Khotbah Kisah Para Rasul 17: 22-30 "Taat Kepada Allah Pencipta dan Penguasa Segala Sesuatu"

Minggu 3 Set. Trinitatis; 07 Juli 2019

Ulaon ni Apostel 17: 22 - 30

17:22 Asa jongjong ma si Paulus di parsitongaan ni Areopagus i, ninna ma: Hamu angka halak Aten, sandok huida, mabiar situtu hamu mida angka na pinardebatamuna i.

17:23 Ai di na mardalani ahu, mamerengi angka sisombaonmuna, gabe jumpang ahu ma langgatan sada na sinuratan: Tu Debata na so tinanda! Antong, na sinombamuna na so tinandamuna, i do na hubaritahon tu hamu.

17:24 Ia Debata na tumompa hasiangan on ro di saluhut isina, i ma Tuhan ni langit dohot tano, ndang maringanan Ibana di angka joro na pinauli ni tangan.

17:25 Ndang hurangan Ibana, umbahen pola sihobasan ni tangan ni jolma di Ibana, ai tung Ibana do mangalehon di sudena hangoluan dohot hosa ro di saluhutna i.

17:26 Sian sada jolma do dipatupa Ibana saluhut bangso ni manisia, asa diingani liat sisik ni tano on, dibuhul hian do tingki ni angka bangso i ro di parbalohan ni siinganannasida,

17:27 asa luluannasida Debata, anggiat tung hadadapan nasida Ibana jala jumpang, ai ndang na dao Ibana sian ganup hita on.

17:28 Ai di bagasan Ibana do hita mangolu, manggulmit jala humosa, songon na nidok ni deba parendemuna: "Sabangso do hita dohot Ibana!"

17:29 Antong, anggo sabangso hita dohot Debata, unang ma dirimpu rohanta, suman tu sere Debata, manang tu perak, manang tu batu na pinandean jala piningkiran ni roha ni jolma.

17:30 Naung dibolushon pamereng ni Debata do angka taon haotoon; alai anggo nuaeng dibaritahon do tu hajolmaon: Ingkon sandok sude paubahon rohana.

Turpuk sadari on manaringoti pardalanan ni apostel Paulus tu Aten na mansai tarbarita hatiha i, kota nab alga, na uli jala na maju ala godang disi angka na pistar di parbinotoan, filsuf ni halak Gorik. Di goari do Aten pusat intelektual, ala godang halak Rom marsingkola mangalului hapistaran marhite parsingkolaan disi. Alai diida apostel Paulus do masai godang ganaganaan dis, angka kuil (arca) na mansai uli, alai dibalik ni haulionna i, diida ibana hagolapon marhite parsombaon tu ganaganaan i. Alani i laho ibana martungkar pingkiran dohot angka halak di onan Aten. Pajumpang ma ibana dohot angka na pistar (filsuf) na berminat umbege hatana. Ditogihon angka na pistar i ma apostel Paulus tu dolok na margoar Aeropagus, asa boi tangkas dibege nasida hata na naeng pasahatonna.

Diida apostel Paulus do semangat ni halak Aten, lumobi angka filsuf na pistar di Aten laho mangalului Debata na sintong. Alai ndang dapot nasida dope Debata na sintong sian ganaganaan, ala buni dope sian pingkiran nang roha nasida taringot tu Debata na sintong. Debata na so tinanda nasida i do dipatandahon apostel Paulus tu nasida. Jala di ayat 22-23 didok apostel Paulus, sada do Debata na so tinanda nasida i, i ma Debata dibagasan Jesus Kristus; na manompa, mangatur langit, tano nang sude pangisina. Dipungka apostel Paulus do pangajarionna tu nasida taringot tu Debata Sitompa portibi on dohot nasa na adong, jolma, angka pahanpahanan nang suansuanan, nang angka planet dohot angka bintang (ay. 24a). Peranan ni Debata Sitompa nasa na adong, ndang songon ganaganaan na tinompa ni jolma. Ndang adong huaso ni ganaganaan, alai Debata marhuaso pangoluhon dohot pamatehon angka na tinompaNa. Halak Aten i ma angka na manomba ganaganaan, na so mananda hadirion ni Debata dohot sintong. Alani do dipatorang apostel Paulus ise Debata na sasintongna, jala boasa marisuang jolma molo manomba ganaganaan. Saluhutna i dipatorang laho patuduhon tu halak Aten na holan sada Debata na tumimbo sian nasa na adong. Holan Debata do na tau sisombaon ni jolma hibul di ngoluna. Ndang adong Debata na asing. Holan dibagasan Debata na sintong do adong haluaon ni jolma. Sahat tu partingkian nuaeng on jotjot dope tartait jolma gabe manomba ganaganaan, ala dihaporseai hira na boi ganaganaan mangalehon pasupasu, hape ndang adong pasupasu na ro sian ganaganaan. Hata ni Debata di Patik na parjolo sahat tu na paopathon mandok holan Debata do sisombaon. Ndang patut sombaon ni jolma angka na adong di portibi on, na ditoru ni tano, nang na di parlangitan, ia so holan Debata. Manang ise na manomba ganaganaan, uhum do na ro tu ibana. Molo tasomba ganaganaan na marlapatan do i manggontihon posisi ni Debata. Ndang targantihon posisi ni Deata songon Sitompa nasa na adong.

Dibagasan pangajarion na sian apostel Paulus on diondolhon do muse, na so tinggal Debata di joro na pinauli ni tangan (ay. 24b). Marhite on ditulak ibana do sude angka kuil na mansai godang di Aten hatiha i, na dihaporseai nasida songon inganan ni angka ganaganaan nasida. Ndang terbatas keberadaan ni Debata, ndang dibatasi ruang dohot tingki. Molo tabangun pe garejanta, ndang na mandok holan di gareja i tinggal Debata. Ai ungsi ni gedung gereja na tabangun di ingananta be, i ma inganan parpunguan ni halak Kristen, di tingki masa parmingguon dohot angka kegiatan ni huria hombar tu pelayanan ni huria i. Tutu hadir do Debata molo marpungu hita pasangaphon Ibana di bagas joroNa. Alai ndang terbatas inganan kehadiran ni Debata, ai manang didia pe hadir do Debata patuduhon huaso dohot holong ni rohaNa tu angka na tinompana. Jala ndang hurangan Debata, umbahen pola sihobasan ni tangan ni jolma di Ibana, ai tung Ibana do mangalehon di sudena hangoluan dohot hosa ro di saluhutna tu angka na tinompaNa (ay. 25). Debata do nampuna nasa na adong, alani ndang porlu tapasahat sipanganon manang siinumon tu Debata, songon na jotjot dipatupa angka sisomba ganaganaan. Ndang sihobasan Debata songon na manghobasi jolma, ai Ibana do na paradehon di hita saluhutna asa mangolu hita. Ndang bergantung tu pangurupion ni jolma jala ndang hea dipangido Debata pelean (kurban) laho sipanganonNa alani hapogosonNa. Alani sotung sala hita mangantusi, molo tapasahat pe pelean tu Debata ndang ala na pogos Debata gabe tapapungu hepeng tu Ibana, ai sian Ibana hian do hepengta nang angka hamoraonta i. Molo tapasahat pe pelean tu huria, na mandok mauliate do hita tu Debata marhite huriaNa ala sude pasupasuNa naung tajalo di ngolunta. Tujuan ni pelean ndang laho mangelek Debata songon na mangelek ganaganaan asa dipasahat pasupasu tu jolma na manggana.

Na mangihut di ayat 26-27, diondolhon apostel Paulus do Debata manompa sude bangso sian sada jolma. Dihaporseai halak Aten do, na jumolo jala tumua nasida sian sude bangso jala marasing asal usul nasida sian bangso na asing. Pingkiran ni halak Aten mandok halak barbar do sude bangso na asing. Halak barbar ima hala na so maradat jala na so adong etikana. Alani leas do pamerengan ni bangso Aten (Gorik) tu bangso na asing, termasuk bangso Jahudi. Pingkiran na songon on, ima paham rasialisme, aham na fanatik tu sada ras (suku bangsa). Ndang dipasombu apostel Paulus pandangan na sala si songon i, ala maralo tu hata ni Debata. Hata ni Debata mandok, sian sada jolma do ditompa Debata sude jolma on gabe godang bangso di portibi on. Ndang dihalomohon Debata adong rasisme di tano on. Alani rasisme do gabe dibunu/dipamate si Hitler bangso Jahudi. Alani rasisme do tubu porang, hosom tu bangso na asing, parbolatbolatan di portibi on, tubu istilah kulit putih dohot kulit hitam. Ndang dihalomohon Debata hata manang semboyan na patubu parbolatan. Bangso Batak pe unang adong persaan na tumimbo hita sian bangso manang suku na asing. Unang ma adong parbolatbolatan di huria nang di masyarakat, unang adong hata mayoritas-minioritas, sisuan bulu dohot halak na ro, sitiop huaso dohot pendatang, ai maralo do i tu hata ni Debata. Dihaholongi Debata do sude jolma, ndang adong rasisme nang parbolatbolatan di holong ni Debata. di ayat 28 didok, ndang dao Debata sian hita, ai ditongatonganta do Debata. Jala huaso ni Debata ima huaso na mangatasi salhut bangso, ima di tongani sude bangso na adong di portibi on. Marhite i ma naeng tahaholongi sude bangso, bahkan na so sahaporseaon dohot hit ape, ingkon boi do tahaholongi nasida, ai na tinoma ni Debata do tong nasida, jala naeng dohot nasida mananda holong ni Debata marhite Jesus Kristus.