Khotbah Mazmur 25: 8-15 "Hidup di Jalan Tuhan"

Minggu 17 Set. Trinitatis; 13 Oktober 2019

25:8 TUHAN itu baik dan benar; sebab itu Ia menunjukkan jalan kepada orang yang sesat.

25:9 Ia membimbing orang-orang yang rendah hati menurut hukum, dan Ia mengajarkan jalan-Nya kepada orang-orang yang rendah hati.

25:10 Segala jalan TUHAN adalah kasih setia dan kebenaran bagi orang yang berpegang pada perjanjian-Nya dan peringatan-peringatan-Nya.

25:11 Oleh karena nama-Mu, ya TUHAN, ampunilah kesalahanku, sebab besar kesalahan itu.

25:12 Siapakah orang yang takut akan TUHAN? Kepadanya TUHAN menunjukkan jalan yang harus dipilihnya.

25:13 Orang itu sendiri akan menetap dalam kebahagiaan dan anak cucunya akan mewarisi bumi.

25:14 TUHAN bergaul karib dengan orang yang takut akan Dia, dan perjanjian-Nya diberitahukan-Nya kepada mereka.

25:15 Mataku tetap terarah kepada TUHAN, sebab Ia mengeluarkan kakiku dari jaring.

25:8 Pardengganbasa jala na * bonar do Jahowa, ala ni * dipodahon do dalan na tigor i tu angka pardosa.

25:9 Diparnonohon do uhum tu angka na dangol jala diajarhon dalanna tu angka na tarjepol.

25:10 Asi ni roha dohot hasintongan do sude dalan ni Jahowa di angka na mangaradoti padanna dohot angka panindangionna.

25:11 Ala ni goarmu, ale Jahowa, sai marpamuati ma roham di dosangku, ai tung na balga do i.

25:12 Ise ulaning baoa na mangkabiari Jahowa? Sai na * ajarhononna do tu ibana dalan sipillitonna.

25:13 Sorang di hasonangan do tondina i, jala pinomparna i * tumean tano on sogot.

25:14 Hasudungan ni Jahowa do angka na mangkabiari Ibana, jala dipabotohon tu nasida padanna.

25:15 Sai tong do * mangaranap matangku tu Jahowa, ai Ibana do * mangenet tothu sian jorgong

“Di dalam dunia ada dua jalan, lebar dan sempit mana kau pilih?” On ma saotik sian lirik lagu Sikkola Minggu na tangkas manungkun tu na porsea i, dia do dalan na laho pillitonna. Sude dalan adong do ujungna, alai ndang sarupa aha do di ujung ni dalan na tapillit i. Jala i do na naeng idaonta marhite turpuk on asa tangkas jala unang sala hita mamillit dalan sidalanonta. Ise do Parpsalmen on jala aha do na hinatindanghonna? Parpsalmen on ima halak na mangolu jala maringan di bagasan parsaoran na rosu dohot Debata di tongatonga ni bangso Israel. I ma halak di na pajumpa jala adop dohot Debata, tangkas diida jala diongkui angka dosa na niulana nasai laon. Alai ndang madabu ibana tu ngolu na so marpanghirimon siala tongtong porsea di asi dohot denggan basa ni Jahowa. Na umbalga jala dao sumurung denggan basa ni Jahowa sian hadosaonna. Alani ro ibana mangido haluaon sian hagogotan na sonson jala mardapotdapot di ngoluna siala ni dosa i.

Dibuha do turpuk on marhite sada panindangion haporseaon, Pardenggan basa jala na bonar do Jahowa. Pangongkuon on ndada haruar holan sian roharoha dohot pingkiran sambing, alai sian haporseaon na polin. Pangongkuon na songon on boi dapot di ngolu ni jolma: Naung tangkas marnida, manjalo dohot mandai denggan basa ni Debata di sude pardalanan ni ngoluna. Jolma naung tangkas marnida, manjalo, mandai habonaron ni Jahowa. Sian dua pangongkuon on boi idaonta: Pangongkuon di denggan basa ni Jahowa masuk tu horong etis. Ganup jolma ingkon marnida angka dia ma pambahenan ni Debata na denggan, na marguna jala na tau pauliulihon di ngoluna siganup ari, ngolu marsadasada dohot ngolu ni ruas songon sada bangso. Pangongkuon di habonaron ni Jahowa masuk tu horong uhum/moral. Ganup jolma ingkon marnida dia ma pambahenan ni Debata na mamboan jala mandasori ngolu na sintong di ganup jolma. Marpardomuan tu si di ayat 8b didok “Alani i dipodahon do dalan na tigor i tu angka pardosa”. Lam nalnal ma taida habonaron ni Jahowa idaonta sian uhumNa. Didok di ayat 9, diparnonohon do uhum tu angka na dangol. Ala torop sian bangso Israel na marungkil hinorhon ni uhum na so tigor. Ndang margogo manghamonanghon parungkilon ala jolma na dangol, metmet jala gale. Diuji mangido gogo tu angka na sangap, panggomgomi, alai ndang dapot nasida. On ma ombasna nasida taruli di pangurupion i. Debata do na marparnonohon uhum na tigor tu nasida. Jala diajarhon dalanNa tu angka na tarjepol. Ala di ngolu siganup ari, angka na tarjepol i ma na so umboto dalan na sintong sidalananna. Di pangalaho ni ngolu ni si songon i, gabe ditondong ma dalan tu hamagoan i. Alani i, ro Debata marhite panurirangNa mangajarhon dalan na sintong i tu nasida.

Asi ni roha dohot hasintongan do sude dalan ni Jahowa. Dilehon Debata do uhum tu bangso i na gabe dalan sidalanannasida. Di ngolu siganup ari, tung so tarulahon do uhum i sian gogo dohot hadirionta sandiri. Alani i ma diarahon nasida maporus holan tu asi ni roha ni Debata ala hasintongan do sude dalan ni Jahowa. Dung sun dipaandar taringot tu hapeahan ni uhum i, mangaranap ma Parpsalmen on dihadirion dohot hajongjonganna. Sian hadirionna, tung tangkas do ditanda dirina, jolma pardosa. Tung jolma na gale do ibana, tung so tarlangkahonsa sallangka na ture molo holan mangasahon hadirion ni hajolmaon. Tung so tarula do uhum ni Debata ianggo sian diri ni jolma i sandiri. Alani i, ndang adong dalan na asing so holan maporus tu asi ni roha ni Debata. I do umbahen didok, Sai marparmuati ma rohaM. Sude do jolma hea marsala dohot mangulahon dosa, alai sude do jolma mangarajumi dirina pardosa? Di portibi na gok hadosaon on, adong do jolma na so mangarajumi dirina pardosa, alai adong do jolma na mangarajumi dirina pardosa alai ndang olo ibada mangongkui hadosaonna. Pangongkuon dohot panolosolion ni dosa i do na pinatuduhon ni Parpsalmen di turpuk on jala mangido hasesaan ni dosa tu Debata. Ndang adong ganggu ni roha di hatutulus ni pangidoanna di adopan ni Debata. Martinangi do Debata pasauthon pangidoanna. Alani i, dipuji do Debata di panindangion ni haorseaonna. Didok Parpsalmen i, Ise ulaning baoa na manghabiari Jahowa? Naeng dohononna, asa sude do baoa ingkon manghabiari Jahow. Alani i, sude ma nian mangidohon di tangiangna na gomos, “Sai ajarhononNa do dalan sipillitonna”. Di hinaringkot ni ngolu na manghabiari Jahowa, diparhatopot do upa sijaloonna di ngoluna, i ma: Sorang di hasonangan do tondina. Dohot pandohan na asing, tondi na sonang bolas dapot di ngolu ni jolma na manghabiari Jahowa. Pinomparna i tumean tano on sogot. Lam dao jala bidang muse diida upa sijaloon ni na manghabiari Jahowa, ndada holan di ngolu na ondop di jolona alai dao tu jolo, tu angka pinomparna sogot. Diuduti Parpsalmen do muse mandok: Hasudungan ni Jahowa do angka na manghabiari Jahowa jala dipabotohon tu nasida padanNa, jala Ibana do na mangenet tot ni Parpsalmen sian jorgong. Pandohan on naeng patuduhon pos ni roha di Debata na tongtong rade marmudumudu ngolu ni jolma na tinompana. Alani ingkon umbiar rohanta tu Debata sian tu jolma. Holan Debata Jahowa do na tau gabe hasonangan ni tondinta jala teanonta pasupasu i sian ibana molo tongtong marhabiaran tu Debata hita.

Marhite turpuk on naeng tangkas idaonta hinaringkot ni tumangihon dohot manjalo dalan na tigor i. Asa unang sala mamillit dalan hita gabe mara ma dapot hita di ujung ni pardalananta i. Hita ma nuaeng marnida dohot manulingkit pardalanan ni ngolunta ganup marsadasada. Sungkunsungkun nuaeng tu hita: Nunga mardalan hita di dalan na tigor i? Ndang tarlangkahon hita sallangka na ture molo ndang ala panuturion ni Debata. Alani i ma, ditangiang pujipujianta di Debata taendehon ma denggan basaNa na mangaramoti ngolunta songon na pinaandar di BE. No. 221: 1+3+5.

Saleleng Jesuski, na mandongani au, maporus holsoholsongki, sai di Ibana au.

Sai dipatongon au, tu hasonangan i, Diiringiring Jesus au, mardalan lao tu si.

Naeng tarsulandit au di maol ni dalan i. Hatop ma lao tu Jesus au, pamalum rohangki.