Khotbah Matius 5: 1-12 "Orang Yang Berbahagia Menurut Yesus"

Minggu 4 Set. Epiphanias

5:1 Ketika Yesus melihat orang banyak itu, naiklah Ia ke atas bukit dan setelah Ia duduk, datanglah murid-murid-Nya kepada-Nya.

5:2 Maka Yesus pun mulai berbicara dan mengajar mereka, kata-Nya:

5:3 "Berbahagialah orang yang miskin di hadapan Allah, karena merekalah yang empunya Kerajaan Sorga.

5:4 Berbahagialah orang yang berdukacita, karena mereka akan dihibur.

5:5 Berbahagialah orang yang lemah lembut, karena mereka akan memiliki bumi.

5:6 Berbahagialah orang yang lapar dan haus akan kebenaran, karena mereka akan dipuaskan.

5:7 Berbahagialah orang yang murah hatinya, karena mereka akan beroleh kemurahan.

5:8 Berbahagialah orang yang suci hatinya, karena mereka akan melihat Allah.

5:9 Berbahagialah orang yang membawa damai, karena mereka akan disebut anak-anak Allah.

5:10 Berbahagialah orang yang dianiaya oleh sebab kebenaran, karena merekalah yang empunya Kerajaan Sorga.

5:11 Berbahagialah kamu, jika karena Aku kamu dicela dan dianiaya dan kepadamu difitnahkan segala yang jahat.

5:12 Bersukacita dan bergembiralah, karena upahmu besar di sorga, sebab demikian juga telah dianiaya nabi-nabi yang sebelum kamu."

5:1 Asa dung diida Jesus halak na sai torop i, nangkok ma Ibana tu sada tor jadi hundul ma disi; dung i didapothon angka siseanna ma Ibana.

5:2 Dung i marsoara ma Ibana mangajari nasida, ninna ma:

5:3 Martua ma na pogos tondi, ai di nasida do harajaon banua ginjang i!

5:4 Martua ma na marsak roha, ai siapulon do nasida!

5:5 Martua ma na lambok roha, ai teanonnasida do tano on!

5:6 Martua ma na mauas male mida hatigoran, ai sipabosuron do nasida!

5:7 Martua ma na asi roha, ai siasian do nasida!

5:8 Martua ma parroha na ias, ai idaonasida do Debata!

5:9 Martua ma sibahen dame, ai goaron do nasida anak ni Debata!

5:10 Martua ma na pinaburuburu ni halak ala ni hatigoran, ai di nasida do harajaon banua ginjang i!

5:11 Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu!

5:12 Las ma rohamuna jala marolopolop, ai godang do umpamuna di banua ginjang i, ai songon i do dipaburuburu angka panurirang na jumolo sian hamu.

Sude do halak manghirim las ni roha di ngoluna. Ndang adong halak sian roha parbagasan mangalului hasusaan. Ngolu dibagasan hasonangan, i do diparsinta jolma di ngoluna. Jala ragam do dipatupa jolma laho mangalului dohot mangeahi hasonangan. Molo ditoropan halak Batak, adong do tolu dalan na dihirim boi mambahen las rohana. Molo mamora, dihirim do las ma roha. Alani i, tung dihalojahon halak Batak do na mangalului arta, mangula torus sian manogot sahat tu borngin, pola ndang diboto samban, ditinggang udan las ni ari torus dipukpuhi dagingna. Diantusi nasida do slogan “time is money” gabe sosososo tu torop halak asa mangalului arta, gabe sipata ndang ringkot na marsaor tu dongan, tu keluarga, nang marsaor dohot Tuhan i pe hira hurang ringkot ala ringkot ni na karejo. Hape ia dung dapot arta, las do roha? Deba! Alai di na deba, dung mamora gabe tubu do ragam hasusaan dohot angka parsualan. Tarlumobi molo taloas hamoraon i manirang hita sian keluarga dohot dongan. Alani i ringkot tasadari, arta ndang boi gabe ojahan na sintong laho mangalului las ni roha. Molo gabe, dihirim do las ma roha. Molo titir maranak, titir maeboru, marpahompu, marnini marnono, las ma rohanta. I do na tahirim. Alani tung dihalojahon halak Batak do asa tamba pomparanna, disuru ma mangoli/marhaulian. Molo songon na lambat, dihudus, didatdati mandok asa marhasohotan, pola adong na patohotohohon, manang pola adong na mardatu mangalului parmanisan (pelet) dohot padaohon hangalan, asa pintor hatop ro sirongkap ni tondina. Dung ro las do roha? Deba. Alai sipata na ro i gabe dongan marbada do. Dung marhasohotan tahirim do asa marhagabeon, asa dililiti andorna, asa marurat tu toru mardangka tu ginjang. Molo ro sibasabasa i, las do rohanta? Boi. Alai deba gabe parungkilon do. Ai holan na mangalo, maol aturon, patubu arsak. Ala ni i huhut naeng ringkot tasadari hagabeon ndang boi gabe ojahan na sintong laho mangalului las ni roha. Boha do asa las rohanta? Molo sangap hita, dihormati, ditangihon halak hatanta, las ma rohanta. Boi. Alai, sipata boi do tong marsak hita. Halak do manangihon/pasangap hita, haoe gellengta i, ndang ditangihon hita. Gabe maniak do tahilala. Manang, dijolonta do hita diparsangapi alai dipudi dibursikkon do hita, ala hasangapon na pinaksa do. Alani i tong do ma ringkot tasadari, hasangapon ndang boi gabe ojahan na sintong laho mangalului las ni roha.

Antong, boha do asa las rohanta, sonang ngolunta? Marhite pangajarion na pinasahat ni Jesus tu angka siseanNa nang tu angka natorop laos diajari do hita laho mangauhon jala mangeahi las ni roha di ngolunta. Ndada holan las ni roha na sangombas manang las ni roha parsatongkinan. Alai tung las ni roha na tutu jala na manontong do na naeng sahat tu hita. I do na boi idaonta marhite turpuk on. Molo tajaha turpuk on pola sia hali disurathon hata “martua” dung i diuduti muse marhite sada hata “las ma rohamuna” jala sada hata “marolopolop”. Aha do na naeng dohononna disi? Impola ni jamita on laho manogunogu hita ndada holan asa marlas ni roha dohot marolopolop, alai lobi sian i ima asa martua. Hata martua di turpuk on martudutudu tu las ni roha na sintong jala na manontong, ndada las ni roha parsatongkinan manang las ni roha sangombas. Molo dihajolmaon, termasuk di halak Batak, jotjot do ojahan ni las ni roha ima hamoraon, hagabeon dohot hasangapon, hape andul do na masa molo tajaha turpuk on. Angka na pogos tondi, na marsak, na lambok, na mauas male, na asi roha, parroha na ias, sibahen dame jala na pinaburuburu alani hatigoran, nasida do na manjalo tua dohot pasupasu nang manjalo las ni roha dohot olopolop na manontong. Maol do i siat tu rohanta, molo pingkiranta do tapangasahon alai talup do hita mangantusi i jala mangauhon i molo Tuhan i na tapangasahon.

Lima sian sia hali hata martua na dipatorang marhahonaan do tu harajaon banua ginjang (ay. 3,10) dohot marhahonaan tu Debata (ay. 8,9) jala marhahonaan tu Jesus (ay. 11). Udut tusi hata “las ma rohamuna” jala hata marolopolop tong do marhahonaan tu banua ginjang (ay. 12). Tontu ndang na mandok, opat hata martua na asing i ndang adong hahonaanna tu harajaon banua ginjang manang marhahonaan tu Debata. Aha na naeng dohononna disi? Haporseaon dohot parsaoranta tu Tuhan i do na gabe ojahan ni las ni roha na manongtong jala na sintong. Alani i, ringkot situtu do tubu roha na marsitutu mangihuthon Jesus jala manghaporseai Ibana asa dipatau Tuhan i hita gabe halak na martua jala tarpasupasu. Haporseaonta tu Tuhan i do na mambahen hita gabe halak na martua jala na tarpasupasu.

Sian hajolmaon tontu ndang tuk hita marlas ni roha molo pogos hita jala molo marsak, mauas, male tahilala. Sian pardagingonta tontu ndang talup hita hita marolopolop molo dipaburuburu halak hita jala diinsahi. Alai molo tahaporseai do Tuhan, pos rohanta di holongNa dohot huasoNa na tuk mangurupi jala mandongani hita disaluhut hamaolon na masa di ngolunta, tontu talup do hita ndada holan marlas ni roha jala marolopolop alai lobian sian i dope gabe halak na martua ma hita jala tarpasupasu di adopan ni Debata. Molo ndang mian di hita haporseaon tu Tuhan i manang aha pe na adong di hita (hamoraon, hagabeon, hasangapon dohot lan angka na asing dope) ndang tuk i gabe patubu las ni roha ni ngolunta. Alai molo dibagasan haporseaon dohot hasintongan ni Debata do talului angka na ringkot di ngolunta on, tontu patubu las ni roha do i di hita dohot pasupasu. Unang ma tu na hurang i tartuju simalolong ni pardagingonta nang simalolong ni partondionta, alai tu banua ginjang i ma nian (tu asi ni roha dohot huaso ni Tuhan i ma nian), asa unang tarambat las ni rohanta dohot olopolopta alai asa tongtong martua jala tarpasupasu hita di ngolunta.