Khotbah Lukas 6: 27 - 36 "Kasihilah Musuhmu"

Haholongi ma Musum

Minggu, 10 Set. Trinitatis; 25 Agustus 2019

Lukas 6: 27-36

6:27 Alai hudok ma tu hamuna na manangi: Haholongi hamu ma musumuna; na denggan ma bahen hamu tu na mangkosomi hamu.

6:28 Pasupasu hamu ma angka na mamburai hamu, tangiangkon hamu ma angka na mangasupi hamu.

6:29 Anggo dipastap hurummi, tarehon nang na sambariba i; jala anggo dibuat ulosmu, unang jua nang bajubajum.

6:30 Nasa na mangido tu ho, lehon; jala unang tunggu halak, naung mambuat ugasanmi.

6:31 Ia i na pinangidomuna, naeng bahenon ni halak tu hamu, i ma bahen hamu tu nasida!

6:32 Ai molo dihaholongi hamu na marholong ni roha di hamu, parulian dia ma i di hamu? Ai nang angka parjahat dihaholongi do na marholong ni roha di nasida.

6:33 Jala anggo dibahen hamu na denggan tu angka sibahen na denggan tu hamu, parulian dia ma i di hamu? Nang angka parjahat i, songon i do pambahenna.

6:34 Jala molo mangkirim hamu mambuatsa muse, laho pasali dongan, parulian dia ma i di hamu? Ai dipasali parjahat do donganna parjahat, asa dijalo muse hepengna.

6:35 On ma tahe: Haholongi hamu ma musumuna bahen hamu ma na denggan jala pasali hamu ma, di na so hirim rohamuna di balosna; balga ma upamuna, gabe angka anak ni Natumimbul i ma hamu, ai basa do Ibana di na tois marroha jala di na jahat.

6:36 Gabe parasiroha ma hamu, songon Amamuna, Parasiroha i!

Dipartingkian nuaeng on hatophatop do sar angka barita na masa di portibi on, dao humatop sian na tuk pabotohononhon ni surat, surat kabar, radio, televisi, telepon, telegram, dohot lan angka na asing naung somal tatanda. Marhite media sosial, isarana, hatop do sar ragam ni berita, adong na sintong, jala adong na so sintong (hoax). Bahat mamangke media sosial patupa sogo ni roha sahat tu parmusuan. Sasintongna umbahen na dipatupa angka penemu media sosial isarana Mark Zuckenberg dohot angka dongan na di media sosial i laho pasadahon dohot pasolhothon hajolmaon do marhite na boi jolma hatophatop berkomunikasi, ndang dibatasi jarak, inganan, adat, habangsaon, ulaon nasida, dohot lan na asing. Alai nuaeng nunga bahat donganta mamangke media sosial i laho mamolatmolat hajolmaon i, patupa parmusuon di angka jolma. Nang pe nunga adong undang-undang hate speech (ujaran kebencian) na binahen ni negaranta laho mangorui doras ni pamangkeon media sosial i laho pahembangkon joujou dohot soara parmusuon sama di angka jolma ndang apala tung marhasil dope taida. Dipartingkian na songon i ma jotjot ummura dipamohopmohop angka na mamangke media sosial i laho patubu panghilalalon parmusuon di angka jolma i ma parmusuon taringot tu parugamoon, siala ni i ma, apala bahat halak Kristen na di Sri Lanka di kota Kolombo na tongon patupa parmingguon dohot Missa di bom angka teroris di ari Minggu, 21 April 2019, mamunu 257 halak dohot lukaluka berat 500 halak dohot di Surabaya tanggal 13 Mei 2018 na mamunu 28 halak dohot 57 halak lukaluka dohot na lagi viral di tingki parpudi on taringot tu tausiyah ni sahalak parjamita sian ugamo saborang na patubuhon parmusuon ni halak Kristen dohot nasida dohot kerusuhan na terjadi di Papua dohot Surabaya alani barita na so jelas na sar di media sosial i. Apala dipartingkian pamangkeon ni media sosial na pararathon panghilalaan parmusuon na songon i do manghuling pangajarion ni Tuhanta Jesus Kristus, jamita tu hita halak Kristen Batak di Minggu Trinititas 25 Agustus 2019 sadarion, saminggu dung tapestahon haluaon ni bangsonta rakyat Indonesia sian penjajahan maradophon angka ompungta di tingki na salpu.

Ndang holan di tingki andorang so mangula Jesus di Palestina taon 27-30 abad parjolo, alai dohot do nang di angka abad dung i sahat tu tingki on margurasa pangajarion di tongatonga ni jolma na mandok, “sihaholongon, sipasupasuon dohot sipatupaon do angka na denggan tu angka donganniba, tu sisolhotniba, tu dongan sahutaniba, tu dongan saulaonniba, tu bangsoniba na patupa na denggan tu iba manang hita, alai sihasogohononhon manang ise na marmusu dompak iba. Sipatupaon do parmusuon dohot musuniba, manang ise na patupa na so denggan tu ngoluniba. Siala pangajarion umum dohot ugamo na songon i do gabe lam tubu parbolatbolaton di angka jolma. Jotjot ma dipangke jolma dipanghataionna hata na manggombarhon tu na so sadalanan lumobi na marmusu dompak hita ndang sipatupaon na denggan tu nasida, ndang sibahenon tangiang tu Debata asa dipasupasu Debata nasida. Baliksa tahe ditangianghon do asa di uhum Debata nasida. Alai turpuk sadarion, ima pangajarion na pinasahat ni Jesus mansai tandi dohot angka poda dohot pangalaho na mansai dao sian hajolmaon. Jotjot do madabu hita tu angka pangalaho na masibalosan. Molo jinalo na denggan sian dongan, bahenon ma na denggan balos ni. Alai molo na roa do jinalo sai adong do na manggoit di roha laho mambalos na roa i.

Mamungka tingki pangajarion ni Jesus di sada inganan na hornop di Palestina, maradophon torop siseanNa dohot mansai godang halak sian sandok Judea dohot Jerusalem (Lukas : 17). Apala mangolu poda pangajarion naung gabe turpuk ni hajolmaon sisongon on i do na niajarhon ni Jesus Kristus tu saluhut naeng mananda Ibana, ise Jesus Kristus, ise Debata Sitolusada i, jala dia lomo ni rohaNa na ingkon siihuthonon dohot sihangoluhononhon. Boi dohonon turpuk on gabe sada singotsingot tu halak Jahudi. Tontu diboto Jesus do uhum ni halak Jahudi ala Ibana pe halak Jahudi do. Di 3 Musa 24: 20 mansai tangkas do uhum i didok “Bugang abul ni bugang, mata abul ni mata, ipon abul ni ipon; manang sahit sahit dia tahe na binahen ni dongan tu hita, ingkon songon i do nang sibahenon tu ibana. Aut so diingot angka sisolhot ni angka na mate binahen ni bom ni angka teroris di ari 21 April 2019 dohot keluarga ni korban bom Gereja na di Surabaya i ajaran ni Jesus i, ra atik pe adong oraora ni pamarenta tu ulaon pamaloson nunga olo angka sisolhot ni na mate dohot na lukaluka berat dohot halak Kristen patupa ulaon pamaloson tu manang ise pe na dipandok di media sosial na sanga rarat i na ima keluarga ni pelaku bom bunuh diri i. Alai ala diingot nasida hata ni Jesus, molo pamarenta mambahen angka na ringkot laho mamboan na patupahon (pelaku) i tu uhum, ia halak Kristen patupa pangajarion ni Jesus Kristus na marrumanghon parenta i do, i ma tongtong: (i) Manghaholongi na patupa parmusuon dompak nasida; (ii) Rumangna? Mambahen na denggan tu na manghosomi nasida; (iii) Mamasumasu angka na mamurai nasida di tangiang nasida, (iv) Manangianghon angka na mangasupi nasida. Gariada tahe na opat i ingkon marsitutu patupahonsa, marhite usaha na marsitutu jala na “digohi pambahenanna na lobi sian na somal”; “molo dipastap hurum i, tarehon nang na sambariba i, jala anggo dibuat ulosmu (baju parduru), unang jua nang bajubajum (baju parbagasan ni halak Jahudi). Pola dipasingkop Jesus na opat sipatupaon, “Na sa na mangido tu ho, lehon; jala unang tunggu halak naung mambuat ugasanmi” (Lukas 6: 29-30). Mangihuthon Jesus Kristus i do pangajarion ni ugamo na dumenggan na diharingkothon hajolmaon na mura marbolatbolat i, dao dumenggan sian na holan manghaholongi, mamasumasu, patupa na denggan dohot manangianghon angka na somal pinatupa ni jolma (Luk. 6: 32-35a), “Ia i na pinangidomuna naeng bahenon ni halak tu hamu, i ma bahen hamu tu nasida” (           Luk. 6: 32). On do roha ni parbagasan ni parange ni siihuthon Jesus. Marhite parenta na pinasahat ni Jesus on, olo do tubu dibagasan rohanta, gabe si oto-oto na ma molo songon hita. Boasa ndang guluton ganup naung binuat ni jolma sian dirinta? Sasintong na, ndang asa gabe siotooto hita umbahen didok Jesus songon i. Alai naeng diondolhon Jesus tu hita, i ma dalanta songon pataridahon parbue ni hakristenon i. 

Ganup tingki do tabereng agka parbadaan. Marbada do jolma ala ni angka pingkiran na marimbar. Marbada do jolma alani ugamo dohot suku na marimbar. Nunga somal hita marnida angka pangalaho niganup jolma na mangolu di bagasan paraloan dohot parmusuon. Hombar tu pandapot ni angka na malo, ndang adong jolma na giot mangolu di parmusuon. Alai ala ni ginjang ni roha, ai naeng gulut di hamonangan, gabe mian ma roha ni jolma i mangolu dibagasan parmusuon i sandiri. Alani do ndang hea diajari Jesus hita asa marmusu. Alai molo adong na gabe musunta manang na marmusu dompak hita, ndang na so denggan sipatupaon tu nasida, baliksa na denggan do. Dung pe olo hita patupa i asa targoar hita anak ni na Tumimbul i, jala balga upanta jaloonta sian Debata. Dung pe tapatupa i asa boi targoar hita parasiroha songon Amanta Debata Parasiroha i (Luk. 6: 36). Molo tapamanat nidok ni apostel Paulus naung umbege tradisi pangajarion parenta pinatolhas ni Jesus di Roma (Rom. 12: 14; 20-21), di na didok ibana disi songon on, “Ai songon na pagukguk gara do ho tu atas uluna, anggo dibahen ho songon i” (Rom 12: 20b), songon i nang pangajarion na ginurithon ni panurat ni 1 Petrus na jinalona sian apostel Petrus na umbege hata parenta ni Jesus na tarsurat di Lukas 6 : 27-35; (1 Petrus 3: 9-14), di na didok ibana disi songon on, “Unang ma baloshon hamu na jat alo ni na jat, panginsahion alo ni panginsahion; lam mamasumasu ma hamu, ai naeng teanonmuna do pasupasu umbahe na tarjou hamu (1 Petrus 3: 9)”, dohot “Alai molo tung tumaon na porsuk hamu alani hatigoran, na martua do hamu disi. Unang ma gaor rohamuna, bahenon ni biar ni roha mida nasida” (1 Petrus 3: 14).