Khotbah Yesaya 40: 1-8 "Persiapkanlah Jalan Untuk Tuhan"

Minggu Advent I; 01 Desember 2019

40:1 Hiburkanlah, hiburkanlah umat-Ku, demikian firman Allahmu,

40:2 tenangkanlah hati Yerusalem dan serukanlah kepadanya, bahwa perhambaannya sudah berakhir, bahwa kesalahannya telah diampuni, sebab ia telah menerima hukuman dari tangan TUHAN dua kali lipat karena segala dosanya.

40:3 Ada suara yang berseru-seru: "Persiapkanlah di padang gurun jalan untuk TUHAN, luruskanlah di padang belantara jalan raya bagi Allah kita!

40:4 Setiap lembah harus ditutup, dan setiap gunung dan bukit diratakan; tanah yang berbukit-bukit harus menjadi tanah yang rata, dan tanah yang berlekuk-lekuk menjadi dataran;

40:5 maka kemuliaan TUHAN akan dinyatakan dan seluruh umat manusia akan melihatnya bersama-sama; sungguh, TUHAN sendiri telah mengatakannya."

40:6 Ada suara yang berkata: "Berserulah!" Jawabku: "Apakah yang harus kuserukan?" "Seluruh umat manusia adalah seperti rumput dan semua semaraknya seperti bunga di padang.

40:7 Rumput menjadi kering, bunga menjadi layu, apabila TUHAN menghembusnya dengan nafas-Nya. Sesungguhnyalah bangsa itu seperti rumput.

40:8 Rumput menjadi kering, bunga menjadi layu, tetapi firman Allah kita tetap untuk selama-lamanya."

40:1 Apuli, apuli hamu bangsongki, ninna Debatamuna.

40:2 * Hata apulapul ma dok hamu tu roha ni isi ni Jerusalem, jala jouhon hamu ma tu nasida: Nunga marujung parungkilonna, ai nunga salese dosana i, ai nunga dijalo sian tangan ni Jahowa * silompit dua singkat ni saluhut dosana.

40:3 Soara ni na joujou di halongonan: Pauli hamu dalan di Jahowa; patigor hamu di adaran dalan balobung di Debatanta.

40:4 Ingkon gohan do nasa rura, jala parejeton nasa dolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok.

40:5 Jadi patar ma hamuliaon ni Jahowa, jala sange nasa sibuk marnidasa, ai pamangan ni Jahowa do mandok.

40:6 Adong sada soara na mandok: Joujou ma ho! Jadi dohononna ma: Aha do Jouhononku? * Duhutduhut do nasa sibuk, jala doshon bunga pansur hinadengganna i sudena.

40:7 Nunga malos duhutduhut i, nunga marurus bunga i, ai nunga mangombus Tondi ni Jahowa tusi. Tongon tahe duhutduhut do bangso i.

40:8 Nunga malos duhutduhut i, nunga marurus bunga i, alai anggo * hata ni Debatanta sai hot do ro di salelenglelengna.

Sada pangajarion do turpuk on di tongatonga ni parsaoran ni bangso Israel na tongon tarbuang di Babel. Tontu ndang di bagas joro dipatupa pangajarion on, ala hatiha i di habuangan do nasida jala bagas joro pe nunga malengse. Antong didia do dipatupa pangajarion on?  Di tongatonga ni sihatoropan uju marpungu nasida. Dibonai do turpuk on dohot pandohan, apuli, apuli hamu bangsongki. Pandohan na mansai arga do hatiha i, marpardomuan tu pangalaho masa na sonson ni adopannasida, i ma habuangan. Alai mansai maol do pandohan i dijalo nasida. Ai ndang adong na humansit sian ruang ni ngolu na tongon marsak siala dibuat na mambuat na ummarga sian ngoluna soada alana. On ma hamaolon siadopan ni sahalak panurirang. Alai ala na dibagasan Goar ni Debata do ibana mangulahon i, margogo do ibana. Debata do dipangasahon, ndada dirina sandiri. Antong, aha ma hata apulapul i? Mansai tangkas didok di ayat 2: Nunga marujung parungkilon i; nunga salese dosana i; nunga dijalo sian tangan ni Jahowa silompit dua singkat ni saluhut dosana.

Apulapul na sumurung tu bangso Israel na tongon tarbuang i ma haradeon dohot haroro ni Debata pauahon nasida sian habuangan i. I ma barita na uli di nasida. Di ombas na ro do Debata paluahon nasida sian habuangan i, mamboan nasida mulak tu Jerusalem. Di hamumulak nasida sian habuangan i, di si ma marujung parungkilonnasida. Laho patandaphon barita na uli on, dipaingot muse bangso Israel di sibonsiri ni habuangan i. Lapatanna, ingkon sintong do dilapati nasida habuangan i. Habuangan ndada dalan ni Debata laho mangalengsehon nasida, sai hira na so adong be panghirimon ni hajongjongan songon sada bangso. Sabalikna, habuangan i ma dalan ni Debata laho mangajari nasida anggiat mulak tu dalan na sintong, dalan lomo ni roha ni Debata. Alani i, di haradeon ni Debata mamboan nasida ruar sian habuangan i laos huhut do i marlapatan haradeon ni Debata manesa dosanasida. I do umbahen didok, “Nunga salese dosana i”.  Laos dos pangalapation ni pandohan na mangihut, “Nunga dijalo sian tangan ni Jahowa silompit dua singkat ni saluhut dosana”. Debata do na pasonggophon habuangan i jala Debata do muse na paluahonsa. Angkup ni i, jaloonnasida ma pasupasu ni Debata dao umbalga sian uhuman na sailaon.

Haroro ni Debata di turpuk on dirajumi Israel do i hagogonop ni padan ni Debata dohot nasida di haroro ni Mesias Sipalua i. Di na ro Mesias Sipalua i, antong aha ma sihobasan? Di ayat 2-3 didok: “Pauli hamu dalan ni Jahowa”. Joujou na laos paboahon barita na uli tu tongatonga ni sihatoropan hatiha i songon na dipaandar di ayat 23 on di pardalanan ni bangso Israel sahat tu Padan Naimbaru tongtong do marsaringar gabe sada hatandian nasida. Joujou on do muse na dibaritahon si Johannes di Padan Naimbaru. Aha ma muse sihobasan nasida? Di ayat 6-8 tangkas dipaandar dua rumang ni ngolu na ingkon sahatopna hobasan nasida, i ma: Panandaon na tangkas di hadirion ni hajolmaon songon na tinompa ni Debata. I do umbahen didok di ayat 6, “Duhutduhut do nasa sibuk, jala doshon bunga pansur hinadengganna i sudena”. Pandohan on naeng paingothon saluhut bangso Israel dohot saluhut jolma paboa ngolu na dipasahat Debata tu ganup jolma di hasiangan on parsatongkinan do i. Alani i, unang ma lalap holan di ngolu parsatongkinan i. Ala parsatongkinan do ngolu di hasiangan on, maporus ma hita tu na hot salelengna i ma hata ni Debata. Asa hata ni Debata ma parsigantunganta.

Turpuk Evangelium on mangalehon alus jala na laos disoarahon di topik minggu: Parade ma dalan ni Jahowa. Ala Raja na naeng ro i naeng bongot tu ngolunta dohot tu rohanta, alani i sude ma taparade. Asa dalan na nidokna na di hita nuaeng i ma paradehon sude totalitas ni ngolunta dohot parade rohanta gabe inganan hasorangan ni Jesus. I se do Tuhan na tapaimaima i? Di Padan Narobi didok “Mesias” dipadas tu hata “Kristus” di Padan Naimbaru. Na dua hata on, i ma Mesias dohot Kristus marlapatan ma i, “Na miniahan”. Di tradisi ni bangso Israel  na di Padan Narobi jala dipahembang nang di Padan Naimbaru, mamiahi sasahalak marlapatan do i paborhathonsa tu sada ulaon. Antong, aha ulaon ni Mesias na tapaimaima i? Paluahon saluhut jolma pardosa na porsea di Ibana. Gabe Sipalua do Ibana. Las ma rohanta manomunomu haroro ni Sipalua, asa marhite sian i partohap hita di harajaonNa.

Dalan dia do sipaulionta di Jahowa? Hata “Dalan” di son mansai bagas do naeng dohononna. Digombarhon pandohan i do ngolu ni jolma na tongon di pardalanan, manang ngolu ni jolma na bongot tu sada uduran manuju sada tujuan. Alani i ma ingkon disulingkit, uduran na songon dia do nuaeng naung nidohotan ni ruas ni huria. Adong tolu rumang ni uduran i, hita ma marnida tongon di uduran dia hita nuaeng mardalan. Massa Damnata, i ma uduran ni angka na marsonang-sonang di portibi on paihutihut bangkobangko haportibi on dohot hisaphisap pardagingon , alai so pamotoan nasida uduran on sasintongna i ma uduran manuju hamagoan. Massa Doloriae, i ma uduran ni na tongon marungkil mangadopi pangalaho masa na sonson jala mardapotdapot di ngoluna. Massa Gloriae, i ma uduran ni naung manghamonangkon parungkilon i jala manuju tu sambulo ni ngolu ni angka na porsea, i ma surgo hasonangan i. Di mingguminggu Advent on tung padasip ma pardalanan ni ngolunta. Tapastihon ma, parsidohot hita di uduran ni Massa Gloriae i. Tutu do mangadopi ragam ni hamaolon do hita nuaeng di saluhut pardalanan ni ngolunta, alai nunga tahamonanghon i siala panghirimon na gara di haroro ni Jesus Sipalua i.