Khotbah Amsal 8: 12 - 21 "Pemerintah Adalah Hamba Allah"

Minggu 12 Set. Trinitatis; 08 September 2019

Naposo ni Debata do Panggomgomi na Marbisuk

Poda 8: 12 - 21

8:12 Aku, hikmat, tinggal bersama-sama dengan kecerdasan, dan aku mendapat pengetahuan dan kebijaksanaan.

8:13 Takut akan TUHAN ialah membenci kejahatan; aku benci kepada kesombongan, kecongkakan, tingkah laku yang jahat, dan mulut penuh tipu muslihat.

8:14 Padaku ada nasihat dan pertimbangan, akulah pengertian, padakulah kekuatan.

8:15 Karena aku para raja memerintah, dan para pembesar menetapkan keadilan.

8:16 Karena aku para pembesar berkuasa juga para bangsawan dan semua hakim di bumi.

8:17 Aku mengasihi orang yang mengasihi aku, dan orang yang tekun mencari aku akan mendapatkan daku.

8:18 Kekayaan dan kehormatan ada padaku, juga harta yang tetap dan keadilan.

8:19 Buahku lebih berharga dari pada emas, bahkan dari pada emas tua, hasilku lebih dari pada perak pilihan.

8:20 Aku berjalan pada jalan kebenaran, di tengah-tengah jalan keadilan,

8:21 supaya kuwariskan harta kepada yang mengasihi aku, dan kuisi penuh perbendaharaan mereka.

8:12 Ahu, Hapistaran i maringan tampak dohot habisuhon, jala jumpang Ahu do parbinotoan ni panuturion.

8:13 Biar mida Jahowa do mangkagigihon na jat, roha haginjangon dohot hajungkaton; pangalaho na jahat pe dohot pamangan getegete pe na huhagigihon do.

8:14 Ahu do nampuna panuturion dohot hatongtongon, Ahu do nampuna pangantusion dohot hagogoon.

8:15 Marhitehite Ahu mangarajai angka raja, jala mangkajongjongkon hasintongan angka induk.

8:16 Marhitehite Ahu mangarajai angka induk, nang angka na sangap ro di saluhut panguhum na di tano on tahe.

8:17 Ahu mangkaholongi angka na mangkaholongi Ahu, jala angka na burju mangalului Ahu sai jumpangsa do Ahu.

8:18 Guru di Ahu do hamoraon dohot hamuliaon, arta angka na arga dohot hatigoran.

8:19 Dumenggan do parbuengku sian sere palangki dohot sian sere naung niuji, jala dumenggan do na huomo sian perak na pinillit.

8:20 Ahu mangiringiring halak di dalan hatigoran di tongatonga ni angka lapang habonaron.

8:21 Marbasabasahon siteanon tu angka na mangkaholongi Ahu, jala parartaon nasida hugoki do.

Dung ro barita nauli tu tano Batak jala disuru angka parbarita na uli i halak hita asa burju marsingkola, sai dihalaputi angka ompunta do na jolo laho pasingkolahon gellengna satimbotimbona jala pola dibahen ende taringot tusi. Marhoihoi mansari, arian nang bodari, intap ni na tolap gogo jala sai dipatupa dalan laho patulushon. Parbue ni tangiang do na tarida nuaeng. Nunga torop halak hita sarjana, marpangkat na timbo, marserak di portibi on. Hapistaran, parbinotoan, habisuhon i do na patauhon nasida dapotan parsaulian. Alai, ingkon tongtong suan dibagasan rohanta, ndada holan gogo dohot pambahenanta na patulushon hita dapot parsaulian. Tangiangta na ditangihon Debata, i do na mangaloas hita pasauthon saluhut marhite angka ulaon na denggan i. Sungkunsungkun tu hita, aha do hapistaran i jala aha niualana?

Hapistaran dohot habisuhon ni Debata ndang dos tu hapistaran dohot habisuhon ni portibi on na jotjot marlaok jala boi mambahen mara tu ngolu ni jolma. Angka naung dapotan bisuk dohot parbinotoan sian Debata mangolu dibagasan parange na tongtong mabiar mida Jahowa. Hapataran ni jolma naung taruli di panuturion ni Debata dipadao do dirina sian angka na jat, roha haginjangon dohot hajungkaton. Songon i nang pangalaho na jahat dohot pamangan panggetegete dihagigihon. Asa ndang maol mananda jolma naung tinuturan ni Tondi ni Debata sian jolma na mangasahon bisuk ni portibi on. Nian ndang gabe tulahonta bisuk ni tano on molo tarajumi angka pangajari bisuk i dapotan bisuk sian Jahowa. Alai ingkon naeng do tangkas idaonta parasinganna, ai habisuhon ni portibi on sipata do marpangait tu hagiot ni pardagingon jala marpangahut tu angka na ringkot di daging i. Angkup ni tarida do bisuk ni tano on na so ra mansadi manjalahi arta ni portibi, na sai torus mambahen loja jolma mandiori.

Ndang otik jolma loja mamangke bisukna mangalului nasa na ringkot di ngoluna alai mansai maol situtu dapotan. Hatandion na songon i do taida sian turpuk jamita on. Debata do habisuhon dohot hapistaran i na sai manuturi hita mananda dalan na lehet. Habisuhon i manogu huhut margogoihon hita mangula gabe ndang marisuang loja i. Molo marbisuk jolma mangula, boi do na maol gabe mura diula, alai jolma na so marbisuk, nang pe mura ulaon i gabe maol dipatupa. Asa i do ala na umbahen sai didok halak Batak tumagon do na hurang rupa sian na hurang roha. Marbisuk dipatudos do tu na marroha. Hombar tusi ma nuaeng ringkot tangkasanta dirinta, bisuk dia do na tapake na sailaon na mangula di tano on? Sintasinta ni hita halak Batak dapotan “hamoraon, hagabeon, hasangapon”. Mansai uli situtu do sintasinta on, alai ndang sude hita trauli disi. Burju jala marsitutu mula ulaon alai ndang marna jumpang sude na talului i.

Hata ni Debata di turpuk on paingothon: (1) Manghagigihon na jat; (2) Manghasogohon ginjang ni roha dohot hajungkaton; (3) Manulak pangalaho hajahaton; (4) Mandao sian pamangan getegete. Taringot tu na opathon ringkot tasulingkit dirinta. Adong dope sian hita na sai lomo rohana mangula na jat? Angka dia ma ulaon na jat i? Boha do taringot tu harohaonta, songon dia do rumang ni si ginjang roha i? Hata aha do na haruar sian pamanganta? Tagamon do hata na lambok, na gok hadameon manang na patubu arsak dohot hagunturon do? Sotung do ala opat pangalaho i gabe sundat dapotan las ni roha hita di parngoluanta nuaeng. Molo songon i do, tatadinghon ma i. Jala unang lupa hita nang pe marsitutu hita laho mangulahon bisuk na sian Debata, haru hira so singkop dope parngoluanta di tano on, lam boha ma molo so bisuk na sian Tuhan i tapangke mandalani parngoluonta be. Tasulingkit ma dirinta sotung do ndang hata na uli ruar sian pamanganta di tongatonga ni parsaripeon dohot na marhombar jabu. Songon dia do natoras pasahat hata tu ianakhonna? Unang ma nian holan rimas dohot songgaksonggak na tarbege sian ama manang ina tu angka ianakhon. Jolma naung dapotan bisuk ni Debata, sai toruk do rohana jala lambok panghulingna tu angka donganna. Nang pe ra adong sogo ni rohana alai ndang gabe pangarimason ibana manghatai. Sabam dohot benget ni roha do dipataridahon angka na bisuk molo ro pe parugkilon di ngoluna, ala diboto Debata do manuturi ibana laho mangadopi saluhut na masa. Ndang pandelean manang ungutungut jala ndang lomos roha nang pingkiran ni jolma naung marbisuk sian habisuhon na Sintong i. Bisuk i do patureture rohana laho patupahon angka na uli di ngoluna siganup ari. Debata do habisuhon i na tuk laho patupahon angka na denggan di ngolu ni angka na niasianNa.

Didok turpuk jamita on, habisuhon i dapot ni jolma angka na holong roha di Jahowa. Ndang maila jolma na hinaholongan ni Tuhan i. Asa tung mansai arga hian do habisuhon i patupahon hatimbulonta. Ibana mangalehon parbue na mansai uli ai marimpola ma sude na niulana jala manghorhon las ni roha ma saluhut hata na haruar sian dirina jala manjadi sude na pinatupana. Ala dipadomu do habisuhon i tu angka na maniop huaso isara pangomgomi manang panguhum gabe boi ma tangkas taida di humaliangta boha pangulaon ni habisuhon i. Angka pangomgomi ndang mardingkan pahothot patik dohot aturan jala na binahenna sai patubuhon hademahon dohot hadameon. Habisuhon i do na padaohon pangarupaon di tongatonganta ai ndang adong be na barani patuduhon hisapna marhite angka parange na jahat. Jala parpudi sian turpuk on taida do parbue ni habisuhon dohot parbinotoan i, ima hamoraon dohot hamuliaon, arta angka na arga dohot hatigoran. Tung mansai ringkot do saluhutna i di parngoluonta. Ihut tusi dipatangkas do muse parbue na gok tu angka panean di hamoraon i. Lapatanna, ndada holan sasundut alai sahat tu pinomparna nunga diparade na ringkot di hita.

Sada nari na mansai ringkot pamanatonta sian turpuk jamita on, i ma taringot tu parbue ni habisuhon i na dumenggan do sian sere palangki, dohot sian sere naung niuji jala na niomona dumenggan sian perak na pinillit. Molo habisuhon na sian ginjang i nian jala mangarajai ngolu ni sude jolma di tano on, mangolu di bagasan hasintongan ma hita saluhutna jala angka na uli ma sipateanhononta tu angka sundut na mangihut. Tapangke ma habisuhon i, pistar ma hita mandalani parngoluon on asa dapotan pasupasu hita saluhutna di bagasan Tuhanta Jesus.