Khotbah Amsal 19: 20-29 "Mendengar dan Melakukan Nasihat"

Minggu 21 Set. Trinitatis; 10 Nopember 2019

19:20 Dengarkanlah nasihat dan terimalah didikan, supaya engkau menjadi bijak di masa depan.

19:21 Banyaklah rancangan di hati manusia, tetapi keputusan TUHANlah yang terlaksana.

19:22 Sifat yang diinginkan pada seseorang ialah kesetiaannya; lebih baik orang miskin dari pada seorang pembohong.

19:23 Takut akan Allah mendatangkan hidup, maka orang bermalam dengan puas, tanpa ditimpa malapetaka.

19:24 Si pemalas mencelup tangannya ke dalam pinggan, tetapi tidak juga mengembalikannya ke mulut.

19:25 Jikalau si pencemooh kaupukul, barulah orang yang tak berpengalaman menjadi bijak, jikalau orang yang berpengertian ditegur, ia menjadi insaf.

19:26 Anak yang menganiaya ayahnya atau mengusir ibunya, memburukkan dan memalukan diri.

19:27 Hai anakku, jangan lagi mendengarkan didikan, kalau engkau menyimpang juga dari perkataan-perkataan yang memberi pengetahuan.

19:28 Saksi yang tidak berguna mencemoohkan hukum dan mulut orang fasik menelan dusta.

19:29 Hukuman bagi si pencemooh tersedia dan pukulan bagi punggung orang bebal.

19:20 Sai tangihon ma hata sipaingot jala jangkon pangajaran, asa gabe pistar ho di hasusuda ni bohalmu.

19:21 Pasimpar do sangkapsangkap di bagasan roha ni baoa, alai sangkap ni Jahowa do na marsihohot.

19:22 Pinangido ni roha ni jolma do habasaronna, jala tagonan do halak na pogos sian baoa pargapgap.

19:23 Biar mida Jahowa parohon hangoluan, jala halak na sabam roha marsonangsonang do, ndang manginona jea tu ibana.

19:24 Dipohul halak sigurbak ulu do nian indahanna, gari mambahen tu pamanganna ro losokna.

19:25 Mangonai tangan ma ho tu halak pangelesi, asa anggiat marbisuk halak na oto, sai ajar ma halak na pantas marroha, asa tamba parbinotoannai.

19:26 Manang ise na mangarupa amana, tung pola dipalaholaho inana, i ma halak sibahen haleaon dohot haurahon.

19:27 Ale anaha, molo dipasadi ho tumangihon pangajaran, jadi lilu ma ho sian angka hata parbinotoan.

19:28 Halak sitindangi parroha na jat palea uhum, jala pamangan ni halak parjahat mamolgak hageduhon.

19:29 Naung pinadiri hian torutoru di halak pangarehe, jala lipatlipat tu tanggurung ni halak na oto.

 

Didok hata ni natuatua ni halak Batak: Aek tumuntun dalanna maloha gadugadu. Dipatudos pandohan on tu sahalak na so siat poda manang pangajaran. Ujungna tartuktuk manang tarsulandit ibana ala manuntun lomona. Alai halak na mangoloi sipaingot, poda manang pangajaran tagamon do ibana dapotan uli dohot hatuaon. Alani i saleleng mangolu hita ringkot poda dohot pangajaron sian silehon poda i. Sian natoras tu ianakhon, sian natuatua tu sundut na umposo, manang sian angka pangajari tu angka na niajaranna. Alai ummarga sian poda ni jolma i do poda na sian hata ni Debata na nidok ni turpuk on. Marhite turpuk on adong pigapiga parsiajaran na mansai arga na ampit tu parngoluonta.

Manangihon sipaingot dohot pangajaran. Ndang marlapatan poda dohot pangajaran tu sasahalak jolma molo so diualhon. Boha pe didok tu ibana molo so dirorahon poda i marisuang situtu do i. Alani, boha do asa marguna? Ringkot ma manangihon. Ai nang pe sai dipandok tu sasahalak alai ndang diparrohahon marisuang songon i do poda i. Masuk sian pinggol hambirang, haruar sian pinggol siamun manang sabalikna, holan mamolus sambing, alai untung dope boi songon i. Boha muse ma molo masuk sian hambirang laos tong haruar sian hambirang manang sabalikna. Didok ma i muntul, ndang siat tu sipareonna. Alai anggo na sintong ingkon do manangihon dohot denggan. I do umbahen didok raja Salomo di turpuk on: “Sai tangihon ma hata sipaingot jala jangkon pangajaran”. Naeng ma tubu roha manangihon angka sipaingot dohot pangajaran. Alai molo so ditangihon be pangajaran i ujungna madabu ma ibana tu parmaraan dohot hamaolon. Asa ingkon tangihonon ma sipaingot dohot pangajaran. Didok raja Salomo di buku Poda on, “Jala molo ditangihon tontu ma gabe pistar sahat di hasusuda ni bohalmu”. Marlapatan do i saleleng di ngoluna na marguna situtu poda i.

Marguuru tu sangkap ni Jahowa. Sude do jolma adong be angka sangkapna, pangidoanna. Alai ndang sude sangkap i boi jumpang. Apalagi sangkapta i ndang hombar tu lomo ni roha ni Debata. Alai anggo sangkap ni Jahowa tutu situtu do denggan. Sangkap na pangoluhon. Nian ndang adong jolma na umboto sangkap ni Debata. Debata sandiri do na umboto sangkap sibahenonna tu hita. Maol do mamereng dalan dohot pingkiran ni Debata jala ndang adong na boi mandodo i. I do umbahen didok ndada pingkiranHu pingkiranmuna, jala ndada dalanmuna angka dalanHu (Jes. 55: 8-9). Alani molo so saut pe sangka pangidoan i unang gabe mandele. Jala ingkon antusanta na adong do sangkap ni Debata di sude angka na tasangkapi i. Molo saut sangkap pangidoan i, unang ginjang rohanta, alai tadok ma mauliate tu Debata. Alani taloas ma sangkap ni Debata mangula dibagasan ngolunta.

Biar mida Jahowa. Mansai bagas do pangantusion molo didok mabiar mida Jahowa. Alai, boasa ingkon mabiar mida Jahowa? Ala biar mida Jahowa parohon hangoluan dohot las ni roha. Biar mida Jahowa ndada sarupa tu na mabiar mida tu jolma. Biar mida Jahowa i ma pasangaphon Debata. Manghaporseai Debata pargogo na so hatudosan; Manangihon hata ni Debata jala pasidinghon angka sogo ni roha ni Debata. Alani i, lobi sian sinamotpoda dohot pangajaran na nidok ni hata ni Debata di turpuk on. Molo tangi di angka poda ndang tarbahen madabu tu angka ulaon na so hinalomohon ni Debata. I do umbahen ingkon tangihononhon do angka pangajarion i.

Unang sigurbak ulu. Ndang dihalomohon Debata angka sigurbak ulu, na so olo mula ulaon. Sigurbak ulu na mangulahon hata ni Debata ndang sahat tu tujuan ni ngoluna. godang do na pinarsinta ni rohana alai ndang adong sibahen na saut. Songon na tarsurat di Poda 24: 33 “Otiknari modom, otiknari mondokondok, otiknari muse mangunsimpu tangan peak modom. Hape dilehon Debata gogo, pingkirab dohot partingkian ingkon pangkeon ni jolma laho mangula ulaonna. Boha ma dapotan parngoluan molo holan hundulhundu, manang holan na maranganangan sambing. Angka na olo karejo do na dapotan sipanganon (2 Tesalonik 3: 10).

Angka na marnatoras dohot na marianakhon. Sude do natuatua marsintasintahon angka ianakhon asa berhasil jala hasea muse. Alai aha do kuncina, i ma marhie na olo tumangihon. I do umbahen didok, “Sai tangihon ma hata sipaingot jala jangkon pangajaran, asa gabe pistar ho di hasusuda ni bohalmu”. Marhite na pasangap natoras hombar tu hata/patik ni Debata. Sitangihonon do hata ni angka natuatua ai i do haroroan ni poda na denggan. Ndang adong natuatua mamodahon na so tingkos tu gellengna. Songon i ma nang angka ianakhon angka sioloi ajar ni natoras. Alai, angka natoras unang manggintali ianakhonna (memancing amarah). Alai pagodanggodanghon dibagasan ajar dohot poda ni Tuhan i (Ep. 6: 1-9). Manogunogu nasida hombar tu ajar ni Tuhan i. Asa turpuk on pe tangkas paingothon angka natoras asa tongtong manangianghon angka ianakhonna. Sahalak Bapak Gereja na tarbarita mandok, “Ndang mago ianakhon na sai tongtong tinangianghon”.

Jolma na manjanghon dohot mangulahon poda dapotan pasupasu. Mansai arga do poda i di hita. Ala marhite i do hita boi dapotan pangantusion dohot dalan laho marnida hinauli ni ngolu on. Alai poda na tingkos i ma poda na sian Debata. Godang parpoda haliluon na so pola ringkot tangihonon. Martua ma halak sioloi poda. Ai i ma sinjatana laho mangadopi hamaolon na masa di ngoluna. Alani ndang jadi tois roha di sipaingot dohot pangajaran ni angka natuatua. Lumboi tu angka sundut na umposo ringkot manangihon poda ni angka natoras. Jala angka natoras naeng ma nian gabe pangalapan ni poda dohot pangajarion. Ndang holan ripe mandokhon natoras tu ianakhonna alai ingkon natoras i sandiri do na jumolo mangulahonsa. Unang laos dipasombu angka ianakhon i mangulahon hagiothagiot ni dagingna, alai sipodaan do nasida. Hinorhon ni hamajuon ni jaman on, nunga masibahen lomona angka ianakhon, alai molo ganuo natoras paingothon ianakhonna tong do i boi mardenggan. Alani tangkas ma hita mangolu di bagasan poda na sian hata ni Debata ai sian i do ro angka pangajaran dohot poda na boi mamboan hita tu lomo ni roha ni Tuhan i,