Khotbah Matius 9: 27-31 "Bila Kuberseru, Engkau Menjawab"

Minggu Invokavit, 1 Maret 2020

9:27 Ketika Yesus meneruskan perjalanan-Nya dari sana, dua orang buta mengikuti-Nya sambil berseru-seru dan berkata: "Kasihanilah kami, hai Anak Daud."

9:28 Setelah Yesus masuk ke dalam sebuah rumah, datanglah kedua orang buta itu kepada-Nya dan Yesus berkata kepada mereka: "Percayakah kamu, bahwa Aku dapat melakukannya?" Mereka menjawab: "Ya Tuhan, kami percaya."

9:29 Lalu Yesus menjamah mata mereka sambil berkata: "Jadilah kepadamu menurut imanmu."

9:30 Maka meleklah mata mereka. Dan Yesus pun dengan tegas berpesan kepada mereka, kata-Nya: "Jagalah supaya jangan seorang pun mengetahui hal ini."

9:31 Tetapi mereka keluar dan memasyhurkan Dia ke seluruh daerah itu.

9:27 Dung i laho ma Jesus sian i, jadi adong ma dua halak na mapitung mangihutihut Ibana, huhut gogo manjoujou: Ale Anak ni si Daud! Asi ma roham di hami!

9:28 Jadi laho bongot tu jabu i Jesus, didapothon angka na mapitung ondeng ma Ibana, gabe didok ma mandok nasida: Ai dihaporseai hamu do Ahu margogo patupahon i? Jadi didok nasida ma mandok Ibana: I do, Tuhan!

9:29 Gabe dijama ma matanasida huhut ma didok: Marguru tu haporseaonmuna ma jumpang hamu!

9:30 Jadi saut ma buha matanasida. Dung i gogo ma dipopai Jesus nasida, didok ma: Jaga ma hamu! So tung adong manang ise na umbotosa!

9:31 Alai laho do nasida, dipanghatahatahon ma Ibana tu sude nasida na saluat i.

Di turpuk on dipatorang panurat Evangelium ni si Matius do, na ro dua halak na mapitung paihutihut Jesus, huhut gogo manjoujou “Ale Anak ni si Daud! Asi ma roham dihami!”, joujou nasida mangido hamalumon asa boi nasida marnida. Ndang holan joujou angka na mapitung i tu Jesus alai didapothon nasida do Jesus tu jabu na di si. Tangkas didok di turpuk on, dung joujou nasida tu Jesus, laho nasida muse mandapothon Jesus tu bagas i. Marusaha do angka na mapitung i joujou jala mandapothon Jesus, gabe sada sitiruon do on tu angka na porsea. Ndang boi hape holan joujou hita tu Jesus, alai ingkon tadapothon do Ibana, asa boi hita pajumpang dohot Ibana di ngolunta. I do na niulahon na mapitung i, nang pe mapitung do na dua halak i, boi dohonon ala ndang boi marnida, sasintongna maol do mardalan, alai tong do didapothon nasida Jesus. Molo pajumpang hita dohot Ibana, di si do hita tangkas manghatahatai dohot Ibana taringot pengalaman ni ngolunta siganupari. Saonari ndang pajumpang secara fisik hita dohot Jesus, alai marhite Tondi Parbadia  do hita pajumpang dohot Ibana. Alani ingkon berusaha do hita, boha do asa tutu hita pajumpang dohot Jesus. Marhite tangiang, marhite na tumangihon hataNa, marhite na manjaha hataNa, marhite na mangulahon hataNa. Angka halak na sai martangiang, alai ndang hea mangulahon hataNa, ndang tutu pajumpang i dohot Jesus. Angka halak na holan joujou alai ndang olo pajumpang dohot Jesus, tontu ndang hea ibana manghatahatai dohot Tuhan Jesus.

Aha do joujou ni angka na mapitung i tu Jesus? Na parjolo, diongkui jala dihaporseai nasida, na Anak ni si Daud do Jesus (ay. 27). Diboto nasida, na marhuaso do Jesus songon pinompar ni si Daud pamalum nasida. Ai dibege basida do barita ni Jesus songon pinompar ni si Daud, Ibana do Mesias na ro i, na marhuaso mangalehon hamalumon nang angka halongangan tu angka na dangol, na marsahit dohot tu angka na pogos. Na paduahon, didok nasida tu Jesus, asi ma rohaM di hami. Hata i laho patuduhon haserepon ni rohanasida, asa marasi roha Jesus tu nasida. Pandohan nasida i, patuduhon pangalaho (sikap) na mangelek Jesus, asa marasiroha Jesus pamalumhon simalolong nasida. Gombaran do di hita, asa dibagasan haserepon ni roha hita molo joujou tu Jesus. Halak na joujou tu Jesus naeng ma dibagasan serep ni roha, mananda diri di jolo ni Debata, na sisoada do hita, na mansai lea do hita di jolona, jala holan asi ni rohaNa do na tapangasahon asa dialusi joujounta. Ndang dialusi Tuhan i joujou ni halak na ginjang marroha, na so olo mananda diri, na mamaksahon hagiot, na so mangasahon asi ni roha ni Tuhan i. Alai, ditangihon Tuhan i do joujou ni halak na serep marroha, na mananda diri di jolo ni Tuhan i, jala na mangasahon asi ni rohaNa. Songon goar ni Minggunta sadari on Invocavit na marlapatan, jouonna ma Ahu, jala alusangKu ma ibana.

Di na pajumpang dua halak na mapitung i dohot Jesus, disungkun Jesus do nasida, “Ai dihaporseai hamu do Ahu margogo patupahon i? Sungkunsungkun ni Jesus tu nasida mangondolhon, porsea do nasida na boi do Jesus pamalum nasida manang ndang? Porlu do alus nasida begeon ni Jesus, songon sada panindangion na marsitutu do haporseaon nasida di Tuhan Jesus manang ndang di jolo ni natorop i. Sasintongna nunga diboto Jesus na di bagasan rohanasida, alai panindangion marhite pamangan, di jolo ni natorop na marnida panghataion nasida dohot Jesus, porlu do i, laho pahothon haporseaon nasida di Tuhan Jesus. Dung i dialusima sungkunsungkun ni Jesus i, “I do Tuhan”. Alus nasida tu sungkunsungkun ni Jesus mandok na tutu do porsea nasida, na tarpatupa Jesus pamalum simalolong nasida. Pengakuanta di huaso ni Tuhan Jesus mansai porlu di ngolunta. Ingkon jumolo hita porsea na marhuaso Debata pamalum angka sahitta, na margogo do Debata mangurupi hita di angka hamaolon na taadopi. Ndang marlapatan joujou hita tu Tuhan i, molo so porsea hita di huasoNa. Marisuang do joujou hita tu Debata molo ndang tahaporseai huasoNa. Molo porsea hita di hataNa, manjadi do sude na nidok ni Debata di ngolunta. Alani do didok di ayat 29, “Gabe dijama ma mata nasida huhut ma didok: Marguru tu haporseaonmuna ma jumpang hamu”. Haporseaon nasida tu huaso ni Jesus mambahen malum nasida. Ndang mapitung simalolong pardagingonta, alai boi do ndang marnida (mapitung) mata ni haporseaon. Boi do gabe marnida mata ni haporseaonta molo tahaporseai huaso ni Debata boi pahisar haporseaonta. Sude sahit di pardagingon nang partondion boi do dipamalun hombar tu haporseaonta di Ibana. Alani do haporseaonta i do na gabe dalan laho manjalo huaso ni Debata asa mangula huasoNa di ngolunta. Sian dia do ro haporseaonta i? Sian Debata sambing, ai asi ni roha silehonlehon na sian Debata sambing do i (1 Kor. 12: 9). Molo dilehon Debata tu hita haporseaon, naeng tatiop haporseaonta i unang mago sian dirinta. Ai molo so adong be di hita haporseaon, tontu ndang margogo be hita di ngolunta on, ai gabe so adong be na boi tapangasahon manjangkon hata ni Debata jala mangulahon.

Di ayat 31 didok, “Alai laho do nasida, dipanghatahatahon ma Ibana tu sude nasida na saluat i”. Hape nunga didok Jesus tu nasida asa jaga nasida unang adong manang ise na umbotosa. Na gabe sungkunsungkun di hita, boasa diorai Jesus asa jaga nasida unang dipahatahata nasida tu manang ise pambahenan ni Jesus tu nasida? Alai boasa gabe dibaritahon nasida pambahenan ni Jesus tu na saluat i, hape nunga diorai Jesus? Jala boasa diorai Jesus nasida? Ala situasi hatiha i, na masai godang halak na so marlomo ni roha di angka halongangan nang tanda na pintupa ni Jesus. Ai godang dope naeng ulahonon ni Jesus hatiha i, ai molo lam godang halak na mangambati ulaonNa tontu lam maol do Ibana mangula ulaonNa. Alani i do didok, asa unang dipaboaboa tu halak, ai ndang naeng mangalului popularitas Jesus marhite angka halongangan na binahenNa. I do na jinaga ni Jesus asa unang pola dipaboaboa tu halak angka na binaheNa. Alai sude pambahenan ni Jesus tong do ingkon sar baritana tu na saluat i, gabe diboto na saluat i do pambahenan ni Jesus pamalum na mapitung i. I ma gombaran angka haak naung manjalo asi ni roha ni Debata di ngoluna, secara spontan pasti do mamaritahon angka pambahenan ni Debata di ngoluna, gabe tarbarita jala marsangap Debata. Molo tahilala do asi ni roha ni Debata di ngolunta, tabaritahon ma i tu angka na humaliang marhite hata nang pambahenan, asa gabe sude halak mamuji pasangaphon Debata.