Khotbah Matius 8: 23-27 "Yesus Penolong Kita"

Jesus Pangurupi di Ngolunta

Minggu 8 Set. Trinitatis; 11 Agustus 2019

8:23 Dung i bongot ma Ibana tu parau, jadi diihuthon angka siseanna ma Ibana.

8:24 Dung i ro ma habahaba siampalautus di tao i, pola dilungkupi angka galumbang i parau i; alai na tarpodom do anggo Ibana.

8:25 Jadi didapothon angka sisean i ma Ibana, disungguli ma, didok ma: Ale Tuhan, urupi ma; na mago ma hami!

8:26 Dung i ninna ma mandok nasida: Na mabiar do hamu hape, hamu parhaporseaon na metmet? Laos hehe ma Ibana, hona hata ma alogo dohot tao i dibahen, gabe menak situtu ma.

8:27 Alai tarhalomong ma roha ni jolma i, angka ninna ma: Halak dia do On? Guru dokna do hape alogo nang tao i!

Sude do jolma hea mabiar, nang pe deba sian hita boi jala malo pabunihon huhut mangatasi biar ni rohana gabe ndang apala patar diida halak na tongon mabiar do hita. Alai deba sian hita tung maol do mangatasi biar ni rohana, gabe angka hitir ibana mangadopi na masa. Jala marasingasing do sibonsiri dohot panghorhon ni habiaran i. Ndang sihailahononhon i alai ringkot ma diadopi. Aha mambahen hita mabiar? Tontu godang do na boi mambahen hita mabiar. Boi do ala mardalan hita di dalan na lungun lumobi di na holom marimpotimpot, manang tingki laho marhuta sada tu inganan na so tatanda hian, manang ala tongon hita jongjong di sada inganan na tung mansai timbo, gabe tubu ma biar ni roha. Udut tusi jotjot tubu biar ni roha di jolma na tongon mangadopi parsahiton, tarlumobi sahit na posa. Ragam nari alasan dohot situasi na boi mambaen hita mabiar. Sada kondisi na mansai borat na boi patubu biar ni roha, i ma tingki punjung tahilala. Songon dia pe holom dohot lungun ni dalan na tadalani, manang songon dia rohanta laos martamba do gogo dohot semangatta mangadopi angka na masa dingolunta, molo tahilala “adong do donganta”. Asa ringkot situtu molo adong dongan. Alani i do umbahen sai dipodahon natuatua tu ianakonna na naeng mangaranto, lului gareja, lului dongan samarga dohotdongan sahuta. Asa unang punjung ibana, asa adong donganna. Ai ngolu na dumangol, i ma ngolu na punjung. Alani i ringkot ma niluluan dongan, jala taargahon ma dongan na di lambungta nuaeng, ai tahirim do nasida mandongani dohot mangurupi hita mangadopi ragam ni angka na masa dingolunta.

Alai di saluhutna i, lumobi ringkot situtu tahilala jala tahaporseai pandonganion ni Tuhan i. Asa unang tarhirim hita, ringkot hantus di rohanta, molo dongan jolma ( keluarga, aleale, tondong, pinaribot) terbatas do gogo, huaso, holong, tingki, dohot rohana laho mangurupi hita. Alai anggo Tuhan i pargogo na so hatudosan do Ibana, na tuk mangurupi hita manaon na porsuk, na tuk mandongani hita mardalan di dalan na landit, na tuk mangalehon gogo dohot bisuk mangulahon ulaonta. Jala naeng tangkas taingot ai ndang tarula hita agia aha, anggo so Tuhan i na mardongan hita (Joh.15:5). Asa tung ringkot tapadimundimun jala tatambortambori haporseaonta di pandonganion ni Tuhan i di ngolunta. Molo porsea hita dipandonganion dohot pangaramotion ni Tuhan i ndang tagamon be dihuphupi biar ni roha hita. I do na maol dope jumpang di angka sisean ni Jesus songon na pinaboa ni turpuk on. Tongon do nasida sapardalanan dohot Jesus, ai rap nasida do Jesus di na marparaui. Alai ndang tutu situtu (bagas) ditanda jala dihaporseai pandonganion dohot pangaramotion ni Jesus di nasida. Ndang bagas diantusi hadirion ni Jesus songon Immanuel ( tanda dohot hapataran ni pandonganion ni Debata tu jolma). Alani ido umbahen na mabiar situtu nasida uju ro habahaba siapalautus i, uju dilingkupi angka galumbang i parau nasida. Ndang habahaba dohot galumbang i alasan na umbagas umbahen na mabiar nasida, alai ala na so porsea do nasida dipandonganion dohot dipangaramotion ni Jesus i (parhaporsean na metmet... ay.26). dirimpu nasida do na modom sambing Jesus disi jala na so parduli Jesus di nasida. Dirimpu nasida ndang marhuaso Jesus mangatasi na masa i. Alani i do umbahen didok nasida “Tuhan, urupi ma; na mago ma hami” (ay.25). molo tapamanat ayat 25 on boi dope idaonta haporseaon nasida i di na pinangido nasida tu Jesus “Tuhan urupi ma”, alai metmet do haporseaon i. Boi do tubu pangidoan i nionjar ni haporseaon nasida tu Jesus. Alai laos boi do hilalaonta pangidoan i ndang ro sian haporseaon na tutu. Baliksa tahe boi do dohonon pangidoan i marharoroan sian pandelean ala diida nasida jonok situtu hamatean i dohot hamagoan i tu nasida. Mago nama nasida, i do dipingkiri roha nasida. Alani i do umbahen na didok Jesus tu nasida “Na mabiar do hamu hape, hamu parhaporseaon na metmet?” (ay.26).

Sasintongna nunga tung bahat pangajaron na pinasahat ni Jesus tu nasida. Nunga godang angka tanta halongangan dohot angka ulaon na balga na pinatupa ni Jesus diida nasida. Alai, ndang ra matoras haporseaon nasida, tong dope marmetmet. Rap do Jesus dohot nasida alai ndang porsea situtu nasida tu Jesus. Alai nang pe songon i, hehe do Jesus mangurupi siseanNa, gabe menak situtu ma alogo dohot tao i. Marhite na masa i naeng idaonta hinabagas ni holong ni Jesus di angka sisean i. Nang pe humurang nasida jala hurang singkop dope haporseaon nasida, alai anggo Jesus sai didongani jala diurupi do angka sisean i di hahurangan, di hagaleon dohot di hatahuton nasida. Na masa i (galumbang dohot habahaba siapalautus i) dipangke Jesus laho manogunogu siseanNa asa lam tang jala hot dihaporseaon. Ai tangkas do didok di ayat 27 “ Tarhalomong ma roha ni jolma i, angka ninna, halak dia do on? Guru dok na do hape alogo nang tao i!”

Laos i do na masa nang tu hita. Lan do dalan dibahen Jesus laho patoguhon haporseaonta. Na boi masa do angka hamaolon dibagasan ngolunta. Ro habahaba dohot galumbang di keluarganta. Tubu angka parsoalan, pangalaho ni ianakhon pe lam mambahen rundut jala borat pingkiranta, ro parsihiton na posa, ndang dope panosak ni ekonomi na lam tu borat na, dohot lan angka na asing na manosak ngolunta. Alai marhite turpuk on naeng ditogotogu hita mangantusi, ai lan do dibahen Tuhan i dalan laho patoguhon haporseaon tu Ibana. Las ni roha nang arsak pe loason ni Tuhan i do masa i ndada asa lonong jala mago hita, alai asa lam tarjolma do hita laho marnida jala mandai pandonganion ni Debata jala asa lam patar idaonta holong dohot huaso ni Tuhan i, asa lam porsea do hita tu Ibana, Tuhan jala Sipalua i. Asa marhite haporseaon i ndang be mabiar jala tahuton hita. Unang mandele, bobonosan, jala hapusohan hita mangadopi ragam na masa di ngolunta lumobi angka hamolon dohot parsorion. Naeng tongtong togu haporseaonta. Ndang loason ni Tuhan hita mago. Sai na dongananNa do hita rasi rasa ro ajal ni hasiangan on (Mat. 28: 20).