Khotbah Yohanes 6: 43-54 "Yesus Roti Kehidupan"

Jesus do Roti Hangoluan

Minggu 11 Set. Trinitatis; 01 September 2019

Johannes 6: 43-45

6:43 Jadi dialusi Jesus ma nasida: Unang hamu marmungutmungut!

6:44 Ndang adong na tarbahen ro tu Ahu, ia so na tinogu ni Ama i na marsuru Ahu; jala Ahu pahehehon ibana di ari parpudi.

6:45 Na tarsurat do di angka panurirang: "Na pinodaan ni Debata ma nasida saluhutna." Ganup na manangihon Ama i jala na marguru tu Ibana, i do na ro tu Ahu.

6:46 Ndang dung adong nian na marnida Ama i; holan Ibana na ro sian Debata, I do na marnida Ama i.

6:47 Na tutu situtu do na hudok on tu hamu: Na porsea, i do naung gabe nampuna hangoluan na salelenglelengna.

6:48 Ahu do roti hangoluan i!

6:49 Na mangan Manna i do angka ompumuna di parhorsihan, jadi mate do!

6:50 On do roti na tuat sian banua ginjang, asa unang mate na manganhonsa.

6:51 Ahu do roti na mangolu, na tuat sian banua ginjang i. Manang ise na manganhon roti on, i do mangolu salelenglelengna. Ia roti silehononki, bahen hangoluan ni portibi on, i ma dagingku.

6:52 Dung i marsual ma angka Jahudi sama nasida, ninna ma: Beha ma bahenon ni Halak on mangalehon dagingna i panganonta?

6:53 Jadi didok Jesus ma tu nasida: Na tutu situtu do hatangkon na tu hamu: Tung na so dapot hamu hangoluan i, molo so dipangan hamu daging ni Anak ni jolma i, jala so diinum hamu mudarna!

6:54 Dapotan hangoluan salelenglelengna do ganup na manganhon dagingku jala manginum mudarhu; jala paheheonku do ibana di ari parpudi.

Dung dilehon Jesus mangan roti angka na torop i, bosur do nasida, alai male do muse nasida. Alani sai marsual jala marungutungut nasida (ay. 41-42) taringot tu Jesus na boi mangalehon nasida mangan roti. Jala sai mulakulak nasida mangido tanda sian Debata tarlumobi tanda roti laho sipanganon nasida songon di tingki ni si Musa di na manjalo manna ompu nasida ganup ari saleleng di parhorsihan. Tubu dibagasan roha nasida ai lobi sian tanda binahen ni Jesus nunga dipatupa si Musa tu ompu nasida. Asa naeng ma dipatupa Jesus tanda songon na masa di tingki ni si Musa. Alai diboto Jesus do na dibagasan roha nang pingkiran nasida, na holan mamingkiri sipanganon pardagingon. Dipasingot Jesus nasida, na so holan marhite sipanganon pardagingon boi mangolu nasida, alai marhite na porsea nasida di Ibana songon na sinuru ni Debata. Alani didok Jesus ma, tutu do na mangan manna ompu nasida di parhorsihan di tingki ni si Musa, alai ndang si Musa na patupa tanda i tu ompu nasida najolo, Debata do. Holan ulaula ni Debata do si Musa na mandok tu bangso i, na sian Debata do manna na dilehon tu ompu nasida. Jala molo dipangan ompu nasida pe manna i, tong do male nasida muse. Na marlapatan sarupa do fungsi ni manna na dipangan ompu nasida na jolo i dohot roti na dipangan nasida ganup ari di pardagingon. Ndang sipanganon na sian surgo manna na dipangan ompu nasida i, ai sipanganon na holan tu pardagingon sambing do i. Alai Debata, dipasahat do roti na sian surgo tu nasida i ma Jesus songon roti hangoluan. Na marlapatan tumimbo do Jesus sian si Musa na tinanda ni ompu nasida.

Dipatudos Jesus do diriNa tu roti hangoluan, roti na sintong, roti sian surgo, asa manang ise na olo manjanghon ibana dapotan hangoluan saleleng lelengna. Boasa didok Jesus roti hangoluan Iban? Ala ganup na porsea jala manjangkon Jesus gabe sipalua dapotan dame, las ni roha, haluaon sian dosa, hasesaan ni dosa, nang ngolu dibagasan Harajaon ni Debata. Inganan hatutubu ni Jesus i ma di Betlehem (Betlehem lapatanna rumah roti) na gabe simbol ni roti hangoluan. Ibana do roti hangoluan na sian Debata (roti Ilahi), ai holan Ibana do na ro sian Debata (ay. 46). Roti na pinasahat ni Debata (ay.32;51) tu angka na olo manjangkon Ibana asa mangolu marhite hamamateNa dohot haheheonNa. Marhite Jesus do gabe marsada angka na porsea dohot Debata, ai Jesus do parhiteanta tu Debata. Marhite na manjangkon Jesus roti hangoluan, ngolu ni angka na porsea ndang holan dipasuang alai dijujung jala dipahot saleleng na. I ma hatandion ni manna (roti pardagingon) sian roti hangoluan. Jesus mangalehon hangoluan saleleng na tu angka na olo manjangkon Ibana, na olo maninggalhon dosana.

Sogo do roha nasida ala didok Jesus na ro do Ibana sian banua ginjang (ay. 41). Ala diida nasida Jesus holan songon anak ni Josep naung tinanda nasida. Leas jala sala do parnidaan nasida di hadirion ni Jesus. Lupa nasida di angka tanda naung dipataridahon Jesus tu nasida na so holan jolma biasa Jesus, alai jolma na marrumanghon Debata (manusia ilahi) do Ibana. Sian Debata do haroro ni Jesus, na ro do Ibana sian banua ginjang. Marrumanghon jolma pe Ibana ro tu portibi on, asa tatanda do Ibana na gabe jolma, alai ndang jolma padosa Ibana songon hita. Gabe jolma Ibana alai ndang mardosa Ibana, alani do ingkon marhite Ibana do hita boi pajumpang dohot Debata. Holan marhite roti hangoluan do boi hita pajumpang dohot Debata i ma marhite hamamate dohot haheheon ni Jesus Kristus, na dipasada do hita tu hamamateNa nang haheheonNa, asa sahat hita tu hangoluan na saleleng ni lelengna. Marhite Jesus do tajalo hatiuron, ngolu na hot dohot holong ni roha na so ra suda sian Debata ganup ari, ganup tingki, i ma Roti Hangoluan i. Molo naeng di hita Roti Hangoluan i ingkon ro hita tu Ibana, mandapothon Ibana, ganup tingki, jala tapasahat tu Ibana angka ulaonta be, asa unang marisuang ngolunta. Di tingki tajalo parpadanan na badia, di na parsidohot hita manjangkon Roti Hangoluan (Jesus), di na tapangan roti parpadanan i, di si tahilala do naung rap hita dohot Ibana, jala ndang tarsirang be hita sian Ibana salelenglelengna. Nang pe ndang tau hita manjalo hangoluan i, alai dipatau Ibana hita gabe parsidohot dibagasan HarajaonNa. I ma holong ni Jesus tu hita na mansai arga tu angka na olo manjangkon Ibana songon Roti Hangoluan, asa mangolu hita.

Dipelehon Ibana diriNa marhite hamamatena di hau pinarsilang i ma Roti Hangoluan, asa unang mate jala unang hona uhum hita alani dosanta. Alani do Jesus didok Roti Hangoluan, ala ro Ibana laho mamboan hangoluan tu hita. Ndang holan hangoluan di pardagingon sambing, dohot do hangoluan na so ra suda. Didok Jesus do, ndang mago nanggo sada angka na pinasahat ni AmaNa tu tanganNa asa marsangap Debata AmaNa (ay. 39). Lapatanna ganup halak na olo pasahat ngoluna tu Jesus, ndang mate be salelenglelengna. I do jaminan na dipasahat Jesus tu na manjanghon Ibana songon Roti Hangoluan. Nang pe mate pamatangta alai mulak mangolu do i sogot raphon Tuhan Jesus di bagasan HarajaonNa na so ra suda. Mandapothon Jesus na marlapatan ndang holan gabe halak Kristen sambing. Alai ro mandapothon Ibana marhite haporseaon na mangolu manjalo haluaon na pinasahatNa tu hita, pasahathon dirinta tu Ibana jala marhamubaon ni roha. Ro mandapothon Jesus ala nionjar holong ni rohanta tu Ibana. Ra tadok na so tau hita ro mandapothon Jesus alani hagaleon nang angka dosanta na godang i. Dijangkon Jesus do angka pardosa na ro mandapothon Ibana, ndang hea ditulak Jesus angka na olo manjanghon Ibana. Ndang hea ditulak Jesus angka na marsahit na mangido hamalumon sian Ibana, dipamalum do angka na marsahit jala dipargogoi haporseaon nasida. Ndang hea dipaksa Jesus hita ingkon ro mandapothon Ibana na gabe Roti Hangoluan. Na marlapatan, naeng ro hita mandapothon Jesus sian ias ni rohanta, sian sonang ni rohanta nang sian tulus ni rohanta. Nang pe di mulana i, bangkol rohanta mandapothon Jesus, alai molo olo hita, boi do dipauba Debata rohanta gabe rade jala sonang rohanta mandapothon Tuhan Jesus. I ma hamubaon ni roha na rimpas, molo tadapothon Tuhan Jesus di bagasan las ni roha, dipargogoi Debata do hita mangoloi Ibana. Hata ni Debata na tahaporseai i do Roti Hangoluan. Ai Jesus do Hata ni Debata naung gabe daging. Ndang taida Jesus marhite mata ni pardagingonta, alai taida Ibana marhite pangajarion na pinasahatNa tu hita. Marhite hata ni Debata do lam magodang haporseaonta, jala lam margogo, lam ringgas mangulahon angka ulaon na denggan. Antong tajanghon ma Jesus Roti Hangoluan, i ma hata ni Debata na mangalehon hangoluan di hita.