Khotbah Amsal 22: 8-12 "Allah Mencintai Kesucian Hati"

Minggu 19 Set. Trinitatis; 27 Oktober 2019

22:8 Orang yang menabur kecurangan akan menuai bencana, dan tongkat amarahnya akan habis binasa.

22:9 Orang yang baik hati akan diberkati, karena ia membagi rezekinya dengan si miskin.

22:10 Usirlah si pencemooh, maka lenyaplah pertengkaran, dan akan berhentilah perbantahan dan cemooh.

22:11 Orang yang mencintai kesucian hati dan yang manis bicaranya menjadi sahabat raja.

22:12 Mata TUHAN menjaga pengetahuan, tetapi Ia membatalkan perkataan si pengkhianat.

22:8 Manang ise na manaburhon hageduhon, gotilonna do sogot hamagoan, jala siap do tungkot ni hajungkatonna i.

22:9 Halak na lambok marpanaili, dapotan pasupasu, ai dilehon do sian indahanna tu halak na pogos.

22:10 Sai pabali ma halak pargeduk, asa mandao parbadaan, jadi mansadi ma parsalisian dohot tongkartongkar.

22:11 Manang ise na mangkaholongi roha hapitaon, basar huhut pangkulingna, alealena marajai.

22:12 Mata ni Jahowa mangaramoti parbinotoan, alai anggo hatahata ni pangoseose, dibalikkon Ibana do.

Parbue manang hasil na tajalo di ngolu on, sai marpardomuan do i dohot sikap nang pambahenan, manang pangulaonta di ngoluon manang jotjot digoari Hukuk Tabur Tuai. Molo taulahon na denggan, tontu boi ma hita manghirim jaloonta na denggan sian Debata Tuhan i di ngolu on, alai molo na so denggan do taulahon, tontu sahali na so denggan do na patut sihirimon jala sijaloon di ngolu on. Songon pandohan ni Tuhan Jesus di Mateus 12: 33 “Molo hau na denggan sinuan, na denggan ma antong parbuena; molo hau na roa sinuan, gabe roa do parbuena, ai matua sian parbuena do tandaon hau”

Suman tu boni do ganup pangalaho, rap marnampuna kesempatan laho tubu. Na denggan sinuan, tubu; na roa sinuan, tubu. Ia i disabur halak i do gotilonna (Gal. 6:7). Halak na manaburhon hatigoran, maruli upa haburjuon (Poda 11: 18), halak na manaburhon hamagoan, manggotil hamagoan (Job. 4:8). Jala hageduhon i boi do manubuhon hageduhon tu luar diri ni jolma i. Digoari suman ni boni, ala sian hageduhon boi tubu lobi sian 10 hageduhon na imbaru. Pandohan manabur di son marlapatan na diulahon secara berulangulang. Ndang tarsirang hita manabur sian manggotil. Ingkon mago do nasa “tungkot ni hajungkaton”. Tungkot di son songon simbol ni huaso dohot gogo. Hatiha i somal do dipangke halak huaso patudu gogo ni hajahaton (Jes. 14: 5; Psalm. 125: 3). Mansadi do angka partingkian, ndang manahan gogo ni angka na mangasahon huasona laho manjahati. Dungkon salpu gogo ni huasona i,bongot ma hamaolon tu bagasan dirina. Ai suman ni halak na manuan mara do i tu dirina.

Somalna sai dirajai halak na mora do halak na pogos. Nunga sian masa tu masa taida pangalaho i. Alai marasing do jumpang di ayat 9 di turpuk on, marsagi sipanganon do halak na ias roha tu angka na pogos, angka halak na dangol, na gale. Tarpasupasu do halak na lambok marpanaili, na mangalehon sian indahanna tu halak na pogos. Indahanna i do disagi, lapatanna ndang alani naung marlobian ibana umbahen na tuk mangalehon, sian na adong i do ibana marbagi dompak na hurangan. Jala gabe si sada panganan, lapatanna ndada holan asa bosur siubeon ni halak na male, alai jumoang di sisada panganan i rosu ni parsaoran, las ni roha, paulak tondi ni angka na pogos i.

Asa ndang jolo ingkon mamora hape hita asa tarbahen hita mangurupi angka na pogos, ndang jolo ingkon mamora asa tuk hita gabe parasiroha, tuk do i tarulahon halak angka na lambok marpanaili, alai maol do i do angka halak na jungkat marpanaili. Baliksa sipabalion do halak pargeduk. Boasa? Parjolo, ndang haubatan angka na songon on. Ndada holan rumang ni halak na dibagasan haotoon, na losok dohot na tumundalhon habisuhon lapatan ni pargeduk. Alai halak na aktif jala tongtong martahan sumuanhon angka parbadaan dohot parsalisian. Na so haubatan ni manang ise be, i do alana umbahen na ingkon dipabali. Paduahon, boasa ingkon dipabali, marlapatam do i na tuk do Debata mangandalihon luhutna hageduhon. Ndang adong hageduhon na so dikendalihon Debata. Ndang talu Debata maralohon hageduhon. Patoluhon, ala bahaya ni hageduhon mangarasuni torop halak, torop generasi. Masa do nuaeng di humaliang hita rumang ni hageduhon marhite na manuan berita hoax. Dungkon disabur hageduhon on gabe bidang situtu do panghorhonna, parmusuon ro di ragam ni angka parmaraan na asing.

Ndang tarsirang halak na bisuk sian halak na ias marroha. Alai, dia do rumang ni halak parroha na ias? Parjolo, i ma halak na tau mangantusi huhut manghangoluhon hasintongan na sian Debata di tongatonga ni parngoluan si ganup ari. Halak na tau manirang na denggan sian na roa. Alani sada hasurungan ni angka na ias marroha i ma na manjamothon pamanganna (ay. 11). Na basar panghulingna, lapatanna ndang kasar, ndang sai holan songgak-songgak, ndang mambahen hancit ni roha, tabo begeon jala mambahen sonang ni roha. Paduahon, martua do angka na ias roha, ala di bagasan ibana mian kejujuran, hasintongan dohot haholongan. Suhar ni halak pangoseose, halak na so sian roha bulus jala tulus mangoloi Jahowa. Na mura manimbil do on sian dalan hasintongan i. Jala tongon do hita nuaeng mangolu di zaman na godang halak mangose haporseaonna. Patoluhon, halak na ias roha gabe aleale ni raja. Aleale dison ndada holan pardonganon sambing alai gombaran sikap di pardonganon i, i ma loyalitas. Asa molo didok aleale ni raja, i ma halak na dihaposi sahalak raja, na donok tu raja.

Tamba taon dohot hamajuon, boi do lam tamba nang pangalaho na hurang denggan, dohot hamaolon ni ngolu. Jotjot di tongatonga ni parngoluonta, hurianta, jabunta, jumpang angka parkaro manang parsalisian, na so apala gabe parkaro sasintongna molo adong na patalu roha. Jotjot do alani angka parsalisian, mambahen gabe marsirang na marhuta, na mardongan, na sahuria manang sahaporseaon, songon istilah ni halak Batak na mandok: “Mardomu di tano rara”. Marhite turpuk on, mansai tangkas do dipaingothon tu hita, paboa hadengganon do parbue ni na denggan, jala hamagoan do parbue ni pangalaho nang pambahenan angka na so tama. Alani disungguli jala dibohali do hita marhite turpuk on, laho pasiding angka parange na so marojahan tu poda ni Tuhan i. Asa ingkon jamot jala manat do hita tu pandohan na mandok “eme na masak digagat ursa; i na masa ima ni ula”. Nunga torop Kristen di partingkianon na pahombar ngoluna songon pandohan, ujungna ndang tarida be ciri khas ni hakristeonon di ngoluna. Tarjou do hita patuduhon jala manghangoluhon parange na khas, na marojahan tu lomo ni roha ni Debata. Parange dohot pambahenanta, ingkon mamboan las ni roha dohot pangoluhon dongan, ndada gabe manusai manang pamatehon. Lapatanna, ingkon tangkas do di hita, adong solidaritas na perduli tu donganta jolma, songon hapapatar ni holong ni roha ni Debata.