Khotbah Habakuk 3: 14-19 "Tuhan Kekuatan di Tengah Pergumulan"

Minggu 7 Set. Trinitatis; 04 Agustus 2019

3:14 Ditullang ho do marhitehite guringanna sandiri ulu ni partogina, angka na dorongdorong, songon habahaba, paserak ahu; angka na marolopolop, songon na laho manganhon halak na dangol disihabunian.

3:15 Dibolus ho do laut i marhite sian angka hodam, ditondong ho do galumbang ni torop angka aek magodang na gunsang.

3:16 Nunga hubege baritana, jadi dibaling do butuhangku, angka hitir bibirhu dibahen suara i; ro do tahe habusukon tu bagasan holiholingku, jala mardugu ulu ni tothu; asa hupahohom ahu di ari hagogotan, molo martahop dompak bangso i na mangarupa nasida.

3:17 Ai ndang martumbur disi hau antajau, jala ndang marparbue angka hau anggur, lambang do bunga ni hau jetun, jala ndang dapot sipanganon sian angka hauma; rasip do angka birubiru sian balian, jala ndang adong be jonggi di bagasan bara.

3:18 Alai anggo ahu, * marolopolop ma ahu di bagasan Jahowa, jala mariaia ahu mida Debata ni hatuaonku.

3:19 Jahowa, Tuhan i do hagogoonku, jala * dibahen ibana do pathu tudoshon ursa tini, jala toguonna do ahu dumege angka dolokdolokku. I ma di pande ende mardongan parhinaloan.

Godang do halak na so lomo rohana dicueki (dipasombu sai hira na so diantoi). Ndang adong na dumangol sian na dipasombu (dicueki). “Sesakit-sakitnya keadaan yang paling sakit adalah dicueki”, ninna torop halak lumobi diruhut ni angka na masihaholongan. Ianakhon dicuekin natorasna, natoras dicuekin ianakhonna, pasangan dicuekin pasanganna, dohot lan angka na asing. Tung i nama dangolna molo pola dicuekin, dipasombu, sai hira na so diantoi na tahaholongi hita. Lam boha ma molo “rasa cuek” on tahilala ro sian Tuhanta ? sai hira na so diantusi na tahilala, sai hira na masisombu Debata diparsorion ni ngolunta. Nunga nian sai mangalualu hita tu Ibana alai sai hira na mauhom Debata. Situasi na songon i ma na tongon diadopan bangso ni Debata uju i. Sai hira na masisomnu Debata diluntak parjahat bangsoNa umbahen didok, “sadia leleng on, ale Jahowa, joujou ahu, matua so ditangihon ho? Sai hualualuhon tu Ho hadoboon, matua so manumpak Ho? Boasa tung pataridahononmu tu ahu hageduhon, jala marsombusombu Ho paidaida hangaluton? Pangarupaon dohot hadoboon di jolongku, masa parsalisian, jala tubu parbadaan (Hab.1:2-3).

Turpuk jamita Minggu on ma songon alus di panurirang Habakuk di sada sisi, alai panghirimon di sisi na asing taringot tu nania lelengna sai hira na masisombu Debata tu sitaonon ni bangsoNa. Nunga mulai tarida alus ni Debata tu angka bangso, termasuk bangso pangaluntak. Jala sian ayat 13-15 haidaan holong ni rohaNa tu bangsoNa. Mambahen hatuaon di bangso na miniahanNa. On ma songon alus ni anggukangguk ni panurirang Habakuk na parjolo i. Alus tu panurirang Habakuk na marnida bangso ni Debata diluntak angka parjahat. Gabe patar Debata ni hagogoon i, jala ndang mauhom marnida hatangkangon ni angka parjahat i. Molo di mulana i sai hira na ditadingkon Debata nasida, alai diturpuk on haidaan ma Debata dona gabe gogo di nasida. Dimulana i usouso panurirang Habakuk, nuaeng diturpuk on ibana angka hitir marnida hagogoon ni Debata (ay. 16). Ndada na dipasombu Debata hape portibi on mian dibagasan hajahaton. Ndang na ditadingkon Debata hape bangsoNa. Alai songon sada uhuman do i tu bangsoNa gabe hira na mauhom Debata marnida paeniahapan ni bangsoNa i nasailaon.

Jahowa, Tuhan i do hagogoonku (ay.19) sada padohan na jempek jala menarik situtu. Ndang didok haporseaonki do hagogoonku, manang hamaloonki, haboionki, semangathi do hagogoonku. Jahowa, Tuhan i do hagogoonku, ala hagogoon ni Debata do umbahen na margogo ibana. Pola digombarhon ibana di ayat 17 on “Ai ndang martumbur disi hau antajau, jala ndang marparbue angka hau anggur, lambang do bunga ni hau jetun...”  pola didok ndang martumbur hau ara (di hata Batak diterjemahkan tu hau antajau). Hape hau ara do na gumodangan tubu di hatiha i di luat i, jala hau ara do nang na parjolo digoari hau na marparbue di Bibel i, di 1 Musa 3:7. Na umotikna 2 hali dibagasan sataon marparbue hau ara. Asa hau on do na paling dianggap lazim, sada sian na paling pokok, na ingkon jumotjot haidaan di ngolu. Molo sanga martumbur hau on haidaan ma tandatanda na ojak dope parngoluan i.alai didok molo so martumbur  pe hau ara on, tongtong do marolopolop ibana di adopan ni Debata. Uju kebutuhan na paling pokok ndang adong be, na paling mandasornunga suda, ndang haidaan be kebutuhan, tongtong do ibana marolopolop dibagasan Jahowa jala mariaia mida Debata ni hatuaonna. Diuduti ma muse dohot pandohan “ndang marparbue angka hau anggur”. Simbol ni kemakmuran dohot kesejahteraan do anggur di nasida hatiha i. Alai tuk do panurirang Habakuk dison laho manoarahon olopolopna tu Debata nang pe so adong kesejahteraan dohot kemakmuran. Ndang adong halak na manjua hadumaon, baliksa i do na pinarsinta ni torop bangso. Dison ma jumpang hita, na so kebutuhan pokok hape na mengontrol las ni roha jala ndang kemakmuran mengontrol olopolop ni jolma, alai las ni roha na gok olopolop di Debata, i do na mengontrol nasa keadaan dohot ketiadaan di ngolunta.” Lambang do bunga ni hau jetun”. Hau jetun do sada sian na tung dihlomohon (favorit, disukai) bangso i, alai laos dohot muse do i didok mengecewakan. Boi taantusi hinadangolna molo pola na tung dihalomohon i mengecewakan. Alai tuk do panurirang Habakuk marsoara na gogo, Alai anggo ahu,marolopolop ma ahu dibagasan Jahowa, jala mariaia ahu mida Debata ni hatuaonku (ay.18). pandohan marolopolop jala mariaia dison somal diangke laho manggombarhon pangalaho na tongtong marlas ni roha atik pe dokdok sitaononna.

Olopolop na so pola ingkon marojahan tu bentuk ni perasaan, tu keadaan ni ngolu, alai marojahan tu holong ni rohaNa, tu asi ni rohaNa na so ra muba i. Asa Debata sambing ma sibonsiri na tontu di nasa lasni rohanta. Sotung mura hita mandele, manjua molo ro hamaolon tu bagasan ngolunta. Di rumang ni angka sitaonon na tompu, na so isan panagaman dohot lomo ni rohanta. Justru di angka tingki na songon on dodiuji haporseaonta, naung lam matoras do manang ndang. Uju bongot hita tu keadaan na songon on, gabe marasing ma panatapanta taringot angka na masa dibagasan ngolu. Ndang muruk be si Habakuk atik pe keadaan masih tetap buruk. Molo bolas hita mangolu di keadaan na songon on, ndang mura be hita madabu tu pandelean, stress  dohot angka na sarombang tusi. Ndang mura be hita liluhono (ditipu) ni angka na ro manohupi hita. Ndang mura hita digugai angka na masa di humaliangta. Ndang holan sambola pamerengta molo sanga ro angka hamaolon, alai nunga bolas marnida ro di angka na dibalik ni hamaolon i. Mulak ma simalolongta i tu ingananna, holan marnida na hinalomohon ni Tuhan i. Nunga boi be taantisipasi dia angka na naeng masa, ndang gabe sala mambuat tindakan hita molo masa angka hamolon na ro tu adopanta. Dipatudos panurirang Habakuk do hita tu pat ni ursa tini, na tinogu dumege angka dolokdolok. Ursa dison ndang targoar tu dorbia (hewan pemangsa) alai sabalikna binatang na jotjot dimangsa do. Alai Debata hagogoon i tuk do mangalehon gogo disimanjojak ni ursa i laho marlojong i, mangalumpati batu ro di manangkohi dolok. Margogo ma hita hinorhon ni hagogoonNa i.