Khotbah Hakim-hakim 7: 2-9 "Kemenangan Bersama Tuhan"

Minggu 6 Set. Trinitatis; 28 Juli 2019

Panguhum 7: 2 - 9

7:2 Dung i ro ma hata ni Jahowa tu si Gidion: Matorophu halak donganmu, nda tung tarlehon Ahu halak Midian tu tangannasida, atik beha mamuji dirina halak Israel maon moradophon Ahu mandok: Tanganku sandiri do paluahon ahu.

7:3 On pe tingtingkon ma tu pinggol ni bangso i songon on: Manang ise na mabiar, jala na tahuton, mulak ma ibana sian dolok Gilead! Jadi mulak ma duapulu dua ribu halak, gabe tading nama sampuluribu.

7:4 Dung i ninna Jahowa muse tu si Gidion: Matorophu dope jolma i; togihon ma nasida tuat tu batang aek i, asa Ahu manguji nasida di ho disi, jadi manang ise na hudok tu ho, ingkon i ma donganmu laho, jala ganup na hudok tu ho, ndang jadi donganmu ibana laho, i ma na so jadi laho.

7:5 Dung i ditogihon ibana ma bangso i tuat tu batang aek i, gabe didok Jahowa tu si Gidion: Manang ise na manirup aek i sian tanganna, songon pandilati ni biang, pulik ibana pajongjong; suang le songon i sude na minum manunggam.

7:6 Jadi bilangan ni angka na manirup sian tanganna, tolu ratus halak do, jala sandok bangso na teba i manunggam do laho minum aek.

7:7 Dung i ninna Jahowa ma tu si Gidion: Marhitehite na toluratus halak angka naung manirup sian tanganna Ahu paluahon hamu, jala lehononku Midian tu tanganmu; alai sandok bangso i dungkon i, muli be ma tu ingananna.

7:8 Dung i dibuat nasida ma bohal i sian na torop i dohot angka sarunenasida di bagasan tangannasida, dipamuli ma luhut halak Israel na asing ganup tu undungundungna be; alai ditiopi do anggo na tolu ratus halak i ianggo parangan ni halak Midian, marsaro do di jolona, tungkan toruan di rura i.

7:9 Laos bornginna i didok Jahowa tu ibana: Hehe ma ho! Tuat ma ho tu parsaroan ni parangan i, ai nunga hupasahat nasida tu tanganmu.

Godang na tarjou, alai otik do na tarpillit. Pandohan on ra nunga jotjot tarbege hita manang hita sandiri pe ra hea do mandok hata i. Jala pandoha i do na masa di turpuk jamita on di tingkia laho marporang halak Israel na niuluhon ni si Gidion dohot halak Midian. Tarjou do si Gidion gabe sada sian horong ni angka Panguhum na pinabangkit ni Debata laho manguluhon bangso Israel laho marporang dompak halak Midian. Ro suruan ni Jahowa mandapothon ibana huhut mandok: Didongani Jahowa ma ho, ale ulu balang na gogo (Panguhum 6: 11-12). Ulaon na borat do na sahat tu si Gidion jala na so hea diula ibana dope na songon i. Dijua si Gidion do nian panjouon i, alai ala mangula Debata tu rohana ujungna dijalo ibana ulaon i. Laho paposhon rohana didok Debata ma, “Laho ma ho di hagogoonmom, ingkon ho paluahon Israel sian tangan ni halak Midia, nda Ahu do marsuru ho?” (Panguhum 6: 14). Dung i disuru Debata do si Gidion laho mamillit bangso i na boi dohot marporang mangalo halak Midian. Dipatupa si Gidion do pamilliton tu halak Israel laho mangalo halak Midian hombar tu parsuruon ni Debata. Laho patulushon sangkap parporangan i, martingting ma si Gidion tu bangso i hombar tu tona ni Debata:

Parjolo, na mabiar jala na tahuton boi mulak. Ala pertarungan ni hosa do tutu parporangan i, porlu disungkun bangso i, angka ise ma na olo na so pola dipaksahon. Jala ndang sai sude jolma na boi boanon marporang. Adong do deba holan dibereng alona nunga pintor mabiar. I do umbahen dilehon tingki pamilliton i. Manang ise na mabiar jala na tahuton mulak ma ibana tu dolok Gilead. Unang mamaksahon diri, gabe siuruson ibana di parporangan i. Tutu godang do na mabiar dohot marporang, goarna ma marporang sotung gabe dibuat musu ibana. Toho ma tutu godang na mabiar tu parporangan i. Dung i tading ma sampulu ribu halak, unang do holan bilangan ni jolma i do na godang alai anggo boban kerja ndang marlapatan. Na tumagon do otik alai tarida hasilna na memuaskan. Jala jotjot do i masa di tongatonga ni parngoluonta. Alai sai girgir do halak sai naeng dohot alai as alma dohot alai ndang olo mangula.

Paduahon, na manirup aek sian tanganna ima na dohot marporang. Mangihuthon pamotoan ni Debata tong dope patorophu ba sampulu ribu i. Alani i naeng ma oruanna nasida. Dung i dibahen si Gidion ma pamilliton, manang ise na manirup aek i sian tanganna, ndang songon pandilat ni biang, nasida ma na dohot. Boasa songon i? Cara sisongon on do na denggan molo manginum aek, mamangke tangan laos disirup sian tanganna i. Asa di tingki na minum i do boi huhut mamereng halak na ro. Unang do di tingki minum laos lalap boti hape musu nunga ro. Ala molo marsobur do ibana huhut manungkap tu aek i, laos tompu ma ro alo laho mangaroro nasida, olo ma gabe pasudaonna nasida, ala ndang dibereng nasida be tu na humaliang, nunga tartuju tu aek i pardompahanna. Disi ma ro musu i manaluhon nasida. I do umbahen didok Debata tu si Gidion, marhitehite na tolu ratus halak on ma na dohot tu parporangan i gabe dipasahat Debata ma halak Midian na tongon marsaro tu tangan ni bangso i. Nang pe holan tading tolu ratus halak nasida, boi do manghamonanghon parporangan i, ala Jahowa sandiri do na pasahathon hamonangan i tu nasida; Debata sandiri do marporang rap dohot bangso i. Monang do angka na mangasahon Debata; si Gidion na so mangasahon gogo dohot utohutok alai mangasahon Debata sandiri. I do umbahen didok Jahowa tu si Gidion, “Hehe ma ho”! Tuat ma ho tu parsaoran ni parangan i, ai nunga hupasahat nasida tu tanganmu.

Monang do hita maralaohon sumbia ni sibolis marhite gogo na sian Debata. Songon na masa di turpuk on na marhadomuan tu topic minggunta ima: Marhamonangan Raphon Tuhan i. Monang do bangso ni Debata maralohon angka musu na mangarongom ngolu nasida. Molo dung Debata marsuru hita, tung so dipasombu do jolma i agohonon ni manang ise pe. Ndang suruon ni Debata hita tu ulaon na so tolap ulahononta alai ulaon na boi ulahononta do. Disi ma pandonganion ni Debata tu angka naporsea lahu manaluhon angka musu ni Debata. Diparar Debata do hita manghamonanghon paraloanta, alai ndada holan hita na mangula. Na rap do Debata dohot hita maralohon angka musunta manang ise pe alonta. Alani unang mabia hita disi, donganan ni Debata do hita tongtong asal ma marsihohot tu Ibana hita. Ai molo Debata donganta ise ma laonta? Alani i tapatujolo ma Debata di nasa ulaonta dohot angka na tasangkapi (Pat. BE. No. 66). Hombar ma i tu turpuk Epistelta, ima Epesus 6: 10-20, dung i, gabe togu ma rohamuna dibagasan Tuhan i dohot dibagasan hagogoon na togu i ala nunga tapangke sinjata haporseaon dohot hagogoon ni Debata. Nunga disuru Debata tu hita Panguhum na bolon, ima Tuhan Jesus na mamboan hita monang maralohon portibi on. Marhitehite Jesus Kristus i dapot hita ma asi ni roha ni Debata. Nunga disesa Debata nasa dosanta marhitehite hamamate dohot haheheon ni Jesus i. Jala boi ma hita malua sian uhum dohot rimas ni Debata.

Alani i naeng ringkot sungkononta huaso manang hagogoon dia do nuaeng na tapangke di ngolunta on, hagogoon na sian Debata do manang na sian portibi on do, ala rade do duansa i di hita. Tangkas taboto di turpuk jamita on, hagogoon na sian Debata do na mangula di halak Israel umbahen monang maralohon halak Midian. Ndang hagogoon portibi on manang hagogoon ni jolma. Dao gumodang parangan ni halak Midian sian halak Israel alai monang do bangso ni Debata. Disi ma tarida hagogoon ni Debata. Si Gidion manjalo hagogoon manguluhon bangso i marporang mangalo musu nasida. Mansai godang dope alonta di portibi on, alani unang ma hita mabiar ala didongani Tuhan i do hita. Unang ganggu jala mabiar hita ala Tuhan Debata do na rap dohot hita laho maralohon i saluhutna. Tahilala manang so tahilala mansai gogo do portibi on berusaha manaluhon jala manait hita asa mandao sian Debata. Alai taingot ma manang boha pe hagogoon ni portibi on parsatongkinan do i. Anggo di angka na porsea ingkon sai tongtong do mananda dohot mamangke hagogoon ni Debata. Alai memang molo taparrohahon angka na masa di tingki parpudi on, torop dope jolma na mamangke gogo ni portibi on laho mangurupi ibana. Jala marsigantung tu hagogoon na adong di portibi on. Alani do turpuk jamita on paingothon hita asa tung tangkas manjalo dohot mamangke gogo na sian Debata. Jala unang mangasahon hagogoon ni portibi on. Gumogo do Debata sian sude hagogoon dohot huaso na adong di portibi on. Jala tangkas do taboto, ndang adong na gumogo asing ni Debata.