Khotbah Yohanes 4: 21-26 "Menyembah Tuhan dalam Roh dan Kebenaran"

Minggu 18 Set. Trinitatis; 20 Oktober 2019

4:21 Kata Yesus kepadanya: "Percayalah kepada-Ku, hai perempuan, saatnya akan tiba, bahwa kamu akan menyembah Bapa bukan di gunung ini dan bukan juga di Yerusalem.

4:22 Kamu menyembah apa yang tidak kamu kenal, kami menyembah apa yang kami kenal, sebab keselamatan datang dari bangsa Yahudi.

4:23 Tetapi saatnya akan datang dan sudah tiba sekarang, bahwa penyembah-penyembah benar akan menyembah Bapa dalam roh dan kebenaran; sebab Bapa menghendaki penyembah-penyembah demikian.

4:24 Allah itu Roh dan barangsiapa menyembah Dia, harus menyembah-Nya dalam roh dan kebenaran."

4:25 Jawab perempuan itu kepada-Nya: "Aku tahu, bahwa Mesias akan datang, yang disebut juga Kristus; apabila Ia datang, Ia akan memberitakan segala sesuatu kepada kami."

4:26 Kata Yesus kepadanya: "Akulah Dia, yang sedang berkata-kata dengan engkau."

4:21 Dung i ninna Jesus ma mandok ibana: Porsea ma ho di Ahu, inang! Na ro ma tingkina, gabe ndang pola be dolok an manang Jerusalem partangiangan tu Ama i.

4:22 Disomba hamu do na so binotomuna; huboto hami do na husomba hami, ai bangso Jahudi do haroroan ni haluaon.

4:23 Alai na ro ma tingkina jala nunga ro i nuaeng, gabe di bagasan Tondi dohot hasintongan martangiang angka partangiang na tutu tu Ama i; ai angka partangiang na songon i dipangido Ama i.

4:24 Tondi do anggo Debata; asa angka na martangiang tu Ibana, patut martangiang di bagasan Tondi dohot hasintongan.

4:25 Dung i didok boruboru i ma mandok Ibana: Huboto do, na naeng ro Messias na margoar Kristus; ia dung ro Ibana, baritahononna do saluhutna i tu hami.

4:26 Dung i ninna Jesus ma mandok ibana: Ahu do i, na mangkatai dohot ho!

Asa taboto pangantusion di turpukta on, ringkot do tajaha sian ayat 4, ala di na pajumpang sahat na manghati Jesus dohot boru Samaria i, dipapatar do mulai sian ayat 4. Panghataion na andul sian hasomalan do na niula ni Jesus tu halak Samaria on. Boru Samaria on, ndada sada parompuan na denggan, ala somalna, ia angka boruboru sisongon i do lao mambuat aek, jala somalna rap do i dohot angka donganna boruboru. Hape ibaa di hos ni ari laho tu sumur jala sahalakna. Gombaran on patuduhon, ia boru Samaria on ndang adong na mandongani ibana, ra dipapulik angka donganna do ibana alani pangalahona. Pangalaho ni ibana ima siala marsaor daging dohot angka baoa, pola sampe lima hali ibana mardongan saripe (ay. 18). Diboto Jesus do sude ngolu nang dosa na niula ni parompuan Samaria i. Dihaporseai parompuan Samaria i do sude na pinatorang ni Jesus tu Ibana. Alai ndang diboto ibana dope ise do Debata na sintong jala boha do manomba Debata dibagasan hasintongan. Didok boru Samaria i tu Jesus, “Di dolok an do martangiang ia ompu nami, gabe didok hamu, ingkon Jerusalem do partangiangan”. Ompu nasida na nidok ni boru Samaria, i ma halak Samaria na parjolo. Boasa gabe inganan partangiangan dihatai ibana tu Jesus? Ala di rohana, naeng pasesahon dosana ibana, alai tudia ibana ingkon laho, tu dolok Gerizim do (inganan partangiangan ni halak Samaria) manang tu Jerusalem inganan ni halak Israel manomba Debata? Didok Jesus ma, “Porsea ma ho di Ahu, inang! Na ro ma tingkina, gabe ndang pola be dolok an manang Jerusalem partangiangan tu Ama i”. Dialusi Jesus do na dibagasan rohana, na so tradisi ni ompunasida nang tradisi ni halak Israel ukuran manontuhon inganan partangiangan tu Debata huhut mangido hasesaan ni dosa. Alus ni Jesus patuduhon ndang ingkon di Jerusalem hita manomba Debata, alai boi do manang didia. Na umporlu di Jesus, ise na tasomba, ndang inganan panombaon i. Tangkas do didok Jesus panomba na sintong i ma molo ditanda ise na disomba ibana. Umporlu do na tasomba sian inganan parsombaon. Asa sahat do pangajarion ni Jesus tu boruboru i taringot ise do Debata na sintong.

Molo tasomba Debata ingkon tutu tatanda Debata na tasomba i. Unang tasomba na so tatanda hasintonganna. Didok Jesus tu boru Samaria i, “Disomba hamu do na so binotomuna; huboto hami do na husomba hami, ai bangsa Jahudi do haroroan ni haluaon”. Aha do lapatan ni hata ni Jesus di hita? Godang do nuaeng halak manomba na so tinandana. Laho tu datu, hape ndang ditanda ise datu i, laho tu angka peramal, hape ndang ditanda peramal i, dohot lan na asing. Alani do gabe lilu do haporseaon ni halak na manomba na so tinandana. Ala ndang ditanda na sinombana, ujungna ndang diboto tudia ibana diboan na sinombana. Molo naeng hombar tu lomo ni roha ni Debata parsombaonta tu Debata, naeng ma hombar tu na niaturhon ni Debata. Hata ni Jesus mangondolhon naeng gabe panomba na sintong hita jala unang gabe panomba na sala, ala ndang tatanda na tasomba. Adong do panomba na sala? Adong! Molo tadok “Sarupa do sude haporseaon i, ai holan carana do na berbeda, ai rap manomba Debata do”. Sintong do sarupa haporseaon sude haporseaonta dohot haporseaon ni halak na so mananda Kristus? Ndang sarupa i! Molo tadok sarupa, berarti termasauk do hita panomba na sala, ndang tatanda na tasomba, gabe sala hita manomba. Ndang dihalomohon Debata angka na sala manomba Ibana. Lomo do roha ni Debata tasomba Ibana, alai ingkon tadomba Ibana di bagasan hasintongan. I do asa didok di ayat 23b, “Gabe di bagasan Tondi dohot hasintongan martangiang angka partangiang na tutu tu Ama i; ai angka partangiang na songon i dipangido Debata”.

Boha do manomba Debata di bagasan hasintongan? Hasintongan di do maksudna? Ingkon tasomba Ibana holan di bagasan Jesus Kristus, ala holan Jesus Kristus do dalan hasintongan na boi mamboan hita sahat tu Debata (Joh. 14:6; 1 Tim. 2:5). Hasintongan dibagasan Jesus Kristus, ndang adong na asing. Ndang hasintongan menurut ukuran ni hajolmaon, alai hasintongan na hombar tu standar manang ukuran ni Debata. Hasintongan nidok ni Jesus, ndang persoalan inganan. Toho do di bagasa joro hita marpungu, marende, martangiang manomba Debata ganup ari Minggu, jala partangiangan di jabu ni angka ruas. Alai ndang na mandok gabe ndang boi hita martangiang manomba Debata di inganan na asing. Ndang masalah inganan di na manomba Debata, ai hadir do Debata manang didia pe. Ndang boi tapenjarahon Debata di bagasan sada dolok nang gedung. Manang didia pe boi do hita manomba Debata!

Di na tasomba Debata, naeng ma Tondi Parbadia na mangingani roha nang pingkiranta asa sintong panombaonta tu Debata. Molo giot ni daging do tapangke manomba Debata, jotjot sala panombaonta tu Debata, ala holan pingkiranta tapangasahon. Boi do halak di bagasan Gereja pamatangna alai roha nang pingkiranna ndang fokus manomba tu Debata (pingkiranna tu na asing). Holan ro marminggu, alai ndang tulus roha nang pingkiranna manomba Debata. Na songon i ndang manomba Debata di bagasan Tondi, jala ndang sintong panombaonna. Ingkon di bagasan Tondi Parbadia do hita manomba Debata. Ingkon diarahon Tondi parbadia do roha nang pingkiranya manomba Debata. Tondi Parbadia do mangalehon gogo tu hita manomba Debata manang didia pe. Nang pe marsahit pamatangta alai margogo do rohanta manomba Debata molo Tondi Parbadia margogoihon hita. Lapatanna, Tondi Parbadia do na boi mangarahon saluhut hadirionta, manomba Debata sian nasa roha, gogo, ateate nang pingkiranta.

Aha do lapatan ni “Manomba Debata?” Jotjot sala hita mangantusi hata ‘manomba’, hira na holan ro marminggu, martangiang. Godang do halak nuaeng ro marmiggu hira na laho tu ulaon adat, na holan terpesona di angka hal-hal lahiriah, angka hiasan di gareja, angka kegiatan na holan papuashon roha na alai ndang tu Debata roha nang pingkiranna. Panombaon na sintong i ma na holan tu Debata, ndang tu angka Parjamita nang tu angka parhobas na adong do parmingguon. Alani do ingkon manat hita manjaga dirinta asa fokus roha nang pingkiranta na holan manomba Debata.