Khotbah Keluaran 17: 1-7 "Kasih Setia Allah Pada UmatNya"

Minggu Reminiscere; 8 Maret 2020

17:1 Kemudian berangkatlah segenap jemaah Israel dari padang gurun Sin, berjalan dari tempat persinggahan ke tempat persinggahan, sesuai dengan titah TUHAN, lalu berkemahlah mereka di Rafidim, tetapi di sana tidak ada air untuk diminum bangsa itu.

17:2 Jadi mulailah mereka itu bertengkar dengan Musa, kata mereka: "Berikanlah air kepada kami, supaya kami dapat minum." Tetapi Musa berkata kepada mereka: "Mengapakah kamu bertengkar dengan aku? Mengapakah kamu mencobai TUHAN?"

17:3 Hauslah bangsa itu akan air di sana; bersungut-sungutlah bangsa itu kepada Musa dan berkata: "Mengapa pula engkau memimpin kami keluar dari Mesir, untuk membunuh kami, anak-anak kami dan ternak kami dengan kehausan?"

17:4 Lalu berseru-serulah Musa kepada TUHAN, katanya: "Apakah yang akan kulakukan kepada bangsa ini? Sebentar lagi mereka akan melempari aku dengan batu!"

17:5 Berfirmanlah TUHAN kepada Musa: "Berjalanlah di depan bangsa itu dan bawalah beserta engkau beberapa orang dari antara para tua-tua Israel; bawalah juga di tanganmu tongkatmu yang kaupakai memukul sungai Nil dan pergilah.

17:6 Maka Aku akan berdiri di sana di depanmu di atas gunung batu di Horeb; haruslah kaupukul gunung batu itu dan dari dalamnya akan keluar air, sehingga bangsa itu dapat minum." Demikianlah diperbuat Musa di depan mata tua-tua Israel.

17:7 Dinamailah tempat itu Masa dan Meriba, oleh karena orang Israel telah bertengkar dan oleh karena mereka telah mencobai TUHAN dengan mengatakan: "Adakah TUHAN di tengah-tengah kita atau tidak?"

17:1 Dung i borhat ma sandok luhutan ni halak Israel sian halongonan Sin, marguru tu pandokkon ni Jahowa pardalanonnasida i, gabe marsaro nasida di Rapidim; alai ndang adong aek siinumon ni bangso i disi.

17:2 Jadi dibadai bangso i ma si Musa, angka didok ma: Lehon hamu aek siinumonnami! Jadi didok si Musa ma tu nasida: Boasa ahu badaanmuna? Boasa unjunanmuna Jahowa?

17:3 Alai uasan di aek bangso i disi, gabe marmungutmungut nasida dompak si Musa, didok ma: Boasa tung paruaronmu hami sian Misir laho mambunu hami dohot anakkonnami ro di pinahannami dibahen uas?

17:4 Jadi mangangguhi ma si Musa tu Jahowa, ninna ma: Aha ma bahenonku tu bangso on? Otik nari dangguronnasida ma ahu dohot batu.

17:5 Jadi didok Jahowa ma tu si Musa: Bolus ma sian jolo ni bangso i, jala arahon deba sian angka sintua ni Israel bahen donganmu, jala boan ma tungkotmu, na nilipathonmu tu batang aek i, dung i laho ma ho.

17:6 Ida ma, jongjong ma Ahu disi di jolom di atas ni sada dolok batu di Horeb, lipati ma dolok batu i, gabe ruar ma sian i aek siinumon ni bangso i. Jadi dibahen si Musa ma songon i di adopan ni angka sintua ni Israel.

17:7 Jadi dibahen ma goar ni hajongjongan i Massa (pangunjunan) dohot Meriba (parbadaan), ala ni bada ni halak Israel, jala ala ni niunjunannasida Jahowa, na nidokna i: Di tongatonganta ulaning do Jahowa manang ndang?

Ndang tarsirang ngolu ni jolma sian aek, alani i do ndang leleng hita mangolu molo so adong aek. Di halak Batak, aek do sada simbol na arga, alai dipatuduhon aek i do hatioon (kejernihan), alani do umbahen digoari aek sitiotio. alai atik pe songon i donok ni ngolu ni hita jolma tu aek, ndang tarsirang ngolunta sian aek, alai adong dope na umbalga jala na rumingkot na so boi sirangon, i ma na so tarsirang ngolunta sian asi ni roha ni Debata, manontong do asi ni roha ni Debata di hita angka na hinongkopNa. Suang songon i do nang di bangso Israel na dipardalanan sian Misir, tontu mansai ringkot do aek di nasida, alani do asa marungutungut nasida tu si Musa ala so adong aek hatiha i. Ndang on be partingkian na parjolo hurangan aek siinumon halak Israel. Andorang so bindu 17 on nunga hurangan aek nasida di bindu 15. Molo uju i di Mara adong aek, alai ndang boi inumon alani paetna (2 Musa 15: 24), di bindu 17 on laos so adong jumpang nasida aek. Alani atik pe songon i tong do didatdati nasida marungutungut. Songon i do nang di bindu 16, ala so adong sipanganon ni nasida tong nasida marungutungut. Boi dohonon hira bangko nama di nasida pangalaho na sai marungutungut on. Marulakulak dijalo nasida halongangan sian Debata, alai marulakulak do nang ungutungut nasida maradophon si Musa dohot Debata.

Ganup do hita hea mambege “Pengalaman adalah guru yang terbaik”. Ndang asong guru na dumenggan sian angka na taalami sandiri. Tutu do ndang di sude luat adong dapotan aek na denggan laho inumon, lumobi ma di angka dolok dohot halongonan (padang gurun), na maol situtu do luluan aek na songon on. Alai nunga pigapiga hali diaalami nasida halongangan laho paluahon nasida, alai tong dope ndang pos roha ndohot haporseaon asida. Marningot asi ni roha dohot balga ni pambahenan ni Debata di tingki paet siinumon nasida di bindu 15, dohot na so adong sipanganon nasida di bindu 16, ingkon lam ganda ma nian pos ni roha nasida mangadopi siinumon na soada di bindu 17 on. Alai baliksa do na masa, madabu do nasida tu lomos ni roha. Pangunjunan na umbalga na mamboan torop jolma madabu tu bagasan dosa i ma lupa di asi ni roha ni Debata, lupa di huaso ni Debata. Pola usouso nasida di rohana, “di tongatonganta ulaning do Jahowa manang ndang” (ay. 7).

Molo taida sian isi ni ungutungut nasida i, suman do nasda tu halak na tongon dibagasan rasa kecewa na mansai borat. Pola dipatudos nasida tu Misir, “Boasa tung paruaronmu hami sian Misir laho mambunu hami dohot anakkonnami ro di pinahannami dibahen uas”? Disolsoli nasida si Musa na mamboan nasida ruar sian Misir. Jala si Musa do dietong nasida na mamboan nasida tu hamatean, na mamboan nasida ruar sian Misir, ndada Jahowa. Jala dietong nasida naung ditadingkon Jahowa do si Musa. Asa dompak si Musa ma sude diusehon nasida rasa kecewa nasida i. Ise do martanggungjawab taringot tu ngolu nasida. Dirajumi nasida na mamboan tu hamatean do si Musa umbahen diparuar nasida sian Misir. Nian, bangkona do i di angka halak na di pardalanan isarani na mardalan di halongonan mura do songgop biar dohot pandelelan, sanga masa hamaolon manigor dietong do i dalan manopot hamatean. Lam marasing do sikap nasida sian bindu 16 tu bindu 17 on. Alani rimasna otik nari hian naeng dangguron nasida ma si Musa dohot batu (ay. 4). Jala di 2 Musa 1 Debata sandiri do na langsung mangalusi ungutungut nasida, alai molo di bindu 17 on si Musa sandiri do parjolo mangalusi. Molo taida sian pambahenan ni bangso on, hatop situtu do bangso on menyerang si Musa, alai sabalikna, lambat situtu nasida laho mandok mauliate tu Debata nang tu donganna jolma pe. Sipata boi do hita bongot tu inganan manang situasi manang tu keadaan na so siat dirohanta. Di situasi na songon on, sada do hinsu na ingkon tioponta, unang madabu hita tu burabura dohot pandelean, unang lupa di asi ni roha ni Debata.

Sada sitiruon sian si Musa on ganup mangadopi hamaolon, sai jumolo do diboan ibana hamaolon i tu jolo ni Jahowa (ay. 4). Jala na menarik situtu do sungkunsungkun ni si Musa di turpuk on, Aha ma bahenonku tu bangso on? Di situasi na gogot i ndang didok ibana “aha ma bahenonMu tu bangso on? Manang “aha do naung dibahen Ho tu bangso on? manang “hahuaonMu ma bangso on? Ndang adong jumpang ibana hasalaan di Tuhan i atik pe songon i pangalaho ni bangso i, sabalikna dirina do dipangido ibana laho mangulahonsa. Toho do ns nidokna di 4 Musa 12: 3 “alai jolma na mardangol situtu do si Musa, gabe lumambok ibana sian saluhut jolma na di atas tano on”. jadi didok Jahowa ma tu si Musa : “Bolus ma sian jolo ni bangso i, jala arahon deba sian angka sintua ni Israel bahen donganmu, jala boan ma tungkotmu, na nilipathonmu tu batang aek i, dung i laho ma ho” (ay. 5). Songon na masa di tingki na salpu, diparentahon Jahowa do taringot tu tungkot i. Torop do angka na bisuk mandok, tungkot na di 2 Musa 7: 20 i do na nidok ni turpuk on. Alani i naeng dohononna marhite tungkot na sarupa masa hamatean (2 Musa 7), jala ruar aek hangoluan (2 Musa 17). Dung i didok Jahowa, “Ida ma, jongjong ma Ahu disi di jolom di atas ni sada dolok batu di Horeb, lipati ma dolok batu i, gabe ruar ma sian i aek siinumon ni bangso i. Jadi dibahen si Musa ma songon i di adopan ni angka sintua ni Israel (ay. 6)”. Tuhan i do na paradehon singkop sude na sinangkapan ni rohaNa.

Dolok tungil na hasang jala na mahiang do dolok on, alai boi masa halongangan bolon ruar aek siinumon ni bangso i sian batu di dolok na mahiang i. Tangkas situtu do pamilliton ni Debata on laho patuduhon asi ni rohaNa na bolon i. Asa ndada holan halongangan na masa uju i, alai dohot do hasosombu ni uas di gohi Debata. Gari sian batu na porngis i boi diparuar Debata aek na tio di adopan ni angka sintua ni Israel i do na masa i. Lapatanna na boi nalnal idaon ni simalolong parduru i. Ndang adong na buni jala na lipe sian na masa i. Ndang marsibuni Debata laho patupahon asi ni rohaNa. Dibahen ma goar ni hajongjongan i Masa (Pangunjunan) dohot Meriba (Parbadaan, ay.7). boi dohonon jarang do dibahen dua goar ni sada inganan. Pangunjunan dohot parbadaan. Patudu na humurang do goar i alai parningotan ma i di asi ni roha ni Debata na manontong i. Uju usouso nasida, “di tongatonganta ulaning do Jahowa manang ndang?” Turpuk on ma na gabe alus, di tongatonganta do Ibana.