Khotbah 1 Raja-raja 4: 29-34 "Pentingnya Memiliki Hikmat"

Minggu 9 Set. Trinitatis; 18 Agustus 2019

Hinaringkot ni na Marbisuk

1 Raja-raja 5: 9-14

5:9 Dung i dibasabasahon Debata ma tu si Salomo habisuhon dohot roha panimbangon mansai godang dohot parbinotoan godang, tudoshon horsik na di topi ni laut godangna.

5:10 Jala gumodang do habisuhon ni si Salomo sian habisuhon ni saluhut anak angka na di habinsaran dohot sian saluhut habisuhon ni halak Misir.

5:11 Umbisuk ibana tahe sian sude manisia, umbisuk sian si Etan, halak Esrahi dohot si Heman dohot si Kalkol, dohot si Darda, angka anak ni si Mahol, gabe sar baritana tu saluhut bangso parbegu humaliang.

5:12 Jala dihatahon ibana tolu ribu umpama, ia torop ni endena saribu lima do.

5:13 Diboto huhut torsahononna taringot tu angka hau, sian hau Ares na di Libanon ro di Ysop (limutlimut) na tubu di dorpi; ditorsahon huhut taringot tu angka pahanpahanan, taringot tu angka pidong, taringot tu angka gulokgulok dohot taringot tu angka dengke.

5:14 Jadi marroan ma halak sian saluhut bangso naeng umbege habisuhon ni si Salomo, sian saluhut angka raja di tano on, angka na umbege barita ni habisukonna.

Mansai godang do panghorhon ni bisuk manang habisuhon, jala ganup do jolma mangalului habisuhon asa anggiat ma nian boi gabe jolma na marbisuk ibana. Adong hata ni natuatua na mandok: na bisuk nampuna hata, na oto tu panggadisan.” Alani do mansai ringkot do habisuhon di parngoluan ni jolma i, tarlumobi molo gabe sada uluan songon na masa tu raja Salomo. Laho patuduhon sahalak raja songon naposo ni Debata pajongjongho harajaon ni Debata mansai ringkot na marnampunahon habisuhon. Alani do sada sikap na sintong jala mansai uli do na pinatuduhon ni raja Salomo di na pinagidona habisuhon na sian Debata. Tontu, diida, diranap jala diongkui ibana do hinaringkot ni habisuhon on di ngoluna songon sahalak raja. Aha do habisuhon? Jala sian ise do dapot ni jolma habisuhon i? Di hata Heber, bisuk didok “hokma”. Gerhard Von Rad di buku na ginurithonna “Wisdom in Israel”, patoranghon, ia habishuhon (hokma) i, i ma hatauon mangalapati pangalaho na masa laho manirang na denggan manang na hombar tu lomo ni roha ni Debata siulahononna sian angka na roa sipasidingonna. Borhat sian pangalapation dohot pameakhonon na songon i, di ngolu si ganup ari tangkas diparhatopot jala dihaporseai saluhut bangso Israel paboa habisuhon i marharoroan sian Debata. Holan sian ginjang manang Debata mual dohot haroroan ni habisuhon. Saurdot tu pangantusion sisongon i, mansai umbuk jala sintong do pandohan ni ayat 9 na mandok “Dung i dibasabasahon Debata ma tu si Salomo habisuhon”. Hata ‘dung i’ dison patuduhon hadomuan ni turpuk on dohot turpuk na di jolona. Andorang so turpuk on, dilehon Debata do partingkian tu si Salomo mamillit manang aha na pinangido ni rohana pasahaton ni Debata tu ibana. Dipillit si Salomo do mangido habisuhon sian Debata. Ndang hamoraon, ndang ganjang ni umur dipangido ibana sian Debata. Asa, alus ni pangidoanna i do na tarsurat di turpuk on, di na dibasabasahon Debata habisuhon tu si Salomo. Sian pangalaho na masa on idaonta ma boasa dipiliit si Salomo mangido habisuhon on sian Debata, i ma:

a.       Tangkas do diparhatopot si Salomo hinaringkot ni habisuhon on di ngoluna, dao rumingkot sian angka na asing. Asa, dipatujolo ibana do na rumingkot di ngoluna.

b.      Tangkas dihaporseai ibana holan Debata do haroroan ni habisuhon. Holan tu Debata do mangido pangurupion, ndada tu portibi on.

Pandohan ‘roha panimbangon mansai godang’ martudutudu do tu pameakhonon ni habisuhon di ngolu siganup ari. Songon sahalak raja, dipangke si Salomo do habisuhon i di na manimbangi sahat tu na mambuat haputusan tu ganup pangalaho na masa na niadopan ni bangso Israel. Pandohan, ‘parbinotoan godang’ martudutudu do tu pangalaho dohot hinaringkot ni habisuhon i. Sada hasurungan na tangkas do habisuhon i dijalo raja Salomo sian Debata. Pola do diida hasurungan i sian dua ruhut ni hajolmaon, ima sian angka na di habinsaran dohot sian saluhut habisuhon ni halak Misir. Sude na i naeng manggombarhon dohot patuduhon hinabidang ni habisuhon na dapot di diri ni raja Salomo. Angka goar na dipaandar di ayat 11 boi do muse idaonta di 1 Kronika 6: 18-29; dohot di Psalmen 87;89.

Di ayat 14 boi taida hinagogo ni habisuhon i manait halak sian saluhut bangso naeng umbege habisuhon ni si Salomo, sian saluhut raja di tano on, na umbege barita ni habisuhonna. Alani i do, di ngolu siganup ari tangkas do dihaporseai bangso Israel habisuhon ni jolma na hatop maubauba jala parsatongkinan, alai habisuhon sian Debata manongtong do i saleleng ni lelengna. Habisuhon ni si Salomo tongtong do i imbaru jala hona tu ganup partingkian siala dijalo marhite sondang na sian hata ni Debata na manongtong. Sian i do boi tadok basabasa ni Debata do habisuhon i.

Marhite topik minggu sadarion “Hinaringkot ni na marbisuk,” lam tangkas ma dihita ondolanna, i ma mananda Debata marhite na manjangkon habisuhon sian Ibana. Holan Debata do habaoran dohot haroroan ni habisuhon. Alani i, ondop ma hita ro tu adopanNa jala tung olo ma hita manjangkon habisuhon na sian Debata i. Boasa pola ondohononta i? Ala mansai ringkot do habisuhon i pangkeonta di ngolunta siganup ari. Alani i do, hombar tu rumang ni alusna mangadopi ganup pangalaho na masa na ni adopanna, disagi do ganup jolma di portibi on tu tolu horong:

a.       Jolma na oto, ima na marnida nalnal di jolona partngkian laho mangerbang dohot mangula sada ulaon alai mabiar mamake partingkian i. Boasa? Ala mabiar tu hamaolon na ditagam ingkon adopanna di na mangula ulaon i.

b.      Jolma na burju, i ma jolma na marpaima, molo adong partingkian mangulahonsa, on ma diulahon. Sabalikna, molo ndang adong partingkian, mauhon paimahonsa.

c.       Jolma na bisuk, i ma jolma na so marpaima jo. Diadu do ganup partingkian na adong, diulahon dohot denggan, nang pe ingkon mangadopi ragam ni hamaolon.

Gabe jolma na bisuk ma hita, asa marhite i tau hita pasauthon dohot pahembanghon lomo ni roha ni Debata di sandok pardalanan ni ngolunta. Dihatutulus ni lomo ni roha ni Debata, disi do songgop harajaonNa. Alani, tung marsitutu ma hita dibagasan toruk ni roha mangido dohot manjalo bisuk na sian Debata.  Ndada ro jala bongot boti habisuhon tu ngolu ni ganup jolma. Ingkon buhaonta do pintu ni rohanta dung i bongot ma habisuhon i. Tung so olo do habisuhon i bongot so jolo tabuha pintu ni rohanta. Jala haroroan ni habisuhon holan sian Debata. Alani i, sotung adong mangalului jala manjalo habisuhon i sian angka hagogoon na asing.