didongani sahala ni Jahowa ibana mago do biarna jala sai hira na mandok, na so agia boha manang na so tupa mate ibana di jolo ni raja i. Ai dung diida jongjong ibana di alaman ni bagas ni raja i, disurdukhon ma tu ibana tungkot harajaon sere laos dijama. Dipaloas jala dipasombu raja Serses do si Ester bongot tu bagas. Dioloi Jahowa do tangiang ni halak Jahudi na mangido pangurupionNa jala boi malua sian hamatean.

Mangula do Debata disude inganan nang partingkian laho paluahon bangsoNa sian ragam ni parmaraan. Nang pe buni panghophoponNa, alai tangkas do dipatuduhon barita ni si Ester, na tuk do gogona dohot huasona patupa haluaon ni angka na ni asianNa. Ndang hadodoan jala ndang tarsuhat dalan ni Debata mangaramoti, mangondihon bangsoNa dohot patulushon sangkap hatuaonNa. Naeng tongtong mangolu tondi na manghophop di hita ganup siihuthon Kristus ala marragam do hamaolon, hasusaan, parungkilon, dohot parmaraan diadopi angka na porsea i dingolu siganup ari, taida ma dirinta dohot haradeonta laho mangondihon angka donganta. Unang ma marroha diri manang holan sumarihon na ringkot di dirinta be hita, alai ingkon tatiru parange ni si Ester. Nang pe susa do ngoluna uju di sihametmetonna, alai hasatiaonna tu Debata patauhon ibana mangula na denggan tu bangso ni Tuhanta. Ingkon tau hita mananda sangkap hatuaon ni Debata. Molo masa hamaolon ingkon tongtong porsea hita di huasoNa marhite na rade mangido pangurupionNa. Haunduhon tu Jahowa padaohon tondi biar sian angka na porsea. Na marsitutu mangido tu adopan ni Debata i do na sai dapotan parsaulian. Hasatiaon tu Debata do dalan tongtong marpanghirimon na mangolu di pangondihonon ni Tuhan i. Tuhanta Jesus mandok, na so tupa tadinghononNa hita saleleng di tano on. “Sai na dongananKu do hamu ganup ari, rasi rasa ro ajal ni hasiangan on”.