Khotbah Habakuk 3: 1 - 6 "Allah Yang Agung Akan Menghakimi Bangsa-Bangsa

Minggu Akhir Tahun Gerejawi; 24 Nopember 2019

3:1 Doa nabi Habakuk. Menurut nada ratapan.

3:2 TUHAN, telah kudengar kabar tentang Engkau, dan pekerjaan-Mu, ya TUHAN, kutakuti! Hidupkanlah itu dalam lintasan tahun, nyatakanlah itu dalam lintasan tahun; dalam murka ingatlah akan kasih sayang!

3:3 Allah datang dari negeri Téman dan Yang Mahakudus dari pegunungan Paran. Sela Keagungan-Nya menutupi segenap langit, dan bumi pun penuh dengan pujian kepada-Nya.

3:4 Ada kilauan seperti cahaya, sinar cahaya dari sisi-Nya dan di situlah terselubung kekuatan-Nya.

3:5 Mendahului-Nya berjalan penyakit sampar dan demam mengikuti jejak-Nya.

3:6 Ia berdiri, maka bumi dibuat-Nya bergoyang; Ia melihat berkeliling, maka bangsa-bangsa dibuat-Nya melompat terkejut, hancur gunung-gunung yang ada sejak purba, merendah bukit-bukit yang berabad-abad; itulah perjalanan-Nya berabad-abad.

3:1 On ma tangiang ni panurirang Habakuk, marlogu andung.

3:2 Ale Jahowa, nunga hubege baritam, gabe mabiar ahu. Ale Jahowa, sai ulahi ma pangolu ulaonmu di parsitongaan ni angka taon, di parsitongaan ni angka taon ma i tutu pabotohon! Sai marningot ma ho di asi ni roha, nang di bagasan rimas.

3:3 Na ro sian Teman do Debata, jala na sun badia i sian dolok Elaparan Sela. Hamuliaonna mangkuphupi angka langit, jala gok pujipujianna do tano on.

3:4 Ia sondangna songon tiur ni mata ni ari do, pansar sian tanganna do angka sondangna, parhitean ni hagogoonna.

3:5 Di jolona mardalan begu siherut, jala mangihut tu ibana do begu na rahat.

3:6 Jongjong do ibana manatap manonggor tu tano on gabe marserak angka bangso parbegu, gabe marigat angka dolok sian na robi, jala marongrong angka 

Minggu sadarion i ma ujung taon parhuriaon dohot parningotan di angka na monding. Alani ringkot situtu do tasungkun dirinta, songon dia ngolu haporseaonta dohot parsaoranta sataon bolon on. Ra, godang do si las ni roha, parsaulian nang ragam ni pasupasu naung tajalo alai ra laos adong do nang siparungkilhononta, sintasinta na so dapot dope. Alai, dia pe angka naung tabolus i, naeng songon panurirang Habakuk hita unduk marsomba dohot martangiang tu Debata Jahowa siala saluhut na masa ni adopanna. Tongtong diingot huaso, hagogoon dohot asi ni roha ni Debata tu bangsoNa uju dipalua Ibana nasida sian ragam ni hamaolon, hasusaan dohot parhatobanon. Tandi do tangiang ni panurirang Habakuk on sian barita naung pinatolhasna di bindu 1 – 2. Tangiang na i marrumanghon ende (pat. Panguhum 5: 5 Musa 33; Psalmen 77: 17-20). Alai molo tapamanat tu panurirangionna di bindu 1, boi tadok hira alus do bindu 3 on, na gabe pasingkophon barita na adong di bindu 1 dohot 2. Habakuk 3 on somal do diendehon di bagas joro di Jerusalem di bona ni taon. Marpungu do di joro i raja rap dohot sude bangso i laho pasangaphon huaso dohot sahala ni Debata sitompa saluhut portibi on huhut mangido pangaramotonNa na gok haluaon i.

Dibuha panurirang i do tangiangna marrumang ende patuduhon parsaoran na rosu tu Debata huhut dipangdo asa hot pambahenanNa mian di tongantonga nasida manipat taon. Dipaboa do biar ni rohana dung tangkas dibege barita na binahenNa di ari na salpu tu bangso i. Panandaon na tangkas di pambahenan ni Debata, i ma rimas dohot asi ni roha, i do na mambahen panurirang i mabiar. Alai ringkot do antusanta hata mabiar dison, ndada ala na marsala ibana umbahen mabiar manang ala godang hahuranganna dohot dosa na niulana. Hata mabiar martudutudu tu habuluson ni roha dohot haburjuon mangoloi Debata nionjar ni haporseaon na polin. Asa parange na mabiar mida Jahowa do ojahan ni haporseaon tu Jahowa. Molo ndang adong biar ni jolma tu Debata, haporseaonna pe ndang boi tangkas idaon dohot hatindanghonon. Ro sian panandaion na mabiar i do si Habakuk marpanghirimon, Jahowa tongtong manondangi bangso i dibagasan asi ni rohaNa jala patupahon paruhuman tu angka musu nasida songon na masa di ari na salpu. Angkup ni i dipangido do nang denggan basa ni Debata singkop mian di panrngoluannasida dibagasan hadameon, hademahon dohot habadiaon ni paruhumanNa.

Dihatindanghon tangiang ni panurirang Habakuk do huaso dohot habalgaon ni Jahowa. Nunga tarida i marhite haluaon ni bangso Israel sian parhatobanon Misir, jala huaso dohot habalgaonNa i do na tong patar nang nuaeng di angka na porsea di Ibana. Dipabotohon do, ia haroroNa sian Teman laho paluahon bangsoNa. Hamuliaon ni Jahowa manghuphupi angka langit jala gok pujipujianNa do tano on. Huaso dohot habalgaon ni Debata ndang holan di sada partingkian dohot di sada inganan, alai di sandok tano on. Panurirangion ni si Habakuk on taringot inganan haroro ni Jahowa, i ma Teman dangsina (selatan), secara geografis martudu tu Betlehem, inganan hatubuan ni Jesus. Asa ndang holan manudu inganan haroroan na paluahon Israel sian Misir alai dohot do nang saluhut siihuthon Jesus Kristus. Haluaon parjolo sian parhatobanon ni bangsa na gogo i jala haluaon na paduahon i ma sian parhatobanon ni dosa na jorbut i. Molo tapaihutihut tangiang ni panurirang Habakuk on, tung tangkas do tarida panindangionna taringot tu hadirion ni Jahowa. Huaso dohot hagogoonNa na mangatasi saluhut dibaritahon marhite tangiang i. Panandaon na tangkas tu Debata, i do na patubu biar di ibana maradophon Jahowa. Alani i, mansai ringkot guruhononta sian turpuk jamita on:

Parjolo, mananda huaso dohot gogo ni Debata na masa di ari na salpu. Haporseaon na hot tu Ibana, i do paposhon roha mangadopi ragam na masa di ari na naeng ro. Molo pe tabolus na hansit, na porsuk dohot ragam ni hangaluton di ari naung salpu, unang lupa hita marningot asi ni roha ni Debata na tuk pangoluhon dohot paluahon na hinophopNa. Asa marhite i unang lalap jolma i holan marningot na bernitdi ngoluna.

Paduahon, ise do Debata di ngolunta? Di tangiang ni panurirang Habakuk di dok, na ro sian Teman do Debata jala na sun badia di dolok Elaparan. Dihatindanghon panurirang Habakuk do Debata songon sada pahlawan, jala didok muse hamuliaonNa manghuphupi angka langit jala gok pujipujianNa do tano on. Ndang holan panurirang i na manghatindanghon hamuliaon ni Jahowa na songon i, si Job nunga dihantindanghon ibana hamuliaon ni Jahowa na manghuphupi sandok langit dohot tano on. Na gabe sungkun sungkun dihita, songon dia ma panindangionta taringot tu Debata naung pamasa ragam parsorion na sailaon?

Patoluhon, aha do dipatupa Debata di ngolunta? Pandohan di ay. 5 na mandok begu siherut dohot begu sirahat (bahasa Indonesia: sakit sampar dan demam) i ma dua sahit na tung mansai dihabiari jolma di partingkian ni panurirang i jala manudu haroro ni huaso ni Jahowa. Dijoloani dua panahit do haroro ni Jahowa, alani i do tung mansai biar do hatihai nasida molo ro Jahowa. Angkup ni i adong dope na manjoloani haroro ni Debata, i ma marhite na marigat dohot marongrong angka dolok. Hata on paingothon hita tu partingkian ari panompaon ni tano on, di na ditompa langit dohot tano on sian na tarulang dohot halongonan gabe inganan na uli di jalomaon. Debata do na pademakhon angka na guntur dohot na gaor i.

Na tolu hatorangan taringot tu hadirion ni Debata on ma jamita di hita di ari parningotan ni na monding sadari on. Ndang tagamon adong sian hita na tung masai lungun panghilalaanna maringot ari parsirangan sian angka na hinaholonganna. Ra, adong sian hita na maheu jala gondok rohana marningot parsaoran tu angka naung parjolo monding i. Lungun tahilala ala taingot haulion naung salpu, ndang boi mulak be las ni roha rap dohot nasida naung marujung ngolu i. Jamita on mandok tu hita asa tongtong dibagasan tangiang hita mangido tu Ibana huhut asa mangulahi mangolu ulaon ni Debata di angka taon na tabolus. Boi do jolma mangandung dibagasan tangiangna songon si Habakuk alai unang madabu tu pandelean hira na so marpanghirimon. Unang olo hita mangasahon gogonta sandiri. Taingot ma, na gok huaso dohot gogo ni Debata do saluhut portibi on. Sondang ni hamuliaon ni Jahowa ma na patiurhon ngolunta mamolus ari dohot taon parhuriaon na imbaru, simasuhanta sian ari minggu sadari on sahat ro di ujung ni ngolunta.