Khotbah Lukas 14: 7-11 "Hidup Dengan Rendah Hati"

Minggu 13 Set. Trinitatis; 15 September 2019

Mangolu Dibagasan Serep ni Roha

Lukas 14: 7 - 11

14:7 Karena Yesus melihat, bahwa tamu-tamu berusaha menduduki tempat-tempat kehormatan, Ia mengatakan perumpamaan ini kepada mereka:

14:8 "Kalau seorang mengundang engkau ke pesta perkawinan, janganlah duduk di tempat kehormatan, sebab mungkin orang itu telah mengundang seorang yang lebih terhormat dari padamu,

14:9 supaya orang itu, yang mengundang engkau dan dia, jangan datang dan berkata kepadamu: Berilah tempat ini kepada orang itu. Lalu engkau dengan malu harus pergi duduk di tempat yang paling rendah.

14:10 Tetapi, apabila engkau diundang, pergilah duduk di tempat yang paling rendah. Mungkin tuan rumah akan datang dan berkata kepadamu: Sahabat, silakan duduk di depan. Dan dengan demikian engkau akan menerima hormat di depan mata semua tamu yang lain.

14:11 Sebab barangsiapa meninggikan diri, ia akan direndahkan dan barangsiapa merendahkan diri, ia akan ditinggikan."

14:7 Alai diida ma, angka hundulan na sumangap dipilliti angka na pinio i, gabe marumpama ma Ibana, ninna ma mandok nasida:

14:8 Anggo tarpio ho tu parunjuhan, unang ho juguk tu hundulan na ummangat, atik beha adong piniona sahalak na sumangap sian ho;

14:9 gabe ro suhut i, na rap mamio hamu, mandok tu ho: Di ibana ma juguhanmi! Jadi ila ma roham juguk tu hundulan partoru.

14:10 Alai anggo dipio na mamio ho, laho ma ho juguk tu hundulan pudipudi; asa anggo dung ro na mamio ho, dohononna ma tu ho: Tungkan julu on ma ho juguk, ale! Jadi sangap ma ho idaon ni sude donganmu na tarpio i.

14:11 Ai nasa na patimbohon dirina, sipaoruon do; jala na paoru dirina, i do sipatimboon!

Di parngoluan ni halak Batak siapari mansai ringkot do inganan ni parhundul molo adong asa ulaon. Holan sala inganan ni sasahalak hundul, olo do pintor tubu persoalan. Turpuk on pe manaringoti parhundul uju marsipanganon Tuhan Jesus di bagas ni sada sintua ni halak Parise tongon di ari Sabat. Diparrohahon Tuhan Jesus, holan hundulan na sumangap do dipilliti angka na pinio i, gabe marumpama ma Tuhan Jesus. Diuduti Tuhan Jesus do muse pangajarion na tung ringkot, ima sian na binereng ni Jesus tingki i, di na marsigulut angka na pinio i mambuat hundulan na sumangap. Halak Parise i ma angka jolma na sai uasan di hasangapon dohot pamujion sian humaliang tu dirina. Jala i do na sai dihasiholi jala dilului halak Parise marhite saluhut ulaonna. Alani, sogo do roha ni angka halak Parise molo jumpang nasida halak na dipasangap manang dipapujipuji angka jolma. Sai luluan nasida do angka dalan laho mandabuhon hasangapon i. I do umbahen na sai dihasogohon halak Parise Jesus, ala na dipapujipuji jala dipasangap angka na torop i Jesus.

Dipaboa turpuk on do tu hita, paboa holan Debata do na mangaturhon ise sipatimboonNa jala ise sipatutoruonNa. Sian dia dapot i? Parjolo, marhite gombaran ni pamio (hasuhutan) di umpama i. Hasuhuton i do na boi paorothon jolma sian hundulan na sangap tu hundulan pudipudi, dohot sabalikna. Ndang jolma na piniona i na manontuhon ise na patut hundul di hundulan na sumangap. Ala huaso, kedaulatan taringot tu parhundul di tangan hasuhuto do. Ala Debata do na mangontang hita asa ro tu HarajaonNa, tu haroan bolon i, marlapatan ma i Debata do hasuhuton, jadi Debata do na mangaturhon ise sipasangaponNa jala sipaleaonNa di HarajaonNa saonari nang sogot. Paduahon, tangkas do taboto sian ayat 11, “Ai nasa na patimbohon dirina, sipaoruon do; jala na paoru dirina, i do sipatimboon!” Alani, nalnaldo sian turpuk on na Debata do na berhak manontuhon ise sipatimboonNa jala ise sipatutoruonNa. Holan di tangan ni Debata do huaso i, ndang di tangan ni jolma, jadi ndang adong lapatanna margulut jolma tusi. Nasa na naeng timbo dipasahat ma dirina tu Debata na mangalehon hatimboon i, dibege, jala dioloi ma Debata. Tudosan na marimpola na binahen ni Jesus di turpuk on. Asa di naro na pinio i tu bagasan sada ulaon ingkon dibagasan serep ni roha, unang hunduk tu inganan na sumangap (unang merasa sangap). Angka sisean ni Jesus sian na jolo sahat tu hita sisaonari diajari do asa tongtong paserephon roha mamboto dirina, asa ingkon parsangapanta do angka halak na asing. Ndang hasangapon na di hasiangan on na tapareahi, atik pe ringkot do i nian, alai na rumingkot i ma hasangapon na sian Ama i (Mat. 6: 33).

Ala sude do hita marsintasinta asa sangap/timbo dipabotohon Debata ma songon dia do dalan na sintong laho tusi. Molo parbinotoan ni jolma manang pangantusion ni haportibi on, asa sangap sasahalak, ingkon diadu do hasangapon i marhite na patimbo dirina. Dipatimbo jolma dirina songon na niida ni Tuhan Jesus di turpuk on, marhite na pintor laho tu hundulan na sumangap. Hundulan na sumangap, molo mangihuthon Hajahudion di lambung ni hasuhuton; alai di Habatakon, di halangulu. Molo adong na pintor manggulut hundulan na sumangap (halangulu) patuduhon haginjangon ni roha ma i. Tontu ndang sala hundul tu halangulu manang hundulan na sumangap molo hombar do i tu naniaturhon ni hasuhuton manang ruhutruhut ni paradaton. Na hurang denggan, i ma molo na ginulut do, manang songon hata na dipake di ayat 7 di turpuk on i ma “dipilliti”. Ndada holan taringot tu etika parhundulan na niajarhon n Tuhan Jesus di umpama on. Ndang na diorai Tuhan Jesus hita manghunduli hundulan na sumangap molo memang nunga i ruhutruhutna. Unok ni turpuk on, i ma ngolu na marhaserepon, na pasidinghon ginjang ni roha. Jadi puncak ni turpuk on, pangarimpunan ni umpama ni Tuhan Jesus on i ma di ayat 11, “Ai nasa na patimbohon dirina, sipaoruon do; jala na paoru dirina, i do sipatimboon”! Marhite ayat 11 on, diajarhon asa tapatutoru dirinta, unang adong na patimbohon dirina, asa unang dipatutoru Debata hita.

Mangihuthon hata ni Debata, asa sangap, asa timbo sasahalak ingkon na dipatutoru do dirina. Suhar do on tu pingkiran ni hajolmaon, alai on ma dalan ni Debata. Molo tung pe ringgas jala godang tumpak manang sumbanganna, unang pola nian dipangeahon jala unang pola ingkon sai lomona. Molo pe arga ugasanniba, unang lea roha marnida na mamangke ugasan tiruan. Unang ma nian mamillit mardongan dohot mangadopi pesta. Molo tung pe mora jala sangap, tong ma didongani na pogos jala na so mardihadiha. Unang ingkon jumolo dongan manise iba, dohot lan angka na asing. Molo olo hita mangulahon songon i, pos ma rohanta, manatap do Debata sian banua ginjang, pasti do patimboonNa hita muse, songon naung pinatuduhon ni Debata di ngolu ni Tuhan Jesus. Dipatutoru Tuhan Jesus diriNa pola mate tarsilang alai dipatimbo Debata do Ibana muse (Pilippi 2: 5-11). Alani songon halak na porsea tarjou do hita maniru Tuhan Jesus i ma mangolu dibagasan serep ni roha. Didia pe hita mangula jala maringanan, unang ma nian pola tapaimaima jolma pasangaphon hita. Marsiajar ma hita pasangaphon donganta songon hataridaan ni haserepon ni rohanta, songon Tuhan Jesus Sitoruk roha i, asa dipatimbo Debata hita. Jala taingot ma songon na nidok ni Epistelta di Jesaya 57; di lambung ni angka na serep marroha do Debatanta. Molo olo hita patutoru dirinta, di lambungta ma Debata dung i patimboon ni Debata ma hita.

Unang tapatimbo manang tapaginjang rohanta, asa unang gabe hona bura manang dipatutoru hita. Alai tapatutoru ma rohanta, tapaserep jala tapasonang ngolunta. Debata ma marnida roha nang parngoluanta asa dipatimbo hita tu hasangaponNa di tingki halehetanna. Taparhasiat ma donganta tu angka ulaon sipajoloon, ai denggan do saluhut di angka partingkianna be. Unang tapangasahon gogonta dohot angka na adong di hita, gabe muruk ma on Debata tu hita (Jer. 17: 5). Molo tung pe adong angka sinadonganta, pangkat dohot lan angka na asing ingkon sihamauliatehononta do i tu Debata di bagasan serep ni roha. Saluhutna i laho salpu do sude jala boi so sangkidop mata mago molo dihasogohon Debata. Na tumagon ma songon na lea di portibi on, alai gabe dipatimbo Debata tu harajaonNa. Tung aha ma lapatanna molo dipasangapsangap portibi alai lea di adopan ni Debata. Sandok tahasabamhon ma salhut pambahenan ni Debata di ngolunta.