Khotbah Filipi 4: 10 - 20 "Peduli Akan Kebutuhan Orang Lain"

Minggu 22 Set. Trinitatis; 17 Nopember 2019

4:10 Aku sangat bersukacita dalam Tuhan, bahwa akhirnya pikiranmu dan perasaanmu bertumbuh kembali untuk aku. Memang selalu ada perhatianmu, tetapi tidak ada kesempatan bagimu.

4:11 Kukatakan ini bukanlah karena kekurangan, sebab aku telah belajar mencukupkan diri dalam segala keadaan.

4:12 Aku tahu apa itu kekurangan dan aku tahu apa itu kelimpahan. Dalam segala hal dan dalam segala perkara tidak ada sesuatu yang merupakan rahasia bagiku; baik dalam hal kenyang, maupun dalam hal kelaparan, baik dalam hal kelimpahan maupun dalam hal kekurangan.

4:13 Segala perkara dapat kutanggung di dalam Dia yang memberi kekuatan kepadaku.

4:14 Namun baik juga perbuatanmu, bahwa kamu telah mengambil bagian dalam kesusahanku.

4:15 Kamu sendiri tahu juga, hai orang-orang Filipi; pada waktu aku baru mulai mengabarkan Injil, ketika aku berangkat dari Makedonia, tidak ada satu jemaat pun yang mengadakan perhitungan hutang dan piutang dengan aku selain dari pada kamu.

4:16 Karena di Tesalonika pun kamu telah satu dua kali mengirimkan bantuan kepadaku.

4:17 Tetapi yang kuutamakan bukanlah pemberian itu, melainkan buahnya, yang makin memperbesar keuntunganmu.

4:18 Kini aku telah menerima semua yang perlu dari padamu, malahan lebih dari pada itu. Aku berkelimpahan, karena aku telah menerima kirimanmu dari Epafroditus, suatu persembahan yang harum, suatu korban yang disukai dan yang berkenan kepada Allah.

4:19 Allahku akan memenuhi segala keperluanmu menurut kekayaan dan kemuliaan-Nya dalam Kristus Yesus.

4:20 Dimuliakanlah Allah dan Bapa kita selama-lamanya! Amin.

4:10 Alai tarhilas situtu do rohangku di bagasan Tuhan i, ala mangulahi tarida rohamuna sumarihon na ringkot di ahu. Tongtong do i nian rohamuna, alai holan tingkina do na so une.

4:11 Ndada ala na hurangan ahu, umbahen na hudok i; ai nunga huguruhon, mangkasonangkon na adong.

4:12 Huboto do marpangontik, huboto do marlobilobian; tongtong do somal ahu di saluhutna, nang bosur, nang rapar, nang marlobilobi, nang marnahurang.

4:13 Saluhutna do tarpatupa ahu marhitehite Ibana, na margogoihon ahu!

4:14 Alai tahe, denggan do pambahenmuna i; ai ditiroi hamu do haporsuhonku.

4:15 Alai diboto hamu halak Pilippi do, na so adong, dungkon ni hamu, huria na hubahen donganku mangetong hepeng na ro dohot na laho, olat ni mula ni pamaritahonki, di na borhat i ahu sian Makedonia.

4:16 Ai di Tessalonik dope ahu, nunga ditongos hamu na ringkot di ahu, sahali ro di dua hali.

4:17 Ndada silehonlehon i hulului parbue i do na hujalahi; na gabe singirmuna do i.

4:18 Alai sandok tuk do di ahu, marlobilobi gari adong; suksuk do di ahu, dung hujalo na tinongosmuna marhite sian si Epaproditus: Uap na hushus ma i, pelean halaean, halomoan ni roha ni Debata.

4:19 Alai gohan ni Debatangku do nasa na ringkot di hamu, hombar tu hamoraonna i di hasangapon i, di bagasan Kristus Jesus!

4:20 Alai hasangapon ma di Debata, Amanta i, ro di salelenglelengna! Amen.

Sude do jolma manghirim las ni roha dibagasan ngoluna. Molo adong jolma na so manghirim las ni roha, nunga tung ringkot sungkunon naung boha do hadirionna, atik naung adong do na pilit dibagasan rohana. Ala molo sehat dope pamatang nang roha, tontu hirimon dope las ni roha dibagasan ngoluna. Ringkot situtu do las ni roha i di ngolunta. Ai boi do jumpang hagogoon dohot hahipason molo las roha. Ai tangkas do disurathon di Poda 17: 22 “Roha na hilas manumpak hahisaron, alai anggo tondi na gondok pamalas holiholi”. Laos i do dihatindanghon angka pangubati, dipodahon nasida do asa las roha ni angka na niobatanna. Laos i do dijouhon apostel Paulus di surat Pipippi on. Pigapiga hali ditaringoti manang dijouhon apostel Paulus asa marlas ni roha, gariada tahe didok “Marlas ni roha ma hamu tongtong di bagasan Tuhan i”. Alai ndada holan tu ruas ni huria Pilippi na ringkot marlas ni roha. Hita pe sude ringkot do marlas ni roha. Sude do hita manghirim asa jumpang las ni roha di tongatonga ni ngolunta, keluarga, huria nang masyarakat pe. Ai molo nunga jumpang las ni roha, disi ma patar pasupasu ni Tuhan i. Ai pasupasu na godang i ma roha na sonang.

Godang jala marragam do na boi mambahen hita marlas ni roha, ala somalna sude do jolma marlas ni roha molo dapotan. Molo dapot na niluluan jala jumpang na jinalahan tontu las ma roha. Isarana las do roha ni angka partigatiga molo mangomo. Las do roha ni angka pangula molo denggan panen, dohot lan na asing muse. Saluhut do marlas ni roha molo dapotan. Alai adong do jolma na maol marlas ni roha hape nunga dapotan ibana, gariada tahe bahat situtu naung dijalo ibana pasupasu ni Tuhan. Maol ibana marlas ni roha mamuji Tuhan i hape nunga maralus tangiangna di jolo ni Tuhan i. Jolma si songon on patut sipahantuson. Alai na boi masa do pangalaho si songon i molo ndang bagas ditanda pambahenan dohot asi ni roha ni Tuhan i di ngolu nasida.

Di turpuk on tung tangkas do dipaboa aspotel Paulus las ni roha na, ala dapotan ibana. Ala dijalo parbue ni barita na uli naung disuanhon tu huria Pilippi jala parbue i marhapataran marhite roha na ra di nasida laho sumarihon angka na rigkot di ulaon panghobasion marbarita na uli. Nang pe baru jongjong huria i, alai nunga patar tarida parbue ni haporseaon ni huria Pilippi. Uju di Tessalonik dope apostel Paulus na ummotikna nunga dua hali ditongos nasida pangurupuion tu apostel Paulus. Uju tarhurung apostel Paulus di Rom di tongos huria i dope pangurupion marhite si Epaproditus. Tangkas do tarida parsitutuon ni huria Pilippi manarihon angka na ringkot di apostel i. Alai ndada holan silehonlehon i apostel Paulus marlas ni roha. Ndada tu si lehonlehon i tartuju roha ni apostel Paulus, songon na jotjot masa di hita halak Batak na mamboto pandohan “Pat ni manuk paturengreng, marrara mata mida hepeng”. Sipata humurang do las ni roha ni dba dongan mandohoti ulaon adat molo olopolop manang parsituak na tonggi na jinalo nasida otik, ndang songon na di roha na. Alani aha boi masa si songon i? Ala tu silehonlehon i tartuju roha na. Alai ndang songon i apostel Paulus. Alani i do umbahen didok apostel i, “Ndada ala na hurangan ahu umbahen na hudok i. Ai nunga huguruhon manghasonangkon na adong. Huboto do marpangontik ...” Alani i naeng tangkas di hita ndada silehonlehon i na gabe ojahan ni las ni roha ni apostel Paulus, alai ala denggan ni pambahenan nasida i do, ala marparbue barita nauli i di ngolu nasida gabe uli roha nang pambahenan nasida, tarlumobi tu apostel Paulus.

Ala ndada holan apostel Paulus na marlas ni roha. Ruas ni huria Pilippi pe tong do dibagasan las ni roha bolon, ala sahat ma tu nasida pandohan na mandok, “Martuaan do na mangalehon sian na manjalo (Ulaon ni Apostel 20: 35)”. Tutu las do roha molo dapotan manang manjalo alai tangkas do didok martuaan do na mangalehon sian na manjalo jala tangkas do nang i dipatorang di turpuk on. Ai didok, “Na gabe singirmuna do i (ay. 17)” huhut muse didok, “Uap na hushus ma i, pelean halaean do i (ay. 18)” jala tarlumobi didok do muse, “Gohan ni Debatangku do nasa na ringkot i di hamu, hombar tu hamoraonNa i di hasangapon i, dibagasan Kristus Jesus (ay. 19)”. Dohot hata na jempek naeng dohonon, dapotan pasupasu na godang do nasida sian Tuhan i. Dilehon nasida do silehonlehon tu naposo ni Debata alai ndang adong na moru manang hahurangan, gariada tahe gabe singir, paruntungan jala pasupasu marlompit ganda do i tu nasida. Ndang marharugian halak na ungkap rohana manarihon angka dongan na ringkot siurupan tarlumobi di angka ulaon marbarita na uli (pat. Parjamita 11: 1 “Padalan ma sagusagum tu bariba ni laut, ai di laonlaon ni ari dapot ho do i marbunga”. Masa ma las ni roha tarlumobi tu huria Pilippi, ndada ala dapotan/manjalo alai ala mangalehon, marbasabasahon, manarihon angka na ringkot di ulaon pararathon barita na uli. Asa marhite i jumpang jala marhapataran ma tutu di ngolu nasida pandohan i, “Martuaan do na mangalehon sian na manjalo”.

Laos i ma nian na ingkon sihangoluhonon ni ruas ni Huria di partingkian si nuaeng on. Tutu las do roha molo dapotan/manjalo, alai dao sumurung las ni rohanta molo tubu roha na ra mangalehon jala marpanarihon tu dongan jolma, tarlumobi marpanarihon tu ulaon pararathon barita nauli. Ndang holan las ni roha jumpang hita disi, alai lobi sian i do, i ma ngolu na tarpasupasu di jolo ni Tuhan i. Songon na masa tu sahalak ina na mabalu di Sarfat na olo mangurupi jala manarihon ngolu ni panurirang Elia, ndang hahurangan ibana, gariada lam martamba-tamba pasupasu dapot ni inanta i.