Khotbah Yakobus 1: 2-12 "Hidup Beriman dan Berhikmat"

Minggu 5 Set. Trinitatis; 21 Juli 2019

Jakobus 1: 2 - 12

1:2 Ale angka donganku, las ni roha sambing ma rajumi hamu i, anggo madabu hamu tu bagasan ragam ni pangunjunan.

1:3 Boto hamu ma: Na mangkorhon habengeton do pangunjunan na tu haporseaonmuna.

1:4 Alai ingkon dihorhon habengeton i do ulaon na sun denggan, asa gabe rimpas hamu, angka na so marlindang, na so marnahurang.

1:5 Ai molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea, dung i lehononna ma tu ibana.

1:6 Alai di bagasan haporseaon ma ibana mangido, unang marganggu ni roha; ai na ganggu roha i, tudos do tu galumbang ni laut, na pinahuturhutur jala na pinalindaklindak ni alogo.

1:7 Unang ma diparbaga roha ni halak i, jaloonna agia aha sian Tuhan i!

1:8 Ai halak na mardua roha, na gaor do i di saluhut angka dalanna.

1:9 Alai dipuji dongan na toruk i ma dirina siala timbona i!

1:10 Songon i na mora i, siala hatoruhonna; ai na laho salpu ma ibana songon bungabunga na di ladang i.

1:11 Ai binsar ma mata ni ari dohot mohopna, jadi rahar ma duhut i, marurus ma bungana, mago ma rupana na jengkar i. Songon i ma laho malos na mora i di bagasan angka dalanna.

1:12 Martua do halak na manaon di pangunjunan i: Ai dung tau ibana, jaloonna ma tumpal hangoluan, naung diparbagabaga tu angka na holong roha di Ibana

Boha do bahenon ni jolma i marlas ni roha molo ro pangunjunan? Boi do goaron “halak na martua” angka jolma na manaon pangunjunan? Hira so hea do tabege i di angka panghataion jala hira so jumpang do di ngolu si ganup ari. Tung mansai suhar do i tu pingkiran dohot pangantusion ni hajolmaon, alai na suhar jala na so siat tu pingkiran ni jolma i do nidok di turpuk jamita on. Suhar do pangajarion ni Debata on tu pungkiran ni hajolmaon alai ndang na mandok gabe so tingkos nang pe suhar jala maol tarjalo pangantusion ni hajolmaon. Marlas ni roha nidokna ndang na mengkelengkel molo ro arsak, margahargak molo marsahit manang molo ditadinghon na hinaholongan. Alani ingkon singkop do jahaon jala antusan turpuk on. Tangkas dipatorang sidalian marlas ni roha di pangunjunan di turpuk on, ima ala dihorhon i do habengeton, dung i dihorhon ulaon na sun denggan, dung i dihorhon harimpason, jala di ujungna dihorhon tumpal hangoluan. Urutanna ima: Pangunjunan è Habengeton è Ulon na sun denggan è Harimpason è Tumpal hangoluan. Ujung ni pangunjunan i do na mamboan las ni roha manang hatuaon, songon na tarsurat di ayat 12, “Martua do halak na manaon di pangunjunan i, ai dung tau ibana jaloonna ma tumpal hangoluan naung diparbagabaga tu angka na holong roha di Ibana”. Lapatanna, ndada pangnjunan i na mambahen las roha, alai parbue ni pangunjunan i do. Songon pangula di hauma, tung mansai loja do nasida, alai marlas ni roha do nang pe didoit mata ni ari ganup ari. Ndada na nidoit ni mata ni ari i na mambahen las rohanasida, ndang mohop ni mata ni ari i na dipaingotingot, alai parbue ni na niula na i do, ujungna boi ma nasida benget mula ulaon. Hira songon i do nidok ni si Jakobus dison. Ndang sihalashonon pangunjunan, alai parbue ni pangunjunan i, ima ulaon na sun denggan dohot tumpal hangoluan. Panghirimon tu parbue na denggan i do na manghorhon las ni roha nang gogo mangula ulaon. Dos ma i songon buku sinurat ni Rick Warren, The Purpose Driven Life (Hidup yang digerakkan oleh tujuan/ Ngolu na niamudihon ni tujuan). Ulaon na denggan do tumpal hangoluan, ima na mangamudihon na porsea molo ro pangunjunan tu ngoluna, gabe margogo ibana mangadopi i, ndang olo mandele ala diboto ndang pangunjunan i ujung ni ngoluna, jala ala tangkas diantusi, di pudi ni pangunjunan i adong do tumpal hangoluan sijaloonna. Holan naung dapota tumpal hangoluan do na martua jala holan na monang maralohon pangunjunan do dapota tumpal hangoluan. Alani, molo naeng martua hita, unang be mandele molo ro pangunjunan, baliksa tahe tahasabamhon, tahabengethon jala tahamonanghon ma.

Tung pe songon i, ndang tangianghononta asa ro pangunjunan tu hita, ndang i pangantusionna. Pangunjunan na nidok ni turpuk on ima pangunjunan na tu haporseaon (ay.3). Molo tahurung hita ala manangko/ marnarkoba manang ala mangula ulaon hajahaton, ndang mamboan tu tumpal hangoluan i. Pangunjunan na nidok na ima pangunjunan na so tinuntun, na so ala mangula hajahaton. Isarana, molo dipahatahata halak hita ala ringgas marminggu/martangiang, molo dialo hita, molo dialo hita hita ala mangulahon na denggan, molo dihasogohon dongan hita ala ndang olo mangula na jat, molo dipaburuburu halak hita ala manghantindanghon na sintong, dohot lan na asing. Ndang alusan pangunjunan on, marhite ungutungut manang pandelean. Alai nionjar, ni pargogoan ni tumpal hangoluan na pinarade ni Debata tu hita, tahabengethon jala tahamonanghon ma saluhutna i.

 Molo ro pangunjunan, lumobi molo ro ala mangula na denggan, olo do golap panghilalaan. Olo do gabe so boi diida tumpal hangoluan i. Tangkas do diantusi si Jakobus uju manurat bukuna on ibana, alani do didok di ayat 5, “Ai molo adong di tongatongamuna na hurangan bisuk, dipangdo ma tu Debata, na bulus mangalehon saluhut jala ndang marpangea, dung i lehononNa ma tu ibana”. Ala pardaging na gale jala mardosa dope hita, sipata ndang tapanghilalahon panghorhon ni panghirimon tu tumpal hangoluan i. Holan habisuhon sian Debata do patauhon hita marnida i nang pe marsitaonon hita. Songon turpuk Epistelta, 1 Rajaraja 3: 5-15; ima tangiang ni raja Salomo mangido pantas ni roha dohot habisuhon asa boi manirang na denggan sian na roa, asa boi manguluhon bangso Israel, songon i ma nian hita. Tapangido ma bisuk sian Debata asa boi taida tumpal hangoluan naung pinarade ni Debata, nang pe dibagasan pangunjunan hita.

Mangido habisuhon sian Debata ingkon dibagasan haporseaon do. Marnida angka naung di joloniba do mura, alai marnida na denggan, harimpason, nang tumpal hangoluan na so rade dope diadopan ni simalolong ndang ulaon na mura i. Alani ringkot ma habisuhon na tau mangurupi marnida angka na mangihut tu pangunjunan. Mangido sian Debata ndang boi dibagasan ganggu ni roha, ingkon dibagasan haporseaon. Ai molo mangido tu Debata, ndang songon na mangallang cabe, disi ni pangan disi ni panghilalahon siak na. Mangido tu Debata ndang sae holan sahali, alai ingkon manongtong. I do umbahen disurathon di ayat 6, “Alai dibagasan haporseaon ma ibana mangido, unang marganggu ni roha; ai na ganggu roha i, tudos do tu galumbang ni laut, na pinahuturhutur jala na pinalindaklindak ni alogo”. Lapatanna, mangido habisuhon tu Debata di bagasan haporseaon, mangido dibagasan parsitutuon, ndang mardua roha. Unang nuaeng mangido tu Debata, hape marsogot nunga tu angka na malo ni portibi on. Sapala pinangido tu Debata, ingkon holan tu Debata do. Ingkon pos roha, ingkon hibul roha, ingkon satia. Molo songon i do, tontu lehonon ni Debata ma tu hita habisuhon, gabe boi ma taida dibagasan haporseaonta tumpal hangoluan i. Tontu ndang boi i diida na so marbisuk, jala na so marhaporseaon. Holan na marhaporseaon do na boi marnida tumpal hangoluan i, songon na tarsurat di Heber 11: 1; “Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida”. Molo pe rongom ro pangunjunan i tu ngolunta, sotung olo hita mandele. Tarajumi ma i songon dalan ni Debata laho patogu haporseaonta asa sahat hita tu tumpal hangoluan i. Marbisuk jala marhaporseaon ma hita di pardalanan ni ngolunta, tarlumobi di tingki mangadopi pangunjunan asa boi hita marlas ni roha jala asa gabe angka halak na martua hita.